Mǐ sixú ɖu ɖo wǎngbɛ́númɛ jí!

Ényí nǔ mɔ̌hun ná bó ma ko xá we kpɔ́n ǎ ɔ, a ka sixú ko mɔ lěe mɛ ɖěvo lɛ́ nɔ gbɛ́ wǎn nú mɛ gbɔn é ɖo ali ɖé alǒ ɖěvo nu. Hwɛhwɛ wɛ mǐ nɔ mɔ lěe è nɔ wa nǔ agɔ xá mɛ ɖěvo lɛ́ gbɔn é, ɖó yě nyí toɖévomɛnu, ɖó sinmɛ agbaza tɔn ɖěvo, alǒ, ɖó yě nɔ ɖó kancícá wǎnyíyí tɔn xá súnnu yětɔn ɖɔhun, kabǐ nyɔ̌nu yětɔn ɖɔhun wútu. Énɛ́ zɔ́n bɔ acɛkpikpa gěgé ɖó sɛ́n lɛ́ ayǐ ɖó wǎngbɛ́númɛ alɔkpa lɛ́ bǐ wú.

Hwɛhwɛ ɔ, mɛ e è gbɛ́ wǎn ná lɛ́ é nɔ gbɛ́ wǎn nú mɛ ɖěvo lɛ́. Ðo ninɔmɛ gěgé mɛ ɔ, yě nɔ gbɛ́ wǎn nú mɛ ɖěvo lɛ́ dó ba hlɔn, bɔ mɔ̌ mɛ ɔ, yě nɔ bló bɔ wǎngbɛ́númɛ nɔ ɖo kan vun d’é jí wɛ.

Bóyá è ko wa nǔ agɔ xá we, cá we ko, zun we, alǒ gɔn xomɛ nyɔ́ dó wǔ we kpɔ́n. Amɔ̌, wǎngbɛ́númɛ nɔ lɛ́ syɛ́n hú mɔ̌. Hwɛhwɛ wɛ é nɔ tɔ́n kɔ dó dǎkaxomɛwú, nǔɖɔbamɛ, nǔwadómɛwú, asúfánmɛ, xóɖóxámɛ gǎnnugǎnnu, mɛhuhu alǒ akɔhwan mɛ.

Xójláwéma élɔ́ ná ná xósin nú nǔkanbyɔ́ e bɔ d’é wú lɛ́ é, bó ná lɛ́ xlɛ́ lěe è sixú ɖu ɖo wǎngbɛ́númɛ jí gbɔn é:

• Aniwú wǎngbɛ́númɛ ka tíin sɔmɔ̌?

• Nɛ̌ è ka sixú ɖu ɖo wǎngbɛ́númɛ jí gbɔn?

• Hweɖénu ka ná wa su bɔ wǎngbɛ́númɛ ná bú bǐ gbídígbídí a?