Hɛn Hwiɖee Ðò Wanyiyi Mawu Tɔn Mɛ

1, 2. Fitɛ mǐ ka sixu mɔ bibɛtɛn ɖagbe ɖé ɖè ɖò égbé?

MǏ NI ɖɔ ɖɔ a ɖò yiyi wɛ ɖò ali jí gbè ɖokpo bɔ jɔhɔn syɛnsyɛn ɖé jɛ nyìnyì jí. Jinukúnsin d’ablu tlolo bɔ jǐ jɛ wun kɛ jí, xɛbyoso jɛ awǎn nyɛ jí lobɔ jǐ ɖaxó ɖé wlí. A bɛ́ wezun bo jɛ bibɛtɛn ɖé ba jí. A wá mɔ xɔ ɖé ɖò ali ɔ kpá. É syɛn tawun, bɔ xò tɔn mɛ xú bo lɛ́ dɔn mɛ. Kpɔ́n lee fí ɖagbe enɛ e a mɔ é na hun xomɛ nú we sɔ́ é!

² Hwenu vɛwǔ lɛ mɛ wɛ mǐ ɖè dìn. Bɔ gbɛ̀ ɔ fɔ́n bo ɖò gblègblé d’eji wɛ. Fitɛ mǐ ka sixu mɔ bibɛtɛn ɖé ɖè, bo ma na wá ba gbɛ̀ mavɔmavɔ ɔ kpò ǎ? Ðǒ ayi nǔ e Biblu kplɔ́n mɛ é wu: “Un na ɖɔ nú Jehovah ɖɔ: ‘Hwɛ wɛ nyí bibɛtɛn ce kpo sósyɛn ce kpo, Mawu ce e wu un na ɖeji dó é.’”—Psaume 91:2.

3. Nɛ̌ mǐ ka sixu sɔ́ Jehovah dó ɖó bibɛtɛn mǐtɔn na gbɔn?

³ A mɔ à? Jehovah e nyí Gbɛɖotɔ́ ɔ bo lɛ́ nyí Nǔbǐwukpétɔ́ wɛkɛ ɔ tɔn é hɛn ɔ, é na nyí bibɛtɛn mǐtɔn. É hɛn ɔ, é na cyɔn alɔ mǐ jí, ɖó é ɖó hlɔnhlɔn hú mɛɖebǔ alǒ nǔ ɖebǔ e sixu wà nǔ dó mǐ wu é. Enyi è na bo tlɛ hɛn nùɖé gblé dó mǐ wu ɔ, Jehovah hɛn ɔ, é na bló bǐ ɖó. Nɛ̌ mǐ ka sixu sɔ́ Jehovah dó ɖó bibɛtɛn mǐtɔn na gbɛn? Mǐ ɖó na ɖeji dó wutu tɔn. Gɔ́ nú enɛ ɔ, Xó Mawu tɔn byɔ mǐ ɖɔ: “Mi hɛn miɖee ɖò wanyiyi Mawu tɔn mɛ.” (Judi 21) Mǐ ɖó na hɛn mǐɖee ɖò wanyiyi Mawu tɔn mɛ, alǒ nɔ gɛ́dɛ́ wanyiyi tɔn ɖé mɛ xá ɛ. Enɛ gudo wɛ mǐ sixu ɖó ganjɛwu ɖɔ é nyí bibɛtɛn mǐtɔn. Amɔ̌, nɛ̌ mǐ ka sixu sɔnǔ nú gɛ́dɛ́ mɔhun gbɔn?

MƆ NǓ JƐ WANYIYI E JEHOVAH ÐÓ NÚ WE É WU BO XLƐ́ ÐƆ É XƆ AKWƐ ÐÒ NUKÚN TOWE MƐ

4, 5. Ðɔ ali e nu Jehovah xlɛ́ ɖɔ emi yí wǎn nú mǐ ɖè é ɖé lɛ.

⁴ Bonu mǐ na hɛn mǐɖee ɖò wanyiyi Jehovah tɔn mɛ ɔ, mǐ ɖó na mɔ nukúnnú jɛ lee éyɛ ko ɖè wanyiyi xlɛ́ mǐ gbɔn é mɛ hwɛ̌. Lin tamɛ dó nùkplɔnmɛ Biblu tɔn e wema elɔ d’alɔ we bɔ a ko kplɔ́n é ɖé lɛ jí. Ðó Jehovah wɛ nyí Gbɛɖotɔ́ ɔ wutu ɔ, é ko ɖó ayikúngban ɔ nú mǐ na nɔ jí. É bló bɔ nùɖuɖu, sìn, ayǐdɔkun lɛ, kanlin lɛ, kpo nǔ e lɛlɛ̌ dó mǐ lɛ é kpo tíìn. Ðó é wɛ lɛ́ nyí Dowatɔ́ Biblu ɔ tɔn wutu ɔ, é ɖè nyikɔ tɔn kpo jijɔ tɔn lɛ kpo xlɛ́ mǐ. Gɔ́ nú enɛ ɔ, Xó tɔn xlɛ́ mǐ ɖɔ é sɛ́ Vǐ vívɛ́ tɔn Jezu dó ayikúngban ɔ jí, bo tin bɔ é jiya bo kú dó ta mǐtɔn mɛ. (Jaan 3:16) Enɛ zɔ́n bɔ mǐ ɖò nukún ɖó sɔgudo jiwǔ ɖé wɛ.

⁵ Nukúnɖiɖo mɔhun e mǐ ɖó é lɛ́ sín nǔ ɖevo wu. Nǔ ɔ wɛ nyí ɖɔ Jehovah ko ɖó acɛkpikpa ɖé ayǐ, bɔ zaanɖé dìn ɔ, é na ɖè wuvɛ̌ mimɔ bǐ síìn bo na bló bɔ ayikúngban ɔ na huzu palaɖisi ɖé. Lin tamɛ kpɛɖé bo kpɔ́n! Mǐ hɛn ɔ, mǐ na nɔ gbɛ̀ ɖò fífá kpo awǎjijɛ kpo mɛ kaka sɔyi. (Psaume 37:29) Amɔ̌ dìn hwɛ̌ ɔ, Mawu xlɛ́ lee mǐ na zán gbɛ̀ mǐtɔn gbɔn ganji é mǐ. É lɛ́ jɔwu mǐ bɔ mǐ sixu xoɖɛ sɛ́dó é hweɖebǔnu kpo fí ɖebǔ e mǐ ɖè é kpo. Ali e nu Jehovah ɖè wanyiyi xlɛ́ gbɛtɔ́ lɛ bǐ kpo hwiɖesu mɛtún ɔ kpo ɖè lɛ é kpɛɖé nɛ.

6. Nɛ̌ a ka sixu xlɛ́ ɖɔ wanyiyi e Jehovah ɖexlɛ́ we é xɔ akwɛ ɖò nukún towe mɛ gbɔn?

⁶ Nùkanbyɔ taji e jí a ɖó na lin tamɛ dó dìn é wɛ nyí: Nɛ̌ un ka na xlɛ́ ɖɔ wanyiyi Jehovah tɔn xɔ akwɛ ɖò nukún ce mɛ gbɔn? Mɛ gègě na ɖɔ: “Nyì lɔ ɖó na yí wǎn nú Jehovah.” Mɔ̌ wɛ hwi lɔ lin à? Sɛ́n ɖaxó e jɛ nukɔn nú sɛ́n lɛ bǐ bɔ Jezu ɖɔ é ɖíe: “A na yí wǎn nú Aklunɔ Mawu towe kpodo ayi towe bǐ kpo, kpodo lindɔ̌n towe bǐ kpo, kpodo linlin towe bǐ kpo.” (Matie 22:37) É ɖò gaàn ɖɔ a ɖó hwɛjijɔ gègě bo na yí wǎn nú Jehovah Mawu. Nɛ̌ mǐ ka sixu yí wǎn nú Jehovah kpodo ayi mǐtɔn bǐ kpo, kpodo lindɔ̌n mǐtɔn bǐ kpo, kpodo linlin mǐtɔn bǐ kpo gbɔn?

7. Etɛ wǎn yí nú Mawu ka ɖó na d’alɔ mǐ bɔ mǐ na wà? Tinmɛ.

⁷ Sɔgbe kpo Biblu kpo ɔ, wanyiyi nú Mawu ɖò taji tawun. Etɛ wanyiyi nú Mawu ka ɖó na d’alɔ mǐ bɔ mǐ na wà? Nùjlɛdonǔwu ɖé ɖíe: Enyi atín sínsɛ́n ɖé ɖuɖu jló we vlafo bonu mɛɖé dlɛn atín sínsɛ́n ɔ sín kwín dó we ɔ, enɛ ko kpé wɛ à? É ɖò gaàn ɖɔ é kún ko kpé ó! È ɖó na dó kwín enɛ ɔ bɔ é na wu atín ɔ hwɛ̌ cobo na wá ɖó sínsɛ́n. Ði atín sínsɛ́n sín kwín enɛ ɖɔhun ɔ, è ɖɔ kpowun ɖɔ è yí wǎn nú Mawu ko kpé ǎ. Biblu ɖɔ: “Wǎn yí nú Mawu wɛ nyí ɖɔ è ni nyì sɛ́n tɔn lɛ; sɛ́n tɔn lɛ ka vɛ́ nyì ǎ.” (1 Jaan 5:3) Enɛ wu ɔ, enyi mǐ ɖó wanyiyi jɔ wanyiyi nú Jehovah ɔ, wanyiyi mǐtɔn ɖó na jɛji bo ɖó sínsɛ́n ɖagbe. Nǔwiwa mǐtɔn lɛ ɖó na xlɛ́ ɖɔ mǐ yí wǎn nú Mawu nugbǒ nugbǒ.—Matie 7:16-20.

8, 9. Nɛ̌ mǐ ka sixu xlɛ́ ɖɔ mǐ yí wǎn nú Mawu bɔ nǔ e é bló nú mǐ lɛ é xɔ akwɛ ɖò nukún mǐtɔn mɛ gbɔn?

⁸ Sɛ́n Mawu tɔn lɛ xwixwedó kpo tónúsíse nú nugbodòdó tɔn lɛ kpo wɛ nɔ xlɛ́ ɖɔ mǐ yí wǎn n’i. Mɔ̌ biblo ka vɛwǔ dín ǎ. É nyɔ́ wà ɔ, ye na d’alɔ mǐ bɔ mǐ na zán gbɛ̀ ɖagbe e na ɖó lè nú mǐ é. (Isaïe 48:17, 18) Enyi mǐ nɔ zán gbɛ̀ sɔgbe kpo alixlɛ́mɛ Jehovah tɔn kpo ɔ, mǐ nɔ xlɛ́ ɖɔ nǔ tobutobu e é bló nú mǐ lɛ é xɔ akwɛ ɖò nukún mǐtɔn mɛ. Amɔ̌, mɛ kpɛɖé jɛn nɔ bló mɔ̌ ɖò égbé dìn. Mǐ jló na nyí ɖumakpamɛsi, lee mɛɖé lɛ nyí hwenu e Jezu ɖò ayikúngban jí é ǎ. Jezu gbɔ azɔn nú gudunɔ wǒ, amɔ̌, mɛ ɖokpo géé wɛ lɛkɔ bo wá dó kú tɔn n’i. (Luka 17:12-17) É ɖò gaàn ɖɔ mɛ e wá dokú nú Jezu é ɖɔhun wɛ mǐ jló na cí, é nyí ɖumakpamɛsi tɛnnɛ lɛ ɖɔhun ǎ.

⁹ Sɛ́n Jehovah tɔn tɛ lɛ mǐ ka ɖó na xwedó lo? Mǐ ko ɖɔ xó dó gègě jí ɖò wema elɔ mɛ, amɔ̌, mi nú mǐ ni vɔ́ ɖé lɛ jí gbɔn. Sɛ́n Mawu tɔn lɛ xwixwedó na d’alɔ mǐ bɔ mǐ na hɛn mǐɖee ɖò wanyiyi tɔn mɛ.

NƆ SƐKPƆ JEHOVAH D’EJI HWEBǏNU

10. Tinmɛ nǔ e wu é ɖò taji ɖɔ mǐ ɖó na ɖò nukúnnúmɔjɛnǔmɛ ɖó dó Jehovah Mawu wu wɛ é.

¹⁰ Cobonu è na sɛkpɔ Jehovah ɔ, é ɖò dandan ɖɔ è ni nɔ ɖò nǔ kplɔ́n dó wutu tɔn wɛ. Mɔ̌ biblo ɖó na nɔte gbeɖé ǎ. Enyi vlafo a ɖò kɔxota zǎnmɛ bɔ jɔhɔn fá tawun bonu a ɖò myɔ xú wɛ ɔ, a na jó myɔ ɔ dó bɔ é na ɖò cící wɛ kaka bo cí bǐ wɛ à? Gbeɖé kpɔ́n. A na ɖò naki sɔ́ dó myɔ ɔ mɛ wɛ bonu é na mɔ tɛn bo na ɖò jiji wɛ. Lee a ɖò naki sɔ́ d’emɛ gbɔn wɛ é wɛ myɔ towe na ɖò te gbɔn. Ði lee naki nɔ zɔ́n bɔ myɔ ɖé ma nɔ cí ǎ gbɔn é ɔ, “nukúnnúmɔjɛnǔmɛ Mawu tɔn” ɖiɖó na zɔ́n bɔ wǎn e mǐ yí nú Jehovah é na ɖò jijɛ jí wɛ.—Proverbes 2:1-5.

11. Nɛ̌ nǔ e Jezu tinmɛ nú ahwanvu tɔn lɛ é ka cí gbɔn nú ye?

¹¹ Jezu jló ɖɔ wǎn e ahwanvu emitɔn lɛ yí nú Jehovah kpo Xó Tɔn nugbǒ ɔ kpo é ni fɔ́n bo ɖò jijɛ jí wɛ. Ðò fínfɔ́n sín kú tɔn gudo ɔ, é tinmɛ xóɖɔɖ’ayǐ e jɛ dó wutu tɔn bo ɖò Akpáxwé Biblu tɔn e è wlan dó Eblegbe mɛ é ɖé lɛ nú ahwanvu tɔn wè. Nɛ̌ nǔ enɛ ka cí gbɔn nú ye? Ye ɖɔ: “Hwenu e é ɖò xó ɖɔ nú mǐ wɛ ɖò alixo, bo ɖò Mawuxó tinmɛ nú mǐ wɛ ɔ, akpàkpà ɖé ma sɔ́ mǐ sín xomɛ à?”—Luka 24:32.

12, 13. (a) Etɛ ka ko jɛ dó wǎn e mɛ gègě yí nú Mawu kpo Biblu kpo é wu ɖò égbé? (b) Nɛ̌ mǐ ka sixu bló gbɔn bɔ wanyiyi mǐtɔn ma na ɖekpo ǎ?

¹² Hwenu e a kplɔ́n nǔ e Biblu kplɔ́n mɛ tawun é tlolo é ɔ, akpàkpà ɖé ma sɔ́ hwi lɔ bɔ a ɖó awǎjijɛ, bo ɖókan dó nugbǒ ɔ ɖiɖɔ nú mɛ ɖevo lɛ wu, lobo yí wǎn nú Mawu à cé? É ɖò gaàn ɖɔ a wà mɔ̌. Akpàkpà mɔhun ko sɔ́ mɛ gègě. Amɔ̌, nǔ e nɔ wá vɛwǔ nú ye é wɛ nyí lee ye na bló gbɔn bɔ wanyiyi mɔhun ma na fá ǎ, lobo na fɔ́n bo ɖò jijɛ jí wɛ é. Mǐ jló na nɔ wà nǔ lee gbɛ̀ égbé tɔn nɔ wà gbɔn é ǎ. Wanyiyi e mɛ gègě ɖó nú Mawu é ɖò ɖiɖekpo wɛ. (Matie 24:12) Nɛ̌ a ka sixu bló gbɔn bɔ wǎn e a yí nú Jehovah kpo nugbǒ Biblu tɔn lɛ kpo é ma na ɖekpo ǎ?

¹³ Ðò Jehovah Mawu kpo Jezu Klisu kpo tuùn d’eji wɛ. (Jaan 17:3) Nɔ lin tamɛ ganji dó nǔ e a nɔ kplɔ́n ɖò Xó Mawu tɔn mɛ lɛ é jí, bo nɔ kanbyɔ hwiɖee ɖɔ: ‘Etɛ nǔ elɔ ka kplɔ́n mì dó Jehovah Mawu wu? Hwɛjijɔ ɖevo tɛ é ka na mì bɔ un na yí wǎn nú Jehovah kpodo ayi ce, linlin ce kpo lindɔ̌n ce bǐ kpo?’ (Psaume 77:12) Tamɛ linlin mɔhun na zɔ́n bɔ wǎn e a yí nú Jehovah é na ɖekpo ǎ.

14. Nɛ̌ ɖɛxixo ka sixu d’alɔ mǐ bɔ wanyiyi e mǐ ɖó nú Jehovah é ma na ɖekpo ǎ gbɔn?

¹⁴ Lee a sixu lɛ́ bló gbɔn bɔ wanyiyi e a ɖó nú Jehovah é ma na ɖekpo ǎ é wɛ nyí ɖɔ a ɖó na nɔ xoɖɛ hwebǐnu. (1 Tɛsalonikinu lɛ 5:17) Ðò Wemata 17gɔ́ ɔ mɛ ɔ, mǐ ko kplɔ́n ɖɔ ɖɛxixo nyí wǔjɔmɛ ɖé. Enyi xɔ́ntɔn xɔ́ntɔn lɛ nɔ ɖɔ xó ɖó kpɔ́ ganji ɔ, ye nɔ ɖò vívɛ́ d’eji wɛ. Mɔ̌ ɖokpo ɔ, enyi mǐ nɔ xoɖɛ sɛ́dó Jehovah hwebǐnu ɔ, mǐ kpo é kpo nɔ vɛ́ d’eji. É ɖò dandan ɖɔ ɖɛ e mǐ nɔ xò lɛ é kún ɖó na nyí ɖɛ ɖokpo ɔ lɛ hwebǐnu, alǒ mǐ na nɔ ɖò xó ɖokpo ɔ lɛ kpo xó ma ɖi xó lɛ kpo wlí ɖɔ wɛ ó. Mǐ ɖó na nɔ xoɖɛ sɛ́dó Jehovah lee vǐ ɖé nɔ ɖɔ xó xá tɔ́ wanyiyinɔ ɖé gbɔn é ɖɔhun. Nugbǒ wɛ ɖɔ mǐ jló na nɔ xoɖɛ kpo sísí kpo, amɔ̌, mǐ ɖó na nɔ ɖɔ nǔ e ɖò ayi mǐtɔn mɛ lɛ é bǐ, kpo ayijlɔjlɔ kpo. (Psaume 62:8) Biblu kplɔnkplɔn mɛɖesunɔ tɔn gɔ́ nú ɖɛxixo kpo ayijlɔjlɔ kpo ɖò dandan ɖò lee mǐ nɔ sɛ̀n Mawu gbɔn é mɛ, lobo na d’alɔ mǐ bɔ mǐ na hɛn mǐɖee ɖò wanyiyi tɔn mɛ.

MƆ AWǍJIJƐ ÐÒ MAWU SÍNSƐ́N MƐ

15, 16. Aniwu é ka sɔgbe ɖɔ mǐ ni nɔ mɔ ɖɔ Axɔsuɖuto ɔ jijla sín azɔ̌ nyí wǔjɔmɛ ɖé kpo dɔkun ɖé kpo?

¹⁵ Alabǔ wɛ Biblu kplɔnkplɔn mɛɖesunɔ tɔn kpo ɖɛxixo kpo nyí ɖò Mawu sínsɛ́n mɛ. É ka nyí agbawungba wɛ mǐ nɔ bló nǔ enɛ lɛ ɖè dandan ǎ. Mi nú mǐ ni ɖɔ xó dó lee mǐ nɔ sɛ̀n Mawu gbɔn ɖò agbawungba é ɖokpo wu: é wɛ nyí nǔ e mǐ ɖi nǔ na lɛ é ɖiɖɔ nú mɛ ɖevo lɛ. A ka ko jɛ nugbǒ Biblu tɔn lɛ má xá mɛ ɖevo lɛ jí à? Enyi mɔ̌ hǔn, a na ko ɖò vivǐ wǔjɔmɛ jiwǔ ɖé tɔn ɖu wɛ. (Luka 1:74) Enyi mǐ nɔ má nugbǒ Biblu tɔn lɛ xá mɛ ɖevo lɛ ɔ, azɔ̌ taji e è zɔ́n Klisanwun nugbǒ lɛ bǐ, bɔ é nyí Axɔsuɖuto Mawu tɔn jijla é, wà wɛ mǐ ɖè nɛ.—Matie 24:14; 28:19, 20.

¹⁶ Sinsɛnzɔ́ mɛsɛ́dó Pɔlu tɔn xɔ akwɛ tawun ɖò nukún tɔn mɛ, kaka bɔ é ylɔ ɛ ɖɔ dɔkun ɖé. (2 Kolɛntinu lɛ 4:7) Xó ɖɔ nú mɛ ɖevo lɛ dó Jehovah kpo linlin tɔn lɛ kpo wu nyí azɔ̌ ɖagbe hugǎn e mǐ sixu wà é. Ðó Mɛ e zɔ́n azɔ̌ enɛ mǐ é ɖó acɛ hugǎn gǎn ɖevo ɖebǔ, bɔ azɔ̌ enɛ nɔ lɛ́ ɖó lè nú mǐ hú azɔ̌ ɖevo ɖebǔ. Azɔ̌ enɛ wiwa nɔ zɔ́n bɔ mǐ nɔ d’alɔ gbɛtɔ́ ayijlɔjlɔnɔ lɛ bɔ ye nɔ sɛkpɔ Mawu, lobo nɔ wlí gbɛ̀ mavɔmavɔ sín ali ɔ! Azɔ̌ tɛ ka sɔ́ kpé hú azɔ̌ enɛ? Gɔ́ na ɔ, kúnnuɖiɖe dó Jehovah kpo Xó tɔn kpo wu nɔ lɛ́ zɔ́n bɔ nùɖiɖi towe nɔ lidǒ, bɔ wanyiyi e a ɖó n’i é nɔ lɛ́ syɛn ganji. Gǎndido towe lɛ ka nɔ xɔ akwɛ tawun ɖò Jehovah nukúnmɛ. (Eble lɛ 6:10) Kàn ɖó dó azɔ̌ enɛ wu na d’alɔ we bɔ a na hɛn hwiɖee ɖò wanyiyi Mawu tɔn mɛ.—1 Kolɛntinu lɛ 15:58.

17. Etɛwu sinsɛnzɔ́ Klisanwun tɔn ɔ ka ɖó na mya nukún ɖò égbé?

¹⁷ É ɖò taji ɖɔ mǐ ni nɔ flín ɖɔ Axɔsuɖuto ɔ jijla sín azɔ̌ ɖó na mya nukún nú mǐ. Biblu ɖɔ: “Jla Mawuxó . . . hwebǐnu; hwe ɔ nu nyɔ́ kpo é ma nyɔ́ kpo ɔ, a na nɔ jla.” (2 Timɔtée 4:2) Etɛwu mɔ̌ biblo ka ɖó na mya nukún égbé? Xó Mawu tɔn ɖɔ nú mǐ ɖɔ: “Azǎn ɖaxó Jehovah tɔn sɛkpɔ. É sɛkpɔ, bo ɖò wun na wɛ tawun.” (Tsephania 1:14) Hwenu e Jehovah na sú kún dó nú gbɛ̀ elɔ é ko sɛkpɔ tawun. È ɖó na gbò akpá tɔn nú gbɛtɔ́ lɛ! Ye ɖó na tuùn ɖɔ dìn wɛ nyí hwenu e ye na sɔ́ Jehovah dó ɖó Nǔbǐwukpétɔ́ yetɔn é. Gbɛvivɔ ɔ “na gbɔ hwenu ǎ.”—Habaqouq 2:3.

18. Etɛwu mǐ ka ɖó na nɔ kplé kpo Klisanwun nugbǒ lɛ kpo bo sɛ̀n Jehovah ɖò agbawungba?

¹⁸ Jehovah jló ɖɔ mǐ ni sɛ̀n emi ɖò agbawungba xá Klisanwun nugbǒ lɛ. Enɛ wu wɛ Xó tɔn ɖɔ: “Mi nú mǐ ni kpé nukún dó mǐɖee wu, bo na flɔ́ wanyiyi sín zo dó lanmɛ nú mǐɖee, bo na ɖó wanyiyi, bo na nɔ flɔ́ ɖagbe wiwa sín zo dó lanmɛ nú mǐɖee, bo na wà nǔ ɖagbe. Mǐ ni ma jó agun mǐtɔn mɛ yiyi dó, ɖi mɛ e ko nɔ bló mɔ̌, bɔ é ko má ye lɛ ɖɔhun ó. Loɔ, mǐ ni nɔ na kanmɛsyɛn mǐɖee, ɖó Aklunɔ sín azǎn ɔ ko ɖò sisɛkpɔ wɛ lee mɔ gbɔn wɛ mi ɖè dìn é.” (Eble lɛ 10:24, 25) Hwenu e mǐ kpo nùɖitɔ́ hàtɔ́ lɛ kpo kplé ɖò kplé Klisanwun tɔn lɛ jí é ɔ, ali nɔ hun nú mǐ bɔ mǐ nɔ kpa Mawu bo nɔ sɛ̀n ɛ. Mǐ nɔ lɛ́ flɔ́ ɖagbe wiwa sín zo dó lanmɛ nú mǐɖee bo nɔ lɛ́vɔ na kanmɛsyɛn mǐɖee.

19. Nɛ̌ mǐ ka sixu bló bɔ gɛ́dɛ́ wanyiyi tɔn e ɖò agun Klisanwun tɔn mɛ é syɛn gbɔn?

¹⁹ Enyi mǐ nɔ dó gbɛ̌ xá Jehovah sɛntɔ́ ɖevo lɛ ɔ, é nɔ zɔ́n bɔ gɛ́dɛ́ wanyiyi tɔn e ɖò agun ɔ mɛ é nɔ syɛn bɔ mǐ nɔ lɛ́ vɛ́ d’eji. É ɖò taji ɖɔ mǐ ni nɔ sɔ́ ayi ɖó jijɔ ɖagbe e wegɔ mǐtɔn lɛ ɖó é jí, lee Jehovah nɔ bló mɔ̌ gbɔn é. Ma ɖó nukún ɖɔ nùɖitɔ́ hàtɔ́ towe ni nyí mɛ maɖóblɔ̌ ó. Flín ɖɔ mǐ bǐ wɛ ɖò gǎn dó wɛ bo na vɛ́ kpo Mawu kpo, bo kún ka ko yì nukɔn jɛ fí ɖokpo ɔ lɛ ó. Mǐ mɛ bǐ wɛ ka nɔ lɛ́ wà nǔ nyì dò. (Kolɔsinu lɛ 3:13) Nɔ ba na vɛ́ kpo mɛ e yí wǎn nú Jehovah ganji lɛ é kpo. Enɛ na zɔ́n bɔ a na ɖò nukɔn yì wɛ ɖò gbigbɔ lixo. Jehovah sinsɛn xá nɔví gbigbɔ mɛ tɔn towe lɛ na d’alɔ we bɔ a na hɛn hwiɖee ɖò wanyiyi Mawu tɔn mɛ. Nɛ̌ Jehovah ka na sú axɔ mɛ e nɔ sɛ̀n ɛ kpo gbejininɔ kpo bo dó hɛn yeɖee ɖò wanyiyi tɔn mɛ lɛ é gbɔn?

DǑ GǍN BA MƆ “GBƐ̀ JƆ GBƐ̀ Ɔ”

20, 21. Etɛ ka nyí “gbɛ̀ jɔ gbɛ̀ ɔ”? Etɛwu é ka nyí nukúnɖiɖo jiwǔ ɖé?

²⁰ Gbɛ̀ wɛ nyí lè e Jehovah na na mɛ e nɔ nɔ gbeji n’i lɛ é. Gbɛ̀ alɔkpa tɛ? É nyɔ́, mǐ ɖò gbɛ̀ nɔ wɛ ɖò égbé dìn dóó à? Mǐ mɛ gègě na yí gbè ɖɔ ɛɛn mǐ ɖò gbɛ̀ nɔ wɛ, ɖó gbɔjɛ mǐtɔn kpó ɖò wiwayi wɛ, mǐ nɔ ɖu nǔ bo nɔ nu sìn. Hweɖelɛnu bonu jimɛ jɛ mǐ ɔ, mǐ tlɛ nɔ ɖɔ: “Gbɛ̀ víví!” É ɖò mɔ̌ có, Biblu ɖexlɛ́ ɖɔ ɖò ali taji ɖé nu ɔ, mɛɖebǔ ɖò gbɛ̀ nugbǒ nugbǒ ɔ nɔ wɛ ɖò égbé ǎ.

²¹ Xó Mawu tɔn dó wusyɛn lanmɛ nú mǐ ɖɔ mǐ ni ‘hɛn gbɛ̀ jɔ gbɛ̀ ɔ wu syɛnsyɛn.’ (1 Timɔtée 6:19) Xógbe enɛ lɛ xlɛ́ ɖɔ “gbɛ̀ jɔ gbɛ̀ ɔ” nyí nùɖé bɔ mǐ ɖò nukún ɖó wɛ bo na mɔ ɖò sɔgudo. Hwenu e mǐ na mɔ gbɛ̀ mavɔmavɔ e nɔte kpɔ́n wɛ mǐ ɖè ɖò palaɖisi mɛ ɖò ayikúngban jí é ɔ, mǐ sɔ́ na j’azɔn, alǒ kpò ǎ. Mǐ na ɖu lè fífá kpo awǎjijɛ kpo tɔn. Hwenɛnu wɛ mǐ na ɖu vivǐ “gbɛ̀ jɔ gbɛ̀” e Mawu jló nú mǐ ɖò bǐbɛ̌mɛ é tɔn, é wɛ nyí gbɛ̀ mavɔmavɔ. (1 Timɔtée 6:12) Nukúnɖiɖo jiwǔ ɖé wɛ nyí enɛ à cé?

22. Nɛ̌ a ka sixu ‘hɛn gbɛ̀ jɔ gbɛ̀ ɔ wu syɛnsyɛn’ gbɔn?

²² Nɛ̌ mǐ ka sixu ‘hɛn gbɛ̀ jɔ gbɛ̀ ɔ wu syɛnsyɛn’ gbɔn? Pɔlu byɔ ɖò Klisanwun lɛ sí ɖɔ ye ni nɔ “wà nǔ ɖagbe gègě.” (1 Timɔtée 6:18) É ɖò gaàn dìn ɖɔ é na sín lee mǐ nɔ zán nugbǒ e mǐ nɔ kplɔ́n ɖò Biblu mɛ lɛ é gbɔn é wu. Amɔ̌, ɖiɖɔ wɛ Pɔlu ɖè ɖɔ enyi mǐ wà nǔ ɖagbe kpowun ɔ, é ko kpé bɔ mǐ na mɔ “gbɛ̀ jɔ gbɛ̀ ɔ” à? Eǒ, ɖó “fɛ́nú” Mawu tɔn wutu wɛ zɔ́n bɔ mǐ sixu ɖó nukúnɖiɖo jiwǔ mɔhun lɛ. (Hlɔmanu lɛ 5:15) É ɖò mɔ̌ có, xomɛ nɔ hun Jehovah dó axɔ súsú mɛ e nɔ sɛ̀n ɛ kpo gbejininɔ kpo lɛ é wu. É jló ɖɔ a ni mɔ “gbɛ̀ jɔ gbɛ̀ ɔ.” Gbɛ̀ mavɔmavɔ e mɛ fífá kpo awǎjijɛ kpo ɖè é ɖò te kpɔ́n mɛ e hɛn yeɖee ɖò wanyiyi Mawu tɔn mɛ lɛ é.

23. Etɛwu é ka ɖò dandan ɖɔ è ni hɛn mɛɖee ɖò wanyiyi Mawu tɔn mɛ?

²³ Mǐ mɛ bǐ ɖó na kanbyɔ mǐɖee ɖɔ: ‘Un ka ɖò Mawu sɛ̀n wɛ lee é ɖɔ gbɔn ɖò Biblu mɛ é à?’ Enyi mǐ nɔ gbéjé mǐɖee kpɔ́n hwebǐnu bo mɔ ɖɔ mǐ ɖò mɔ̌ bló wɛ ɔ, é xlɛ́ ɖɔ mǐ ɖò ali ɖagbe ɔ jí. Mǐ sixu ɖó ganjɛwu ɖɔ Jehovah nyí bibɛtɛn mǐtɔn. É na cyɔn alɔ gbejinɔtɔ́ tɔn lɛ jí ɖò azǎn gudo gudo tɔn gbɛ̀ elɔ tɔn e vɛwǔ lɛ é sín hwenu. Jehovah na lɛ́ kplá mǐ wuyɛyɛ̌-afɔyɛ́yɛ́ bɔ mǐ na byɔ palaɖisi ɔ mɛ. Kpɔ́n lee xomɛ na hun mǐ sɔ hwenɛnu é! Lɛ̌ kpɔ́n lee xomɛ na hun mǐ sɔ ɖɔ mǐ ɖè afɔ ɖagbe lɛ ɖò azǎn gudo gudo tɔn elɔ lɛ sín hwenu gbɔn é! Enyi a ɖè afɔ mɔhun lɛ dìn ɔ, a na ɖu vivǐ “gbɛ̀ jɔ gbɛ̀ ɔ” tɔn kaka sɔyi, lee Jehovah ko jló ɖó é.