Nǔsisɔ E Ðò Dandan Cobɔ È Na Kplɔ́n Nǔ Mɛ kpo Azɔ̌ Tuùntuùn kpo É
É hwe bǐ ɔ, è kàn xó ɖokpo ɔ byɔ Jezu dó gbɛ̀ mavɔmavɔ wu azɔn wè, amɔ̌, ɖò ninɔmɛ ɖokpo ɖokpo mɛ ɔ, é na xósin sɔgbe xá hudo nùkanbyɔtɔ́ ɔ tɔn. (Luk. 10:25-28; 18:18-20) Enɛ wu ɔ, enyi mǐ na bo tlɛ tuùn wema e mɛ mǐ nɔ kplɔ́n Biblu ɖè xá mɛ ɔ é ganji ɔ, mǐ ɖó na nɔ sɔnǔ na jɛ nukɔn, bo ka na nɔ hɛn nùkplɔntɔ́ ɔ d’ayi mɛ hwenu e mǐ ɖò nǔ sɔ́ na wɛ é. Nǔ tɛ lɛ mɛ mimɔ nukúnnú jɛ alǒ yíyí gbè na ka sixu vɛwǔ n’i? Wemafɔ e ɖ’emɛ lɛ é ɖětɛ lɛ mǐ ka ɖó na xà kpo é kpo? Akpáxwé nabi mɔ̌ mǐ ka ɖó na ba dò na? É sixu byɔ ɖɔ mǐ ni sɔnǔ nú nùjlɛdonǔwu ɖé, tinmɛ ɖé, alǒ nùkanbyɔ ɖebɔdoɖewu ɖé lɛ bo na mɔ tɛn dó d’alɔ nùkplɔntɔ́ ɔ bonu é na ɖó mɔjɛmɛ nùkplɔnkplɔn ɔ tɔn. Gɔ́ na ɔ, ɖó Jehovah wɛ nɔ bló bɔ nǔkún nugbǒ ɔ tɔn nɔ sù ɖò ayi mɛ lɛ tɔn mɛ wutu ɔ, mǐ ɖó na byɔ nyɔna Jehovah tɔn dó nǔsisɔ mǐtɔn, nùkplɔntɔ́ mǐtɔn kpo gǎn e dó wɛ mǐ ɖè bo na d’alɔ ɛ ɖò gbigbɔ lixo lɛ é kpo jí.—1 Kɔ. 3:6; Ja. 1:5.