Lee Xóɖɔɖ’ayǐ Daniɛli Tɔn Ðɔ Wìwá Mɛsiya ɔ Tɔn Ð’ayǐ Gbɔn É

GBEYIÐƆ Daniɛli nɔ gbɛ̀ é ɔ, é ko bló xwè hugǎn 500 cobɔ è jì Jezu. É ɖò mɔ̌ có, Jehovah ɖè nùɖé xlɛ́ ɛ, bɔ nǔ ɔ na d’alɔ mɛ bɔ è na tuùn hwenu e è na kɔn ami dó ta nú Jezu bɔ é na huzu Mɛsiya alǒ Klisu ɔ é. É ɖɔ nú Daniɛli ɖɔ: “A ɖó na tuùn bo mɔ nǔ jɛ wu ɖɔ sín hwenu e è na ɖegbe ɖɔ è ni jla Jeluzalɛmu ɖó bo vɔ́ ɛ gbá é kaka jɛ Mɛsiya Nukɔntɔ́ ɔ sín hwenu ɔ, aklunɔzán gblamɛ tɛnwe na wá yì, bɔ aklunɔzán gblamɛ kanɖé-ko-nukún-wè na lɛ́ wá yì.”—Daniel 9:25.

Bonu mǐ na tuùn hwenu e Mɛsiya ɔ wá é ɔ, mǐ ɖó na tó tuùn hwenu e xóɖɔɖ’ayǐ Daniɛli tɔn enɛ e kúnkplá Mɛsiya ɔ sín wìwá é jɛ jijɛ jí é hwɛ̌. Sɔgbe kpo xóɖɔɖ’ayǐ ɔ kpo ɔ, é na jɛ jijɛ jí ɖò “hwenu e è na ɖegbe ɖɔ è ni jla Jeluzalɛmu ɖó bo vɔ́ ɛ gbá é.” Hwetɛnu è ka “ɖegbe” enɛ? Biblu wlantɔ́ Nexemii xlɛ́ ɖɔ è ɖegbe ɖɔ è ni vɔ́ dǒ mɛ̀ lɛlɛ̌ dó Jeluzalɛmu ‘ɖò xwè kogɔ ɔ axɔsuɖuɖu Alutazɛluzɛɛ tɔn sín hwenu.’ (Nehémia 2:1, 5-8) Hwenuxó wlantɔ́ lɛ ka xlɛ́ ɖɔ 455 J.H.M. wɛ nyí axɔsuɖuɖu Alutazɛluzɛɛ tɔn sín xwè kogɔ ɔ. Mǐ ko tuùn hwenu e xóɖɔɖ’ayǐ Daniɛli tɔn enɛ e kúnkplá Mɛsiya ɔ é jɛ jijɛ jí é lo, é wɛ nyí 455 J.H.M.

Daniɛli xlɛ́ hwenu nabi e na wá yì cobɔ “Mɛsiya Nukɔntɔ́ ɔ” na wá é. Xóɖɔɖ’ayǐ ɔ ɖɔ ɖɔ “aklunɔzán gblamɛ tɛnwe na wá yì, bɔ aklunɔzán gblamɛ kanɖé-ko-nukún-wè na lɛ́ wá yì.” Hǔn, bǐ bló aklunɔzán gblamɛ 69 nɛ. Nɛ̌ aklunɔzán gblamɛ 69 lɛ ka na ɖi ga sɔ? Lilɛdogbeɖevomɛ Biblu tɔn gègě xlɛ́ ɖɔ aklunɔzán gblamɛ enɛ lɛ kún nyí aklunɔzán gblamɛ azǎn tɛnwe tɔn ó, amɔ̌, ɖɔ ye nyí aklunɔzán gblamɛ xwè tɛnwe tɔn. Enyi mɔ̌ hǔn, aklunɔzán gblamɛ ɖokpo nɔte nú xwè tɛnwe nɛ. Aklunɔzán gblamɛ xwè tɔn nyí nǔ yɔyɔ̌ nú Jwifu hwexónu tɔn lɛ ǎ. Ði kpɔ́ndéwú ɖé ɔ, ye nɔ ɖu Gbɔjɛzán xwè tɔn ɖò xwè tɛnwe mɛ tɛgbɛ. (Exode 23:10, 11) Enɛ wu ɔ, aklunɔzán gblamɛ 69 e xó è ɖɔ ɖ’ayǐ é bló xwè 7 donu 69, alǒ xwè 483.

Dìn ɔ, nǔ kɛɖɛ jɛn kpò bɔ mǐ na lɛ́n. Enyi mǐ lɛ́n sín 455 J.H.M. ɔ, mǐ na mɔ ɖɔ xwè 483 lɛ wá fó ɖó 29 H.M. Xwè enɛ mɛ pɛ́ɛ́ wɛ Jezu bló baptɛm bo huzu Mɛsiya ɔ!a (Luka 3:1, 2, 21, 22) Lee xóɖɔɖ’ayǐ Biblu tɔn enɛ jɛ gbɔn é jiwǔ à cé?