TÀN 113
Pɔlu Ðò Hlɔma
KPƆ́N Pɔlu ɖò wlɔ mɛ, lɛ̌ kpɔ́n sɔja Hlɔma tɔn e ɖò cícɔ́ ɛ wɛ é. Pɔlu ɖò gan mɛ ɖò Hlɔma. Nǔ e Sezaa Hlɔma tɔn na wà n’i é nɔte kpɔ́n wɛ é ɖè. Hwenu e é ɖò gan mɛ é ɔ, è na gbè bɔ mɛ lɛ nɔ wá ba ɛ kpɔ́n.
Ee Pɔlu yì Hlɔma é ɔ, é dó wɛn sɛ́dó Jwifu nukúnɖeji lɛ azǎn tɔn atɔngɔ ɔ gbè ɖɔ ye ni wá kpɔ́n emi. Jwifu e ɖò Hlɔma lɛ é gègě wá kpɔ́n ɛ nugbǒ. Pɔlu ɖɔ yɛhwexó nú ye dó Jezu kpo axɔsuɖuto Mawu tɔn kpo wu. Mɛɖé lɛ ɖi nǔ bo huzu Klisanwun, amɔ̌, mɛ e kpò lɛ é ka ɖi nǔ ǎ.
Pɔlu lɛ́ ɖɔ yɛhwexó nú sɔja vovo e nɔ wá cɔ́ ɛ lɛ é. Xwè wè e Pɔlu nɔ gan mɛ na lɛ é ɔ, é ɖɔ yɛhwexó ɔ nú mɛ e é mɔ lɛ é bǐ. Ali enɛ ɔ nu wɛ hɛnnumɔ Sezaa tɔn lɛ sè wɛnɖagbe Axɔsuɖuto ɔ tɔn ɖè, bɔ mɛɖé lɛ huzu Klisanwun.
Mɛ̌ ka nyí jonɔ enɛ e ɖò nǔ wlan wɛ ɖò tavo tó é? Timɔtée wɛ. È ko wlí Timɔtée ɖesu dó gan mɛ, ɖó wɛnɖagbe Axɔsuɖuto ɔ tɔn jijla wu. Amɔ̌, è ko jó é. É wá finɛ bo na d’alɔ Pɔlu. A ka tuùn nǔ e wlan wɛ Timɔtée ɖè é à? Mi nú mǐ ni kpɔ́n.
A ka flín toxo Filipu kpo Efɛzi kpo tɔn e xó mǐ ɖɔ ɖò Tàn 110 gɔ́ ɔ mɛ é à? Pɔlu d’alɔ bɔ è ɖó agun Klisanwun tɔn ayǐ ɖò toxo enɛ lɛ mɛ. Ee é wá ɖò gan mɛ dìn é ɔ, é wlan wema sɛ́dó Klisanwun enɛ lɛ. Wema enɛ lɛ ɖò Biblu mɛ, bɔ è nɔ ylɔ ye ɖɔ Efɛzinu lɛ kpo Filipunu lɛ kpo. Nǔ e Timɔtée na wlan sɛ́dó xɔ́ntɔn yetɔn Klisanwun e ɖò Filipu lɛ é wɛ Pɔlu ɖò ɖiɖɔ n’i wɛ ɖò finɛ.
Filipunu lɛ nyɔ́ xomɛ dó Pɔlu wu tawun. Ye sɛ́ nǔ dó é hwenu e é ɖò gankpa mɛ é. Enɛ wu ɔ, Pɔlu ɖò kú dó nú ye wɛ. Epafloditi wɛ hɛn nùnina lɛ wá. Amɔ̌, é wá j’azɔn kaka bo ɖibla kú. É ko kpɔ́n te n’i dìn, bɔ é jló na sɔ́ xwé nú. É na sɔ́ wema e Pɔlu kpo Timɔtée kpo wlan é yì jó nú Filipunu lɛ.
Hwenu e Pɔlu ɖò gan mɛ é ɔ, é lɛ́ wlan wema wè ɖevo, bɔ ye lɔ ɖò Biblu mɛ. É sɛ́ ɖokpo dó Klisanwun e ɖò toxo Kolɔsi tɔn mɛ lɛ é. A ka tuùn lee è nɔ ylɔ wema enɛ ɖɔ é à? È nɔ ylɔ ɖɔ Kolɔsinu lɛ. É sɛ́ wegɔ ɔ dó xɔ́ntɔn tɔn vívɛ́ e nɔ nɔ Kolɔsi bo nyí Filemɔ é. Pɔlu ɖɔ xó dó deví Filemɔ tɔn e nɔ nyí Onɛzimu é wu ɖò wema enɛ mɛ.
Onɛzimu hɔn sín Filemɔ gɔ́n bo wá Hlɔma. É sè ɖɔ Pɔlu ɖò gan mɛ ɖò finɛ, bo yì ba ɛ kpɔ́n. Pɔlu ka ɖɔ yɛhwexó n’i. Zaan ɔ, Onɛzimu lɔ huzu Klisanwun. É wá vɛ́ nú Onɛzimu ɖɔ é hɔn sín Filemɔ gɔ́n. Enɛ wu ɔ, a ka tuùn nǔ e Pɔlu wlan sɛ́dó Filemɔ é à?
Pɔlu byɔ Filemɔ ɖɔ é ni sɔ́ hwɛ kɛ Onɛzimu. Pɔlu wlan ɖɔ: ‘Un lɛkɔ n’i sɛ́dó we. Amɔ̌ dìn ɔ, é sɔ́ nyí kannumɔ kɛɖɛ ǎ, nɔví vívɛ́ Klisanwun wɛ é lɛ́ nyí.’ Ee Onɛzimu lɛkɔ xwè Kolɔsi é ɔ, é hɛn wema wè lɛ yì: ɖokpo nyí Kolɔsinu lɛ tɔn, bɔ wegɔ ɔ nyí Filemɔ tɔn. Hwenu e Filemɔ mɔ nǔ jɛ wu ɖɔ deví emitɔn ko huzu Klisanwun é ɔ, kpɔ́n lee xomɛ na ko hun i sɔ́ é!
Hwenu e Pɔlu wlan wema sɛ́dó Filipunu lɛ kpo Filemɔ kpo é ɔ, é dó wɛnɖagbe ɖé ye. É ɖɔ sɛ́dó Filipunu lɛ ɖɔ: ‘Un ɖò Timɔtée sɛ́dó mi wɛ. Amɔ̌, nyɛɖesu na wá ba mi kpɔ́n zaanɖé dìn.’ É ka wlan sɛ́dó Filemɔ ɖɔ: ‘Blǒ xɔ ɖokpo mɛ ɖó ɖ’ayǐ nú ma wá nɔ finɛ.’
Ee è jó Pɔlu é ɔ, é yì ba nɔví tɔn Klisanwun sunnu kpo nyɔnu kpo kpɔ́n ɖò fí gègě. Enɛ gudo ɔ, è lɛ́ wlí i dó gan ɖò Hlɔma. É tuùn ɖɔ è na hu emi lo. Enɛ wu ɔ, é wlan wema sɛ́dó Timɔtée ɖɔ é ni yawu wǎ. É wlan ɖɔ: ‘Un nɔ gbeji nú Mawu, bɔ é na na mì ajɔ ce.’ È hu Pɔlu, bɔ é ɖó xwè yɔywɛ ɖé gudo é ɔ, è lɛ́ gbà Jeluzalɛmu. Dìn tɔn ɔ, Hlɔmanu lɛ wɛ gbà ɛ.
Kú Pɔlu tɔn gudo ɔ, è lɛ́ wlan wema Biblu tɔn ɖevo lɛ. Mɛsɛ́dó Jaan wɛ Jehovah zán, bɔ é wlan wema gudo tɔn Biblu tɔn lɛ. Nǔɖexlɛ́mɛ wema lɔ ɖ’emɛ. Wema enɛ ɖɔ xó dó sɔgudo wu. Mi nú mǐ ni kplɔ́n nǔ dó nǔ e na jɛ sɔ lɛ é wu.
Mɛsɛ́dó 28:16-31; Filipunu lɛ 1:13; 2:19-30; 4:18-23; Eble lɛ 13:23; Filemɔ 1-25; Kolɔsinu lɛ 4:7-9; 2 Timɔtée 4:7-9.