Nǔ lɛ́ ní bɔkun

Nǔ e Jezu wa é

VIDEO: Jezu jlɛ́ nukún e Tɔ́ mǐtɔn nɔ kpé mǐ wú é dó nǔ wú

1. Kpɔ́n VIDEO ɔ, alǒ xa Matíe 6:25-27. Énɛ́ gúdo hǔn, lin tamɛ dó nǔkanbyɔ́ élɔ́ lɛ́ jí:

1. Nǔjlɛ́dónǔwú tɛ́ Jezu ka zán dó xlɛ́ nukún e Tɔ́ mǐtɔn nɔ kpé dó mǐ wú é?

2. Jezu tuun nǔ gěgé dó xɛ lɛ́ wú có, gǒflɛ́mɛ e bɔkun é tɛ́ jí é ka sɔ́ ayi ɖó? Étɛ́wú wlɛnwín énɛ́ ka w’azɔ̌?

Étɛ́ kpɔ́ndéwú Jezu tɔn ka sixú kplɔ́n mǐ?

2. Ényí mǐ nɔ kplɔ́n nǔ mɛ lɛ́ ɖo ali ɖé nu, b’ɛ nɔ bɔkun ɔ, yě ná flín nǔ e mǐ kplɔ́n yě lɛ́ é, bɔ nǔkplɔ́nmɛ mǐtɔn ná byɔ́ ayi yětɔn mɛ.

Xwedó kpɔ́ndéwú Jezu tɔn

3. Ma nɔ ɖɔ xó dín ó. Ma nɔ wlí nǔ e a tuun dó xóta ɖé wú é bǐ ɖɔ ó, é nyɔ́ wa hǔn, nɔ sɔ́ ayi ɖó nǔ e ɖo nǔkplɔ́nkplɔ́nwéma ɔ mɛ é jí. A kan nǔ byɔ́ hǔn, nɔ ɖó suúlu, bo nɔ nɔ te nú nǔkplɔ́ntɔ́ towe ní nɔ ná xósin. Ényí é ma tuun xósin ɔ ǎ, alǒ xó e é ɖɔ é sɔ́ ta nǔkplɔ́nmɛ Biblu tɔn lɛ́ hǔn, zǎn nǔkanbyɔ́ ɖěvo lɛ́ dó zɔ́n tamɛ lin i. Nǔkplɔ́ntɔ́ towe mɔ nǔ jɛ nǔ tají ɔ wú hǔn, mi yi nukɔn.

4. D’alɔ nǔkplɔ́ntɔ́ towe nú é ní sɔ́ nǔ yɔ̌yɔ́ e é kplɔ́n lɛ́ é cá dó nǔ e é ko tuun lɛ́ é nu. Ði kpɔ́ndéwú ɔ, cóbónú mi ná bɛ́ nǔkplɔ́nkplɔ́n e ɖɔ xó dó fínfɔ́n sín kú wú é ɔ, a sixú vɔ́ nǔ e nǔkplɔ́ntɔ́ ɔ ko tuun dó ninɔmɛ mɛkúkú lɛ́ tɔn wú é jí gbɔn xá ɛ kléwún.

5. Zǎn nǔjlɛ́dónǔwú lɛ́ ganjí. Cóbónú a ná zán nǔjlɛ́dónǔwú ɖé hǔn, kanbyɔ́ hwiɖée ɖɔ:

1. ‘Nǔjlɛ́dónǔwú ɔ ka bɔkun a?’

2. ‘É ka ná bɔ wǔ nú nǔkplɔ́ntɔ́ ce, b’ɛ ná mɔ nǔ jɛ mɛ a?’

3. ‘É ka ná d’alɔ nǔkplɔ́ntɔ́ ce, b’ɛ ná flín nǔ tají ɔ, b’ɛ ná nyí nǔjlɛ́dónǔwú ɔ kɛ́ɖɛ́ ǎ a?’