Nyɔna Ðěɖee Mɛ E Nɔ Setónú nú Mawu lɛ É Nɔ Mɔ lɛ É

Gbeyiɖɔ Mɔyizi ɖɔ ɖɔ enyi mǐ nyi sɛ́n Mawu tɔn lɛ ɔ, Mawu na kɔn nyɔna dó mǐ jí. (Sɛ́nflínmɛ 10:13; 11:27) Mawu táa dɔn tó nú mǐ wɛ zɔ́n bɔ mǐ nɔ setónú n’i ǎ. Loɔ, jijɔ tɔn ɖagbeɖagbe lɛ wɛ nɔ zɔ́n bɔ mǐ nɔ setónú n’i, ɖó mǐ yí wǎn n’i, bo ba na wà nǔ e sixu vɛ́ n’i é ɖebǔ ǎ wutu. “Wǎn yí nú Mawu wɛ nyí è ni nyi sɛ́n tɔn lɛ.”—1 Jaan 5:3.

Amɔ̌, nɛ̌ tónúsíse nú Mawu ka na tɔ́n kɔ dó nyɔna mɛ gbɔn? Kpɔ́n ali e nu nǔ sixu nyí mɔ̌ ɖè é we.

1. TÓNÚSÍSE NÚ MAWU NA ZƆ́N BƆ MǏ NA ÐÓ NǓNYWƐ

“Nyɛ Mawu Mavɔmavɔ ɔ, nyɛ wɛ nyí Mawu towe; nyi wɛ na ɖɔ nǔ e na nyɔ́ nú we ɔ nú we. Nyi wɛ ɖò ali xlɛ́ we wɛ ɖò ali e a mlɛ́ ɔ jí.”—EZAYÍI 48:17.

Jehovah Mawu, Gbɛɖotɔ́ mǐtɔn ɔ tuùn mǐ, bo nɔ lɛ́ na alixlɛ́mɛ e sín hudo mǐ ɖó é mǐ. Enyi mǐ ba ɖɔ nǔkplɔnmɛ tɔn lɛ ni d’alɔ mǐ bonu mǐ ni wá gbeta e nǔnywɛ kpé lɛ é kɔn ɔ, mǐ ɖó na kplɔ́n nǔ e Mawu ba ɖɔ mǐ ni wà lɛ é ɖò Nǔwlanwlán Mímɛ́ lɛ mɛ, enɛ gudo ɔ, mǐ na xwedó nǔkplɔnmɛ enɛ lɛ.

2. TÓNÚSÍSE NA ZƆ́N BƆ MǏ NA ÐÓ AWǍJIJƐ

“Mɛ e sè Mawuxó ɔ, bo bló ɖ’eji lɛ wɛ nǔ nyɔ́ na.”—LUKI 11:28.

Égbé ɔ, mɛ ɖěɖee nɔ setónú nú Xó Mawu tɔn lɛ é livi mɔ̌kpan nɔ ɖu vivǐ awǎjijɛ nǔgbo ɔ tɔn. Ði kpɔ́ndéwú ɔ, kpɔ́n kpɔ́ndéwú nya ɖé tɔn. É nɔ nɔ Espagne, bo nɔ yawǔ sin xomɛ, bo nɔ xò daka mɛ ɖevo lɛ wu kaka jɛ asì tɔn jí. Gbè ɖokpo ɔ, é xà nǔ e gbeyiɖɔ Mɔyizi wlán b’ɛ kúnkplá lee Jozɛfu, Jakɔbu ví ɔ fá xomɛ gbɔn é é. È sà Jozɛfu b’ɛ nyí kannumɔ ɖé, bɔ è dá hwɛ agɔ n’i, lobo sú i dó ganmɛ, é ɖò mɔ̌ có, é fá xomɛ, xò fífá kan, lobo lɛ́ sɔ́ hwɛ kɛ mɛ. (Bǐbɛ̌mɛ, wemata 37-45) Nya ɔ ɖɔ: “Tamɛ linlin dó kpɔ́ndéwú Jozɛfu tɔn jí sísɛ́ mì bɔ un nɔ fá xomɛ, nyɔ́ xomɛ, bo nɔ lɛ́ ɖu ɖò nyiɖée jí. Wǎgbɔ tɔn ɔ, un ɖò gbɛzán awǎjijɛ tɔn ɖé sín vivǐ ɖu wɛ dìn.”

Nǔwlanwlán Mímɛ́ lɛ na alixlɛ́mɛ gegě dó lee mǐ ɖó na wà nǔ xá mɛ ɖevo lɛ gbɔn é wu. Mǐ na gbajɛ̌mɛ na ganji ɖò xóta e bɔ d’ewu é mɛ.