TÀN 102
Jezu Ðò Gbɛ̀
AKA tuùn nyɔnu enɛ kpo sunnu wè enɛ lɛ kpo à? Mali Madalanu wɛ nyí nyɔnu ɔ. Ahwanvu Jezu tɔn wɛ. Sunnu e dó awu wewé lɛ é ɔ, wɛnsagun wɛ nú ye. Xɔ kpɛví e mɛ kpɔ́n wɛ Mali ɖè é wɛ è ɖi Jezu dó. Amɔ̌, cyɔ Jezu tɔn sɔ́ ɖò finɛ ǎ! Mɛ̌ ka zé é sín finɛ? Mǐ ni ba dò na.
Ee Jezu kú gudo é ɔ, vɔsanúxwlémawutɔ́ lɛ ɖɔ nú Pilatu ɖɔ: ‘Hwenu e Jezu ɖò gbɛ̀ é ɔ, é ɖɔ emi na fɔ́n azǎn tɔn atɔngɔ ɔ gbè. Enɛ wu ɔ, nǎ gbè bonu è na cɔ́ yɔdo ɔ. É ma nyí mɔ̌ ǎ ɔ, ahwanvu tɔn lɛ taa wá yí fin cyɔ tɔn sɔ́, bo na ɖɔ é ko fɔ́n sín kú!’ Pilatu ɖɔ nú vɔsanúxwlémawutɔ́ lɛ ɖɔ ye ni sɛ́ sɔja lɛ dó bonu ye ni cɔ́ yɔdo ɔ.
Amɔ̌, Jezu kú bɔ é jɛ azǎn tɔn atɔngɔ ɔ gbè ayitéhɔnnu é ɔ, wɛnsagun Jehovah tɔn ɖé wá xwetɔ́n ajijimɛ. É blí awinnya ɔ sín yɔdo ɔ nu. Xɛsi jɛ sɔja lɛ jí kaka, bɔ ye sixu danwǔ ǎ. Ee ye wá kpɔ́n yɔdo ɔ mɛ é ɔ, ye sɔ́ mɔ cyɔ ɔ ǎ! Sɔja ɖé lɛ yì toxo ɔ mɛ, bo wlí nǔ e jɛ lɛ é ɖɔ nú vɔsanúxwlémawutɔ́ lɛ. A ka tuùn nǔ e nùbaɖabaɖa enɛ lɛ bló é à? Ye na akwɛ sɔja lɛ nú ye ni ɖó adingban bo ɖɔ: ‘Hwenu e mǐ ɖò amlɔ dɔ wɛ zǎnmɛ é ɔ, ahwanvu tɔn lɛ wá fin cyɔ tɔn sɔ́.’
Hwenɛnu ɔ, ahwanvu Jezu tɔn nyɔnu ɖé lɛ yí kpɔ́n yɔdo ɔ. Ee ye mɔ yɔdo ɔ ɖò vɔ̌ é ɔ, é kpaca ye tawun. Tlolo ɔ, wɛnsagun wè wá xwetɔ́n, bo dó avɔ e ɖò kínkɔ́n wɛ é. Ye kanbyɔ nyɔnu lɛ ɖɔ: ‘Etɛwu mi ka ɖò Jezu ba wɛ ɖò fí? É ko fɔ́n sín kú. Mi kanwezun bo yì ɖɔ mɔ̌ nú ahwanvu tɔn lɛ.’ Kpɔ́n lee nyɔnu enɛ lɛ na ko kanwezun sɔ é! Amɔ̌, nya ɖé ɖó ye te ɖò ali ɔ jí. A ka tuùn nya e wɛ é à? Jezu wɛ! É ɖɔ nú ye ɖɔ: ‘Mi yì bo yì ɖɔ mɔ̌ nú ahwanvu ce lɛ.’
Ee nyɔnu lɛ ɖɔ nú ahwanvu Jezu tɔn lɛ ɖɔ emi mɔ ɛ bɔ é ɖò gbɛ̀ é ɔ, ye ɖi ǎ. Piyɛɛ kpo Jaan kpo kanwezun yì kpɔ́n yɔdo ɔ. Nugbǒ ɔ, é ko ɖò vɔ̌! Ee Piyɛɛ kpo Jaan kpo lɛkɔ é ɔ, Mali Madalanu cí finɛ. Hwenɛnu wɛ é kpɔ́n yɔdo ɔ mɛ, bo mɔ wɛnsagun wè lɛ.
Mawu bló nùjiwǔ bɔ cyɔ Jezu tɔn bú. É fɔ́n ɛ dó agbaza e mɛ é kú dó é ǎ. É na ɛ agbaza yɔyɔ̌ ɖevo. Agbaza jixwé tɔn e wɛnsagun lɛ ɖó é ɖɔhun wɛ. Amɔ̌, bonu é na xlɛ́ ahwanvu tɔn lɛ ɖɔ emi ɖò gbɛ̀ ɔ, é nɔ zé agbaza gbɛtɔ́ tɔn dó. Mǐ na wá kplɔ́n nǔ d’ewu.
Matie 27:62-66; 28:1-15; Luka 24:1-12; Jaan 20:1-12.