Fífá mimɔ ɖo gbɛ e mɛ ahwan kpó hunnyahunnya lɛ́ kpó ɖe é
Gary e wa ahwanzɔ́ ɖ’ayǐ é ɖɔ: “Cóbónú un ná jɛ Biblu kplɔ́n jí ɔ, un tuun nǔ e wú dǎkaxixo, nǔagɔwiwa kpó hunnyahunnya kpó sukpɔ́ ɖo gbɛ ɔ mɛ é ǎ. Amɔ̌ din ɔ, un ɖó fífá ayi mɛ tɔn. Un tuun ɖɔ Jexóva Mawu ná bló bɔ gbɛ ɔ ná nyí fí e ayijayǐ ná nɔ é ɖé.”
Gary ɖokpónɔ wɛ nǔ nɔ cí mɔ̌ ná ǎ. Kpɔ́n lěe Biblu ko d’alɔ mɛ ɖěvo lɛ́ gbɔn é.
BIBLU ÐƆ: “Hwi wɛ nyí Aklúnɔ, a nyɔ́, a ɖo gbesisɔmɛ bo ná sɔ́ hwɛ kɛ mɛ.”—Ðɛhan 86:5.
LĚE ÉNƐ́ NƆ D’ALƆ GBƆN É: “Wěmafɔ énɛ́ ná gǎnjɛwú mì ɖɔ Jexóva nɔ kú nǔbláwǔ nú mɛ. Un tuun ɖɔ é ɖo gbesisɔmɛ bo ná sɔ́ nǔ e un wa wá yi hwenu e un ɖo ahwan mɛ é bǐ kɛ mì.”—Wilmar, Colombie.
BIBLU ÐƆ: “Un ná bló jǐnukúnsin yɔ̌yɔ́, bo ná bló ayǐkúngban yɔ̌yɔ́. Énɛ́ ɔ, mɛɖé sɔ́ ná flín nǔ xóxó lɛ́ ǎ. Yě sɔ́ ná wá ayi mɛ nú mɛɖé ǎ.”—Ezayíi 65:17.
LĚE ÉNƐ́ NƆ D’ALƆ GBƆN É: “Un nɔ se wǔvɛ́ nǔ nyanya e jɛ wá yi lɛ́ é flínflín tɔn, bo lɛ́ jɛ linkpɔ́nzɔn, ɖó nǔ e un mɔ ɖo ahwanzɔ́ mɛ lɛ́ é wú. Amɔ̌, wěmafɔ énɛ́ flín mì ɖɔ zaanɖé din ɔ, Jexóva ná bló bɔ un ná wɔn nǔ baɖabaɖa énɛ́ lɛ́ bǐ, bo sɔ́ ná nɔ kú dlɔ̌ baɖabaɖa ɖě ǎ. Yě ná blí bú bǐ mlɛ́mlɛ́. Nǔníná tɛ́ ɖíe!”—Zafirah, États-Unis.
BIBLU ÐƆ: “Hwɛjijɔ ní gba kpé axɔ́sú ɔ hwenu, bɔ nú sun vɛ́ ko nɔ tɔ́n ɔ, vivo ní tíin ɖo to ɔ mɛ.”—Ðɛhan 72:7.
LĚE ÉNƐ́ NƆ D’ALƆ GBƆN É: “Un nɔ lin tamɛ dó xó énɛ́ lɛ́ jí hwɛhwɛ. Zaanɖé din ɔ, mǐ sɔ́ ná nɔ kú dlɔ̌ baɖabaɖa ɖé ɖó ahwan wú ǎ, bɔ mǐ sɔ́ ná nɔ ɖo adohu adohu jí ɖě ɖó mɛvívɛ́ mǐtɔn lɛ́ sín ayijayǐ wú ǎ.”— Oleksandra, Ukraine.
BIBLU ÐƆ: “Mɛ towe e kú lɛ́ ná fɔ́n . . . Mi mɛ e ɖo kɔ́ glɔ́ lɛ́ mi, mi fɔ́n; mi j’awǎ.”—Ezayíi 26:19.
LĚE ÉNƐ́ NƆ D’ALƆ GBƆN É: “Ðibla nyí hǎgbɛ́ xwédo ce tɔn lɛ́ bǐ wɛ è hu ɖo akɔhwan Tutsi lɛ́ tɔn hwenu. Amɔ̌, wěmafɔ énɛ́ ná jiɖe mì ɖɔ un ná lɛ́ wá mɔ yě. Un ɖo nukún ɖó wɛ bo ná se awǎjijɛ sín gbe yětɔn lɛ́, hwenu e yě ná fɔ́n sín kú é!”—Marie, Rwanda.
BIBLU ÐƆ: “Zaanɖé din ɔ, mɛdídá sɔ́ ná ɖe ǎ . . . To ɔ ka ná nyí mɛ e nɔ sɔ́ yěɖée hwe lɛ́ tɔn, bɔ fífá ma ɖó dogbó e yě ná mɔ ɔ wɛ ná nyí nǔ e ná nɔ víví nú yě é.”—Ðɛhan 37:10, 11.
LĚE ÉNƐ́ NƆ D’ALƆ GBƆN É: “Ahwan ɔ ko fó có, nǔagɔwiwa lɛ́ kpó mɛdídá lɛ́ kpó kpo ɖ’ayǐ. Wěmafɔ énɛ́ lɛ́ ná hlɔ̌nhlɔ́n mì tawun. Jexóva nɔ mɔ nǔ lɛ́ bǐ, bo lɛ́ mɔ nukúnnú jɛ ninɔmɛ ce mɛ. É d’akpá ɖɔ zaanɖé din ɔ, wǔvɛ́ mimɔ lɛ́ bǐ ná vɔ, bɔ è sɔ́ ná flín yě ǎ.”—Daler, Tadjikistan.
Mɛ ɖěɖěe xó è ɖɔ ɖo xójláwéma élɔ́ mɛ lɛ́ é ɖo Kúnnuɖetɔ́ Jexóva tɔn lǐvi mɔ̌kpán e Biblu d’alɔ bɔ yě mɔ fífá lɛ́ é mɛ. Yě ko kplɔ́n lěe yě ná ɖu ɖo wǎngbɛ́númɛ alɔkpa lɛ́ bǐ jí gbɔn é. (Efɛ́zinu lɛ́ 4:31, 32) Kúnnuɖetɔ́ Jexóva tɔn lɛ́ nɔ ɖó nu ɖo toxóɖiɖɔ mɛ ǎ, bo nɔ lɛ́ gbɛ́ ɖɔ émí kún ná ɖ’alɔ ɖo dǎkaxixo mɛ ó.—Jaan 18:36.
Kúnnuɖetɔ́ Jexóva tɔn lɛ́ nɔ mɔ alɔdó ɖo kplékplé nɔví lɛ́ tɔn yětɔn wǎnyíyínɔ e gbɔn gbɛ ɔ bǐ mɛ é mɛ. (Jaan 13:35) Ði kpɔ́ndéwú ɔ, é byɔ́ ɖɔ Oleksandra e xó mǐ ɖɔ wá yi é kpó nɔví nyɔ̌nu tɔn kpó ní hɔn yi to ɖěvo mɛ ɖó ahwan wú. É ɖɔ: “Hwenu e mǐ d’asá dogbó ɔ é ɔ, tlóló jɛ́n mǐ mɔ Kúnnuɖetɔ́ ayǐ ɔ jí tɔn lɛ́ ɖo fínɛ́ bo ɖo gbesisɔmɛ bá yí mǐ. Gǔdo e yě nɔ nú mǐ é d’alɔ mǐ bɔ mǐ húzú sɔgbe xá lěe è nɔ zán gbɛ gbɔn ɖo to yɔ̌yɔ́ ɖé mɛ é.”
Mǐ byɔ́ we kpó akpakpa sɔ́ mɛ kpó ɖɔ a ní wá gɔ́ nú mǐ ɖo kplé mǐtɔn lɛ́ jí; kplé énɛ́ lɛ́ jí ɔ, mǐ nɔ kplɔ́n nǔ dó wɛn fífá tɔn e ɖo Biblu mɛ é kpó lěe è ná zán gbɔn é kpó wú. Yi jw.org jí bá dó mɔ fí e sɛkpɔ́ we é ɖé, alǒ bá dó byɔ́ ɖɔ Kúnnuɖetɔ́ Jexóva tɔn ɖé ní zán alɔnuwéma Ðu gbɛ víví káká sɔ́yi! dó kplɔ́n Biblu xá we vɔ̌nu.