D’alɔ Nukúntíntɔ́nnɔ lɛ nú Ye Ni Kplɔ́n Nǔ Dó Jehovah Wu
1. Nɛ̌ Jezu ka sè wuvɛ̌ xá nukúntíntɔ́nnɔ lɛ gbɔn?
1 Azǎn klewun ɖé jɛn kpò bɔ Jezu na kú. Ee é tɔ́n sín Jeliko wá xweyigbe é ɔ, nukúntíntɔ́nnɔ wè ɖé lɛ jɛ xó sú jí, bo nɔ ɖɔ: “Aklunɔ! Davidi-ví, kú nǔblawu nú mǐ.” Mɛtɛnkpɔn ɖěɖee ɖò te kpɔ́n Jezu lɛ é nyí agban bo ɖò kpinkpɛn ayi tɔn wɛ có, é ylɔ ye bo hun nukún nú ye. (Mat. 20:29-34) Nɛ̌ mǐ ka sixu xwedó wuvɛ̌ e Jezu sè xá nukúntíntɔ́nnɔ lɛ é sín kpɔ́ndéwú gbɔn?
2. Nɛ̌ mǐ ka sixu kpéwú bo ɖekúnnu nú nukúntíntɔ́nnɔ e mǐ mɔ ɖò agbawungba é ɖé gbɔn?
2 Nɔ D’alɔ Ye: Enyi a xò gò nukúntíntɔ́nnɔ ɖé, vlafo ɖò agbawungba hǔn, ɖɔ mɛ alɔkpa e a nyí é n’i bo byɔ ɛ ɖɔ emi na d’alɔ ɛ. Hwɛhwɛ ɔ, ɖó mɛ lɛ nɔ sɔ́ mɛ mɔhun lɛ ɖó nukɔn dó ɖu nǔ wutu ɔ, é sixu xò nǔ kpɔ́n hwɛ̌. É ɖò mɔ̌ có, lee a dɔn ɛ dó wǔ ganji bo lɛ́ xlɛ́ ɛ ɖɔ nǔ tɔn ɖu ayi mɛ nú emi tawun gbɔn é sixu zɔ́n bɔ ayi tɔn na j’ayǐ. Lɛ̌vɔ tuùn ɖɔ mɛ e tɔ́n nukún lɛ é bǐ kún tɔ́n ɖó bǎ ɖokpo ɔ mɛ ó, enɛ na zɔ́n bɔ a na tuùn lee a na d’alɔ ɛ gbɔn é. Enyi a d’alɔ ɛ fó gudo ɔ, a sixu ɖɔ n’i vlafo ɖɔ azɔ̌ Biblu kpinkplɔn mɛ tɔn ɖé mɛ ɖó alɔ ɖè wɛ emi ɖè. Byɔ ɛ ɖɔ emi na xà wemafɔ Biblu tɔn ɖé n’i, ɖi Ðɛhan 146:8 alǒ Ezayíi 35:5, 6. Enyi é kpéwú bo na xà nǔ e è wlan dó nukúntíntɔ́nnɔ lɛ sín nùwlanwlan lɔ jí é hǔn, kanbyɔ ɛ ɖɔ é jló na yí wema mǐtɔn lɛ ɖokpo dó nukúntíntɔ́nnɔ lɛ sín nùwlanwlan lɔ jí bonu é na d’alɔ ɛ bɔ é na lɛ́ ɖó mɔjɛmɛ gègě dó Biblu jí à jí. A sixu lɛ́ d’alɔ ɛ b’ɛ na yí xóyidókanji lɛ ɖò jw.org jí. Enyi é ɖó ɔdinatɛ́ɛ bonu ɔdinatɛ́ɛ tɔn ɖó tuto e nɔ xà nǔ e è wlan lɛ é dó jǐ é ɔ, é na nyɔ́ ɖɔ a ni yí xota kpo wema ɖevo e è sixu yí ɖó RTF (Rich Text Format) sín alɔ jí lɛ é kpo n’i ɖò jw.org jí. Enɛ ɔ, é na sù nukún tɔn mɛ tawun.—Kpɔ́n gbàví “Enyi A Ðò Alɔ Dó Nukúntíntɔ́nnɔ ɖé Wɛ Hǔn . . .”
3. Nɛ̌ mǐ ka sixu ba nukúntíntɔ́nnɔ e ɖò agun mǐtɔn sín acɛ mɛ lɛ é mɔ gbɔn?
3 Ba Nukúntíntɔ́nnɔ lɛ Mɔ: Mǐ nɔ xò gò nukúntíntɔ́nnɔ lɛ gbɔn mɔ̌ ɖò sinsɛnzɔ́ xwé ɖé gbè jɛ xwé ɖé gbè tɔn ɔ mɛ ǎ, ɖó gègě yetɔn nɔ sixu vo bo na ɖɔ xó nú jonɔ e wá hɔn yetɔn nukɔn lɛ é ǎ. Enɛ wu ɔ, é nɔ byɔ gǎndido tawun bo na dó sixu ba nukúntíntɔ́nnɔ lɛ mɔ bo ɖekúnnu nú ye. (Mat. 10:11) A ɖó azɔ̌gbɛ́ ɖé alǒ azɔ̌mɛvigbɛ́ e tɔ́n nukún é ɖé wɛ à? Ðè afɔ nukɔn tɔn ɔ, bo ɖɔ xó n’i. Enyi wemaxɔmɛ nukúntíntɔ́nnɔ lɛ tɔn ɖé ɖò fí e agun towe nɔ ɖɔ Mawuxó ɖè é hǔn, nǎ wema mǐtɔn e ɖò nukúntíntɔ́nnɔ lɛ sín nùwlanwlan lɔ jí é ɖé lɛ bonu è ni bɛ́ ɖó wemasɛxwetɛn azɔ̌mɛxwé ɔ tɔn. A tuùn mɛɖé bɔ nukúntíntɔ́nnɔ ɖò xwédo tɔn mɛ wɛ à? Fí e ɖò agun towe sín acɛ mɛ lɛ é ɖé ɖó gbɛ̌ta e nɔ d’alɔ nukúntíntɔ́nnɔ lɛ é alǒ nɔ wá alɔgɔ́ nú xwé ɖěɖee gbè nukúntíntɔ́nnɔ lɛ nɔ nɔ bɔ è nɔ kpé nukún dó ye wu é wɛ à? Tinmɛ nú mɛ e nukúntíntɔ́nnɔ ɖò xwédo tɔn mɛ é, hɔnjinɔtɔ́ alǒ gǎn e nɔ kpé nukún dó gbɛ̌ta ɔ wu é ɖɔ alɔdido nukúntíntɔ́nnɔ lɛ nɔ ɖu ayi mɛ nú Kúnnuɖetɔ́ Jehovah Tɔn lɛ tawun, enɛ gudo hǔn ɖɔ ɖɔ emi na hɛn wema mǐtɔn lɛ wá dó nukúntíntɔ́nnɔ lɛ sín nùwlanwlan lɔ jí alǒ emi na hɛn xóyidókanji ɖé lɛ wá. Xlɛ́ ɛ akpá Biblu tɔn e ɖɔ ɖɔ Mawu na ɖè nukúntíntɔ́n síìn bǐ kpátákpátá ɖò malin malin mɛ é. A sixu lɛ́ xlɛ́ ɛ video jw.org tɔn e xota tɔn nyí Sans elle, je serais perdu é. Video enɛ ɖɔ nya ɖé xó b’ɛ mɔ Biblu dó nukúntíntɔ́nnɔ lɛ sín nùwlanwlan lɔ jí bo ɖu lè tɔn. Enyi a tinmɛ nǔ e zɔ́n bɔ a wá nukúntíntɔ́nnɔ ɖé gɔ́n é n’i ɔ, enɛ sixu hun ali nú we bɔ a na mɔ nukúntíntɔ́nnɔ ɖevo lɛ.
4. Nǔ tɛ lɛ kpɔ́ndéwú Janet tɔn ka kplɔ́n mǐ?
4 Nɔví nyɔnu nukúntíntɔ́nnɔ e nɔ nyí Janet é yì xwé e gbè nukúntíntɔ́nnɔ lɛ nɔ nɔ é gbè ɖokpo. É jɛ xó ɖɔ xá nawe ɖé jí. Janet ɖɔ n’i ɖɔ “Jezu hun nukún nú nukúntíntɔ́nnɔ lɛ bo dó xlɛ́ nǔ e é ja wiwa nú nukúntíntɔ́nnɔ lɛ bǐ gbé é.” Ye ɖɔ xó dó Nǔɖexlɛ́mɛ 21:3, 4 jí ɖó kpɔ́, bɔ Janet tinmɛ lee Axɔsuɖuto Mawu Tɔn na ɖè akpá enɛ gbɔn é n’i. Nawe ɔ cí xwii bɔ enɛ gudo ɔ, é ɖɔ: “Nukúntíntɔ́nnɔ ɖé ɖɔ xó enɛ bonu un sè kpɔ́n ǎ. Mɛ e ma tɔ́n nukún ǎ lɛ é nɔ ɖɔ mɛ lɛ nɔ tɔ́n nukún, ɖó nǔ e yeɖesunɔ alǒ tɔ́gbó yetɔn wà é ɖé wu.” Janet sɛ́ nǔ e é na zín bo na mɔ wema Biblu Kplɔ́n Mɛ ɖò ɛntɛnɛti jí é d’é gbɔn ɛntɛnɛti jí, bɔ dìn ɔ, ye nɔ kplɔ́n Biblu ɖó kpɔ́ azɔn wè ɖò aklunɔzán gbla ɖokpo mɛ.
5. Mǐ sixu hun nukún nú nukúntíntɔ́nnɔ lɛ Jezu ɖɔhun ǎ có, lè tɛ lɛ jlǒ ɖiɖexlɛ́ nukúntíntɔ́nnɔ lɛ ka na hɛn wá?
5 Nugbǒ wɛ ɖɔ mǐ kún sixu hun nukún nú nukúntíntɔ́nnɔ lɛ Jezu ɖɔhun ó, amɔ̌, mǐ hɛn ɔ mǐ na d’alɔ mɛ ɖěɖee gǎn gbɛ̀ elɔ tɔn ko va nukún na lɛ é bǐ kaka jɛ mɛ e sín nukún tɔ́n nugbǒ nugbǒ lɛ é jí, bɔ ye na mɔ nukúnnú jɛ nugbǒ e ɖò Xó Mawu Tɔn mɛ é mɛ. (2 Kɔ. 4:4) Jezu hun nukún nú nya wè lɛ ɖò Jeliko kpá, ɖó nǔ yetɔn blawu n’i wutu. (Mat. 20:34) Enyi mǐ nɔ ɖè jlǒ mɔhunkɔtɔn xlɛ́ nukúntíntɔ́nnɔ lɛ ɔ, ali na hun nú mǐ bɔ mǐ na d’alɔ ye mɛ ɖé lɛ bɔ ye na kplɔ́n nǔ dó Jehovah e na wá ɖè nukúntíntɔ́n síìn kaka sɔyi é wu.
[Gbàví, Wexwɛ 3]
Enyi A Ðò Alɔ Dó Nukúntíntɔ́nnɔ ɖé Wɛ Hǔn . . .
• Ðɔ xó n’i tlɔlɔ, amɔ̌, ma súxó ó. Nukúntíntɔ́nnɔ lɛ sixu mɔ nǔ ǎ, amɔ̌, ye sixu sè nǔ ganji.
• Jǒ é dó bonu é ni hɛn abɔ̌ta towe, enyi hwi wɛ ɖò ali xlɛ́ ɛ wɛ ɔ nɛ. Nú a nɔ kpɔ́n afɔ bo nɔ ɖè ɔ, è na bɔwǔ n’i b’ɛ na xwedó we. Enyi a mɔ dodo ɖé, atínkpo ɖé, awinnya ɖé alǒ afɔklɛ́nnú ɖevo ɖebǔ hǔn, ɖɔ n’i.
• Vo bo zán xógbe ɖěɖee è nɔ zán nú mɛ e ma tɔ́n nukún ǎ lɛ é, ɖi “mɔ” kpo “kpɔ́n” kpo. Nukúntíntɔ́nnɔ lɛ lɔ nɔ zán xógbe enɛ lɛ. Ye nɔ zán wǔjɔnú yetɔn ɖevo lɛ dó “mɔ” nǔ ɖò ali ɖé lɛ nu; enyi è ɖò nùɖé jlɛ́ nú ye wɛ ɔ, ye tlɛ nɔ tɛnkpɔn bo nɔ mɔ lee nǔ ɔ cí é sɛ́dó ɖò taglomɛ.
• Ðɔ xó ɖó kpɔ́ xá ɛ ɖò fí e ɖò xwii é. Hwɛhwɛ ɔ, nukúntíntɔ́nnɔ lɛ nɔ vo ɖò fí e gbɛtɔ́ lɛ ɖò xó sú ɖè wɛ é ǎ, ɖó é nɔ vɛwǔ nú ye bɔ ye na tuùn nǔ e ɖò jijɛ lɛlɛ̌ dó ye wɛ é.
• Ðɔ n’i cobo yì. Enɛ na zɔ́n bɔ é na ɖò xó ɖɔ dó jɔ gblolo mɛ wɛ bonu winnya na wá hu i ǎ.
• Wlan nǔ dó Veuillez suivre l’intérêt (S-43) ɖé mɛ bo zé jó nú wěgbojinɔtɔ́ agun ɔ tɔn, enyi nukúntíntɔ́nnɔ ɔ ɖè jló xlɛ́ bo ma ka nɔ nɔ fí e ɖò agun towe sín acɛ mɛ é ǎ ɔ nɛ.