Baptɛm Nɔ Zɔ́n bɔ Mǐ kpo Mawu kpo Nɔ Vɛ́ D’eji

1. Etɛwu axɔsuzɔwatɔ́ ɖaxó Etiopinu ɖé ka byɔ ɖɔ emi na bló baptɛm?

“KPƆ́N! Sìn ɖíe; ani wɛ sɔ́ na gbɛ́ ɖɔ un ma [bló baptɛm] ó?” Nǔ e axɔsuzɔwatɔ́ ɖaxó Etiopinu ɖé kanbyɔ ɖò xwè kanweko nukɔntɔn ɔ mɛ é nɛ. Klisanwun e è nɔ ylɔ ɖɔ Filipu é ɖexlɛ́ ɛ ɖɔ Jezu wɛ nyí Mɛsiya e sín akpá è dó é. Nǔ e Filipu kplɔ́n ɛ ɖò Mawuxówema ɔ mɛ é byɔ ayixa tɔn mɛ bɔ é byɔ ɖɔ emi na bló baptɛm.—Mɛsɛ́dó 8:26-36.

2. Etɛwu a ka ɖó na lin tamɛ ganji dó baptɛm jí?

² Enyi a ko kplɔ́n wemata wema elɔ tɔn e wá yì lɛ é kpo sɔxwixwe kpo xá Kúnnuɖetɔ́ Jehovah tɔn ɖé ɔ, hwiɖesu sixu ko ɖò kinkanbyɔ hwiɖee wɛ ɖɔ: ‘Ani wɛ na gbɛ́ ɖɔ un ma bló baptɛm ó?’ A ko kplɔ́n nǔ dó akpá Biblu tɔn e kúnkplá gbɛ̀ ninɔ kaka sɔyi ɖò Palaɖisi mɛ é wu. (Luka 23:43, Biblu Wiwe lọ—Gun Alada; Nǔɖexlɛ́mɛ 21:3, 4) A ka ko lɛ́ kplɔ́n nǔ dó ninɔmɛ mɛkúkú lɛ tɔn kpo nukúnɖiɖo fínfɔ́n sín kú tɔn kpo wu. (Ecclésiaste 9:5; Jaan 5:28, 29) A sixu ko nɔ lɛ́ kplé kpo Kúnnuɖetɔ́ Jehovah tɔn lɛ kpo ɖò kplé agun tɔn yetɔn lɛ hwenu, bɔ hwiɖesu na ko mɔ ɖɔ yedɛɛ lɛ wɛ ɖò Mawu sɛ̀n wɛ nugbǒ nugbǒ. (Jaan 13:35) Ee ɖò taji hugǎn é wɛ nyí ɖɔ hwi kpo Jehovah Mawu kpo sixu ko jɛ vívɛ́ jí.

3. (a) Gbè tɛ Jezu ka ɖè nú ahwanvu tɔn lɛ? (b) Nɛ̌ è ka nɔ bló baptɛm Klisanwun tɔn gbɔn?

³ Nɛ̌ a ka sixu xlɛ́ ɖɔ emi jló na sɛ̀n Mawu gbɔn? Jezu ɖegbe nú ahwanvu tɔn lɛ ɖɔ: ‘Mi yì bo kplɔ́n nǔ akɔta lɛ bǐ, bonu ye ni huzu ahwanvu ce, lobo bló baptɛm nú ye.’ (Matie 28:19) Jezu ɖesu bló baptɛm ɖò sìn mɛ bo dó zé kpɔ́ndéwú tɔn ɖ’ayǐ. È mì sìn dó wutu tɔn ǎ, è ka kɔn sìn dó ta n’i ǎ. (Matie 3:16) Xókwin “baptɛm” ɔ gosin Glɛkigbe mɛ bɔ tinmɛ tɔn nyí “nylɔ̌.” Enɛ wu ɔ, baptɛm Klisanwun tɔn ɔ byɔ ɖɔ è na nylɔ́ mɛ dó sìn mɛ.

4. Etɛ baptɛm sìn mɛ tɔn ka nɔ ɖexlɛ́?

⁴ Baptɛm sìn mɛ tɔn ɖò dandan nú mɛ e jló ɖɔ emi kpo Jehovah Mawu kpo na vɛ́ lɛ é bǐ. Baptɛm nɔ xlɛ́ jlǒ e a ɖó bo na sɛ̀n Mawu é ɖò agbawungba. É nɔ xlɛ́ ɖɔ a ba na wà jlǒ Jehovah tɔn. (Eble lɛ 10:7; Psaume 40:8) Amɔ̌, cobonu a na sixu bló baptɛm ɔ, a ɖó na ɖè afɔ ɖé lɛ.

A ÐÓ HUDO NUKÚNNÚMƆJƐNǓMƐ KPO NÙÐIÐI KPO TƆN

5. (a) Nú è na sixu bló baptɛm ɔ, afɔ nukɔntɔn tɛ è ka na ɖè? (b) Etɛwu kplé Klisanwun tɔn lɛ ka nyí nǔ taji?

⁵ A ko jɛ afɔ nukɔntɔn ɔ ɖè jí. Gbɔn nɛ̌ é? A ko ɖò nukúnnúmɔjɛnǔmɛ ɖó dó Jehovah kpo Jezu kpo wu wɛ, vlafo gbɔn Biblu kplɔnkplɔn kpo Kúnnuɖetɔ́ Jehovah tɔn lɛ kpo gblamɛ. (Jaan 17:3) Amɔ̌, é lɛ́ kpò nǔ gègě bɔ a na lɛ́ kplɔ́n? Klisanwun lɛ nɔ jló na “tuùn jlǒ [Mawu] tɔn titewungbe.” (Kolɔsinu lɛ 1:9) Kplé agun tɔn Kúnnuɖetɔ́ Jehovah tɔn lɛ tɔn yiyi na d’alɔ we tawun ɖò ali enɛ nu. É ɖò taji ɖɔ è ni nɔ yì kplé mɔhun lɛ. (Eble lɛ 10:24, 25) Kplé lɛ yiyi tɛgbɛ tɛgbɛ na lɛ́ d’alɔ we bɔ nukúnnúmɔjɛnǔmɛ towe dó Mawu wu na lɛ́ jɛji.

6. Bǎ tɛ mɛ a ka ɖó na mɔ nukúnnú jɛ Biblu mɛ ɖó cobo na sixu bló baptɛm?

⁶ É ɖò gaàn ɖɔ a na mɔ nukúnnú jɛ nǔ e ɖò Biblu mɛ lɛ é bǐ mɛ dandan cobo na sixu bló baptɛm ǎ. Axɔsuzɔwatɔ́ ɖaxó Etiopinu ɔ ko tuùn nǔ ɖé lɛ, amɔ̌, è ɖó na d’alɔ ɛ bonu é na mɔ nukúnnú jɛ akpáxwé Mawuxówema ɔ tɔn ɖé lɛ mɛ. (Mɛsɛ́dó 8:30, 31) Mɔ̌ ɖokpo ɔ, hwi lɔ ɖó na lɛ́ kplɔ́n nǔ d’eji. A ɖó na gɔn nǔ kplɔ́n dó Mawu wu gbeɖé ǎ. (Ecclésiaste 3:11) É ɖò mɔ̌ có, é hwe bǐ ɔ, a ɖó na mɔ nukúnnú jɛ nùkplɔnmɛ nukɔn nukɔntɔn e ɖò Biblu mɛ lɛ é mɛ, bo na yí gbè nú ye hwɛ̌, cobo na bló baptɛm. (Eble lɛ 5:12) Nǔ e Biblu ɖɔ dó ninɔmɛ mɛkúkú lɛ tɔn wu é, kpo lee nyikɔ Mawu tɔn kpo Axɔsuɖuto tɔn kpo nyí nǔ taji gbɔn é kpo ɖò nùkplɔnmɛ enɛ lɛ mɛ.

7. Alɔ tɛ Biblu kplɔnkplɔn ka sixu dó we?

⁷ É ɖò mɔ̌ có, nukúnnúmɔjɛnǔmɛ kɛɖɛ ko kpé ǎ, ɖó “nú mɛɖé ma ɖó nùɖiɖi ǎ ɔ, nǔ tɔn sixu nyɔ́ Mawu nukúnmɛ ǎ.” (Eble lɛ 11:6) Biblu ɖɔ nú mǐ ɖɔ jí hwenu e mɛ ɖé lɛ sè wɛn e jla wɛ ahwanvu Jezu tɔn lɛ ɖè ɖò Kolɛnti hwexónu tɔn sín toxo mɛ é ɔ, ye “ɖi nǔ nú Jezu, bo [bló baptɛm].” (Mɛsɛ́dó 18:8) Mɔ̌ ɖokpo ɔ, Biblu kplɔnkplɔn na zɔ́n bɔ a na ɖó nùɖiɖi ɖɔ Biblu ɔ Xó Mawu tɔn wɛ. É na lɛ́ d’alɔ we bɔ a na ɖi nǔ nú akpá Mawu tɔn lɛ bo na lɛ́ ɖi nǔ ɖɔ vɔsisa Jezu tɔn hɛn ɔ, é na hwlɛn we.—Josué 23:14; Mɛsɛ́dó 4:12; 2 Timɔtée 3:16, 17.

MǍ NUGBǑ BIBLU TƆN XÁ MƐ ÐEVO LƐ

8. Etɛ ka na sísɛ́ we bɔ a na mǎ nǔ e a ko kplɔ́n lɛ é xá mɛ ɖevo lɛ?

⁸ Enyi nùɖiɖi towe ɖò doli wɛ ɔ, a na mɔ ɖɔ emi kún sixu hɛn nǔ e emi ko kplɔ́n lɛ é dó xomɛ ó. (Jérémie 20:9) Xó ɖɔ nú mɛ ɖevo lɛ dó Mawu kpo linlin tɔn lɛ kpo wu sín akpàkpà na nɔ sɔ́ we tawun.—2 Kolɛntinu lɛ 4:13.

9, 10. (a) Mɛ̌ mɛ̌ e a ka sixu jɛ nugbǒ Biblu tɔn ɔ má xá jí? (b) Enyi a jló na ɖ’alɔ ɖò wɛnɖagbe jijla sín azɔ̌ e Kúnnuɖetɔ́ Jehovah tɔn lɛ bló tito tɔn e mɛ ɔ, etɛ a ka ɖó na wà?

⁹ A sixu jɛ nugbǒ Biblu tɔn ɔ má xá hɛnnumɔ, xɔ́ntɔn, nɔzo kpo azɔ̌gbɛ̌ towe lɛ kpo jí. Nɔ bló mɔ̌ kpo yɛ̌yi kpo. Enɛ gudo ɔ, a sixu jló na ɖ’alɔ ɖò wɛnɖagbe jijla sín azɔ̌ e Kúnnuɖetɔ́ Jehovah tɔn lɛ bló tito tɔn é mɛ. Enyi mɔ̌ hǔn, ma xò nǔ kpɔ́n ó, ɖɔ linlin towe nú Kúnnuɖetɔ́ e ɖò Biblu kplɔ́n xá we wɛ é. Enyi Biblu kplɔnmɛtɔ́ towe mɔ ɖɔ a jɛxa bo na ɖ’alɔ ɖò wɛnɖagbe jijla agbawungba tɔn ɔ mɛ ɔ, è na bló tito bɔ mɛxo agun tɔn wè na mɔ hwi kpo é kpo.

¹⁰ Enɛ na zɔ́n bɔ a na lɛ́ tuùn mɛxo agun tɔn e ɖò agun Mawu tɔn wu kpé nukún dó wɛ é ɖé lɛ d’eji. (Mɛsɛ́dó 20:28; 1 Piyɛɛ 5:2, 3) Enyi mɛxo enɛ lɛ mɔ ɖɔ a mɔ nukúnnú jɛ nùkplɔnmɛ nukɔn nukɔntɔn Biblu tɔn lɛ mɛ bo ɖi nǔ nú ye, ɖɔ gbɛzinzan towe nɔ sɔgbe xá nugbodòdó Mawu tɔn lɛ, ɖɔ a jló nugbǒ nugbǒ bo na nyí Kúnnuɖetɔ́ Jehovah tɔn ɔ, ye na ɖɔ nú we ɖɔ a jɛxa bo na nyí wɛnjlatɔ́ e ma ko bló baptɛm ǎ é, bo na ɖ’alɔ ɖò wɛnɖagbe jijla agbawungba tɔn ɔ mɛ.

11. Etɛ lɛ mɛ ɖé lɛ ka ɖó na wà hwɛ̌ cobo na jɛxa wɛnɖagbe jijla agbawungba tɔn ɔ?

¹¹ Mɛxo enɛ lɛ sixu mɔ ɖɔ é jɛ ɖɔ a ni huzu gbɛzinzan towe kpo aca e a ɖó é ɖé lɛ kpo bo na dó sixu jɛxa wɛnɖagbe jijla agbawungba tɔn ɔ. Enɛ sixu byɔ ɖɔ a ni jó walɔ e a ko nɔ zán ɖò nǔglɔ é ɖé lɛ dó. Enɛ wu ɔ, cobonu a na byɔ ɖɔ emi na nyí wɛnjlatɔ́ e ma ko bló baptɛm ǎ é ɔ, a ɖó na ko jó hwɛhuhu syɛnsyɛn lɛ dó, ɖi agalilɛ alɔkpa lɛ bǐ, ahannumu kpo amasin e ɖó aɖi lɛ é zinzan nyì dò kpo.—1 Kolɛntinu lɛ 6:9, 10; Galatinu lɛ 5:19-21.

HWƐVƐ́NÚMƐ KPO KƆLILƐ SÍN HWƐ MƐTƆN LƐ GUDO KPO

12. Etɛwu hwɛvɛ́númɛ ka ɖò dandan?

¹² A ɖó na ɖè afɔ ɖevo ɖé lɛ cobo na sixu bló baptɛm. Mɛsɛ́dó Piyɛɛ ɖɔ: ‘Hwɛ mitɔn lɛ ni vɛ́ nú mi, bonu mi lɛkɔ sín ye gudo.’ (Mɛsɛ́dó 3:19) Hwɛvɛ́númɛ sín tinmɛ wɛ nyí ɖɔ è wà nùɖé nyì dò bɔ é vɛ́ nú mɛ tawun. Enyi mɛɖé ko zán gbɛ̀ kwijikwiji wá yì ɔ, hwɛvɛ́númɛ ɖò dandan; é ɖò mɔ̌ có, é lɛ́ ɖò dandan nú mɛ e ma tlɛ wà mɔ̌ kpɔ́n ǎ é. Aniwu? Ðó gbɛtɔ́ lɛ bǐ wɛ nyí hwɛhutɔ́, bo ɖó hudo hwɛsɔkɛ Mawu tɔn tɔn. (Hlɔmanu lɛ 3:23; 5:12) A ko mɔ nukúnnú jɛ jlǒ Mawu tɔn mɛ cobo jɛ Biblu kplɔ́n jí ǎ. Enɛ wu ɔ, a sixu ɖɔ ɖɔ emi ko nɔ zán gbɛ̀ sɔgbe xá jlǒ tɔn ǎ. Hǔn, hwɛvɛ́númɛ ɖò dandan.

13. Etɛ ka nyí kɔlílɛ́ sín hwɛ mɛtɔn lɛ gudo?

¹³ Kɔlílɛ́ sín hwɛ mɛtɔn lɛ gudo ɖó na bɔ dó hwɛvɛ́númɛ wu. Hwɛ towe lɛ vɛ́ nú we kɛɖɛ ko kpé ǎ, a ɖó na wà nǔ hú mɔ̌. A ɖó na jó gbɛzinzan towe ɖ’ayǐ tɔn ɔ dó, bo na ɖò gbesisɔmɛ ɖɔ emi na bló nǔ e nyí ɖagbe é bɛ́sín dìn ɖido. Hwɛvɛ́númɛ kpo kɔlílɛ́ sín hwɛ mɛtɔn lɛ gudo kpo ɖò afɔ e a ɖó na ɖè cobo na bló baptɛm lɛ é mɛ.

ZÉ HWIÐEE JÓ NÚ MAWU

14. Afɔ taji tɛ a ka ɖó na ɖè cobo na sixu bló baptɛm?

¹⁴ Afɔ taji ɖevo lɛ́ ɖè bɔ a ɖó na ɖè cobo na sixu bló baptɛm. A ɖó na zé hwiɖee jó nú Jehovah Mawu.

15, 16. Nɛ̌ a ka na zé hwiɖee jó nú Mawu gbɔn? Etɛ ka na sísɛ́ mɛɖé bɔ é na bló mɔ̌?

¹⁵ Bo na dó zé hwiɖee jó nú Jehovah Mawu ɔ, a ɖó na xoɖɛ bunɔ ɖé sɛ́dó é bo d’akpá ɖɔ emi na nyí étɔn bǐ mlɛ́mlɛ́ kaka sɔyi. (Deutéronome 6:15) Etɛ ka na sísɛ́ mɛɖé bɔ é na bló mɔ̌? É nyɔ́, mǐ ni ɖɔ ɖɔ sunnu ɖé byɔ hǎ nyɔnu ɖé. Lee é ɖò nukúnnú mɔ jɛ wǔ tɔn wɛ, bo ɖò ayi ɖó jijɔ tɔn ɖagbe lɛ wu wɛ sɔ́ é ɔ, mɔ̌ jɛn é na lɛ́ yí wǎn n’i d’eji sɔ́ é nɛ. Hwenu ɖò yiyi wɛ ɔ, é na ɖɔ emi na da ɛ. Nugbǒ wɛ ɖɔ enyi é da ɛ ɔ, azɔ̌ na lɛ́ jɛ azɔ̌ jí n’i. Amɔ̌, wanyiyi na zɔ́n bɔ é na ɖè afɔ taji enɛ.

¹⁶ Enyi è wá tuùn Jehovah bo yí wǎn n’i ɔ, enɛ nɔ sísɛ́ mɛ bɔ è nɔ sɛ̀n ɛ bo nɔ lɔn bonu nǔ ɖebǔ nɔ dó afɔgblɛ̌gblɛ̌ afɔ mɛ nú mɛ ɖ’ékɔn ǎ. Mɛɖebǔ e jló bo na xwedó Vǐ Mawu tɔn Jezu Klisu é ɖó na “jó tito éɖesunɔ tɔn lɛ dó.” (Maki 8:34) Nǔ e nɔ xlɛ́ ɖɔ mǐ jó tito mǐɖesunɔ tɔn lɛ dó é wɛ nyí ɖɔ mǐ nɔ lɔn bonu jlǒ mǐɖesunɔ tɔn lɛ kpo nǔ e nɔ mya nukún nú mǐ lɛ é kpo ni sú ali dó mǐ ɖò tónúsíse nú Mawu kɔn ǎ. Enɛ wu ɔ, cobonu a na bló baptɛm ɔ, jlǒ Jehovah Mawu tɔn wiwa wɛ ɖó na nɔ mya nukún nú we hugǎn.—1 Piyɛɛ 4:2.

MA ÐI XƐSI NÚ AFƆ ÐÈ NYÌ DÒ Ó

17. Etɛwu mɛɖé lɛ ka nɔ xò yeɖee zízé jó nú Mawu kpɔ́n?

¹⁷ Mɛɖé lɛ nɔ xò yeɖee zízé jó nú Jehovah kpɔ́n, ɖó ye nɔ ɖi xɛsi dó afɔ taji enɛ ɖíɖé wu. Ye sixu ɖi xɛsi ɖɔ enyi emi zé emiɖee jó nú Mawu bo nyí Klisanwun ɔ, emi taa ɖó gbè n’i. Ye nɔ ɖi xɛsi ɖɔ emi sixu ɖè afɔ nyì dò bɔ wǔ na kú Jehovah, enɛ wu ɔ, ye nɔ lin ɖɔ enyi emi ma zé emiɖee jó n’i ǎ ɔ, é nyɔ́ hú.

18. Etɛ ka sixu sísɛ́ we bɔ a na zé hwiɖee jó nú Jehovah?

¹⁸ Kplɔnkplɔn bo na yí wǎn nú Jehovah na sísɛ́ we bɔ a na zé hwiɖee jó n’i, bo na lɛ́ wà nǔ e wu a kpé lɛ é bǐ bo na zán gbɛ̀ sɔgbe xá zě e a zé hwiɖee jó n’i é. (Ecclésiaste 5:4) É ɖò gaàn ɖɔ enyi a zé hwiɖee jó nú Mawu gudo ɔ, a na jló bo na ‘nɔ zán gbɛ̀ towe lee é jló gbɔn é, bo na nɔ wà nǔ e nɔ nyɔ́ nukún tɔn mɛ ɔ hwebǐnu.’ (Kolɔsinu lɛ 1:10) Ðó wǎn e a yí nú Mawu é wutu ɔ, a na mɔ ɖɔ jlǒ tɔn wiwa kún vɛwǔ dín ó. Hwi lɔ na ɖó linlin ɖokpo ɔ mɛsɛ́dó Jaan ɖɔhun. É wlan ɖɔ: “Wǎn yí nú Mawu wɛ nyí ɖɔ è ni nyì sɛ́n tɔn lɛ; sɛ́n tɔn lɛ ka vɛ́ nyì ǎ.”—1 Jaan 5:3.

19. Etɛwu xɛsi ma ka ɖó na ɖi we dó hwiɖee zízé jó nú Mawu wu ǎ?

¹⁹ Gbɛtɔ́ maɖóblɔ̌ jɛn a na nyí dandan cobo na zé hwiɖee jó nú Mawu ǎ. Jehovah tuùn dogbó towe lɛ. É na ɖó nukún ɖɔ a ni wà nǔ e hugǎn we é kpɔ́n gbeɖé ǎ. (Psaume 103:14) É jló ɖɔ é ni kpá we. É na nɔ gudo towe bo na lɛ́ d’alɔ we. (Isaïe 41:10) A sixu ɖeji ɖɔ enyi a ganjɛ Jehovah wu kpo ayi towe bǐ kpo ɔ, é “na jlɔ́ mɔ̌ towe lɛ.”—Proverbes 3:5, 6.

XLƐ́ ÐƆ EMI KO ZÉ EMIÐEE JÓ NÚ MAWU GBƆN BAPTƐM GBLAMƐ

20. Etɛwu mǐɖee zízé jó nú Jehovah ma ka ɖó na nyí mǐ kpo é kpo kɛɖɛ xó ǎ?

²⁰ Enyi a lin tamɛ dó nǔ e jí mǐ ɖɔ xó dó wá yì dìn lɛ é jí ɔ, é sixu d’alɔ we bɔ a na zé hwiɖee jó nú Jehovah ɖò ɖɛ mɛ. Mɛ e yí wǎn nú Mawu lɛ é bǐ ɖó na lɛ́ “ɖɔ ɖò mɛɖevo lɛ nukɔn,” ɖó hwlɛngán yetɔn wutu. (Hlɔmanu lɛ 10:10) Nɛ̌ a ka sixu bló mɔ̌ gbɔn?

21, 22. Nɛ̌ a ka sixu yí nùɖiɖi towe sín gbè “ɖò mɛɖevo lɛ nukɔn” gbɔn?

²¹ Enyi a jló na bló baptɛm hǔn, ɖɔ nú titoblonúnǔtɔ́ kplékplé mɛxo lɛ tɔn e ɖò agun towe mɛ é. É na bló tito bɔ mɛxo agun tɔn ɖé lɛ na vɔ́ nùkanbyɔ e kúnkplá nùkplɔnmɛ nukɔn nukɔntɔn Biblu tɔn lɛ é ɖé lɛ gbéjé kpɔ́n xá we. Enyi mɛxo enɛ lɛ mɔ ɖɔ a sixu bló baptɛm ɔ, ye na ɖɔ nú we ɖɔ a hɛn ɔ, a na bló ɖò kpléɖókpɔ́ e na bɔ d’ewu é jí.a Ðò kpléɖókpɔ́ lɛ hwenu ɔ, xóɖiɖɔ ɖé nɔ vɔ́ nǔ e baptɛm nyí é tinmɛ. Enɛ gudo ɔ, xóɖɔtɔ́ ɔ nɔ kàn nǔ wè byɔ mɛ e jló na bló baptɛm lɛ é bonu ye na dó yí nùɖiɖi yetɔn sín gbè “ɖò mɛɖevo lɛ nukɔn.”

²² Baptɛm wɛ na ɖè we xlɛ́ ɖò agbawungba ɖɔ a ko zé hwiɖee jó nú Mawu bɔ è na jɛ yiylɔ we jí ɖɔ Kúnnuɖetɔ́ Jehovah tɔn. È nɔ nylɔ́ mɛ e jló na bló baptɛm lɛ é dó sìn mɛ bǐ mlɛ́mlɛ́ bo na dó xlɛ́ ɖò agbawungba ɖɔ ye ko zé yeɖee jó nú Jehovah.

BAPTƐM E A BLÓ É SÍN TINMƐ

23. Etɛ ka nyí tinmɛ baptɛm biblo ‘ɖò Tɔ́ ɔ, Vǐ ɔ kpodo gbigbɔ mímɛ́ kpo sín nyikɔ mɛ’ tɔn?

²³ Jezu ɖɔ ɖɔ è na bló baptɛm nú ahwanvu emitɔn lɛ ‘ɖò Tɔ́ ɔ, Vǐ ɔ kpodo gbigbɔ mímɛ́ kpo sín nyikɔ mɛ.’ (Matie 28:19) Tinmɛ tɔn wɛ nyí ɖɔ mɛ e jló na bló baptɛm é tuùn acɛ e Jehovah Mawu kpo Jezu Klisu kpo ɖó é. (Psaume 83:18; Matie 28:18) É lɛ́ tuùn nǔ e gbigbɔ mímɛ́, alǒ hlɔnhlɔn e Mawu nɔ dó w’azɔ̌ é nɔ wà é.—Galatinu lɛ 5:22, 23; 2 Piyɛɛ 1:21.

24, 25. (a) Etɛ baptɛm ka nɔte na? (b) Nùkanbyɔ tɛ lɛ è ka ɖó na na sìnkɔn na?

²⁴ É ɖò mɔ̌ có, baptɛm nyí è nylɔ́ mɛ dó sìn mɛ sín xó kpowun ǎ. Xlɛ̌ nǔ taji ɖé tɔn wɛ é nyí. Sìn ɔ glɔ yiyi xlɛ́ ɖɔ a kú bo jó gbɛzinzan towe xóxó ɔ dó. Aga wiwá ɔ xlɛ́ ɖɔ dìn ɔ, a wá gbɛ̀ bo na wà jlǒ Mawu tɔn. Lɛ̌ flín ɖɔ Jehovah Mawu wɛ a zé hwiɖee jó na, é nyí nú azɔ̌, gbɛtɔ́, alǒ gbɛ̌ta ɖé ǎ. Hwiɖee e a zé jó nú Jehovah é kpo baptɛm e a bló é kpo nyí bìbɛ̌ xɔ́ntɔn titewungbe ɖé zunzun xá Mawu tɔn.—Psaume 25:14.

²⁵ È bló baptɛm ko nyí ɖɔ è na mɔ hwlɛngán ǎ. Mɛsɛ́dó Pɔlu wlan ɖɔ: “Mi wà azɔ̌ kpo xɛsi kpo, kpodo sisɔsisɔ kpan nú hwlɛngán mitɔn na nyí hwlɛngán kpíkpé.” (Filipunu lɛ 2:12) Afɔ e è na ɖè bo na mɔ hwlɛngán é sín bìbɛ̌ wɛ nyí baptɛm ɔ. Cobonu mǐ na mɔ hwlɛngán ɔ, mǐ ɖó na ‘hɛn mǐɖee ɖò wanyiyi Mawu tɔn mɛ.’ (Judi 21) Etɛ ka nyí tinmɛ enɛ tɔn? Nɛ̌ a ka sixu hɛn hwiɖee ɖò wanyiyi Mawu tɔn mɛ gbɔn? Xota mǐtɔn gudo tɔn ɔ na na sìnkɔn lɛ.