A Sixu Nyí Xɔ́ntɔn Jehovah Tɔn

Jehovah ba ɖɔ a ni tuùn emi ganji. Etɛwu? É nɔ ɖó nukún ɖɔ bǎ e mɛ a kplɔ́n nǔ dó jijɔ emitɔn lɛ, ali emitɔn lɛ, kpo linlin emitɔn kpo wu yì ɖó é ɔ, bǎ enɛ mɛ wɛ hwi na ba na zun xɔ́ntɔn xá emi yì ɖó. A ka sixu nyí xɔ́ntɔn Mawu tɔn nǔgbo à? (Xà Jaki 2:23.) Etɛ a ka sixu wà bo na huzu xɔ́ntɔn tɔn? Biblu na xósin nú nǔkanbyɔ enɛ lɛ, bo lɛ́ tinmɛ nǔ e wu xɔ́ntɔn zunzun xá Jehovah wɛ nyí kancica taji hugǎn e a sixu ɖó é.

1. Etɛ Jehovah ka ylɔ́ we ɖɔ hwi ni wà?

“Sɛkpɔ́ Mawu; enɛ ɔ é na sɛkpɔ́ [we].” (Jaki 4:8) Etɛ ka nyí tinmɛ enɛ tɔn? Jehovah ɖò ylɔylɔ́ we wɛ ɖɔ hwi ni wá huzu xɔ́ntɔn emitɔn. Mɛɖé lɛ sixu mɔ ɖɔ é na vɛwǔ bɔ emi na zun xɔ́ntɔn xá Mawu, ɖó emi kún nɔ mɔ ɛ ó. Amɔ̌, ɖò Xó Jehovah tɔn Biblu ɔ mɛ ɔ, é ɖè nǔ e sín hudo mǐ ɖó bo na tuùn jijɔ tɔn lɛ bá dó sixu sɛkpɔ́ ɛ lɛ é bǐ xlɛ́. Nú mǐ nɔ xà wɛn e Mawu sɛ́dó mǐ bɔ é ɖò Biblu ɔ mɛ é ɔ, mǐ na bo ma tlɛ mɔ Jehovah kpɔ́n ǎ ɔ, mǐ kpo é kpo na vɛ́ d’eji.

2. Etɛwu Jehovah wɛ ka nyí xɔ́ntɔn ɖagbe hugǎn e a sixu ɖó é?

Mɛɖé yí wǎn nú we sɔ Jehovah ǎ. É nɔ ba ɖɔ a ni ɖó awǎjijɛ, bo nɔ lɛ́ xoɖɛ sɛ́dó emi hweɖebǔnu e a ɖó hudo alɔdó tɔn é. A sixu ‘zlɔ́n nǔ e ɖò linkpɔ́n nyí nú we wɛ lɛ bǐ sín agban ɖó jǐ tɔn, ɖó é ɖò nukún kpé dó wǔ we wɛ.’ (1 Piyɛ́ɛ 5:7) Jehovah nɔ ɖò gbesisɔmɛ hwebǐnu bo na nɔ gudo nú xɔ́ntɔn tɔn lɛ, dó gbɔ nú ye, bo lɛ́ ɖótó ye.—Xà Ðɛhan 94:18, 19.

3. Etɛ Jehovah ka nɔ ɖó nukún ɖò xɔ́ntɔn tɔn lɛ sí?

Jehovah yí wǎn nú gbɛtɔ́ lɛ bǐ ɖò kpaa mɛ, “bo ka nɔ zun xɔ́ntɔn xá mɛ e nɔ wà nǔ jlɔjlɔ lɛ.” (Nǔnywɛxó 3:32) Jehovah nɔ ɖó nukún ɖò xɔ́ntɔn tɔn lɛ sí ɖɔ ye ni nɔ tɛ́n kpɔ́n bo nɔ wà nǔ e nɔ nyɔ́ nukún emitɔn mɛ lɛ é, bo nɔ nyi alɔ nú nǔ ɖěɖee emi ma nɔ ba ǎ lɛ é. Mɛɖé lɛ sixu mɔ ɖɔ emi kún sixu zán gbɛ̀ sɔgbe xá nǔgbododó Jehovah tɔn e kúnkplá nǔ ɖagbe kpo nǔ nyanya kpo lɛ é gbeɖé ó. É ɖò mɔ̌ có, nǔblawukúnúmɛtɔ́ wɛ Jehovah nyí. É nɔ yí mɛ ɖebǔ e yí wǎn n’i nǔgbo nǔgbo bo nɔ wà nǔ e wu é kpé é bǐ bo na dó hɛn xomɛ tɔn hun é.—Ðɛhan 147:11; Mɛsɛ́dó 10:34, 35.

BA DÒ NÚ NǓ D’EJI

4. Ablaxamu nyí xɔ́ntɔn Jehovah Tɔn

Tan Biblu tɔn e kúnkplá Ablaxamu (ee è nɔ lɛ́ ylɔ́ ɖɔ Ablamu) é d’alɔ mǐ bɔ mǐ mɔ nukúnnú jɛ nǔ e xɔ́ntɔn zunzun xá Mawu nyí é mɛ. Xà nǔ dó Ablaxamu wu ɖò Bǐbɛ̌mɛ 12:1-4 mɛ. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ Jehovah ka byɔ Ablaxamu ɖɔ é ni wà?

• Akpá tɛ Jehovah ka dó n’i?

• Etɛ Ablaxamu ka wà hwenu e Jehovah na ɛ alixlɛ́mɛ lɛ é?

5. Nǔ e Jehovah nɔ ɖó nukún ɖò xɔ́ntɔn tɔn lɛ sí é

Hwɛhwɛ ɔ, mǐ nɔ ɖó nukún nǔɖe lɛ ɖò xɔ́ntɔn mǐtɔn lɛ sí.

• Etɛ lɛ mɔ̌ a ka nɔ ba ɖɔ xɔ́ntɔn towe lɛ ni nɔ wà nú we?

Xà 1 Jaan 5:3, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ Jehovah ka nɔ ba ɖò xɔ́ntɔn tɔn lɛ sí?

Bonu mǐ na setónú nú Jehovah ɔ, é sixu byɔ ɖɔ mǐ na huzu walɔ alǒ jijɔ mǐtɔn lɛ. Xà Ezayíi 48:17, 18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu Jehovah ka nɔ byɔ ɖò xɔ́ntɔn tɔn lɛ sí ɖɔ ye ni nɔ bló huzuhuzu lɛ?

6. Etɛ Jehovah ka nɔ wà nú xɔ́ntɔn tɔn lɛ?

VIDEO: Jehovah Wà Ðagbe nú Mì Tawun (3:20)

• Nɛ̌ Jehovah ka d’alɔ nawe e ɖò video ɔ mɛ é bɔ é ɖí xwi xá linlin masɔgbe lɛ gbɔn?

Xà Ezayíi 41:10, 13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ sín akpá Jehovah ka dó ɖɔ emi na bló nú xɔ́ntɔn emitɔn lɛ bǐ?

• A ka lin ɖɔ Jehovah na nyí Xɔ́ntɔn ɖagbe ɖé à? Etɛwu?

7. Xɔ́ntɔn zunzun xá Jehovah nɔ byɔ xóɖɔɖókpɔ́

Xóɖɔɖókpɔ́ nɔ zɔ́n bɔ xɔ́ntɔn lɛ nɔ vɛ́ d’eji. Xà Ðɛhan 86:6, 11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ mǐ ka sixu ɖɔ xó ɖó kpɔ́ xá Jehovah gbɔn?

• Nɛ̌ Jehovah ka nɔ ɖɔ xó ɖó kpɔ́ xá mǐ gbɔn?

ETƐ LƐ A KA KPLƆ́N?

Jehovah jló na nyí Xɔ́ntɔn towe. É na d’alɔ we bɔ a na sɛkpɔ́ ɛ.

Vɔ̌gbɔnji

• Nɛ̌ Jehovah ka nɔ d’alɔ xɔ́ntɔn tɔn lɛ gbɔn?

• Etɛwu Jehovah ka nɔ byɔ xɔ́ntɔn tɔn lɛ ɖɔ ye ni nɔ bló huzuhuzu lɛ?

• A ka nɔ lin ɖɔ Jehovah nɔ ɖó nukún nǔ zɛ xwé wu ɖò xɔ́ntɔn tɔn lɛ sí wɛ à? Etɛwu?

KÍJÉ

Nɛ̌ xɔ́ntɔn zunzun xá Mawu ka sixu hɛn lè wà nú we ɖò gbɛzán towe mɛ gbɔn?

“Jehovah: Mawu E É Jɛxa Ðɔ È Ni Tuùn É” (Atɔxwɛ [Gungbe] 15 février 2003)

Kpɔ́n lee a sixu huzu xɔ́ntɔn Mawu tɔn gbɔn é.

“Nɛ̌ Un ka Sixu Huzu Xɔ́ntɔn Mawu Tɔn Gbɔn?” (Les jeunes s’interrogent. Réponses pratiques, Akpáxwé 2gɔ́, wemata 35)

Kpɔ́n nǔ e wu nawe ɖé wá mɔ ɖɔ xɔ́ntɔn e emi zun xá Jehovah é xɔ gbɛ̀ nú emi é.

“Un Jló Na Kú Ǎ!” (Atɔxwɛ No. 1 2017)

Ðǒtó nǔ e mɛ winnyawinnya lɛ ɖɔ dó lee nǔ cí nú ye dó Jehovah wu é wu é.

Etɛ Xɔ́ntɔn Zunzun Xá Mawu ka Nyí? (1:46)