TÀN 107
È Hu Etyɛni
ETYƐNI wɛ nyí nya e ɖò kpolijijɛ finɛ é. Ahwanvu gbejinɔtɔ́ Jezu tɔn ɖé wɛ. Amɔ̌, kpɔ́n nǔ e ɖò jijɛ dó wutu tɔn wɛ é! Mɛ enɛ lɛ ɖò awinnyaglo nyì dó é wɛ. Etɛwu ye ka gbɛ́ wǎn nú Etyɛni sɔmɔ̌, bo ɖò nǔ baɖabaɖa enɛ dosin xá ɛ wɛ? Mǐ ni kpɔ́n.
Mawu d’alɔ Etyɛni, bɔ é nɔ bló nùjiwǔ gègě. Nǔ enɛ ka nyɔ́ mɛ enɛ lɛ nukún mɛ ǎ. Enɛ wu ɔ, ye jɛ nǔ dɔn xá ɛ dó nugbǒ e é nɔ kplɔ́n togun ɔ é wu jí. Amɔ̌, Mawu na nùnywɛ ɖaxó Etyɛni, bɔ é xlɛ́ mɛ enɛ lɛ ɖɔ nùkplɔnmɛ yedɛɛ lɛ tɔn kún nyí nugbǒ ó. Enɛ lɛ́ dó xomɛsin xomɛ nú ye d’eji. Enɛ wu ɔ, ye wlǐ Etyɛni, bo ba mɛ lɛ bɔ ye ɖó adingban dó kɔ n’i.
Vɔsanúxwlémawutɔ́ ɖaxó ɔ kanbyɔ Etyɛni ɖɔ: ‘Nugbǒ wɛ nyí xó enɛ lɛ à?’ Etyɛni ka sɔ́ xóɖiɖɔ junjɔn Biblu jí ɖagbe ɖé xwlé ye, bo dó yí gbè n’i. Bo na dó fó ɔ, é ɖɔ lee mɛ baɖabaɖa lɛ gbɛ́ wǎn nú gbeyiɖɔ Jehovah tɔn lɛ gbɔn ɖò hwexónu é. Enɛ gudo ɔ, é ɖɔ: ‘Ye wɛ mi ɖi. Mi hu Jezu, deví Mawu tɔn ɔ. Mi setónú nú sɛ́n Mawu tɔn lɛ ǎ.’
Nǔ nɛ ɔ sìn xomɛ nú sinsɛngán lɛ ɖesu! Ye jɛ aɖukún ɖu jí. Amɔ̌, Etyɛni kpɔ́n jixwé bo ɖɔ: ‘Mi kpɔ́n! Un mɔ̌ Jezu ɖò te ɖò ɖisixwé nú Mawu.’ Ee ye sè mɔ̌ é ɔ, ye sú tó yetɔn lɛ, bo zɔn Etyɛni jí. Ye wlǐ i, bo dɔn ɛ yì toxo ɔ gudo.
Mɛɖé lɛ ɖò finɛ bo ɖè awu yetɔn lɛ, bo zɔ́n hinhɛn nyaví e nɔ nyí Solu é. A ka mɔ Solu ɔ ɖò ɖiɖe ɔ mɛ à? Enɛ gudo ɔ, ye jɛ awinnyaglo nyì dó Etyɛni jí. Etyɛni jɛkpo, bo xoɖɛ sɛ́dó Mawu bo ɖɔ: ‘Jehovah, ma dɔn tó nú ye ɖó nǔ baɖabaɖa elɔ wu ó.’ Etyɛni tuùn ɖɔ sinsɛngán lɛ wɛ ɖò mɛɖé lɛ hɛn bú wɛ ɖò ye mɛ. Enɛ gudo ɔ, Etyɛni bɔnu.
Enyi mɛɖé jɛ agɔ dó we ɔ, a nɔ tɛnkpɔn bo na ba hlɔn, alǒ byɔ ɖɔ Mawu ni ba hlɔn wɛ à? Etyɛni kpo Jezu kpo wà mɔ̌ ǎ. Ye nyɔ́ xomɛ dó mɛ e ma tlɛ nyɔ́ xomɛ dó ye wu ǎ lɛ é wu. Mi nú mǐ ni dó gǎn, bo na xwedó afɔdomɛ yetɔn.