Mɛylɔwema Kpléɖókpɔ́ Ðaxó Tɔn Mímá
1. Hwetɛnu è ka na jɛ mɛylɔwema kpléɖókpɔ́ ɖaxó tɔn ɔ má jí?
1 Enyi a ɖò nǔ sɔ́ nú agɔ̌ taji ɖé wɛ nú hɛnnumɔ towe lɛ alǒ xɔ́ntɔn towe lɛ, b’ɛ byɔ gǎndido kpo akwɛzinzan gègě kpo ɖò así towe ɔ, akpàkpà na sɔ́ we hwenu e a na ɖò mɛ lɛ ylɔ wɛ é. Mɔ̌ ɖokpo ɔ, nǔ gègě wɛ é byɔ ɖɔ è ni sɔ́ ɖ’ayǐ nú agɔ̌ gbigbɔ mɛ tɔn e mǐ na ɖu ɖò kpléɖókpɔ́ ɖaxó mǐtɔn e jǎwe é hwenu é. Jehovah jɔwu mǐ bɔ enyi kpléɖókpɔ́ ɖaxó mǐtɔn kpò aklunɔzán gblamɛ atɔn ɔ, mǐ na jɛ mɛ ɖevo lɛ ylɔ na jí. Etɛ ka na d’alɔ mǐ bɔ mǐ na má mɛylɔwema ɔ kpo akpàkpà sɔ́ mɛ kpo?
2. Etɛ ka na sísɛ́ mǐ bɔ mǐ na ɖ’alɔ ɖò mɛylɔwema ɔ mímá mɛ mlɛ́mlɛ́?
2 Enyi mǐ lin tamɛ kpɔ́n dó lè tobutobu e mǐɖesunɔ lɛ nɔ mɔ ɖò nǔ ɖagbeɖagbe e Jehovah nɔ kplɔ́n mǐ ɖò kpléɖókpɔ́ ɖaxó mǐtɔn lɛ hwenu é mɛ é jí, bonu ye sù nukún mǐtɔn mɛ ɔ, enɛ na sísɛ́ mǐ bɔ mǐ na ɖ’alɔ ɖò mɛylɔwema ɔ mímá mɛ mlɛ́mlɛ́. (Eza. 65:13, 14) Mǐ ɖó na lɛ́ flín ɖɔ mɛylɔwema e mǐ nɔ má xwewu xwewu lɛ é nɔ hɛn lè gègě wá. (Kpɔ́n gbàví “É Nɔ Hɛn Lè Wá.”) Mɛ e mǐ na ylɔ é ɖé lɛ na wá kpléɖókpɔ́ ɖaxó ɔ có mɛ ɖevo lɛ ka na gbɔ. É ɖò mɔ̌ có, mɛ e na wá kpléɖókpɔ́ ɔ lɛ é na bo sukpɔ́ alǒ hwe ɔ, kanɖodonǔwu mǐtɔn ɖò mɛylɔwema ɔ mímá hwenu na kpa susu nú Jehovah bo na xlɛ́ ɖɔ é nyí nùnamɛtɔ́.—Ðɛh. 145:3, 7; Nǔɖe. 22:17.
3. Nɛ̌ è ka na má mɛylɔwema ɔ gbɔn?
3 Kplékplé mɛxo lɛ tɔn ɖokpo ɖokpo na ɖɔ lee è sixu má mɛylɔwema ɔ gbɔn fí e ɖò acɛ yetɔn mɛ lɛ é bǐ gbɔn é. Enyi è na zé ɖ’ayǐ nú mɛ e ma ɖò xwégbe ǎ lɛ é alǒ è na má ɖò kúnnuɖiɖe agbawungba tɔn hwenu kpo è na gbɔ kpo ɔ, ye na lɛ́ ɖɔ. Ðò aklunɔzán gblamɛ fifo lɛ ɔ, è na xwlé xójlawema lɛ kpo mɛylɔwema ɔ kpo mɛ hwenu e é jɛxa dó é. Hwenu e mɛylɔwema ɔ mímá sín táan na fó, bɔ mǐ na mɔ ɖɔ mǐ ɖ’alɔ ɖ’emɛ kpo kanɖodonǔwu kpo, lobɔ mɛ gègě na wá gɔ́ nú mǐ ɖò agɔ̌ gbigbɔ mɛ tɔn enɛ e Jehovah sɔnǔ tɔn é hwenu é ɔ, kpɔ́n lee xomɛ na hun mǐ sɔ́ é!
[Gbàví, Wexwɛ 4]
Etɛ A ka Na Ðɔ? Enyi a ko dó gbè mɛ ɔ lee é nɔ nyí gbɔn ɖò ayǐ ɔ jí é gudo ɔ, a sixu ɖɔ: “Mǐ ɖò mɛylɔwema ɖé má nú mɛ lɛ bǐ wɛ nú nǔwiwa taji tawun ɖé. Azǎn ɔ, ganmɛ ɔ, kpo fí e è na bló nǔwiwa ɔ ɖè é kpo ɖò mɛylɔwema ɔ jí.”
[Gbàví, Wexwɛ 4]
É Nɔ Hɛn Lè Wá
• Xwè mɔkpan ɖíe hwenu e nɔví nyɔnu ɖé ɖò alɔ ɖó wɛ ɖò mɛylɔwema ɖé mímá mɛ é ɔ, é kanbyɔ éɖée ɖɔ gǎn e dó wɛ è ɖè lɛ é bǐ ka na ɖó nu à jí. É lin ɖɔ: ‘Mɛ lɛ ka na sɔ ylɔ̌ ɔ bo na wá kpléɖókpɔ́ ɖaxó ɔ tɛnmɛ kpo mǐ kpo dóó à?’ Ðò kpléɖókpɔ́ ɖaxó ɔ sín Síbígbe zǎnzǎn ɔ, é ɖó ayi wu ɖɔ nya e ɖò sinsɛn gbɛ̌ta e è nɔ ylɔ ɖɔ Sikh é mɛ é ɖé junjɔn xá e mɛ é ɖè é, enɛ wu ɔ, nɔví nyɔnu ɔ yawu d’é bo ɖè éɖée xlɛ́ ɛ. É wá mɔ ɖɔ mɛylɔwema mǐtɔn lɛ ɖokpo wɛ é yí wutu wɛ é wá kpléɖókpɔ́ ɔ. É ɖó nùkanbyɔ gègě bɔ nɔví nyɔnu ɔ d’alɔ ɛ bɔ é mɔ sìn nú ye. É ɖɔ ɖɔ emi ɖò vivǐ tuto ɔ tɔn ɖu wɛ tawun, lobɔ nǔsisɔ kpo nùwalɔ kpléɖókpɔ́watɔ́ lɛ kpo tɔn dɔn mɛ ɖesu. Azǎn ɖokpo enɛ ɔ jí ɔ, nɔví nyɔnu ɔ lɛ́ jɛ xó ɖɔ ɖó kpɔ́ xá asú kpo asì kpo e jinjɔn xá e mɛ é ɖè é ɖé jí. Mɛylɔwema ɔ wɛ ye lɔ mɔ bo dó mɔ̌to wá kpléɖókpɔ́ ɔ. Ye ɖò vivǐ kpléɖókpɔ́ ɔ tɔn ɖu wɛ bo bló tuto bo na lɛ́ wá Aklunɔzángbe. Nɔví nyɔnu ɔ wá mɔ ɖɔ mɛylɔwema mǐtɔn lɛ mímá xwewu xwewu nyí nǔ taji tawun.
• Ðò kpléɖókpɔ́ ɖaxó gudo gudo tɔn lɛ ɖé hwenu ɔ, asú kpo asì kpo gbexosin-alijitɔ́ ɖé yawu dó asú kpo asì kpo mɛxomɔ ɖé lobo ɖè yeɖée xlɛ́ ye. Asú kpo asì kpo lɛ tinmɛ ɖɔ azɔn nukɔntɔn ɔ ɖíe emi wá kpléɖókpɔ́ ɔ é. Gbexosin-alijitɔ́ lɛ kanbyɔ ye ɖɔ: “Mɛ̌ ka ylɔ mi?” Ye ɖɔ: “Xwégbe wɛ mǐ wá gbè ɖokpo bo mɔ mɛylɔwema ɔ ɖò hɔn mǐtɔn glɔ.” Ye xà mɛylɔwema ɔ bo tlɛ lɛ́ wlan nǔ dó gbàví e ɖò gudo tɔn é mɛ. Kpléɖókpɔ́watɔ́ ɖevo lɛ má hwemɛ nùɖuɖu yetɔn xá ye. Ye ɖu vivǐ kpléɖókpɔ́ ɔ tɔn kaka, bo bló tuto bo na lɛ́ wá ayihɔngbe tɔn. È bló tuto bo na ba ye kpɔ́n bo dó afɔ nú jlǒ e ye ɖexlɛ́ é.