Lee È Na Zán Tavo Alǒ Nǔ Kɛkɛví Ðɔhun E Jí È Tɛ́ Wema lɛ Ðó É Dó Ðekúnnu Gbɔn É
Nǔ e ko jɛ lɛ é xlɛ́ ɖɔ tavo alǒ nǔ kɛkɛví ɖɔhun e jí è tɛ́ wema lɛ ɖó é zinzan dó ɖekúnnu nɔ dɔn ayijlɔjlɔnɔ lɛ wá nugbǒ ɔ mɛ. (Jaan 6:44) Enɛ wu wɛ è dó wusyɛn lanmɛ nú mɛxo agun tɔn lɛ ɖɔ ye ni bló kúnnuɖiɖe agbawungba tɔn sín tuto ɖò fí ɖěɖee afɔzɔntɔ́ lɛ nɔ sukpɔ́ ɖè bo ɖò agun yetɔn sín acɛ mɛ lɛ é. Ðó nǔ enɛ lɛ e jí è nɔ tɛ́ wema lɛ ɖó é ma nɔ nɔ fí ɖokpo ǎ wutu ɔ, hwɛhwɛ ɔ, é nɔ ɖò dandan ɖɔ è ni byɔ gbè acɛkpikpa lɛ ǎ. Mɛ̌ mɛ̌ e ka jɛxa bo na ɖ’alɔ ɖ’emɛ? Wɛnjlatɔ́ ɖěɖee ayi yetɔn ɖò te, bɔ ye ɖó jujɔ ɖagbe, bo lɛ́ ɖó nǔwukpikpé xóɖɔɖókpɔ́ tɔn lɛ é wɛ. Bonu é na kpa wɛnjlatɔ́ lɛ ɔ, nǔ ɖěɖee ye ɖó na wà kpo ɖěɖee ye ma ɖó na wà ǎ é kpo ɖé lɛ ɖíe.
Nǔ E È Ðó Na Wà lɛ É:
• Nɔ dɔn aligbɔntɔ́ lɛ, nɔ dó gbè ye, nɔ d’alɔ ye. Wɛnjlatɔ́ ɖé lɛ nɔ ko nǔ ɖò nu kpá kpo akpàkpà sɔ́ mɛ kpo bo nɔ dó gbè mɛ kpo xomɛnyínyɔ́ kpo. Enyi aligbɔntɔ́ ɖé nyì kɔ kpɔ́n nǔ e è tɛ́ lɛ é ɔ, a sixu ɖɔ: “Mi sixu sɔ́ nǔ ɖebǔ e jló mi é.”
• Nɔ nɔ zɔ zaan nú nǔ e è tɛ́ é. Ðò fí ɖé lɛ ɔ, wɛnjlatɔ́ lɛ mɔ ɖɔ enyi è ma sɛkpɔ nǔ e è tɛ́ é tútútú ǎ ɔ, é nɔ kpa mɛ. Mɛ ɖevo lɛ mɔ ɖɔ wlɛnwín enɛ nɔ zɔ́n bɔ aligbɔntɔ́ e nɔ xò teninɔ kpɔ́n lɛ é nɔ nɔte, enɛ wu ɔ, ye nɔ nɔ zɔ zaan bo nɔ ɖò te kpɔ́n mɛ e na sɛkpɔ nǔ ɔ é. Enyi mɛɖé sɛkpɔ nǔ e è tɛ́ é hǔn, tɛnkpɔn bo jɛ xó ɖɔ ɖó kpɔ́ xá ɛ jí, vlafo gbɔn nǔ elɔ kinkanbyɔ ɛ gblamɛ: “Mi ka ko lin nǔ kpɔ́n dó nùkanbyɔ elɔ jí kpɔ́n à?”
• Nɔ zán Biblu hwɛhwɛ lee é nyɔ́ bló gbɔn é.
• Nɔ tinmɛ tuto Biblu kplɔnkplɔn tɔn nú mɛɖebǔ e sɔ́ wema nùkplɔnkplɔn tɔn mǐtɔn lɛ ɖě é, ɖi wema Biblu Kplɔ́n Mɛ. Byɔ ɛ ɖɔ emi na xò video Etɛwu È ka Ðó Na Kplɔ́n Biblu? n’i ɖò alokan alǒ nǔ mɔhun ɖevo jí.
• Enyi é nyɔ́ bló hǔn, nɔ yí mɛ e ɖè jlǒ xlɛ́ lɛ é sín adlɛsi. Enyi mɛ ɔ ma nɔ nɔ fí e agun towe ɖó acɛ dó é ǎ hǔn, wlǎn nǔ dó Veuillez suivre l’intérêt (S-43) mɛ, bo yawu sɔ́ jó nú wěgbójínɔtɔ́ agun ɔ tɔn.
Nǔ E È Ma Ðó Na Wà Ǎ lɛ É:
• Ma nɔ nylahun, ɖɔ emitɔn jí jɛn na gbó ɖó, alǒ jinjɔn nǔ e è tɛ́ é kɔn nǔcɔtɔ́ ɖɔhun ó.
• Ma nɔ kpɔ́n kúnnuɖiɖe alɔkpa enɛ dó mɔ wema lɛ mímá sín wlɛnwín kpowun ó. Enyi mǐ ɖò sinsɛnzɔ́ ɔ mɛ ɔ, lee mǐ na wà gbɔn bo jɛ Biblu kplɔ́n xá mɛ lɛ jí é wɛ nɔ mya nukún nú mǐ, enɛ wu ɔ, mǐ ɖó na tɛnkpɔn bo jɛ xó ɖɔ ɖó kpɔ́ xá ye jí.
• Ma nɔ sú zǐn nú nǔ e è tɛ́ é alǒ ɖò xó ɖɔ ɖó kpɔ́ xá azɔ̌gbɛ́ towe wɛ gbɛmɛ ó. Enyi a na zán alokan towe dó nǔ hwiɖesunɔ tɔn ɖevo tamɛ jɛn wɛ hǔn, é na nyɔ́ hugǎn ɖɔ a ni site sín nǔ e è tɛ́ é kɔn.
• Ma nɔ dɔn nǔ xá gbeklanxamɛtɔ́ lɛ ó. Enyi gbeklanxamɛtɔ́ ɖé sín xó jɛ kpá zɛ jí hǔn, é sixu nyɔ́ ɖɔ a ni sɛ̀ tɛn yì fí ɖevo.