Zǎn Video lɛ Dó Kplɔ́n Nǔ Biblu Kplɔntɔ́ Towe Lɛ

Nǔ e nukún mɔ lɛ é nɔ dɔn ayi mɛ e mɔ é tɔn, bo nɔ d’alɔ ɛ b’ɛ nɔ mɔ nukúnnú jɛ nǔ e é kplɔ́n lɛ é mɛ, bo nɔ lɛ́ hɛn ye d’ayi mɛ. Nǔkplɔnmɛtɔ́ Ðaxó mǐtɔn Jehovah zán nǔ e nukún nɔ mɔ lɛ é dó kplɔ́n nǔ taji lɛ mɛ. (Bǐ 15:5; Jel 18:1-6) Jezu e nyí Mɛ̌si Ðaxó ɔ é lɔ wà mɔ̌. (Mt 18:2-6; 22:19-21) Video lɛ ɖò nǔ enɛ lɛ mɛ, bo ko hɛn lè wá tawun ɖò xwè e wá yì lɛ é mɛ. A ka nɔ zán video lɛ ganji hwenu e a ɖò nǔ kplɔ́n xá Biblu kplɔntɔ́ towe lɛ wɛ é à?

È sɔnǔ nú video wǒ bɔ ye na d’alɔ mǐ, bɔ mǐ na kplɔ́n nǔ ɖěɖee ɖò alɔnuwema Wɛnɖagbe ɖé Sín Mawu Gɔ́n! mɛ lɛ é mɛ. Ðò kpaa mɛ ɔ, xóta video ɖokpo ɖokpo tɔn nɔ sɔgbe xá nǔkanbyɔ e è wlan kpo wekwín tlitli kpo ɖò alɔnuwema ɔ mɛ lɛ é ɖokpo. Wuntun ɖé lɛ nɔ ɖò alɔnuwema ɔ ɛntɛnɛti jí tɔn mɛ, bo nɔ flín mǐ hwenu e è na xlɛ́ video ɖokpo ɖokpo dó é. Gɔ́ na ɔ, video ɖevo lɛ gɔ́ sò nú nǔ ɖěɖee ɖò wema nǔkplɔnkplɔn tɔn e ɖò Azɔ̌wanúgbá Mɛkplɔnkplɔn tɔn mǐtɔn mɛ lɛ é é.

Xóta Biblu tɔn e nukúnnú mimɔ jɛ mɛ na vɛwǔ nú nǔkplɔntɔ́ towe é ɖé wu ɖɔ xó dó wɛ a ɖè à? Alǒ nǔkplɔntɔ́ towe ɖò xwi ɖí xá mɛtɛnkpɔn ɖé wɛ wɛ à? Kíjé video ɖěɖee ɖò jw.org® kpo Televiziɔn JW® kpo jí lɛ é, bo ba ee na hɛn lè wá n’i é ɖokpo. Vlafo hwi kpo nǔkplɔntɔ́ towe ɔ kpo sixu kpɔ́n ɖokpo ɖó kpɔ́, bɔ enɛ gudo ɔ, mi na ɖɔ xó ɖó kpɔ́ d’eji.

Video yɔyɔ̌ gegě wɛ è nɔ ɖetɔ́n ɖò sun ɖokpo ɖokpo mɛ. Ee a na ɖò ye kpɔ́n wɛ é ɔ, nɔ lin tamɛ dó lee a sixu zán ye dó kplɔ́n nǔ mɛ ɖevo lɛ gbɔn é jí.