A ka Ðò Nɔ Kíjé Mawuxówema ɔ Gbè Bǐ Gbè Sín Vivǐ Ðu Wɛ À?

Wemafɔ Biblu tɔn e jí tɛ́si azǎn ɖokpo ɖokpo tɔn jinjɔn é kpo tinmɛ e è bló d’eji é kpo, bɔ ye ɖò Nɔ Kíjé Mawuxówema ɔ Gbè Bǐ Gbè mɛ é xixa ka ɖò aca gbigbɔ tɔn towe mɛ à? Nú é ma ko nyí mɔ̌ a ɔ, a na sixu sɔ́ dó ɖó aca towe à? Enyi ayǐ hɔ́n lě tlolo ɔ, mɛ gegě nɔ bló tɛ́si yetɔn, mɔ̌ mɛ ɔ, ye nɔ kpéwú bo nɔ ɖò tamɛ lin d’eji wɛ hwenu e ye nɔ ɖò azɔ̌ ayihɔngbe ayigbɔngbe tɔn yetɔn lɛ wà wɛ é. (Jo 1:8; Ðɛ 119:97) Nɛ̌ a ka sixu lɛ́ ɖu lè wemafɔ lɛ tɔn d’eji gbɔn? Nɔ xà nǔ ɖěɖee lɛlɛ̌ dó wemafɔ Biblu tɔn ɔ lɛ é dó mɔ nǔ jɛ ninɔmɛ ɔ mɛ. Tɛ́n kpɔ́n bo nɔ lin tamɛ dó tan Biblu tɔn e tá weziza dó nǔgbododó e jí è tɛɖɛ̌ ɖò tɛ́si ɔ mɛ é jí. Enɛ gudo hǔn, nɔ zán nǔgbododó ɔ ɖò gbɛzán hwiɖesu tɔn mɛ. Nú a nɔ zán Xó Mawu tɔn ɖò gbeta e kɔn a nɔ wá lɛ é mɛ ɔ, é na xlɛ́ ali we ɖò gbɛzán towe mɛ, bɔ a na lɛ́ ɖu lè tɔn.—Ðɛ 119:105.

Xwédo Betɛli tɔn e gbɔn gbɛ̀ ɔ bǐ mɛ lɛ é nɔ gbéjé Nɔ Kíjé Mawuxówema ɔ Gbè Bǐ Gbè kpɔ́n ɖò nǔɖuɖu zǎnzǎn tɔn sín hwenu. Ðò xwè agaɖanu tɔn lɛ mɛ ɔ, è nɔ sɔ́ xóɖiɖɔ enɛ lɛ gegě dó Televiziɔn JW Tɔn^® jí ɖò akpáxwé NǓWIWA BǓNƆ LƐ mɛ. Hwetɛnu a ka kpɔ́n ɖokpo alǒ gegě ɖò ye mɛ azɔn gudo tɔn ɔ? Vlafo, ɖé lɛ ɖò ye mɛ bo sixu nyí nǔ e sín hudo a ɖó é pɛ́pɛ́pɛ́. Ði kpɔ́ndéwú ɔ, nɛ̌ tan Lɔti tɔn ka sixu xlɛ́ ali we ɖò gbeta e kɔn a nɔ wá lɛ é mɛ gbɔn?

KPƆ́N VIDEO MI MA YÍ WǍN NÚ GBƐ̀ Ɔ Ó Ɔ (1JN 2:15), ENƐ GUDO HǓN, NǍ XÓSIN NÚ NǓKANBYƆ E BƆ D’EWU LƐ É:

• Nǔgbododó Biblu tɔn tɛ jí Sinsɛn-Biblo Zǎnzǎn tɔn elɔ ka jinjɔn?

• Nɛ̌ tan Lɔti tɔn ka xlɛ́ awovínú e ɖò wǎn yiyi nú gbɛ̀ ɔ alǒ nǔ e ɖò gbɛ̀ ɔ mɛ lɛ é nyi wɛn gbɔn?—Bǐ 13:12; 14:12; 19:3, 12, 13, 24-26

• Nɛ̌ mǐ ka nɔ xlɛ́ ɖɔ mǐ yí wǎn nú Jehovah, b’ɛ ma nyí nú gbɛ̀ ɔ alǒ nǔ e ɖ’emɛ lɛ é ǎ gbɔn?