Nɔ ba nǔnywɛ́ e a ná zán ɖo gbɛzínzán gbe bǐ gbe tɔn towe mɛ lɛ́ é ɖo JW.ORG jí

Xó Mawu tɔn nɔ ná mǐ nǔ e sín hudó mǐ ɖó bo ná dó ɖí xwi xá mɛtɛ́nkpɔ́n lɛ́ ɖo azǎn gǔdo gúdo tɔn élɔ́ lɛ́ e vɛ́ wǔ é mɛ. (2Ti 3:1, 16, 17) É ɖo mɔ̌ có, hweɖélɛ́nu ɔ, é sixú byɔ́ ɖɔ è ní d’alɔ mǐ cóbɔ mǐ ná mɔ nǔgbódodó Biblu tɔn e mǐ ná zán ɖo ninɔmɛ ɖé tawun lě mɛ lɛ́ é. Ði kpɔ́ndéwú ɔ, mɛjitɔ́ ɖé wɛ nú we bɔ a ɖo wěɖexámɛ e ná d’alɔ we bɔ a ná kplɔ́n vǐ towe lɛ́ é ba wɛ a? Mɛ wínnyáwínnyá ɖé wɛ nú we bɔ nǔɖiɖi towe ɖo tɛ́nkpɔ́n mɛ gbɔn wɛ a? Asúkúsi alǒ asikúsú e ɖo mɛvívɛ́ tɔn e kú é sín aluwɛ mɛ é ɖé wɛ nú we a? A ná mɔ nǔ ɖěɖěe ná d’alɔ we bɔ a ná mɔ nǔgbódodó Biblu tɔn tawun tawun e ná d’alɔ we ɖo ninɔmɛ énɛ́ lɛ́ kpó gěgé ɖěvo lɛ́ kpó mɛ é ɖo jw.org jí.—Nǔx 2:3-6.

Ðo akpáxwé bǐbɛ́mɛ tɔn jw.org tɔn jí ɔ, zǐn akpáxwé NǓKPLƆ́NMƐ BIBLU TƆN LƐ́. (Kpɔ́n ɖiɖe 1.) Sɔ́ nǔ e jló we é ɖo nǔ ɖěɖěe wá do lɛ́ é mɛ. Alǒ zǐn NǓSƐXWETƐN > XÓTA ÐĚBƆDÓÐĚWÚ LƐ́ bó sɔ́ nǔ e jló we é. (Kpɔ́n ɖiɖe 2.) A sixú mɔ akpáxwé ɖokpó ɔ lɛ́ ɖo JW Library^® mɛ.a Fí ɖěbǔ e jló we é wɛ a sixú ɖu vǐví xóta lɛ́ xixa tɔn ɖe ɖo azɔ̌wanú énɛ́ lɛ́ mɛ. Ényí xóta ɖé tawun lě ba wɛ a ɖe ɔ, wlɛnwín ɖěvo wɛ nyí ɖɔ a ní zán gbǎví nǔbiba tɔn e ɖo jw.org jí é.

Wlǎn nǔ e ɖo do lɛ́ é dó gbǎví nǔbiba tɔn ɔ mɛ, bo wlán xóta ɖěɖěe a jló ná xá lɛ́ é ɖ’ayǐ.

• Vǐ kplɔ́nkplɔ́n

• Linkpɔ́nzɔn mɛ wínnyáwínnyá lɛ́ tɔn

• Kú asú alǒ así ɖé tɔn