È ná jlá nǔ bǔnɔ ɖé ɖo septembre mɛ dó bɛ́ Biblu kplɔ́nkplɔ́n xá mɛ lɛ́

Ðo septembre mɛ ɔ, mǐ ná w’azɔ̌ syɛ́nsyɛ́n bó ná zán alɔnuwéma Ðu gbɛ víví káká sɔ́yi! dó xwlé Biblu kplɔ́nkplɔ́n mɛ e mǐ ná mɔ lɛ́ é bǐ. Wɛnjlátɔ́ lɛ́ sixú nyí gběxosín-alijítɔ́ alɔgɔ́tɔ́ bó ná ganxixo 30 e è nɔ ɖó nukún ɖo yě sí lɛ́ é. Nɛ̌ nǔjlájlá bǔnɔ énɛ́ ka ná yi gbɔn?

• Xóɖɔɖókpɔ́ nukɔntɔn: Zǎn alɔnuwéma ɔ sín akpa gǔdo tɔn ɔ dó bló bónú xó ɔ ní dɔn mɛ ɔ, bó xlɛ́ ɛ lěe Biblu kplɔ́nkplɔ́n nɔ yi gbɔn é. Flín mɛ ɖěɖěe ko ɖe jlǒ xlɛ́ wá yi lɛ́ é, káká jɛ mɛbakpɔ́n lɛ́ jí. Yě ná bó ko gbɛ́ Biblu kplɔ́nkplɔ́n ɖ’ayǐ ɔ, wlɛnwín yɔ̌yɔ́ e mǐ nɔ zán dó kplɔ́n nǔ xá mɛ lɛ́ din é kpó alɔnuwéma ɔ kpó sixú dɔn yě. È ɖó ná jó alɔnuwéma lɛ́ dó nú mɛ ɖěɖěe má ɖo xwégbe ǎ lɛ́ é, alǒ sɛ́ dó mɛ ɖěɖěe má ɖe jlǒ xlɛ́ ɖ’ayǐ ǎ lɛ́ é ǎ. Wěɖegbɛ́ sinsɛnzɔ́ tɔn agun ɔ tɔn sixú bló tuto nú kplé kúnnuɖegbé tɔn ɖěvo lɛ́ gɔ́ ná ɖo sun ɔ mɛ.

• Ali ɖěvo lɛ́: Ényí agun ɔ nɔ zán kɛkɛ́ví lɛ́ dó ɖe kúnnu hǔn, to alɔnuwéma Ðu gbɛ víví káká sɔ́yi! ɔ dó yě jí. Ðɔ nú mɛ ɖěɖěe alɔnuwéma ɔ dɔn lɛ́ é ɖɔ nú yě ba ɔ, è sixú lɛ́ kplɔ́n Biblu xá yě vɔ̌nu. Xlɛ́ lěe é nɔ nyí gbɔn é kléwún ɖo xóɖɔɖókpɔ́ énɛ́ hwenu, alǒ blǒ tuto bá wa mɔ̌ ɖo nukɔnmɛ. Nukúnkpénǔwútɔ́ sinsɛnzɔ́ tɔn sixú bló tuto bɔ wɛnjlátɔ́ e jɛxá lɛ́ é ná yi ajɔ̌watɛn e ɖo fí e agun ɔ nɔ ɖɔ Mawuxó gbɔn lɛ́ é bó xwlé Biblu kplɔ́nkplɔ́n mɛ lɛ́. A sixú lɛ́ xwlé Biblu kplɔ́nkplɔ́n azɔ̌watɔ́gbɛ́ towe lɛ́, alǒ mɛ ɖěɖěe a xo go hwenu e a ɖo kúnnu e ma nyí aca tɔn ǎ é ɖe wɛ é.

Jezu ɖe gbe nú mǐ ɖɔ mǐ ní “kplɔ́n nǔ” mɛ lɛ́ bónú “yě ní húzú ahwanvú.” (Mt 28:19, 20) Ðɛ mǐtɔn wɛ nyí ɖɔ nǔ bǔnɔ élɔ́ e mǐ ná zán Ðu gbɛ víví káká sɔ́yi! dó jlá é ní d’alɔ mǐ bónú mǐ ná kpé énɛ́ wú.