Gudo Ninɔ nú Azɔ̌ Axɔ́suɖuto ɔ Tɔn Ðò Agun Mɛ kpo Gbɛ̀ ɔ Bǐ Mɛ Kpo

ÐÒ NǓ e Jezu ɖɔ ɖ’ayǐ dó azǎn gudogudo tɔn lɛ wu é sín jijɛnu linu ɔ, Kúnnuɖetɔ́ Jehovah tɔn lɛ ko jla wɛnɖagbe ɔ “kaka yì jɛ fí e gbɛ̀ ɔ kponu ɖó é.” (Mɛ. 1:8; Mat. 24:14) Bo na dó wà mɔ̌ ɔ, ye nɔ sɔ́ jlǒ dó zán hwenu yetɔn kpo hlɔnhlɔn yetɔn kpo dó nǔ gbigbɔ tɔn lɛ tamɛ. Ye ɖeji dó Jehovah wu ɖɔ é na kpé nukún dó azɔ̌gbɛ́ tɔn lɛ wu, enɛ wu ɔ, Axɔ́suɖuto Mawu tɔn kpó ɖò nukún mya nú ye wɛ jɛ nukɔn. (Mat. 6:25-34; 1 Kɔ. 3:5-9) Lè ɖěɖee enɛ nɔ hɛn wá lɛ é xlɛ́ vaan ɖɔ xomɛ Jehovah tɔn nɔ hun, b’ɛ nɔ kɔn nyɔna d’eji.

NUKÚNKPÍKPÉ DÓ AXƆ́SUÐUTO Ɔ SÍN NǓ LƐ WU GBƆN GBƐ̀ Ɔ BǏ MƐ

² Enyi mɛɖé lɛ ɖ’ayi Mawuxóɖiɖɔzɔ́ mǐtɔn wu, bo mɔ ɖɔ mǐ nɔ má Biblu lɛ kpo wema jinjɔn Biblu jí lɛ kpo vɔ̌nu ɔ, ye nɔ kanbyɔ ɖɔ: “Nɛ̌ nǔ ka sixu nyí mɔ̌ gbɔn?” Nǔgbo ɔ, Biblu lɛ kpo wema jinjɔn Biblu jí lɛ kpo ɖiɖetɔ́n nɔ ɖu akwɛ. Betɛli lɛ gbigbá kpo nukúnkpíkpé dó ye wu kpo nú devízɔ́watɔ́ ɖěɖee nɔ w’azɔ̌ ɖò wemazínmɔ lɛ jí lɛ é, nɔ kpé nukún dó Mawuxóɖiɖɔzɔ́ ɔ wu lɛ é, alǒ nɔ wà sinsɛnzɔ́ ɖò ali ɖevo lɛ nu bonu wɛnɖagbe ɔ na gbakpé lɛ é lɔmɔ̌ nɔ ɖu akwɛ. Gɔ́ na ɔ, è nɔ d’alɔ nukúnkpénuwutɔ́ lɛ, mɛsɛ́dó e è sɛ́dó gle ɔ mɛ lɛ é, gbexosin-alijitɔ́ titewungbe lɛ, kpo mɛ ɖevo e ɖò sinsɛnzɔ́ hwebǐnu tɔn bǔnɔ ɖé mɛ lɛ é kpo ɖò agbaza lixo, bonu ye na dó sixu kpó ɖò azɔ̌ yetɔn wà wɛ. É ɖò wɛn ɖɔ wɛnɖagbe ɔ jijla ɖò égbé, ɖò agun mɛ alǒ gbɔn gbɛ̀ ɔ bǐ mɛ, nɔ ɖu akwɛ tawun. Fitɛ è ka nɔ ba akwɛ enɛ lɛ bǐ sín?

³ Kpo xomɛhunhun kpo wɛ mɛ ɖěɖee Biblu kpinkplɔnmɛzɔ́ Kúnnuɖetɔ́ Jehovah tɔn lɛ tɔn nɔ jɛji na lɛ é, nɔ na nǔ dó nɔ gudo nú azɔ̌ enɛ e è nɔ wà gbɔn gbɛ̀ ɔ bǐ mɛ é. É ɖò mɔ̌ có, Kúnnuɖetɔ́ lɛ ɖesu wɛ nyí mɛ nukɔntɔn e nɔ nɔ gudo nú azɔ̌ mǐtɔn lɛ é; ye mɛ ɖé lɛ nɔ sɔ́ jlǒ dó sɛ́ nǔnina lɛ dó alaxɔ Kúnnuɖetɔ́ Jehovah tɔn lɛ tɔn e ɖò xá yetɔn mɛ é. Ye nɔ wà nǔ Mawu sɛntɔ́ hwexónu tɔn ɖěɖee na nǔ kpo xomɛ kpo, dó nɔ gudo nú fí e è na nɔ sɛn Jehovah ɖè é gbigbá lɛ é ɖɔhun. (Tín. 35:20-29; 1 Tan 29:9) Nǔnina ɖé lɛ nɔ nyí gǔ e è zé jó lɛ é, bɔ ɖevo lɛ nɔ nyí akwɛ klewun klewun ɖěɖee mɛ lɛ, agun lɛ, kpo lɛdo lɛ kpo nɔ na hwɛhwɛ lɛ é. Nú è xò nǔnina enɛ lɛ kplé ɔ, è nɔ mɔ akwɛ e na zɔ́n bɔ sinsɛnzɔ́ ɔ na kpó ɖò nukɔn yì wɛ lɛ é.

⁴ Kúnnuɖetɔ́ Jehovah tɔn lɛ nɔ mɔ ɖɔ wǔjɔmɛ ɖé wɛ é nyí ɖɔ emi ni zán akwɛ kpo nǔɖokan emitɔn ɖevo lɛ kpo dó nukɔnyiyi Mawuxóɖiɖɔzɔ́ ɔ tɔn tamɛ. Jezu kpo ahwanvu tɔn lɛ kpo ɖó gbǎví nǔnina tɔn ɖé, bɔ ye nɔ kpɔ́n mɛ dó kpé nukún dó akwɛzinzan yetɔn lɛ wu. (Jaan 13:29) Biblu ɖɔ nyɔnu ɖé lɛ xó, bɔ ye nɔ sɔ́ nǔ e ye ɖó lɛ é dó d’alɔ Jezu kpo ahwanvu tɔn lɛ kpo. (Mak. 15:40, 41; Luk. 8:3) Mɛ ɖěɖee jló ɖɔ wɛnɖagbe ɔ ni gbakpé, bo lɛ́ ba na ɖ’alɔ ɖò sinsɛnzɔ́ mɛsɛ́dó Pɔlu tɔn mɛ lɛ é na ɛ nǔ agbaza tɔn lɛ kpo wanyiyi kpo, bɔ é sù nukún tɔn mɛ tawun. (Fili. 4:14-16; 1 Tɛ. 2:9) Kúnnuɖetɔ́ Jehovah tɔn lɛ kpó ɖò sinsɛnzɔ́wiwa kpo kanɖodónǔwu kpo, gɔ́ nú alɔhundónanǔmɛ sín kpɔ́ndéwú hwexónu tɔn enɛ lɛ xwedó wɛ. Mɔ̌ mɛ ɔ, è nɔ kpéwú bo nɔ xwlé “sin e nɔ na gbɛ̀ mɛ ɔ” ayijlɔjlɔnɔ lɛ gbɔn fí lɛ bǐ “vɔ̌nu.”—Nǔɖe. 22:17.

NUKÚNKPÍKPÉ DÓ HUDO AGUN Ɔ TƆN LƐ WU

⁵ Nǔnina ɖěɖee è sɔ́ jlǒ dó na lɛ é mɛ wɛ è nɔ kpɔ́n dó kpé nukún dó akwɛzinzan agun ɔ tɔn lɛ wu. È nɔ yí agbǎnmɛkwɛ ǎ; mɔ̌ jɛn è ma nɔ lɛ́ gbò akwɛ nú mɛ, alǒ byɔ akwɛ ǎ é nɛ. È nɔ sɔ́ gbǎví nǔnina tɔn lɛ ɖó fí e mǐ nɔ bló kplé ɖè lɛ é, bɔ mɛ ɖokpo ɖokpo sixu na nǔ “lee é lin gbɔn ɖò ayi tɔn mɛ é.”—2 Kɔ. 9:7.

⁶ Akwɛ ɖěɖee è na nú akwɛzinzan agun tɔn lɛ é ɔ, Kpléxɔ Axɔ́suɖuto ɔ tɔn zinzan kpo nukúnkpíkpé d’ewu kpo takúnmɛ wɛ è nɔ zán ye dó jɛ nukɔn. Kplékplé mɛxo lɛ tɔn sixu wá gbeta ɔ kɔn ɖɔ è na sɛ́ akwɛ ɔ ɖě dó alaxɔ Kúnnuɖetɔ́ Jehovah tɔn lɛ tɔn e ɖò xá ɔ mɛ é, bɔ é na zán dó nukɔnyiyi azɔ̌ e wà wɛ è ɖè gbɔn gbɛ̀ ɔ bǐ mɛ é tɔn tamɛ. Agun ɔ wɛ na wá gbeta akwɛ nabi e é na nyí é tɔn kɔn. Mɔ̌ mɛ ɔ, agun gegě nɔ na nǔ hwɛhwɛ dó nɔ gudo nú azɔ̌ e wà wɛ è ɖè gbɔn gbɛ̀ ɔ bǐ mɛ é. Enyi mɛ bǐ ɖò acéjí dó hudo ɖěɖee nɔ wá tíìn ɖò agun ɔ mɛ sín hweɖenu jɛ hweɖenu lɛ é wu ɔ, ɖɔnúese e kúnkplá nǔnina lɛ é sɔ́ ɖó na ɖò dandan hwebǐnu ǎ.

NUKÚNKPÍKPÉ DÓ NǓNINA LƐ WU

⁷ Ðò kplé ɖokpo ɖokpo gudo ɔ, nɔví sunnu we na nɔ bɛ́ akwɛ ɖebǔ e ɖò gbǎví nǔnina tɔn lɛ mɛ lɛ é, bo na nɔ wlan ɖ’ayǐ. (2 Axɔ́. 12:10, 11; 2 Kɔ. 8:20) Kplékplé mɛxo lɛ tɔn na bló tuto e sɔgbe é, bɔ è na kpé nukún dó akwɛ enɛ lɛ wu kaka jɛ hwenu e è na sɛ́ ye dó alaxɔ mɛ, alǒ zán ye nú hudo agun ɔ tɔn lɛ é. Nɔví sunnu e nɔ kpé nukún dó akwɛ agun ɔ tɔn lɛ wu é nɔ sɔnǔ nú gbeɖiɖó ɖé sunmɛ sunmɛ, bɔ è nɔ xwlé agun ɔ, lobɔ ɖò sun atɔn mɛ tɛgbɛ ɔ, titoblonunutɔ́ kplékplé mɛxo lɛ tɔn tɔn nɔ bló tuto bɔ è nɔ gbéjé akwɛzinzan lɛ kpɔ́n.

AKWƐZINZAN LƐDO Ɔ TƆN LƐ

⁸ Akwɛzinzan ɖěɖee kpléɖókpɔ́ lɛdo tɔn lɛ kpo lɛdo ɔ sín nǔ ɖevo lɛ kpo nɔ byɔ lɛ é ɔ, Kúnnuɖetɔ́ ɖěɖee ɖò lɛdo ɔ mɛ lɛ é wɛ nɔ na. È nɔ sɔ́ gbǎví nǔnina tɔn lɛ ɖó nɔtɛn kpléɖókpɔ́ tɔn lɛ, bonu è na dó sixu sɔ́ jlǒ dó na nǔ lɛdo ɔ. Gɔ́ na ɔ, bo na dó kpé nukún dó akwɛzinzan e ɖò te lɛ é wu ɔ, agun lɛ sixu na nǔnina ɖò hwe ɖevo lɛ nu.

⁹ Nú é nyɔ́ bló ɔ, lɛdo lɛ ɖó na kpéwú bo ɖeɖɛ akwɛzinzan ɖebǔ e ɖò dandan lɛ é, bo na na kpoɖeji ɔ dó azɔ̌ e wà wɛ è ɖè gbɔn gbɛ̀ ɔ bǐ mɛ é kanta. Enyi akwɛ e ɖò lɛdo ɔ sín kɔ́ntu mɛ é ma sukpɔ́, bonu è na sú akwɛzinzan kpléɖókpɔ́ ɔ tɔn, alǒ akwɛ ɖěɖee è na zán jɛ nukɔn nú kpléɖókpɔ́ ɖevo é, ɖi akwɛ e è na sɔ́ ɖ’ayǐ bo na dó sixu wá mɔ nɔtɛn ɔ zán é ǎ ɔ, nukúnkpénuwutɔ́ lɛdo tɔn sixu byɔ ɖɔ è ni tinmɛ nú agun lɛ ɖɔ è jɔwǔ ye bɔ ye na jɔ fún d’emɛ. Kplékplé mɛxo lɛ tɔn ɖokpo ɖokpo na ɖɔ xó ɖó kpɔ́ d’eji, bo na kpɔ́n akwɛ nabi e wu agun ɔ na kpé, bo na na lɛdo ɔ é. Enɛ gudo ɔ, ye na sɔ́ xwlé agun ɔ, bɔ agun ɔ na yí gbè na hwɛ̌.

¹⁰ Enyi akwɛxó lɛ wá xwetɔ́n b’ɛ byɔ ɖɔ mɛxo lɛdo ɔ tɔn lɛ ni kɛnu d’ewu ɔ, è na bló kplé ɖé xá mɛxo lɛdo ɔ tɔn lɛ ɖò kpléɖókpɔ́ lɛdo tɔn ɖé sín azǎn jí. Cobonu è na zán akwɛ ɖevo ɖebǔ gbɔn vo nú akwɛzinzan lɛdo ɔ tɔn cyancyan lɛ ɔ, mɛxo lɛ wɛ ɖó na wá gbeta lɛ kɔn hwɛ̌. È ɖó na wlan gbeta enɛ lɛ ɖ’ayǐ, bɔ akwɛ nabi e zán gbé è ja é pɛ́ɛ na ɖ’emɛ, lobɔ è na xwlé mɛxo lɛ bonu ye na yí gbè na, hweɖebǔnu e è ja lɛdo ɔ sín akwɛ lɛ zán gbé é.

¹¹ Sín hweɖenu jɛ hweɖenu ɔ, è nɔ bló tuto bɔ è nɔ gbéjé akwɛzinzan lɛdo ɔ tɔn lɛ kpɔ́n.

NUKÚNKPÍKPÉ DÓ WAMAMƆNƆ LƐ WU

¹² Linlin e wu Jezu kpo ahwanvu tɔn lɛ kpo ɖó gbǎví nǔnina tɔn ɖé é ɖokpo wɛ nyí ɖɔ ye na d’alɔ wamamɔnɔ lɛ. (Mak. 14:3-5; Jaan 13:29) Klisanwun sín azɔ̌ enɛ ɔ ko fó ǎ, ɖó Jezu ɖɔ: “Wamamɔnɔ lɛ ɖò mi mɛ tɛgbɛ.” (Mak. 14:7) Nɛ̌ Kúnnuɖetɔ́ Jehovah tɔn lɛ ka nɔ wà azɔ̌ enɛ gbɔn ɖò égbé?

¹³ Hweɖelɛnu ɔ, gbejinɔtɔ́ e ɖò agun ɔ mɛ lɛ é sixu wá ɖó hudo nǔ agbaza tɔn lɛ tɔn ɖó mɛxoxwe, gǎnmaɖó, alǒ nǔ ɖevo e zɛ nǔwukpíkpé yetɔn wu lɛ é wu. Hagbɛ̌ xwédo tɔn, hɛ̌nnumɔ, kpo mɛ ɖevo e wá mɔ nǔ jɛ wu ɖɔ hudo mɔhun tíìn lɛ é kpo sixu d’alɔ. Enɛ sɔgbe xá xó e mɛsɛ́dó Jaan ɖɔ é: “Enyi mɛɖé jɛ dɔkun, bo mɔ ɖɔ nǔɖe hudo nɔví emitɔn, bo ka ɖò nukún syɛn dó è wɛ ɔ, nɛ̌ wanyiyi Mawu tɔn ka sixu nɔ mɛ enɛ sín ayi mɛ gbɔn? Vǐ ce lɛ mi, mi ma nú mǐ ni nɔ yí wǎn nú mɛ ɖò nu kpo xó víví kpo kpowun ó; loɔ, wanyiyi titewungbe e nɔ ɖè éɖée xlɛ́ gbɔn nǔwiwa lɛ mɛ ɔ wɛ mǐ ɖó na ɖó.” (1 Jaan 3:17, 18; 2 Tɛ. 3:6-12) Mawu sinsɛn nǔgbo ɔ nɔ byɔ ɖɔ è ni kpé nukún dó gbejinɔtɔ́ ɖěɖee sixu wá ɖó hudo nǔ agbaza tɔn lɛ tɔn lɛ é wu.—Ja. 1:27; 2:14-17.

¹⁴ Ðò wema nukɔntɔn e mɛsɛ́dó Pɔlu wlan sɛ́dó Timɔtée é mɛ ɔ, é tinmɛ lee è sixu d’alɔ mɛ e jɛxa lɛ é gbɔn é. A sixu xà wěɖexámɛ tɔn ɖò 1 Timɔtée 5:3-21 mɛ. Klisanwun ɖokpo ɖokpo wɛ ɖó azɔ̌ taji ɔ, bo na kpé nukún dó xwédo éɖesunɔ tɔn sín hudo lɛ wu. Mɛxomɔ lɛ, alǒ mɛ e ma ɖó gǎn ǎ lɛ é ɔ, vǐ yetɔn lɛ, vivǔ yetɔn lɛ, alǒ hɛ̌nnumɔ ɖevo e sɛkpɔ́ ye lɛ é wɛ ɖó na d’alɔ ye. Hweɖelɛnu ɔ, acɛkpikpa lɛ, alǒ tutoblonunu ɖé lɛ nɔ bló tuto alɔdómɛ tɔn, enɛ wu ɔ, hɛ̌nnumɔ mɛ e ɖò hudo ɔ mɛ é tɔn lɛ, alǒ mɛ ɖevo lɛ sixu d’alɔ ɛ bɔ é na sɔ́ nyikɔ ɖ’ayǐ nú alɔdómɛ mɔhun. Ninɔmɛ ɖé sixu wá xwetɔ́n bɔ é na byɔ ɖɔ agun ɔ blebu ni lin tamɛ dó alɔdidó nɔví sunnu alǒ nɔví nyɔnu e ko sɛn Jehovah kpo gbejininɔ kpo nú xwè mɔkpan, bo ka wá ɖò hudo mɛ lɛ é jí. Enyi mɛ mɔhun lɛ sín hagbɛ̌ xwédo tɔn lɛ, alǒ hɛ̌nnumɔ ɖevo lɛ ma ɖè, bo na d’alɔ ye ǎ, lobɔ acɛkpikpa tò ɔ tɔn lɛ ma ka ɖó tuto mɔhun ɖé ǎ ɔ, kplékplé mɛxo lɛ tɔn sixu na alixlɛ́mɛ e jɛxa lɛ é, bɔ è na d’alɔ ɖò ali ɖé lɛ nu. Klisanwun lɛ nɔ mɔ ɖɔ wǔjɔmɛ ɖé wɛ é nyí ɖɔ emi ni má nǔɖokan emitɔn lɛ xá mɛ ɖěɖee ɖò hudo mɛ lɛ é.

¹⁵ Yadonúmɛ, ahwan, ayikúngban dánwǔ, tɔgbamɛ, adɔ, alǒ nǔ nyanya ɖevo e nɔ jɛ ɖò azǎn gudogudo tɔn elɔ lɛ mɛ lɛ é sixu zɔ́n bɔ nɔví sunnu kpo nɔví nyɔnu kpo gegě wá jɛ hudo mɛ. (Mat. 24:7-9) É sixu wá jɛ bɔ agun ɔ sín hagbɛ̌ lɛ na ɖó nǔ ɖě bo na dó d’alɔ yeɖée lɛ ǎ, enɛ wu ɔ, Hagbɛ̌ Alixlɛ́mɛtɔ́ ɔ nɔ bló tuto bo nɔ zán nǔ e nɔví ɖěɖee ɖò fí ɖevo lɛ é na lɛ é dó sú hudo lɛ sín dò. Enɛ sɔgbe xá lee Klisanwun Azíi Kpɛví ɔ tɔn lɛ na nǔɖuɖu nɔví Judée tɔn lɛ, hwenu e adɔ ɖé tɔ́n é gbɔn é. (1 Kɔ. 16:1-4; 2 Kɔ. 9:1-5) Kpɔ́ndéwú yetɔn xwixwedó nɔ dó zǒgbe jí ɖɔ mǐ yí wǎn nú nɔví lɛ, bo nɔ lɛ́ ɖexlɛ́ ɖɔ mǐ nyí Jezu Klisu sín ahwanvu nǔgbo lɛ.—Jaan 13:35.

WEMA LƐ MÍMÁ

¹⁶ Biblu lɛ kpo wema jinjɔn Biblu jí lɛ kpo nɔ wà azɔ̌ taji ɖé ɖò wɛn Axɔ́suɖuto ɔ tɔn jijla linu. Ðò kpaa mɛ ɔ, kplékplé mɛxo lɛ tɔn nɔ sɔ́ devízɔ́watɔ́ sinsɛnzɔ́wiwa tɔn ɖé, b’ɛ nɔ kpé nukún dó wema agun ɔ tɔn lɛ wu. Nɔví sunnu enɛ lɛ nɔ ylɔ́ azɔ̌ yetɔn ɖɔ nǔjɔnǔ. Ye nɔ sɔ́ kɛ́n wema lɛ tɔn ganji, bɔ ee na kpé agun ɔ é nɔ ɖò ayǐ.

¹⁷ Ðó mǐ nyí Klisanwun e zé mǐɖée jó nú Mawu lɛ é wutu ɔ, mǐ mɔ nǔ jɛ wu ɖɔ hwenu mǐtɔn, nǔwukpíkpé taglomɛ tɔn kpo agbaza tɔn kpo mǐtɔn, nǔtuùntuùn mǐtɔn kpo nǔɖokan mǐtɔn lɛ kpo, kaka jɛ gbɛ̀ mǐtɔn jí nyí nǔnina e gosin Mawu gɔ́n lɛ é, bɔ mǐ ɖó na zán ye ɖò sinsɛnzɔ́ tɔn mɛ. (Luk. 17:10; 1 Kɔ. 4:7) Enyi mǐ nɔ zán nǔ enɛ lɛ e mǐ ɖó é bǐ ganji ɔ, mǐ nɔ ɖexlɛ́ ɖɔ wanyiyi e mǐ ɖó nú Jehovah é gɔ́ngɔ́n tawun. Mǐ jló na sɔ́ nǔ xɔ akwɛ mǐtɔn lɛ dó kpa susu nú Jehovah, lobo tuùn ɖɔ nǔ ɖebǔ e è na, bo dó xlɛ́ ɖɔ è zé mɛɖée jó n’i kpo ayi bǐ kpo é nɔ hun xomɛ n’i. (Nǔx. 3:9; Mak. 14:3-9; Luk. 21:1-4; Kolo. 3:23, 24) Jezu ɖɔ: “Lee un na acɛ mi vɔ̌nu ɔ, mi lɔmɔ̌ mi bo wà nǔ lɛ bǐ vɔ̌nu.” (Mat. 10:8) Enyi mǐ nɔ zán mǐɖesunɔ kpo nǔ e mǐ ɖó lɛ é kpo ɖò sinsɛnzɔ́ Jehovah tɔn mɛ ɔ, mǐ nɔ ɖó awǎjijɛ ɖaxó.—Mɛ. 20:35.