Lěe è sixú sɔ́ nǔ gbigbɔ tɔn lɛ́ ɖó nukɔn nú mɛɖée, bó jɛ kɔn gbɔn é

1. Nǔ alɔkpa tɛ́ lɛ́ gbé mǐ ka sixú nya?

ÐÓ MǏ nyí Klisánwun nǔgbó lɛ́ wútu ɔ, mǐ yí wǎn nú Jehovah tawun. Mǐ ba ná ná nǔ ɖagbe hú gǎn e mǐ ɖó lɛ́ é Jehovah. Amɔ̌, cóbónú mǐ ka ná kpé nǔ énɛ́ wú bǐ mlɛ́mlɛ́ ɔ, é byɔ́ ɖɔ mǐ ní nya nǔɖé lɛ́ gbé ɖo gbigbɔ lixo, ɖi nǔ sísɔ́ nú jijɔ Klisánwun tɔn lɛ́, kplɔ́nkplɔ́n bónú alɔ ní bí nú mɛ ɖo nǔ tawun tawun ɖé lɛ́ wiwa kɔn kpó ali e nu mǐ sixú wa devízɔ́ nú mɛ ɖěvo lɛ́ ɖe lɛ́ é biba kpó.b

2. Aniwú mǐ ka ɖó ná sɔ́ nǔ gbigbɔ tɔn lɛ́ ɖó nukɔn nú mǐɖée, bó w’azɔ̌ syɛ́nsyɛ́n bó jɛ yě kɔn?

² Étɛ́wú nukɔnyiyi ɖo gbigbɔ lixo ka ɖó ná nɔ ɖu ayi mɛ nú mǐ? Jɛ nukɔn hwɛ̌ ɔ, mǐ ba ɖɔ nǔ mǐtɔn ní nyɔ́ Tɔ́ mǐtɔn jǐxwé tɔn wǎnyíyínɔ ɔ nukúnmɛ wɛ zɔ́n. Ényí Jehovah mɔ bɔ mǐ ɖo nǔwúkpíkpé mǐtɔn lɛ́ zán wɛ bǐ mlɛ́mlɛ́ ɖo sinsɛnzɔ́ tɔn mɛ ɔ, xomɛ nɔ hun i. Gɔ́ ná ɔ, mǐ ba ná yi nukɔn ɖo gbigbɔ lixo, bó ná dó sixú lɛ́ d’alɔ nɔví mǐtɔn lɛ́ d’é jí. (1 Tɛ. 4:9, 10) Nú mǐ ná bó tlɛ ɖo nǔgbó ɔ mɛ bɔ é ma sɔ́ hwe ǎ ɔ, mǐ bǐ sixú yi nukɔn ɖo gbigbɔ lixo. Mi nú mǐ ní kpɔ́n lěe mǐ sixú wa énɛ́ gbɔn é.

3. Sɔgbe xá 1 Timɔtée 4:12-16 ɔ, étɛ́ mɛsɛ́dó Pɔ́lu ka dó wǔsyɛ́n lanmɛ nú Timɔtée ɖɔ é ní wa?

³ Timɔtée kpo ɖo wǐnnyáwínnyá mɛ hwenu e mɛsɛ́dó Pɔ́lu sɛ́ wěma tɔn nukɔntɔn ɔ dó è é có, mɛxó agun tɔn e ko mɔ nǔ kpɔ́n é wɛ n’i. É ɖo mɔ̌ có, Pɔ́lu dó wǔsyɛ́n lanmɛ n’i ɖɔ é ní kpo ɖo nukɔn yi wɛ ɖo gbigbɔ lixo. (Xa 1 Timɔtée 4:12-16.) Ényí a dó nukún xó e Pɔ́lu ɖɔ lɛ́ é mɛ kpɔ́n ɔ, a ná ɖ’ayi wú ɖɔ é ba ɖɔ Timɔtée ní yi nukɔn ɖo ali we élɔ́ lɛ́ nu: nǔ sísɔ́ nú jijɔ Klisánwun tɔn ɖé lɛ́ ɖi wǎnyíyí, nǔɖiɖi kpó gbɛ mímɛ́ zínzán kpó, gɔ́ nú blǒbló bónú alɔ ní bí n’i ɖo nǔxixa ɖo agbawungba, Mawuxóɖiɖɔ kpó mɛkplɔ́nkplɔ́n kpó mɛ. Mi nú mǐ ní ɖɔ xó dó kpɔ́ndéwú Timɔtée tɔn jí, bá kpɔ́n lěe nǔ e ɖo jlɛ̌ jí lɛ́ é sísɔ́ ɖó nukɔn nú mǐɖée, bó nya gbě yětɔn sixú d’alɔ mǐ bɔ mǐ ná yi nukɔn ɖo gbigbɔ lixo gbɔn é. Mǐ ná lɛ́ gbéjé ali ɖěɖěe nu mǐ sixú vlɔ́n kan nú sinsɛnzɔ́ mǐtɔn ɖe é ɖé lɛ́ kpɔ́n.

SƆ́ NǓ NÚ JIJƆ KLISÁNWUN TƆN LƐ́

4. Sɔgbe xá Filípunu lɛ́ 2:19-22 ɔ, étɛ́ ka zɔ́n bɔ Timɔtée jɛ alɔ nú Jehovah sɔmɔ̌?

⁴ Étɛ́ ka zɔ́n bɔ Timɔtée jɛ alɔ nú Jehovah sɔmɔ̌? Jijɔ Klisánwun tɔn ɖěɖěe é nɔ ɖe xlɛ́ lɛ́ é wɛ zɔ́n. (Xa Filípunu lɛ́ 2:19-22.) Nú mǐ kpɔ́n xó ɖěɖěe Pɔ́lu nɔ ɖɔ dó Timɔtée wú lɛ́ é mɛ ɔ, mǐ sixú mɔ ɖɔ Timɔtée nɔ sɔ́ éɖée hwe, nɔ nɔ gbejí, nɔ ɖó kan d’azɔ̌ wú, bɔ è sixú lɛ́ ɖeji dó wǔ tɔn. É yí wǎn nú nɔví lɛ́, bɔ nǔ yětɔn nɔ lɛ́ ɖu ayi mɛ n’i tawun. Énɛ́ zɔ́n bɔ Pɔ́lu yí wǎn nú Timɔtée, bó xo nǔ kpɔ́n cóbó sɔ́ azɔ̌ syɛ́nsyɛ́n lɛ́ d’alɔ mɛ n’i ǎ. (1 Kɔ. 4:17) Ðo ali ɖokpó ɔ nu ɔ, ényí mǐ nɔ sɔ́ nǔ nú jijɔ e Jehovah yí wǎn ná lɛ́ é ɔ, é ná yí wǎn nú mǐ, bɔ mǐ ná lɛ́ nyɔ́ zán nú agun ɔ hú gǎn.—Ðɛh. 25:9; 138:6.

5. (a) Nɛ̌ a ka sixú wá gbeta jijɔ Klisánwun tɔn e a ba ná sɔ́ nǔ ná é ɖé tɔn kɔn gbɔn? (b) Lěe ɖiɖe ɔ xlɛ́ gbɔn é ɔ, nɛ̌ nɔví nyɔ̌nu wínnyáwínnyá ɖé ka ɖo azɔ̌ wa dó gbeta e kɔn é wá bó ná nɔ se wǔvɛ́ xá mɛ ɖěvo lɛ́ hú gǎn é jí wɛ gbɔn?

⁵ Nya nǔ tawun ɖé lě gbé. Xo ɖɛ, bó lin tamɛ dó ali e nu é byɔ́ ɖɔ a ní bló hǔzúhúzú lɛ́ ɖo gbɛzán towe mɛ ɖe é jí. Sɔ́ jijɔ tawun ɖé lě bó w’azɔ̌ d’é jí. Ði kpɔ́ndéwú ɔ, a sixú wá gbeta ɔ kɔn bó ná nɔ se wǔvɛ́ xá mɛ, alǒ tɛ́n kpɔ́n bó ɖó jlǒ tawun bó ná nɔ d’alɔ nǔɖitɔ́ hǎtɔ́ towe lɛ́. Kabǐ a sixú tɛ́n kpɔ́n bó ná nɔ nɔ fífá mɛ xá mɛ ɖěvo lɛ́ hú gǎn, lobo nɔ lɛ́ sɔ́ hwɛ kɛ yě hú gǎn lě a nɔ ko bló gbɔn din é. Nǔ e sixú lɛ́ d’alɔ we é ɖěvo wɛ nyí ɖɔ a ní byɔ́ xɔ́ntɔn e wú a ɖeji dó é ɖé ɖɔ é ní ɖɔ ali ɖěɖěe nu a sixú bló hǔzúhúzú lɛ́ ɖe é nú we.—Nǔx. 27:6.

6. Nɛ̌ a ka sixú kpé wú bó sɔ́ nǔ nú jijɔ ɖé gbɔn?

⁶ Tɛ́n kpɔ́n bó jɛ nǔ e gbé nya wɛ a ɖe é kɔn. Nɛ̌ a ka sixú wa mɔ̌ gbɔn? Ali e nu a sixú wa mɔ̌ ɖe é ɖokpó wɛ nyí ɖɔ a ní kplɔ́n nǔ dó jijɔ e wú a ba ná w’azɔ̌ dó é wú ganjí. Mǐ ní ɖɔ ɖɔ a wá gbeta ɔ kɔn bó ná nɔ sɔ́ hwɛ kɛ mɛ ɖěvo lɛ́ hú gǎn lěe a nɔ wa gbɔn din é. A sixú bɛ́ gbɔn lě: xa nǔ dó mɛ ɖěɖěe xó Biblu ɖɔ, bɔ yě sɔ́ hwɛ kɛ mɛ kpó jlǒ kpó, gɔ́ nú mɛ ɖěɖěe ma wa mɔ̌ ǎ lɛ́ é wú, lobo lɛ́ lin tamɛ dó yě jí. Lin tamɛ dó kpɔ́ndéwú Jezu tɔn jí. É nɔ sɔ́ hwɛ kɛ mɛ ɖěvo lɛ́ kpó jlǒ kpó. (Luk. 7:47, 48) É nɔ lɛ́ kpɔ́n nǔ zɛ nǔwanyido yětɔn lɛ́ wú, bó nɔ sɔ́ ayi ɖó nǔwúkpíkpé yětɔn lɛ́ jí. Falizyɛn e nɔ gbɛ ɖo Jezu hwenu lɛ́ é tɔn ka nyí mɔ̌ ǎ; yě “nɔ ké ya nú mɛ” ɖěvo lɛ́ ǎ. (Luk. 18:9) A lin tamɛ dó kpɔ́ndéwú énɛ́ lɛ́ jí gúdo hǔn, kanbyɔ́ hwiɖée ɖɔ: ‘Linlin tɛ́ un ka nɔ ɖó dó mɛ ɖěvo lɛ́ wú? Jijɔ yětɔn tɛ́ lɛ́ jí un ka nɔ sɔ́ ayi ɖó?’ Ényí hwɛ sísɔ́ kɛ mɛɖé ɖo wǔ vɛ́ nú we wɛ hǔn, tɛ́n kpɔ́n bó sɔ́ kɛ́n jijɔ ɖagbe e mɛ ɔ ɖó lɛ́ é bǐ tɔn. Énɛ́ gúdo hǔn, kanbyɔ́ hwiɖée ɖɔ: ‘Linlin tɛ́ Jezu ka nɔ ɖó dó mɛ ɔ wú? É ka ná sɔ́ hwɛ kɛ ɛ a?’ Ényí mǐ nɔ wa mɔ̌ ɔ, mǐ sixú w’azɔ̌ ɖo linlin mǐtɔn wú. Ðo bǐbɛ́mɛ ɔ, é sixú byɔ́ ɖɔ mǐ ní dó gǎn tawun, bó ná sɔ́ hwɛ kɛ mɛ e jɛ do nú mǐ é ɖé. Amɔ̌, ényí mǐ kpo ɖo tíntɛ́nkpɔ́n wɛ bó ná w’azɔ̌ ɖo mǐɖée wú ɔ, mǐ ná wá ɖo gbesisɔmɛ hú gǎn bó ná nɔ sɔ́ hwɛ kɛ mɛ.

KPLƆ́N BÓNÚ ALƆ NÍ LƐ́ SE KPƐ́N NÚ WE ÐO ALI TAWUN TAWUN ÐÉ LƐ́ NU

7. Sɔgbe xá Nǔnywɛ́xó 22:29 ɔ, ali tɛ́ lɛ́ nu Jehovah ka nɔ zán azɔ̌watɔ́ alɔsekpɛ́nnánɔ lɛ́ ɖe ɖo égbé?

⁷ Nǔ ɖěvo e gbé a sixú nya é wɛ nyí ɖɔ a ní kplɔ́n nǔ tawun ɖé lě bónú wiwa tɔn ní bí alɔ nú we. Dǒ nukún azɔ̌watɔ́ nabí e é nɔ byɔ́ cóbɔ è ná gbá Betɛ́li lɛ́, kpléɖókpɔ́ sín xɔ lɛ́ kpó kpléxɔ Axɔ́súɖuto ɔ tɔn lɛ́ é kpó mɛ kpɔ́n. Azɔ̌ wa ɖó kpɔ́ xá nɔví ɖěɖěe ko mɔ nǔ kpɔ́n lɛ́ é wɛ zɔ́n bɔ nɔví énɛ́ lɛ́ gěgé húzú azɔ̌watɔ́ alɔsekpɛ́nnánɔ lɛ́. Lěe fɔtóo ɔ xlɛ́ gbɔn é ɔ, nɔví súnnu lɛ́ kpó nɔví nyɔ̌nu lɛ́ kpó ɖo azɔ̌ e yě ná tuun, bó ná dó jlá kpléɖókpɔ́ sín xɔ lɛ́ kpó kpléxɔ Axɔ́súɖuto ɔ tɔn lɛ́ kpó ɖó é kplɔ́n wɛ. Ðo ali énɛ́ lɛ́ kpó ɖěvo lɛ́ kpó nu ɔ, Jehovah Mawu éé nyí “Axɔ́sú mavɔmavɔ” é kpó Jezu Klísu e nyí “Axɔ́sú . . . axɔ́sú” lɛ́ tɔn é kpó ɖo azɔ̌watɔ́ ɖěɖěe alɔ se kpɛ́n ná lɛ́ é zán wɛ, bɔ yě ɖo azɔ̌ ɖaxó ɖaxó lɛ́ wa wɛ. (1 Tim. 1:17; 6:15, nwt; xa Nǔnywɛ́xó 22:29.) Mǐ ba ná w’azɔ̌ syɛ́nsyɛ́n dó zán nǔwúkpíkpé mǐtɔn lɛ́ dó kpa susu nú Jehovah, b’ɛ ná nyí nú mǐɖée ǎ.—Jaan 8:54.

8. Nɛ̌ a ka sixú wá gbeta nǔwúkpíkpé e gbé a ná nya é tɔn kɔn gbɔn?

⁸ Nya nǔ tawun ɖé lě gbé. Nǔ tawun tɛ́ gbé a ka sixú nya? Kanbyɔ́ mɛxó agun tɔn towe lɛ́ ɖɔ nǔ tɛ́ gbé émí ka sixú nya tawun a jí; a sixú lɛ́ kan nǔ ɖokpó ɔ byɔ́ nukúnkpénǔwútɔ́ lɛ̌dó tɔn towe. Ði kpɔ́ndéwú ɔ, ényí yě ɖɔ nú we ɖɔ hwi ní w’azɔ̌ ɖo nǔwúkpíkpé xóɖiɖɔ kpó mɛkplɔ́nkplɔ́n kpó tɔn towe wú hǔn, byɔ̌ yě ɖɔ yě ní d’alɔ we bónú a ná tuun akpá e xwé a ná w’azɔ̌ ɖe ɖo nǔwúkpíkpé xóɖiɖɔ tɔn towe wú é. Énɛ́ gúdo hǔn, ɖe afɔ tawun tawun lɛ́ bó w’azɔ̌ ɖo nǔ e xó yě ɖɔ nú we é wú. Nɛ̌ a ka sixú wa énɛ́ gbɔn?

9. Nɛ̌ a ka sixú wa gbɔn bó ná kpé wú bó ná nɔ kplɔ́n nǔ mɛ ganjí?

⁹ Tɛ́n kpɔ́n bó jɛ nǔ e gbé nya wɛ a ɖe é kɔn. Mǐ ní ɖɔ ɖɔ a ba ná húzú nǔkplɔ́nmɛtɔ́ alɔsekpɛ́nnánɔ ɖé. A sixú kplɔ́n alɔnuwéma Ðǒ kan dó nǔxixa kpó mɛkplɔ́nkplɔ́n kpó wú ɔ kpó sɔxwixwe kpó. Ényí è ɖe azɔ̌ nú we ɖo kplé aklúnɔzángbla mɛ tɛ́ntin tɔn hwenu ɔ, a sixú byɔ́ nɔví súnnu e nɔ kplɔ́n nǔ mɛ ganjí é ɖé ɖɔ é ní kpɔ́n azɔ̌ towe xá we, bó ɖɔ lěe a sixú vɔ́ azɔ̌ wa ɖ’é wú gbɔn é nú we cóbɔ a ná wá xwlé mɛ ɖo kplé jí. È ɖe azɔ̌ nú we hǔn, nɔ yá wǔ sɔ́ nǔ ná dó mɛhwenu, énɛ́ ná zɔ́n bɔ mɛ lɛ́ ná mɔ ɖɔ a nɔ ɖó kan dó azɔ̌ e è ɖe nú we lɛ́ é wú, bó ná lɛ́ ɖeji dó wǔtu towe.—Nǔx. 21:5; 2 Kɔ. 8:22.

10. Nǎ kpɔ́ndéwú lěe è ná kpé nǔ e gbé nya wɛ è ɖe é ɖé wú gbɔn é tɔn.

¹⁰ Ényí nǔ e gbé nya wɛ a ɖe é wɛ nyí ɖɔ alɔ ní se kpɛ́n nú we tawun ɖo nǔ e wiwa tɔn nɔ vɛ́ wǔ nú we é ɖé kɔn ɔ, étɛ́ a ka sixú wa? Ma jó gbe ó! Nɔví súnnu ɖé nɔ nyí Garry, bɔ nǔxixa nɔ vɛ́ wǔ n’i. É flín ɖɔ ényí émí ɖo tíntɛ́nkpɔ́n wɛ bó ná xa nǔ ɖo kplé agun tɔn lɛ́ jí ɔ, winnyá nɔ hu émí tawun. Amɔ̌, é kpo ɖo gǎn dó wɛ tawun bó ná mɔ tɛn dó vɔ́ azɔ̌ wa ɖo éɖée wú ɖo ali énɛ́ nu. É ɖɔ ɖɔ azɔ̌ e nɔví e kpé nǔ wú ɖo ali énɛ́ nu lɛ́ é kplɔ́n émí é kpó nǔ e émí mɔ xa ɖo wěma lɛ́ mɛ é kpó d’alɔ émí bɔ émí nɔ xwlé xóɖiɖɔ lɛ́ mɛ ɖo kplé lɛ́ kpó kpléɖókpɔ́ lɛ́ kpó jí.

11. Timɔtée ɖɔhun ɔ, étɛ́ ka ná d’alɔ mǐ bɔ mǐ ná kpé wú bó wa nǔ gěgé ɖo sinsɛnzɔ́ Jehovah tɔn mɛ?

¹¹ Timɔtée ka húzú xóɖɔtɔ́, alǒ nǔkplɔ́nmɛtɔ́ alɔsekpɛ́nnánɔ a? Biblu ɖɔ ǎ. Amɔ̌, é ɖo wɛn ɖɔ alɔ bí nú Timɔtée tawun ɖo azɔ̌ e kɔn è sɛ́ ɛ dó é mɛ, ɖó é xwedó wěɖexámɛ Pɔ́lu tɔn wútu. (2 Tim. 3:10) Mɔ̌ ɖokpó ɔ, ényí mǐ bló bɔ nǔwúkpíkpé mǐtɔn lɛ́ kpɔ́n te d’é jí ɔ, mǐ ná kpé wú, bó wa nǔ gěgé ɖo sinsɛnzɔ́ Jehovah tɔn mɛ.

NƆ BA ALI ÐĚÐĚE NU A NÁ WA DEVÍZƆ́ NÚ MƐ ÐĚVO LƐ́ ÐE LƐ́ É

12. Ðagbe tɛ́ alɔ e mɛ ɖěvo lɛ́ dó we é ka wa nú we?

¹² Mɛ ɖěvo lɛ́ nɔ wa nǔ gěgé dó d’alɔ mǐ. Ði kpɔ́ndéwú ɔ, ényí mǐ ɖo dotóoxwé, bɔ mɛxó ɖěɖěe ɖo Wěɖegbɛ́ e nɔ kpé nukún dó dotóoxwéxó wú lɛ́ é mɛ lɛ́ é, alǒ yě mɛ ɖěɖěe ɖo Gbɛ̌ta e nɔ ba azinzɔnnɔ lɛ́ kpɔ́n lɛ́ é mɛ lɛ́ é wá ba mǐ kpɔ́n ɔ, é nɔ su nukún mǐtɔn mɛ tawun. Ényí mǐ ɖo tagba ɖé ɖí xwi xá wɛ ɖo gbɛzán mǐtɔn mɛ, bɔ mɛxó agun tɔn wǎnyíyínɔ ɖé zán hwenu tɔn bó ɖótó mǐ, lobo lɛ́ dó wǔsyɛ́n lanmɛ nú mǐ ɔ, é nɔ su nukún mǐtɔn mɛ tawun. Ényí mǐ ɖó hudó alɔdó tɔn bó ná dó kpé nukún dó Biblu kplɔ́nkplɔ́n ɖé wú, bɔ gběxosín-alijítɔ́ e ko mɔ nǔ kpɔ́n é ɖé kplá mǐ yi Biblu kplɔ́nkplɔ́n ɔ domɛ, lobo wá ɖe wě xá mǐ dó lěe mǐ sixú bló gbɔn é wú ɔ, é nɔ su nukún mǐtɔn mɛ. Xomɛ nɔ hun nɔví súnnu kpó nɔví nyɔ̌nu kpó énɛ́ lɛ́ bǐ ɖɔ yě d’alɔ mǐ. Ényí mǐ zé mǐɖée jó, bá wa devízɔ́ nú nɔví mǐtɔn lɛ́ ɔ, mǐ lɔ sixú ɖu awǎjijɛ mɔ̌hun sín vǐví. Jezu ɖɔ: “Nǔnámɛ nɔ dó xomɛhunhun nú mɛ hú nǔyíɖomɛsí.” (Mɛ. 20:35) Ényí a ba ná wa nǔ gěgé d’é jí nú Jehovah ɖo ali énɛ́ lɛ́, alǒ ɖěvo lɛ́ nu ɔ, étɛ́ ka ná d’alɔ we bɔ a ná kpé wú?

13. Ényí mǐ sɔ́ nǔɖé ɖó nukɔn nú mǐɖée bó ɖo gbě tɔn nya wɛ ɔ, étɛ́ mǐ ka ɖó ná hɛn d’ayi mɛ?

¹³ Nǔ e gbé nya wɛ a ɖe é ní ɖó nyǐ. Ði kpɔ́ndéwú ɔ, a sixú lin nǔ gbɔn lě: ‘Un ba ná wa nǔ gěgé d’é jí ɖo agun ɔ mɛ.’ Amɔ̌, é sixú vɛ́ wǔ nú we bɔ a ná tuun lěe a ná kpé nǔ énɛ́ e gbé nya wɛ a ɖe é wú gbɔn é; gɔ́ ná ɔ, a sixú lɛ́ mɔ ɖɔ émí kún sixú tuun hwenu e émí ná kpé wú dó é ó. Énɛ́ wú ɔ, sɔ́ nǔ tawun ɖé lě, bó nya gbě tɔn. A tlɛ sixú wlán nǔ e gbé nya wɛ a ɖe é kpó tuto e a bló bá jɛ kɔn é kpó dó nǔɖé jí.

14. Étɛ́wú mǐ ka ɖó ná nɔ nɔ jlɛ̌ jí hwenu e mǐ ɖo nǔɖé lɛ́ gbé nya wɛ é?

¹⁴ É lɛ́ byɔ́ ɖɔ mǐ ní nɔ nɔ jlɛ̌ jí hwenu e mǐ ɖo nǔɖé lɛ́ gbé nya wɛ é. Aniwú? Ðó mǐ ɖó acɛ bǐ mlɛ́mlɛ́ dó ninɔmɛ mǐtɔn lɛ́ jí ǎ. Nǔjlɛ́dónǔwú ɖé ɖíe: Mɛsɛ́dó Pɔ́lu d’alɔ bɔ è ɖó agun yɔ̌yɔ́ ɖé ayǐ ɖo toxo Tɛsaloníki tɔn mɛ. B’ɛ ɖo wɛn ɖɔ nǔ e gbé nya wɛ é ɖe é wɛ nyí ɖɔ é ní nɔ fínɛ́, bó d’alɔ Klisánwun yɔ̌yɔ́ énɛ́ lɛ́. Amɔ̌, gbeklánxámɛtɔ́ lɛ́ lɔn bónú Pɔ́lu ná nɔ toxo ɔ mɛ ǎ. (Mɛ. 17:1-5, 10) Ényí Pɔ́lu ko nɔ fínɛ́ wɛ ɔ, é ná ko dɔn nɔví tɔn lɛ́ dó hɔzɔ mɛ. Amɔ̌, Pɔ́lu jó gbe dó alɔ dídó yě wú ǎ. É nyɔ́ wa ɔ, é húzú sɔgbe xá ninɔmɛ lɛ́. Nukɔnmɛ ɔ, é sɛ́ Timɔtée dó bónú é ná d’alɔ Klisánwun e ɖo Tɛsaloníki lɛ́ é bónú nǔɖiɖi yětɔn ná lí dǒ. (1 Tɛ. 3:1-3) É ɖo wɛn ɖɔ xomɛ ná ko hun Tɛsaloníkinu lɛ́ tawun ɖɔ Timɔtée ɖo gbesisɔmɛ, bá yi fí ɖěbǔ e è ɖó hudó tɔn ɖe é!

15. Nɛ̌ ninɔmɛ ɖěɖěe nɔ zɛ nǔwúkpíkpé mǐtɔn wú lɛ́ é ka sixú wa nǔ dó nǔ e gbé nya wɛ mǐ ɖe lɛ́ é wú gbɔn? Jlɛ̌ dó nǔɖé wú.

¹⁵ Ninɔmɛ e mɛ Pɔ́lu gbɔn ɖo Tɛsaloníki é sixú kplɔ́n nǔɖé mǐ. Mǐ sixú sɔ́ nǔɖé ɖó nukɔn nú mǐɖée bó ɖo gbě tɔn nya wɛ, amɔ̌, ninɔmɛ mǐtɔn lɛ́ sixú húzú bɔ mǐ sɔ́ ná sixú kpé wú ǎ. (Nǔt. 9:11) Ényí mɔ̌ wɛ nǔ lɛ́ nyí gbɔn nú hwiɖésúnɔ ɔ, ɖo gbesisɔmɛ, bá nya nǔ ɖěvo e wú a sixú kpé é gbé. Nǔ e asú kpó asi kpó e nɔ nyí Ted kpó Hiedi kpó é wa é nɛ́. Lanmɛzɔn ɖé zɔ́n bɔ é byɔ́ ɖɔ yě ní gosín Betɛ́li. Amɔ̌, wǎn e yě yí nú Jehovah é sísɛ́ yě, bɔ yě ba ali ɖěvo e nu yě sixú vlɔ́n kan nú sinsɛnzɔ́ yětɔn ɖe lɛ́ é. Ðo bǐbɛ́mɛ ɔ, yě húzú gběxosín-alijítɔ́ hwebǐnu tɔn. Nukɔnmɛ ɔ, yě húzú gběxosín-alijítɔ́ titewungbe, bɔ è kplɔ́n azɔ̌ Ted, b’ɛ ná nyí nukúnkpénǔwútɔ́ lɛ̌dó tɔn tɛnmɛkpɔ́nnúmɛtɔ́. Énɛ́ gúdo ɔ, xwe e è nɔ ɖó bó ná dó kpo ɖo nukúnkpénǔwútɔ́ lɛ̌dó tɔn nyí wɛ é húzú. Ted kpó Hiedi kpó mɔ ɖɔ xwe émítɔn ko zɛ xwe e è nɔ ɖó bó ná dó kpo ɖo wǔjɔmɛzɔ́ énɛ́ wa wɛ é wú. Awakanmɛ kú yě có, yě mɔ nǔ jɛ mɛ ɖɔ émí sixú kpo ɖo Jehovah sɛn wɛ ɖo ali ɖěvo lɛ́ nu. Ted ɖɔ: “Mǐ kplɔ́n ɖɔ mǐ sixú sɛn Jehovah, ɖo akpáxwé sinsɛnzɔ́ ɔ tɔn vovo mɛ.”

16. Étɛ́ Galátinu lɛ́ 6:4 ka sixú kplɔ́n mǐ?

¹⁶ Mǐ sixú ɖ’acɛ dó nǔ e nɔ jɛ ɖo gbɛzán mǐtɔn mɛ lɛ́ é bǐ jí ǎ. Énɛ́ wú ɔ, é ɖo tají ɖɔ mǐ ní ma nɔ lin ɖɔ wǔjɔmɛzɔ́ mǐtɔn lɛ́ wɛ zɔ́n bɔ mǐ xɔ akwɛ́ nú Jehovah ó; gɔ́ ná ɔ, é lɛ́ ɖo tají ɖɔ mǐ ní ma nɔ jlɛ́ mǐɖée dó mɛ ɖěvo e ɖó wǔjɔmɛzɔ́ e mǐ ma ɖó ǎ lɛ́ é wú ó. Hiedi tínmɛ ɖɔ: “Ényí a nɔ jlɛ́ lěe nǔ lɛ́ ɖo yiyi wɛ gbɔn ɖo gbɛzán towe mɛ é dó lěe é ɖe gbɔn nú mɛ ɖěvo lɛ́ é wú ɔ, a ná ba awǎjijɛ kpo.” (Xa Galátinu lɛ́ 6:4.) É ɖo tají ɖɔ mǐ ní nɔ ba ali ɖěɖěe nu mǐ ná nɔ d’alɔ mɛ ɖěvo lɛ́, lobo lɛ́ sɛn Jehovah ɖe lɛ́ é.c

17. Étɛ́ a ka sixú wa bó ná dó jɛxá wǔjɔmɛzɔ́ lɛ́?

¹⁷ Ényí a nɔ zán gbɛ e bɔkun é, lobo nɔ lɛ́ nyi alɔ nú axɔ́ e ma ɖo dandan ǎ lɛ́ é ɔ, ali ɔ sixú hun nú we, bɔ a ná wa nǔ gěgé d’é jí ɖo sinsɛnzɔ́ Jehovah tɔn mɛ. Sɔ́ nǔ vǔvǔ e ná d’alɔ we bɔ a ná kpé wú bó jɛ nǔ ɖaxó lɛ́ kɔn é ɖó nukɔn nú hwiɖée. Ði kpɔ́ndéwú ɔ, ényí gběxosín-alijítɔ́ hwebǐnu tɔn wɛ a jló ná nyí ɔ, a sixú wá gbeta ɔ kɔn din hwɛ̌, bó ná nɔ nyí gběxosín-alijítɔ́ alɔgɔ́tɔ́ ɖo sun lɛ́ bǐ mɛ. Ényí devízɔ́watɔ́ sinsɛnzɔ́wiwa tɔn ba ná nyí wɛ a ɖe ɔ, a sixú wá gbeta ɔ kɔn, bó ná nɔ zán hwenu hú gǎn ɖo sinsɛnzɔ́ ɔ mɛ hú lěe a ɖ’é wú gbɔn din é, bó nɔ lɛ́ yi ba azinzɔnnɔ lɛ́ kpó mɛxómɔ ɖěɖěe ɖo agun towe mɛ lɛ́ é kpó kpɔ́n. Nǔ e kplɔ́n wɛ a ɖe din lɛ́ é sixú hun wǔjɔmɛzɔ́ sinsɛnzɔ́ tɔn ɖěvo lɛ́ sín ali nú we ɖo sɔgúdo. Kán ɖ’é jí, bá wa nǔ e wú a kpé lɛ́ é bǐ ɖo azɔ̌ ɖěbǔ e è ɖe nú we lɛ́ é kɔn.—Hlɔ̌. 12:11.

18. Lěe ɖiɖe ɔ xlɛ́ gbɔn é ɔ, étɛ́ kpɔ́ndéwú Beverley tɔn ka kplɔ́n we?

¹⁸ È na bo ɖó xwe ɖěbǔ ɔ, è hɛn ɔ, è ná sɔ́ nǔ gbigbɔ tɔn lɛ́ ɖó nukɔn nú mɛɖée bó jɛ kɔn. Ð’ayi kpɔ́ndéwú nɔví nyɔ̌nu e ɖó xwe 75, bó nɔ nyí Beverley é tɔn wú. Azɔn syɛ́nsyɛ́n ɖé wɛ ɖo tagba dó n’i wɛ, bɔ é nɔ vɛ́ wǔ n’i tawun ɖɔ é ní ɖi zɔnlin. Amɔ̌, é nɔ ba vɛ́návɛ́ná bó ná ɖ’alɔ ɖo nǔjlájlá Flǐn tɔn lɛ́ mɛ bǐ mlɛ́mlɛ́. Énɛ́ wú ɔ, é wá gbeta ɔ kɔn, bó ná nya nǔ tawun tawun ɖé lɛ́ gbé. Hwenu e Beverley kpé nǔ e gbé nya wɛ é ɖe ɖo nǔjlájlá Flǐn tɔn ɔ kpáxwé é wú é ɔ, xomɛ hun i tawun. Gǎn e é dó é sísɛ́ mɛ ɖěvo lɛ́, bɔ yě lɔ w’azɔ̌ syɛ́nsyɛ́n ɖo sinsɛnzɔ́ ɔ mɛ. Azɔ̌ e nɔví súnnu kpó nɔví nyɔ̌nu kpó mɛxómɔ mǐtɔn lɛ́ nɔ wa lɛ́ é nɔ su Jehovah nukúnmɛ, ényí ninɔmɛ lɛ́ ná bó tlɛ ɖó dogbó nú nǔ e yě sixú wa é ɔ nɛ́.—Ðɛh. 71:17, 18.

19. Nǔ gbigbɔ tɔn tɛ́ lɛ́ mɔ̌ gbé mǐ ka sixú nya?

¹⁹ Nya nǔ ɖěɖěe wú a sixú kpé lɛ́ é gbé. Sɔ́ nǔ nú jijɔ ɖěɖěe ná zɔ́n bɔ nǔ towe ná nyɔ́ Jehovah nukúnmɛ lɛ́ é. Kplɔ́n nǔ ɖěɖěe ná zɔ́n bɔ a ná nyɔ́ zán nú Mawu mǐtɔn kpó tutoblónúnǔ tɔn kpó hú gǎn lɛ́ é. Ba ali ɖěɖěe nu a sixú wa devízɔ́ nú nɔví súnnu kpó nɔví nyɔ̌nu kpó towe lɛ́ bǐ mlɛ́mlɛ́ ɖe lɛ́ é.d Timɔtée ɖɔhun ɔ, Jehovah ná kɔn nyɔ̌ná dó jǐ towe, bɔ “mɛ bǐ ná mɔ nǔ jɛ nukɔnyiyi towe wú.”—1 Tim. 4:15.