“Nǔ E Mawu Dɔn Cá É . . .”

Mɔyizi Sɛ́n ɔ byɔ ɖò sunnu e ɖò linlin na gbɛ́ asì tɔn wɛ é ɖé sí ɖɔ é ni bló wema ɖé ɖò sɛ́n linu. Enɛ zɔ́n bɔ è nɔ zɔn kplakpla jí dó sɛ́n kàn nú alɔwliwli lɛ ǎ. Amɔ̌, ɖò Jezu sín táan mɛ ɔ, sinsɛngán lɛ bló bɔ mɛ gbigbɛ́ bɔkun tawun. Sunnu lɛ sixu gbɛ́ asì yetɔn lɛ ɖó hwɛjijɔ ɖebǔ wu. (“mɛ gbígbɛ́ wema” tinmɛ ɖevo dó Mk 10:4 jí, nwtsty; “gbɛ́ asì tɔn,” gbà acɛ wǔ tɔn” tinmɛ ɖevo lɛ dó Mk 10:11 jí, nwtsty) Ðò Maki 10:2-12 mɛ ɔ, Jezu flín mɛ ɖɔ Jehovah ɖesu wɛ dó alɔwliwli wá bo lɛ́ hun nǔ sín nú. Asú kpo asì kpo ɖé huzu mɛ “ɖokpo géé” ɖò alɔwliwli e na nɔ ayǐ kaka sɔyi é ɖé mɛ. Nǔ e jí è na zɔ́n dó dó gbɛ́ mɛ bɔ Mawuxówema ɔ ɖɔ, sɔgbe xá tan mɔhun e ɖò Matie sín wema mɛ é wɛ nyí ‘afɔdogbě.’​—Mt 19:9.

Égbé ɔ, mɛ gègě nɔ ɖó linlin e Jezu ɖó dó alɔwliwli wu é ǎ, loɔ, linlin Falizyɛn lɛ tɔn wɛ ye nɔ ɖó. Enyi tagba lɛ fɔ́n ɔ, mɛ e ɖò gbɛ̀ ɔ mɛ lɛ é nɔ yawu gbɛ́ yeɖée. Ðò alɔ ɖevo mɛ ɔ, asú kpo asì kpo Klisanwun lɛ nɔ sɔ́ alɔwliwli sín akpá yetɔn ylɔ ɖɔ nùjɔnǔ, bɔ enyi tagba lɛ wá ɔ, ye nɔ dó gǎn bá xwedó nugbodòdó Biblu tɔn lɛ dó ɖeɖɛ ye na. Enyi a kpɔ́n video Wanyiyi kpo Sísí kpo Nɔ Dɔn Xwédo lɛ Ðó Bǔ ɔ gudo hǔn, nǎ xósin nú nùkanbyɔ elɔ lɛ:

• 

  Nɛ̌ a ka sixu zán Nùnywɛxó 15:1 ɖò alɔwliwli towe mɛ gbɔn? Etɛwu é ka ɖò taji?

• Nɛ̌ Nùnywɛxó 19:11 zinzan ka sixu d’alɔ we bɔ a na nyì alɔ nú tagba lɛ gbɔn?

• Enyi alɔwliwli towe ko ɖò gbigba li jí ɔ, bo ma na ɖò linlin wɛ ɖɔ ‘asú wɛ na gbɛ́ à alǒ asì wɛ na gbɛ́ à?’ ǎ ɖɔ wɛ ɔ, nǔ tɛ lɛ a ka ɖó na kanbyɔ?

• Nɛ̌ Matie 7:12 zinzan ka sixu d’alɔ we bɔ a na nyí asú ɖagbe ɖé alǒ asì ɖagbe ɖé gbɔn?