TÀN 101
È Hu Jezu
KPƆ́N nǔ baɖabaɖa e jɛ é! È hu Jezu. Ye sɔ́ ɛ ɖó atín wu, bo xwè hunjɛ́n dó alɔ tɔn lɛ kpo afɔ tɔn lɛ kpo mɛ. Etɛwu ye ka wà mɔ̌ nú Jezu?
Mɛɖé lɛ gbɛ́ wǎn n’i wu wɛ. A ka tuùn mɛ lɛ à? Wɛnsagun nyanya e nɔ nyí Sataan Awovi é ɖò mɛ lɛ mɛ. É wɛ sísɛ́ Adamu kpo Ɛva kpo, bɔ ye tlitó nú Jehovah. Sataan wɛ lɛ́ sísɛ́ kɛntɔ́ Jezu tɔn lɛ, bɔ ye dó nǔ baɖabaɖa enɛ sìn.
Cobonu kɛntɔ́ Jezu tɔn lɛ na xwè é dó atín wu ɔ, ye dó nǔ baɖabaɖa gègě sìn xá ɛ hwɛ̌. A ka flín lee ye wá jikpá Jɛsemanɛ tɔn mɛ, bo wlí i gbɔn é à? Mɛ̌ ka nyí kɛntɔ́ enɛ lɛ? Sinsɛngán lɛ wɛ. Mi nú mǐ ni kpɔ́n nǔ e jɛ bɔ d’ewu lɛ é.
Ee sinsɛngán lɛ wlí Jezu é ɔ, mɛsɛ́dó tɔn lɛ hɔn. Ye jó Jezu ɖokponɔ dó nú kɛntɔ́ tɔn lɛ, ɖó xɛsi ɖi ye. Amɔ̌, mɛsɛ́dó Piyɛɛ kpo Jaan kpo hɔn yì zɔ dín ǎ. Ye jɛ mɛ lɛ gudo bo ɖò nǔ e na jɛ dó Jezu wu é kpɔ́n sɛ́dó wɛ.
Vɔsanúxwlémawutɔ́ lɛ kplá Jezu yì Ana gɔ́n. Nya enɛ ko nyí vɔsanúxwlémawutɔ́ ɖaxó kpɔ́n. Togun ɔ nɔ finɛ dín ǎ. Enɛ gudo ɔ, ye kplá Jezu yì Kayifu e nyí vɔsanúxwlémawutɔ́ ɖaxó hwenɛnu é xwé. Sinsɛngán gègě ko kplé ɖò xwé tɔn gbè.
Kayifu xwé wɛ ye ɖɔ hwɛ Jezu tɔn ɖè. Ye kplá mɛ lɛ wá, bonu ye na ɖó adingban dó Jezu kɔ. Sinsɛngán lɛ bǐ ɖɔ: ‘Jezu ɖó na kú.’ Enɛ gudo ɔ, ye tún atán dó nukún tɔn mɛ, bo xò tomɛ n’i.
Hwenu e nǔ enɛ lɛ bǐ ɖò jijɛ wɛ é ɔ, Piyɛɛ ɖò kɔxo ɔ ta. Avivɔ ɖé gbɛ́ zǎn ɔ mɛ hwenɛnu, enɛ wu ɔ, mɛɖé lɛ bɔ myɔ bo lɛlɛ̌ dó. Ee ye ɖò myɔ ɔ xú wɛ é ɔ, deví nyɔnu ɖé mɔ Piyɛɛ bo ɖɔ: ‘Nya elɔ lɔ nɔ xwedó Jezu.’
Piyɛɛ ka ɖɔ: ‘Gbeɖé kpɔ́n!’
Azɔn atɔn wɛ mɛ lɛ ɖɔ ɖɔ Piyɛɛ lɔ nyí ahwanvu tɔn. Ye ko ɖɔ mɔ̌ hweɖebǔnu ɔ, Piyɛɛ nɔ gbɛ́. Azɔn atɔngɔ e Piyɛɛ gbɛ́ é ɔ, Jezu lilɛ bo kpɔ́n ɛ sɛ́dó. Adingban e Piyɛɛ ɖó lɛ é vɛ́ n’i kaka, bɔ é gosin finɛ bo wlí avǐ.
Axɔsuzángbe zǎnzǎn tɛɛn ɔ, vɔsanúxwlémawutɔ́ lɛ kplá Jezu yì Hwɛɖɔxɔsa Ðaxó Jwifu lɛ tɔn. Ye jɛ nǔ e ye na wà nú Jezu é xó ɖɔ jí ɖò finɛ. Ye kplá ɛ yì tokpɔngán Judee tɔn Pɔnsu Pilatu gɔ́n.
Vɔsanúxwlémawutɔ́ lɛ ɖɔ nú Pilatu ɖɔ: ‘Mɛ baɖabaɖa wɛ n’i. È ɖò na hu i.’ Ee Pilatu kàn nǔ byɔ Jezu gudo é ɔ, é ɖɔ: ‘Un mɔ hwɛ ɖé ɖò kɔ nú nya elɔ ǎ.’ Enɛ gudo ɔ, Pilatu sɛ́ Jezu dó Elodu Antipasi gɔ́n. Elodu wɛ ɖò axɔsu ɖu wɛ ɖò Galilee, amɔ̌, é ɖò Jeluzalɛmu hwenɛnu. Elodu lɔ mɔ ɖɔ Jezu kún wà nǔ nyanya ɖě ó, enɛ wu ɔ, é lɛkɔ n’i sɛ́dó Pilatu gɔ́n.
Pilatu ba na ɖè Jezu nyite. Amɔ̌, kɛntɔ́ Jezu tɔn lɛ jló ɖɔ è ni ɖè ajotɔ́ axansunxo e nɔ nyí Balabasi é nyite ɖó Jezu tɛnmɛ. Ee gan wěwè mɔ̌ ɖò xixo wɛ é ɔ, Pilatu ɖè Jezu tɔ́n. É ɖɔ nú togun ɔ ɖɔ: ‘Axɔsu mitɔn ɖíe!’ Amɔ̌, vɔsanúxwlemawutɔ́gán lɛ súxó bo ɖɔ: ‘Mi hu i! Mi hu i!’ Enɛ wu ɔ, Pilatu ɖè Balabasi nyite, bo jó Jezu, bɔ ye kplá ɛ yì huhu gbé.
Hwe jɛ kɔ lɛ́ jí kɛɖɛ ɖò Axɔsuzángbe é ɔ, ye xwè Jezu dó atín wu. Ye lɛ́ xwè danuwatɔ́ wè dó atín wu ɖò ɖisi kpo amyɔ kpo n’i. Yedɛɛ lɛ ɖò ɖiɖe ɔ mɛ ǎ. Kú Jezu tɔn kpò cɛju yɔywɛ ɖé é ɔ, danuwatɔ́ lɛ ɖokpo ɖɔ n’i ɖɔ: ‘Flín mì hwenu e a na wá ɖu axɔsu é.’ Jezu yí gbè n’i ɖɔ: ‘Un d’akpá nú we ɖɔ a na wá nɔ xá mì ɖò Palaɖisi mɛ.’
Akpá enɛ jiwǔ à cé? A ka tuùn palaɖisi e xó ɖɔ wɛ Jezu ɖè é à? Fitɛ palaɖisi e Mawu bló ɖò bǐbɛ̌mɛ é ka nɔ? Ayikúngban jí wɛ. Hwenu e Jezu na jɛ axɔsu ɖu dó ayikúngban ɔ jí jí é ɔ, é na fɔ́n nya enɛ sín kú, bɔ é na ɖu gbɛ̀ víví ɖò Palaɖisi ɔ mɛ. Nǔ enɛ ɖó na hun xomɛ nú mǐ à cé?
Matie 26:57-75; 27:1-50; Luka 22:54-71; 23:1-49; Jaan 18:12-40; 19:1-30.