Woosun Mɛ Jɛn È ka Jì Jezu À?

BIBLU ɖɔ hwenu e è jì Jezu é nú mǐ ǎ. É ɖò mɔ̌ có, é na mǐ hwɛjijɔ titewungbe e zɔ́n bɔ mǐ na wá gbeta ɔ kɔn ɖɔ è kún jì i ɖò Woosun mɛ ó é.

Mǐ ni ɖɔ xó dó lee ayǐ mɛ nɔ cí ɖò Woosun mɛ ɖò Bɛteleyɛmu sín xá mɛ fí e è jì Jezu ɖè é wu. Jǐ nɔ ja bɔ gbɛmɛ nɔ fá ɖò sun Jwifu lɛ tɔn e nɔ nyí Kisulɛvu (Abɔxwísun/Woosun) é mɛ. Sun e nɔ bɔ d’ewu ɔ nɔ nyí Tebɛtu (Woosun/Aluùnsun). Gbɛmɛ nɔ fá ɖò sun enɛ ɔ mɛ hú sun ɖě lɛ mɛ bɔ hweɖelɛnu ɔ, sìngǒ nɔ ja ɖò só lɛ jí. Mi nú mǐ ni ba dò nú nǔ e Biblu ɖɔ dó lee ayǐ mɛ nɔ cí ɖò xá enɛ ɔ mɛ é wu.

Biblu-wlantɔ́ Ɛzla xlɛ́ ɖɔ jǐ nɔ ja bɔ gbɛmɛ nɔ fá nugbǒ ɖò sun Kisulɛvu tɔn mɛ. Ee Ɛzla ɖɔ ɖɔ mɛ lɛ kplé ɖó kpɔ́ ɖò Jeluzalɛmu “ɖò azǎn kogɔ ɔ sun tɛnnɛgɔ ɔ [Kisulɛvu] tɔn mɛ” é gudo é ɔ, é ɖɔ ɖɔ togun ɔ bǐ nɔ ‘sísɔ́ ɖó jǐ e ɖò jija wɛ magbokɔ é wutu.’ Mɛ e kplé lɛ é ɖesu ɖɔ dó lee ayǐ mɛ nɔ cí ɖò sun enɛ ɔ mɛ é wu bo ɖɔ: “Hwenu e jǐ nɔ ja magbokɔ é wɛ, bɔ è sixu nɔte ɖò kɔxo ǎ.” (Ezra 10:9, 13; Jérémie 36:22) Nǔ e wutu wɛ lɛngbɔnyitɔ́ e nɔ nɔ xá enɛ ɔ mɛ lɛ é nɔ tɛnkpɔn bɔ ye kpo kanlin yetɔn lɛ kpo ma nɔ nɔ kɔxo ɖò zǎnmɛ ɖò Woosun mɛ ǎ é nɛ.

É ɖò mɔ̌ có, Biblu ɖɔ ɖɔ lɛngbɔnyitɔ́ lɛ ɖò nukún kpé dó lɛngbɔhwan yetɔn lɛ wu wɛ ɖò gle mɛ ɖò zǎn e mɛ è jì Jezu é. Nugbǒ ɔ, Biblu-wlantɔ́ Luka xlɛ́ ɖɔ hwenu e è jì Jezu é ɔ, lɛngbɔnyitɔ́ lɛ “ɖò zǎn cɔ́ wɛ ɖò lɛngbɔ̌ yetɔn lɛ kɔn, ɖò gbehan mɛ” ɖò malin-malin dó Bɛteleyɛmu. (Luka 2:8-12) Ðǒ ayi wu ɖɔ lɛngbɔnyitɔ́ lɛ ɖò zǎn cɔ́ wɛ ɖò lɛngbɔ̌ yetɔn lɛ kɔn; ye nɔ ɖi sà kpo kanlin lɛ kpo ɖò kéze kpowun ǎ. Lɛngbɔhwan yetɔn lɛ ɖò gbehan mɛ ɖò zǎnmɛ. Eɖíe jǐ nɔ ja bɔ gbɛmɛ nɔ fá ɖò Woosun mɛ ɖò Bɛteleyɛmu è, bɔ nɛ̌ nǔ enɛ e Luka ɖɔ é ka sixu jɛ gbɔn? Eǒ, é sixu nyí mɔ̌ ǎ. Nǔ enɛ lɛ xlɛ́ céɖécéɖé ɖɔ è kún jì Jezu ɖò Woosun mɛ ó.a

Xó Mawu tɔn ɖɔ hwenu e Jezu kú é céɖécéɖé, amɔ̌, nǔ kpɛɖé jɛ é ɖɔ dó hwenu e è jì i é wu. Enɛ flín mɛ xó e Axɔsu Salomɔɔ ɖɔ é: “Nyikɔ ɖé nyɔ́ hú ami ɖagbe ɖagbe, bɔ kúzán nyɔ́ hú jijizán.” (Ecclésiaste 7:1) Enɛ wu ɔ, é ɖó na kpaca mǐ ɖɔ Biblu ɖɔ xó gègě dó sinsɛnzɔ́ Jezu tɔn kpo kú tɔn kpo wu, bo ka ɖɔ nǔ kpɛví ɖé dó jiji tɔn wu ǎ.