Nukplɔnkplɔn 3

Mɛ Ka Nyí Jezu Klisu?

Etɛwu wɛ Jezu ɔ ka nyí yiylɔ “Nukɔngbeví” Mawu tɔn? (1)

Etɛwu wɛ é nyí yiylɔ “Xó” ɔ? (1)

Etɛwu wɛ Jezu ɔ ka wá ayikungban ji ɖì gbɛtɔ ɖe ɖɔhun? (2-4)

Etɛwu wɛ é ka blo nujiwu lɛ? (5)

Etɛ wà gbé Jezu ka ja ɖo sɔ yi é na hɔn é? (6)

1. Jezu ko tin ɖò sɛxwé ɖì yɛ ɖe cobo wá ayikungban ji. É wɛ nyí nùɖíɖó Mawu tɔn nukɔn nukɔn tɔn, e wɛ zɔn bɔ é nyí yiylɔ ɖɔ “Nukɔngbevi” Mawu tɔn. (Kolɔsinu lɛ 1:15; Nǔɖexlɛ́mɛ 3:14) Jesu wɛ nyí Vi ɖokpo ɔ géé e Mawu ɖesu ɖó ɔ. Hwe co bo wá huzu gbɛtɔ ɖe, Jezu wɛ nyí “azɔwatɔgan” ee Jehovah zan bo do blo nǔ ɖevo lɛ bǐ ee tín ɖò jinukúnsin kpódo ayikungban ji kpán. (Proverbes 8:22-31; Kolɔsinu lɛ 1:16, 17) Mawu ɔ lɛ́ yí ì zan ɖì ɖɛ́mɛnu tɔn ɖaxo ɔ. Enɛ wɛ zɔ́n bɔ Jezu nyí yiylɔ ɖɔ “Xó.”—Jaan 1:1-3; Nǔɖexlɛ́mɛ 19:13.

2. Mawu sɛ́ Vi Tɔn dó ayikungban ji gbɔn gbɛ̀ e tɔn zize ɖò viɖɔ Maliya tɔn mɛ. Hǔn tɔ́ Jezu tɔn nyí gbɛtɔ ǎ. Enɛ wɛ zɔ́n bɔ é ɖugǔ hwɛhuhu abǐ numawé ɖebu tɔn ǎ. Mawu sɛ́ Jezu dó ayikungban ji nú hwɛjijɔ atɔ̀n lɛ: (1) Bonu é na dó kplɔ́n mí nugbo ɔ dó Mawu wu (Jaan 18:37), (2) bonu é na dó hɛn gbejininɔ mímɛ́ bo na ná mí kpɔndewu ee mí na xwedo ɔ (1 Piyɛɛ 2:21), lobɔ (3) bonu é na dó ze gbɛ̀ tɔn do savɔ bo na dó ɖe mí sín hwɛhuhu kpó kú kpó sí. Etɛwu wɛ é nyí nujɔnu?—Matie 20:28.

3. Ðó gbɛtɔ nukɔn tɔn, e nyí Adamu, ma setonu nú sɛ́n Mawu tɔn wutu ɔ, e wà nǔ e Biblu ylɔ ɖɔ “hwɛhuhu.” Enɛ wɛ zɔn bɔ Mawu ɖó kuhwɛ n’i. (Genèse 3:17-19) Ðó é hwè do nubyɔɖomɛsi Mawu tɔn wutu ɔ, é sɔ nyí mɛ mímɛ́ ǎ. Kpɛɖe kpɛɖe ɔ é wá kpò bo kú. Adamu ná vi tɔn lɛ hwɛhuhu. Enɛ wutu wɛ mí lɔ mɔ̌ nɔ kpò, nɔ j’azɔn, bo nɔ kú. Nɛ è na hwlɛn gbɛtɔ lɛ gán gbɛn?—Hlɔmanu lɛ 3:23; 5:12.

4. Jezu ɔ nyí mɛ mímɛ́ e ci Adamu ɖɔhun pɛ́ɛ́. Gbɔnvonnu Adamu hǔn, Jezu ɔ nyí tónusètɔ mímɛ́ nú Mawu, e tlɛ nyí ɖò tɛnpkɔ́n ɖaxo glɔ. Enɛ wɛ zɔ́n bɔ é sixu ze gbɛ̀ gbɛtɔ mímɛ́ tɔn do savɔ bo na sú axɔ́ nú Adamu sin hwɛhuhu. E wɛ nyí nǔ e Biblu ylɔ ɖɔ “gbɛxixɔ” ɔ. Vǐ Adamu tɔn lɛ nyí xixɔ sín hwɛɖonumɛ kú tɔn sí. Hwɛ̀ mɛ e ɖi nǔ nu Jezu lɛ bǐ tɔn ɔ sixu nyí sisɔ kɛ̀ yé lobɔ yé nasɔ mɔ gbɛ̀ mavɔmavɔ.—1 Timɔtée 2:5, 6; Jaan 3:16; Hlɔmanu lɛ 5:18, 19.

5. Hwenu e é ɖó ayikungban ji, Jezu ɔ gbɔ̀ azɔ̀n nú azinzɔnnɔ lɛ, ná núɖùɖù mɛ ee ɖò xovɛ lɛ, bo xo xwixwɛ jɔhɔn ɖaxo lɛ. E lɛ́ fɔ́n mɛkuku lɛ. Etɛwu wɛ e ka blo nujiwu lɛ? (1) Mɛ e nɔ jiya lɛ sin nǔ blawu n’i lobɔ é jlo na d’alɔ yé. (2) Nujiwu tɔn lɛ ɖexlɛ ɖɔ Vi Mawu tɔn wɛ é nyí. (3) Yé xlɛ nǔ e é na wà nú gbɛtɔ tonusetɔ lɛ hwenu ɖee é ná ɖù Axɔsu ɖò ayikungban ji ɔ.—Matie 14:14; Maki 2:10-12; Jaan 5:28, 29.

6. Jezu kú bɔ Mawu fɔn ɛ sín kú ɖò agbaza yɛ tɔn mɛ bɔ é lɛkɔ yì sɛxwé. (1 Piyɛɛ 3:18) Sin hwenɛnu ɔ, Mawu sɔ ɛ do do Axɔsu. Zanɖe din ɔ, Jezu na ɖè nunyanya lɛ kpó yajiji kpó sín ayikungban ji.—Psaumes 37:9-11; Proverbes 2:21, 22.

[Tinmɛ E Nɔ Nɔ Ðiɖe Glɔ É, Wexwɛ 7]

Lizɔnyizɔn Jezu tɔn bɛ mɛkpinkplɔn, nujiwu lɛ biblo, kpó gbɛ̀ ɖesu tɔn sisɔ do savɔ nú mí kpó hɛn