NǓKPƆ́NNÚMƐ 18

Nǔxwlémɛ ɔ Kplɔ́n Nǔ Tóɖówetɔ́ Lɛ

1 Kɔlɛntinu lɛ 9:19-23

SIN SƐ̀ XWE NA: Blǒ bonu tóɖówetɔ́ lɛ ɖesunɔ ni lin tamɛ dó xóta ɔ jí, lobo mɔ ɖɔ emi kplɔ́n nǔ xɔ akwɛ ɖé.

Lin tamɛ dó nǔ e tóɖówetɔ́ lɛ ko tuùn ɖ’ayǐ lɛ é jí. Ma vɔ́ nǔ e ye ko sè kpɔ́n lɛ é ɖɔ kpowun ó, loɔ, d’alɔ ye bonu ye ni mɔ nukúnnú jɛ xóta ɔ wu ɖò ali yɔyɔ̌ ɖé nu.

Yawǔ gbɔn nǔ e ye ko tuùn lɛ é jí, amɔ̌, zɔn dɛ̌dɛ̌ hwenu e a ɖò linlin yɔyɔ̌ lɛ xwlé ye wɛ é.
Ba dò nú nǔ bo lɛ́ lin tamɛ kpɔ́n. Enyi é nyɔ́ bló hǔn, ma zán nǔ e ko má dó mɛ lɛ é alǒ nǔ e jɛ yaɖeyaɖe lɛ é gegě tɔn dó jlɛ́ linlin taji lɛ dó nǔ wu ó. Lin tamɛ kpɔ́n ganji dó azɔ̌ towe kpo kancica e é ɖó xá nǔ e jɛ bɔ a jló na ɖɔ lɛ é kpo jí.

Ee a na ɖò azɔ̌ ɔ gbéjé kpɔ́n wɛ é ɔ, kan nǔ lěhun lɛ byɔ hwiɖée dó lin tamɛ kpɔ́n d’eji: ‘etɛ, etɛwu, hwetɛnu, fitɛ, mɛ̌, kpo nɛ̌ kpo.’ Kan nǔ enɛ lɛ ɖé lɛ byɔ bo lɛ́ na xósin yetɔn ɖò nǔxwlémɛ towe bǐ hwenu, bonu mɛkplɔnkplɔn towe na ɖò gbɛ̀.
Xlɛ́ lee wɛn towe nyɔ́ zán gbɔn é. Tinmɛ lee nǔkplɔnmɛ Mawuxówema ɔ tɔn lɛ sixu d’alɔ tóɖówetɔ́ lɛ ɖò gbɛzinzan yetɔn ayihɔngbe ayihɔngbe tɔn mɛ gbɔn é. Ðɔ xó dó ninɔmɛ, linlin, kpo nǔwiwa kpo tawun tawun ɖěɖee ɖò taji nǔ tóɖówetɔ́ lɛ é jí.