Jezu Setónú Hwebǐnu

Tónúsíse nú mɛjitɔ́ towe lɛ ka nɔ bɔwǔ nú we hwebǐnu à?— Hweɖelɛnu ɔ, é nɔ vɛwǔ. A ka tuùn ɖɔ Jezu setónú nú Jehovah kpo mɛjitɔ́ tɔn lɛ kpo bǐ à?— Kpɔ́ndéwú tɔn na d’alɔ we, bɔ enyi é na bo tlɛ vɛwǔ hweɖelɛnu ɔ, a na setónú nú mɛjitɔ́ towe lɛ. Nǔ mǐ ni kpɔ́n lee nǔ sixu nyí mɔ̌ gbɔn é.

Cobonu Jezu na wá ayikúngban jí ɔ, é ko nɔ jixwé kpo Tɔ́ tɔn Jehovah kpo. Amɔ̌, Jezu lɛ́ ɖó mɛjitɔ́ lɛ ɖò ayikúngban jí. Ye nɔ nyí Jozɛfu kpo Mali kpo. A ka tuùn lee ye huzu mɛjitɔ́ tɔn lɛ gbɔn é à?—

Jehovah zé gbɛ̀ Jezu tɔn sín jixwé bo sɔ́ dó Mali sín xomɛ, bɔ è na dó sixu jì i ɖò ayikúngban jí. Nǔjiwǔ ɖé wɛ enɛ nyí! Jezu sù ɖò Mali sín xomɛ lee yɛyɛví lɛ nɔ sù ɖò nɔ yetɔn lɛ xomɛ gbɔn é. Sun tɛnnɛ mɔ̌ gudo ɔ, è jì Jezu. Lee Mali kpo asú tɔn Jozɛfu kpo huzu mɛjitɔ́ Jezu tɔn lɛ ɖò ayikúngban jí fí gbɔn é nɛ.

Hwenu e Jezu ɖó xwè 12 kpowun é ɔ, é bló nǔɖe bɔ é xlɛ́ ɖɔ é yí wǎn nú Tɔ́ tɔn Jehovah tawun. Hwenu e é kpo mɛ tɔn lɛ kpo yì ɖu Dindinwayixwe ɖò Jeluzalɛmu é wɛ nǔ ɔ jɛ. Ee ye lɛkɔ wá xwè xwé é ɔ, Jozɛfu kpo Mali kpo ba Jezu kpò. A ka tuùn fí e é ɖè é à?—

Jozɛfu kpo Mali kpo yawǔ lɛkɔ wá yì Jeluzalɛmu, bo ba Jezu gbɔn fí bǐ. Ado hu ye tawun, ɖó ye mɔ ɛ ǎ wutu. Amɔ̌, azǎn atɔn gudo ɔ, ye wá yì mɔ ɛ ɖò tɛmpli ɔ mɛ! A ka tuùn nǔ e wu Jezu ɖò tɛmpli ɔ mɛ é à?— Ðó ɖò finɛ ɔ, é sixu kplɔ́n nǔ dó Tɔ́ tɔn Jehovah wu wutu wɛ. É yí wǎn nú Jehovah, bo jló na kplɔ́n nǔ e é na wà bo na hɛn xomɛ tɔn hun é. Jezu sù bo nyí mɛxo có, é nɔ setónú nú Jehovah hwebǐnu. Enyi é na bo tlɛ vɛwǔ n’i hweɖelɛnu, bo byɔ ɖɔ é ni jiya ɔ, é nɔ wà mɔ̌. Jezu ka lɛ́ setónú nú Jozɛfu kpo Mali kpo à?— Ɛɛn, Biblu ɖɔ é wà mɔ̌.

Etɛ kpɔ́ndéwú Jezu tɔn enɛ ka kplɔ́n we?— Enyi tónúsíse nú mɛjitɔ́ towe lɛ na bo tlɛ nɔ vɛwǔ hweɖelɛnu ɔ, a ɖó na nɔ wà mɔ̌. A ka na wà mɔ̌ à?—