Nyikɔ Mawu Tɔn: Yiylɔ Tɔn kpo Tinmɛ Tɔn Kpo

NƐ̌ È ka lilɛ Psaume 83:18 dó gbè e mɛ Biblu towe ɖè é gbɔn? Les Saintes Écritures—Traduction du monde nouveau lilɛ wemafɔ enɛ ɔ dó: “Nú è ni tuùn ɖɔ hwɛ, mɛ e sín nyikɔ nɔ nyí Jehovah é, hwi ɖokponɔ wɛ nyí Ajalɔnnɔ ɖò ayikúngban ɔ bǐ jí.” Lilɛdogbeɖevomɛ Biblu tɔn ɖevo lɛ lɔ zán nyikɔ Jehovah alǒ Yahvé ɖò wemafɔ enɛ mɛ. É ɖò mɔ̌ có, lilɛdogbeɖevomɛ Biblu tɔn gègě ɖè nyikɔ Jehovah ɔ sín mɛ, bo sɔ́ tɛnmɛ-nyikɔ lɛ, ɖi “Aklunɔ” alǒ “Mawu” ɖó tɛn tɔn mɛ. Tɛnmɛ-nyikɔ ɖé wɛ ɖó na nɔ wemafɔ enɛ mɛ à, alǒ nyikɔ Jehovah?

Wemafɔ enɛ ɔ ɖɔ xó dó nyikɔ ɖé wu. Nyikɔ jɔnwun Mawu tɔn ɔ ɖò wemafɔ enɛ ɔ mɛ ɖò Eblegbe dòdó e mɛ è wlan akpáxwé Biblu tɔn gègě dó é. È nɔ wlan ɖó lě יהוה (YHWH) kpo wekwín Eble tɔn lɛ kpo. Ðò kpaà mɛ ɔ, è nɔ lilɛ nyikɔ enɛ ɔ dó “Jehovah.” Wemafɔ ɖokpo géé mɛ jɛn nyikɔ enɛ ka ɖè ɖò Biblu mɛ à? Eǒ. É ɖibla yì 7 000 ɖò Akpáxwé Biblu tɔn e è wlan dó Eblegbe mɛ lɛ é sín wema dòdó ɔ mɛ!

Nɛ̌ Mawu sín nyikɔ ka nyí nùjɔnǔ sɔ? Ðǒ ayi ɖɛ e Jezu Klisu kplɔ́n ahwanvu tɔn lɛ é sín xógbe nukɔntɔn lɛ wu. É ɖɔ: “Tɔ́ mǐtɔn e ɖò [jixwé] ɔ, nyikɔ towe ni nyí nǔ sísí.” (Matie 6:9) Jezu xoɖɛ sɛ́dó Mawu hweɖevonu bo ɖɔ: “Daa, . . . sɔ́ nyikɔ towe sù.” Mawu yí gbè n’i sín jixwé bo ɖɔ: “Un ko sɔ́ nyikɔ ce sɔ́ sù; un ka na lɛ́ sɔ́ ɛ sù.” (Jaan 12:28) É ɖò gaàn dìn ɖɔ nyikɔ Mawu tɔn ɔ nyí nùjɔnǔ hugǎn. Bɔ etɛwu lilɛdogbeɖevomɛtɔ́ ɖé lɛ ka ɖè nyikɔ Mawu tɔn sín Biblu e ye lilɛ dó gbè ɖevo mɛ lɛ é mɛ bo sɔ́ tɛnmɛ-nyikɔ lɛ dó tɛn tɔn mɛ?

É cí ɖɔ hwɛjijɔ taji wè wu wɛ. Nukɔntɔn ɔ, mɛ gègě ɖɔ ɖɔ è kún ɖó na zán nyikɔ Mawu tɔn ó, ɖó è tuùn lee è nɔ ylɔ gbɔn tawun ɖò hwexónu é égbé ǎ. È nɔ zán wekwín asì lɛ dó wlan Eblegbe dòhwenu tɔn ɔ na ǎ. Enɛ wu ɔ, mɛɖebǔ sixu ɖɔ lee mɛ e nɔ gbɛ̀ ɖò hwenu e è wlan Biblu lɛ é nɔ ylɔ YHWH ɖɔ é tawun ɖò égbé ǎ. É ɖò mɔ̌ có, enɛ ka na zɔ́n bɔ mǐ na gɔ́n nyikɔ Mawu tɔn ylɔ wɛ à? É nyɔ́, ɖò hwenu e è wlan Biblu é ɔ, nyikɔ Jezu ɔ, è sixu nɔ ko ylɔ ɖɔ Yeshua alǒ Yehoshua; mɛɖebǔ sixu ɖɔ tawun ǎ. É ɖò mɔ̌ có, gbɔn gbɛ̀ ɔ bǐ mɛ égbé ɔ, mɛ gègě nɔ ylɔ nyikɔ Jezu ɔ gbɔn alɔkpa vovo sɔgbe xá lee è nɔ ylɔ gbɔn ɖò gbè yetɔn mɛ é. Ye tuùn lee è nɔ ylɔ nyikɔ ɔ gbɔn ɖò xwè kanweko nukɔntɔn ɔ mɛ é ǎ có, é sín enɛ wu bonu ye nɔ xò yiylɔ tɔn kpɔ́n ǎ. Mɔ̌ ɖokpo ɔ, enyi a yì tò ɖevo mɛ ɔ, a sixu ɖó ayi wu ɖɔ lee è nɔ ylɔ nyikɔ hwiɖesunɔ tɔn gbɔn ɔ nɔ gbɔn vo ɖò gbè ɖevo lɛ mɛ. Enɛ wu ɔ, lee è nɔ ylɔ nyikɔ Mawu tɔn gbɔn tawun ɖò hwexónu é ma tuùn na zɔ́n bonu è na gɔn yiylɔ ǎ.

Hwɛjijɔ wegɔ e mɛ lɛ nɔ yawu na nú nǔ e wu ye ɖè nyikɔ Mawu tɔn sín Biblu ɔ mɛ é kúnkplá aca hwexónu tɔn Jwifu lɛ tɔn ɖé. Jwifu gègě ɖi nǔ ɖɔ è kún ɖó na ylɔ nyikɔ Mawu tɔn gbeɖé ó. É ɖò gaàn ɖɔ nǔ enɛ e ye ɖi nǔ na ɔ junjɔn nǔ wà zɛ sɛ́n Biblu tɔn elɔ wu jí: “A ɖó na ylɔ nyikɔ Jehovah Mawu towe tɔn dó wuvɔ̌ ǎ, ɖó Jehovah na gɔn tó dɔn nú mɛ e na ylɔ nyikɔ tɔn dó wuvɔ̌ é ǎ.”—Exode 20:7.

Sɛ́n enɛ gbɛ́ ɖɔ è ni ma zán Mawu sín nyikɔ nyì dò ó. Amɔ̌, é ka gbɛ́ ɖɔ è ni ma zán kpo sísí kpo ó wɛ à? É nyí mɔ̌ ǎ. Mɛ e wlan Akpáxwé Biblu tɔn e ɖò Eblegbe mɛ lɛ é (“Alɛnuwema Xóxó” ɔ) bǐ wɛ nyí gbejinɔtɔ́, bo nɔ nyì Sɛ́n e Mawu dó nú Izlayɛli hwexónu tɔn ɔ é. É ɖò mɔ̌ có, ye nɔ ylɔ nyikɔ Mawu tɔn hwɛhwɛ. Ði kpɔ́ndéwú ɖé ɔ, ye zán nyikɔ Mawu tɔn ɖò han e Mawu sɛntɔ́ lɛ nɔ jì kpo axwá kpo lɛ é mɛ. Jehovah Mawu tlɛ ɖɔ nú mɛ e nɔ sɛ̀n ɛ lɛ é ɖɔ ye ni nɔ ylɔ nyikɔ emitɔn, bɔ gbejinɔtɔ́ lɛ ka setónú na. (Psaume 148:5, 13; Mɛsɛ́dó 2:21) Enɛ wu ɔ, Klisanwun lɛ nɔ zán nyikɔ Mawu tɔn kpo sísí kpo égbé, lee Jezu bló gbɔn é ɖɔhun.

Nǔ ɖesu wɛ lilɛdogbeɖevomɛtɔ́ Biblu tɔn lɛ wà nyì dò bo ɖè nyikɔ Mawu tɔn síìn, bo zé tɛnmɛ-nyikɔ lɛ dó tɛn tɔn mɛ. Nǔ e ye wà é xlɛ́ ɖɔ Mawu lín dó mɛ bɔ è kún sixu zun xɔ́ntɔn xá ɛ ó, amɔ̌, Biblu ka byɔ ɖɔ gbɛtɔ́ lɛ ni “vɛ́ kpo Jehovah kpo.” (Psaume 25:14) Lin tamɛ dó xɔ́ntɔn vívɛ́ towe ɖé wu. Enyi a ma tuùn nyikɔ tɔn ǎ ɔ, nɛ̌ hwi kpo é kpo ka sixu vɛ́ gbɔn? Mɔ̌ pɛ́pɛ́ ɔ, enyi mɛ lɛ ma tuùn Mawu sín nyikɔ Jehovah ɔ ǎ ɔ, nɛ̌ ye kpo é kpo ka sixu huzu xɔ́ntɔn vívɛ́ nugbǒ nugbǒ gbɔn? Hú mɔ̌ ɔ, enyi mɛ lɛ ma nɔ zán nyikɔ Mawu tɔn ǎ ɔ, ye sixu lɛ́ tuùn tinmɛ nyikɔ enɛ tɔn kpo lee é jiwǔ sɔ́ é kpo ǎ. Tinmɛ tɛ Mawu sín nyikɔ ka ɖó?

Mawu ɖesu ɖɔ nyikɔ tɔn sín tinmɛ nú deví tɔn gbejinɔtɔ́ Mɔyizi. Ee Mɔyizi kàn nǔ byɔ Mawu dó nyikɔ tɔn wu é ɔ, Jehovah yí gbè n’i ɖɔ: “Un na nyí mɛ e un na nyí é.” (Exode 3:14, Biblu Wiwe lọ—Gun Alada, kpɔ́n nǔ e è wlan dó wemafɔ enɛ jí ɖò Biblu ɔ sín dò é) Lilɛdogbeɖevomɛ Rotherham tɔn lilɛ xógbe enɛ lɛ dó: “Un Na Huzu nǔ ɖebǔ e jló mì é.” Enɛ wu ɔ, Jehovah hɛn ɔ, é na huzu nǔ ɖebǔ e é byɔ ɖɔ é ni huzu bonu linlin tɔn lɛ na dó jɛ jlɔ́ é.

Mǐ ni ɖɔ ɖɔ a hɛn ɔ, a na huzu nǔ ɖebǔ e jló we ɖɔ a ni huzu é. Etɛ a ka na bló nú xɔ́ntɔn towe lɛ? Enyi ye ɖě ɖò azɔn jɛ wɛ syɛnsyɛn ɔ, a sixu huzu dotóo e tuùn azɔ̌ é ɖé bo gbɔ azɔn n’i. Enyi mɛ ɖevo ɖò akwɛyózó mɛ ɔ, a sixu huzu sɔhɛnmɛtɔ́ ɖé bo d’alɔ ɛ. É ɖò mɔ̌ có, nú è na ɖɔ xó nugbǒ ɔ, nǔ e a sixu huzu e ɖó dogbó. Mǐ bǐ wɛ é ɖò mɔ̌ na. Enyi a ɖò Biblu kplɔ́n wɛ ɔ, lee Jehovah huzu nǔ ɖebǔ e é byɔ ɖɔ é ni huzu bo na dó ɖè akpá e é dó lɛ é gbɔn é na kpaca we. Xomɛ tɔn nɔ hun ɖɔ é ni zán hlɔnhlɔn tɔn dó mɛ e yí wǎn n’i lɛ é tamɛ. (2 Chroniques 16:9) Mɛ e ma tuùn nyikɔ Mawu tɔn ǎ lɛ é nɔ mɔ nǔ jɛ jijɔ tɔn ɖagbe ɖagbe enɛ lɛ wu ǎ.

É xlɛ́ céɖécéɖé dìn ɖɔ è zán nyikɔ Jehovah ɔ ɖò Biblu mɛ. Nukúnnú mimɔ jɛ tinmɛ nyikɔ enɛ tɔn mɛ kpo nyikɔ ɔ zinzan dó sɛ̀n Mawu ma xò nǔ kpɔ́n kpo na d’alɔ mǐ bɔ mǐ kpo Tɔ́ mǐtɔn jixwé tɔn Jehovah kpo na vɛ́.a