TÀN 106
È Ðè Ye Tɔ́n Sín Gankpa Mɛ
KPƆ́N wɛnsagun e ɖò gankpa ɔ sín hɔn hun wɛ é. Mɛsɛ́dó Jezu tɔn lɛ ɖé nyite wɛ é ɖè. Mǐ ni ba dò nú nǔ e wu ye wá tɔ́n ɖò gankpa mɛ é.
Gbigbɔ mímɛ́ jɛ ahwanvu Jezu tɔn lɛ jí é ɔ, é lín ǎ bɔ nùɖé jɛ. Piyɛɛ kpo Jaan kpo xwè tɛmpli mɛ ɖò Jeluzalɛmu hwelɛkɔ gbè ɖokpo. Nya ɖé ka tíìn, bo kú sé sín hwenu e è jì i é, bo ɖò tɛmpli ɔ sín hɔn kpá. Mɛ lɛ nɔ sɔ́ ɛ wá finɛ ayihɔngbe ayihɔngbe, bonu é na byɔ akwɛ mɛ e nɔ wá tɛmpli ɔ mɛ lɛ é. Ee é mɔ Piyɛɛ kpo Jaan kpo é ɔ, é savo nú ye ɖɔ ye ni na nùɖé emi. Etɛ mɛsɛ́dó lɛ ka na wà?
Ye nɔte bo kpɔ́n nya ɔ. Piyɛɛ ɖɔ: ‘Un ɖó akwɛ ǎ, amɔ̌, un na na nǔ e un ɖó é we. Ðò Jezu sín nyikɔ mɛ ɔ, site bo ɖi zɔnlin!’ Piyɛɛ hɛn nya ɔ sín alɔ ɖisi ɔ, bɔ é lɔ́n xwete bo jɛ zɔnlin ɖi jí tlolo. Ee togun ɔ mɔ nùjiwǔ enɛ é ɔ, é kpaca ye, bɔ xomɛ lɛ́ hun ye.
Piyɛɛ ɖɔ: ‘Mawu e fɔ́n Jezu sín kú é wɛ na hlɔnhlɔn e mǐ dó bló nùjiwǔ enɛ na é mǐ.’ É kpo Jaan kpo ɖò xó ɖɔ wɛ kɛɖɛ bɔ sinsɛngán ɖé lɛ wá xwetɔ́n. Fínfɔ́n sín kú Jezu tɔn sín xó e ɖɔ nú togun ɔ wɛ Piyɛɛ kpo Jaan kpo ɖè é sìn xomɛ nú ye. Enɛ wu ɔ, ye wlǐ ye dó gankpa mɛ.
Ayihɔngbe tɔn ɔ, sinsɛngán lɛ bló kplé gɛnnyigɛnnyi ɖé. È kplá Piyɛɛ, Jaan kpo nya e ye gbɔ azɔn na é kpo wá nukɔn yetɔn. Sinsɛngán lɛ kanbyɔ ye ɖɔ: ‘Mɛ sín acɛ mɛ wɛ mi ka bló nùjiwǔ enɛ ɖè?’
Piyɛɛ ɖɔ nú ye ɖɔ Mawu e fɔ́n Jezu sín kú é wɛ na hlɔnhlɔn enɛ emi. Vɔsanúxwlémawutɔ́ lɛ sɔ́ tuùn nǔ e ye na wà é ǎ, ɖó ye sixu gbɛ́ ɖɔ nùjiwǔ enɛ kún jɛ ó ǎ. Enɛ wu ɔ, ye dó sɛ́n nú mɛsɛ́dó lɛ ɖɔ ye ni ma sɔ́ ɖɔ xó ɖò Jezu nyikɔ mɛ ɖě ó.
Mɛsɛ́dó lɛ ka ɖó kúnnuɖiɖe dó Jezu wu te ǎ. Ye nɔ lɛ́ ɖò azɔn gbɔ nú azinzɔnnɔ lɛ wɛ. Nùjiwǔ enɛ lɛ sín wɛn gbakpé fí bǐ. Enɛ wu ɔ, mɛ lɛ nɔ nyì ahwan sín toxo e lɛlɛ̌ dó Jeluzalɛmu lɛ é mɛ, bo nɔ kplá azinzɔnnɔ lɛ wá mɛsɛ́dó lɛ gɔ́n. Nǔ enɛ zɔ́n bɔ sinsɛngán lɛ jɛ wǔ hwan jí, lobo wlí mɛsɛ́dó lɛ dó gankpa mɛ. Amɔ̌, ye nɔ finɛ dín ǎ.
Wɛnsagun Mawu tɔn wá hun gankpa ɔ sín hɔn nú ye zǎnmɛ, lee mɔ gbɔn wɛ a ɖè ɖò ɖiɖe ɔ mɛ é. Wɛnsagun ɔ ɖɔ: ‘Mi yì tɛmpli ɔ mɛ, bo ma ɖó yɛhwexóɖiɖɔ te ó.’ Ayihɔngbe tɔn zǎnzǎn ɔ, sinsɛngán lɛ sɛ́ mɛ dó ɖɔ è ni kplá mɛsɛ́dó lɛ sín gankpa ɔ mɛ wá. Ye ɖě ka sɔ́ ɖò finɛ ǎ. Mɛ lɛ wá yì mɔ ye ɖò nǔ kplɔ́n mɛ wɛ ɖò tɛmpli ɔ mɛ, bo kplá ye wá Hwɛɖɔxɔsa Ðaxó Jwifu lɛ tɔn.
Sinsɛngán lɛ ɖɔ: ‘Mǐ ko dó sɛ́n nú mi syɛnsyɛn ɖɔ mi ma sɔ́ kplɔ́n nǔ mɛ ɖě ɖò Jezu nyikɔ mɛ ó. Enɛ nùkplɔnmɛ mitɔn ka gbakpé Jeluzalɛmu nɛ.’ Mɛsɛ́dó lɛ ka ɖɔ: ‘Mǐ ɖó na setónú nú Mawu gǎn ɖɔhun; é nyɔ́ hú ɖɔ mǐ ni setónú nú gbɛtɔ́ lɛ.’ Enɛ wu ɔ, ye ɖó “wɛnɖagbe” ɔ jijla te ǎ. Kpɔ́ndéwú ɖagbe wɛ nyí enɛ, bɔ mǐ na xwedó à cé?