TÀN 110
Timɔtée, Alɔdomɛtɔ́ Yɔyɔ̌ Pɔlu Tɔn
TIMƆTÉE wɛ nyí nyaví dɔnkpɛvu e mɔ wɛ a ɖè ɖò finɛ kpo mɛsɛ́dó Pɔlu kpo é. É kpo xwédo tɔn kpo nɔ nɔ Lisitili. Nɔ tɔn nɔ nyí Enisi, bɔ nɔ tɔn sín nɔ nɔ nyí Loyisi.
Azɔn atɔngɔ ɔ nɛ Pɔlu ɖò Lisitili wá wɛ nɛ. Nukɔntɔn ɔ, é kpo Banabasi kpo wɛ ɖò “wɛnɖagbe” ɔ jla wɛ bo wá finɛ. É ko ɖò xwè ɖokpo mɔ̌ ɖó wɛ. Pɔlu lɛkɔ wá finɛ kpo xɔ́ntɔn tɔn Silasi kpo.
A ka tuùn xó e ɖɔ nú Timɔtée wɛ é ɖè é à? É ɖɔ n’i ɖɔ é ni xwedó emi kpo Silasi kpo, bonu ye na yí jla “wɛnɖagbe” ɔ gbɔn tò línlín lɛ mɛ.
Timɔtée yí gbè, bɔ hwenu kpɛɖé gudo ɔ, é jó mɛ tɔn lɛ dó, bo xwedó Pɔlu kpo Silasi kpo. Amɔ̌, cobonu mǐ na ɖɔ xó dó tomɛyiyi yetɔn wu ɔ, nùɖé jɛ dó Pɔlu wu bɔ mǐ na tó kpɔ́n.
Jezu sɔ́ éɖee xlɛ́ Pɔlu ɖò Damasi li jí é ɔ, é ko ɖò xwè 17 mɔ̌ ɖó wɛ nɛ. Ahwanvu Jezu tɔn lɛ doya na gbé wɛ Pɔlu xwè ɖò Damasi. Amɔ̌ dìn ɔ, elɔ mɔ̌ ko huzu ahwanvu! Gudo mɛ ɔ, kɛntɔ́ ɖé lɛ bla gbě bo na hu Pɔlu, ɖó ye gbɛ́ wǎn nú nǔ e é nɔ kplɔ́n mɛ dó Jezu wu é. Amɔ̌, ahwanvu lɛ d’alɔ Pɔlu, bɔ é hɔn. Ye sɔ́ ɛ dó xasun mɛ, bo sɔ́ ɛ nyite gbɔn dǒ toxo ɔ tɔn ta.
Enɛ gudo ɔ, Pɔlu yì ɖɔ yɛhwexó ɖò Antyɔci. Finɛ wɛ è ylɔ ahwanvu Jezu tɔn lɛ ɖɔ Klisanwun ɖè dó nukɔn. È wá sɛ́ Pɔlu kpo Banabasi kpo dó, bɔ ye gosin Antyɔci bo yí jla “wɛnɖagbe” ɔ gbɔn tò línlín lɛ mɛ. Toxo e mɛ ye yì lɛ é ɖokpo nɔ nyí Lisitili. Finɛ wɛ Timɔtée nɔ nɔ.
Xwè ɖokpo mɔ̌ gudo ɔ, Pɔlu lɛkɔ wá Lisitili ɖò tomɛyiyi tɔn wegɔ ɔ hwenu. Ee Timɔtée xwedó Pɔlu kpo Silasi kpo é ɔ, a ka tuùn fí e ye gbɔn lɛ é à? Kpɔ́n ɖiɖe tò tɔn (carte) ɔ, bonu mǐ ni kpɔ́n fí ɖé lɛ.
Ikoniyɔmu ya dó Lisitili bɔ ye tó yì finɛ hwɛ̌. Toxo wegɔ e mɛ ye yì é nɔ nyí Antyɔci. Enɛ gudo ɔ, ye yì Tolowasi, lobo wá yì Filipu, Tɛsaloniki kpo Belee kpo. A ka mɔ Atɛni ɖò ɖiɖe tò tɔn ɔ mɛ à? Pɔlu ɖɔ yɛhwexó ɖò fí enɛ lɔ. Enɛ gudo ɔ, ye nɔ Kolɛnti nú xwè ɖokpo adaɖé bo jla “wɛnɖagbe” ɔ. Gudo mɛ ɔ, ye nɔ Efɛzi kpɛɖé, lobo dó tɔjihun lɛkɔ wá Sezalee. Ye wá yì Antyɔci, bɔ Pɔlu cí finɛ.
Timɔtée d’alɔ Pɔlu bɔ ye bló kilomɛtlu kanweko donu mɔkpan, bo jla “wɛnɖagbe” ɔ, lobo lɛ́ ɖó agun Klisanwun tɔn gègě ayǐ. Enyi a sù ɔ, a ka na nyí deví gbejinɔtɔ́ nú Mawu Timɔtée ɖɔhun à?
Mɛsɛ́dó 9:19-30; 11:19-26; wemata 13 jɛ 17; 18:1-22.