Zǎn Nǔ E Ðò Wema Biblu Kplɔ́n Mɛ Mɛ lɛ É Ganji

Hwenu e Biblu kplɔntɔ́ ɖé kplɔ́n nǔ e Biblu kplɔ́n mɛ tawun lɛ é bo zán nǔ e é kplɔ́n lɛ é ɔ, é na sù bo na lɛ́ na sínsɛ́n ɖò gbigbɔ lixo. (Ðɛh. 1:1-3) Mǐ sixu d’alɔ Biblu kplɔntɔ́ mǐtɔn b’ɛ na yì nukɔn gbɔn nǔ e ɖò wema Biblu Kplɔ́n Mɛ mɛ lɛ é zinzan ganji gblamɛ.

Nùkanbyɔ Bǐbɛ̌mɛ Tɔn Lɛ: Nùkanbyɔ ɖé lɛ nɔ ɖò wemata ɖokpo ɖokpo sín bǐbɛ̌mɛ bɔ xósin yetɔn lɛ nɔ ɖò nùkplɔnkplɔn ɔ mɛ. A sixu kàn nǔ enɛ lɛ byɔ ɖò alɔkpa ɖé mɛ bɔ nùkplɔntɔ́ ɔ na lin nǔ kpɔ́n, bonu akpàkpà na dó sixu sɔ́ ɛ dó xóɖɔɖókpɔ́ mitɔn e na bɔ d’ewu lɛ é wu. Alǒ a sixu byɔ ɛ ɖɔ é ni na sìnkɔn klewun ɖé nú nùkanbyɔ ɖokpo ɖokpo. Enyi é ɖɔ linlin agɔ ɖé ɔ, é byɔ ɖɔ a ni jla ɖó azɔn ɖokpo ǎ. Nǔ e é na ɖɔ lɛ é na d’alɔ we bɔ a na tuùn nǔ e jí a na sɔ́ ayi ɖó bo lɛ́ tɛɖɛ̌ jí lɛ é.—Nùnywɛxó 16:23; 18:13.

Xota Ðevo Lɛ: Enyi nùkplɔntɔ́ ɔ mɔ nukúnnú jɛ nǔ e ɖò wemata ɔ mɛ é wu bo yí gbè na ɔ, a sixu dó wusyɛn lanmɛ n’i kpowun ɖɔ éɖesunɔ ni gbéjé xota ɖevo e kúnkplá wemata ɔ é kpɔ́n. Ðò nùkplɔnkplɔn e na bɔ d’ewu é hwenu ɔ, a sixu zán cɛju yɔywɛ ɖé dó kpɔ́n ɖɔ é ka mɔ nukúnnú jɛ mɛ à jí. É ɖò mɔ̌ có, enyi enɛ ma na hɛn lè wá n’i ǎ hǔn, mi ni xà xota ɖevo e wɛ é alǒ akpáxwé tɔn ɖé ɖó kpɔ́, bonu a kàn nǔ ɖěɖee a ko sɔnǔ na jɛ nukɔn lɛ é byɔ.

Gbàví Vɔ̌gbɔnji Tɔn: Nùkanbyɔ bǐbɛ̌mɛ tɔn lɛ sín xósin nɔ ɖò gbàví vɔ̌gbɔnji tɔn e ɖò vivɔnu wemata ɖokpo ɖokpo tɔn é mɛ. A sixu zán nǔ enɛ bo dó kpɔ́n ɖɔ nùkplɔntɔ́ towe ka ɖó mɔjɛmɛ nǔ taji lɛ tɔn bo sixu tín ye mɛ à jí. Mi xà xósin lɛ ɖokpo ɖokpo dó jǐ ɖó kpɔ́ gɔ́ nú wemafɔ e ɖò akpá yetɔn lɛ é. Enɛ gudo hǔn, byɔ nùkplɔntɔ́ towe ɖɔ é ni zán wemafɔ lɛ bo dó tinmɛ nǔ e wu xósin ɔ sɔgbe é.—Mɛ. 17:2, 3, NW.