Nɔ xwedó kpɔ́ndéwú Jexóva kpó Jezu kpó tɔn ɖo lěe a nɔ lin nǔ gbɔn é kpáxwé

1-2. Étɛ́ ka ɖo wǎn yí nú Jexóva mɛ? Nɛ̌ Jezu ka ɖe énɛ́ xlɛ́ nyi wɛn gbɔn?

“A ÐÓ ná yí wǎn nú Jexóva Mawu towe kpó ayi towe bǐ kpó, kpó lǐndɔ̌n towe bǐ kpó, kpó hlɔ̌nhlɔ́n towe bǐ kpó, kpó linlin towe bǐ kpó.” (Luk. 10:27) Jezu ɖɔ ɖɔ sɛ́n énɛ́ wɛ ɖo tají hú gǎn sɛ́n lɛ́ bǐ ɖo Mɔyízisɛ́n ɔ mɛ. Ð’ayi wú ɖɔ wǎn e mǐ yí nú Jexóva é xó ɔ kan ayi mǐtɔn; jlǒ mǐtɔn lɛ́ kpó lěe nǔ nɔ cí nú mǐ é kpó ɖ’é mɛ. É lɛ́ kunkplá zě e mǐ zé mǐɖée jó n’i kpó lǐndɔ̌n mǐtɔn bǐ kpó é, gɔ́ nú hlɔ̌nhlɔ́n mǐtɔn. É ɖo mɔ̌ có, wǎn yí nú Jexóva lɛ́ kan linlin mǐtɔn, énɛ́ wɛ nyí ali e nu mǐ nɔ lin tamɛ dó nǔ lɛ́ wú ɖe é. É ɖo wɛn ɖɔ, mǐ kún sixú mɔ nukúnnú jɛ lěe Jexóva nɔ lin nǔ gbɔn é mɛ bǐ mlɛ́mlɛ́ gbeɖé ó. Amɔ̌, mǐ hɛn ɔ, mǐ ná mɔ nukúnnú jɛ linlin Mawu tɔn mɛ ganjí gbɔn “linlin Klísu tɔn” kpínkplɔ́n gblamɛ, ɖó Jezu nɔ ɖe linlin Tɔ́ tɔn tɔn xlɛ́ bɔ nǔ bǐ nɔ vɔ ɖ’é wú.—1 Kɔ. 2:16.

² Jezu yí wǎn nú Jexóva kpó linlin tɔn bǐ kpó. É tuun nǔ e ba wɛ Mawu ɖe ɖ’así tɔn é, bo kán ɖ’é jí bá wa nǔ sɔgbe xá, ényí mɔ̌ wiwa ná bo tlɛ byɔ́ ɖɔ é ná se wǔvɛ́ ɖó nǔjlɔ́jlɔ́wiwa wú ɔ nɛ́. Jezu sɔ́ ayi ɖó jlǒ Tɔ́ tɔn tɔn wiwa jí bo lɔn bónú nǔ ɖěbǔ fɛ́ ayi tɔn sín nǔ énɛ́ e gbé nya wɛ é ɖe é jí ǎ.

3. Étɛ́ mɛsɛ́dó Piyɛ́ɛ ka kplɔ́n ɖo Jezu gɔ́n? Étɛ́ sín wǔsyɛ́n Piyɛ́ɛ ka dó lanmɛ nú klisánwun hǎtɔ́ tɔn lɛ́ ɖɔ yě ní wa? (1 Piyɛ́ɛ 4:1)

³ È jɔ wǔ Piyɛ́ɛ kpó mɛsɛ́dó gbɛ̌ tɔn lɛ́ kpó bɔ yě zán hwenu ɖó kpɔ́ xá Jezu bo kplɔ́n lěe é nɔ lin nǔ gbɔn é tlɔlɔ. Hwenu e Piyɛ́ɛ ɖo wěma tɔn nukɔntɔn e Mawu sɔ́ d’ayi mɛ n’i é wlán wɛ é ɔ, é dó wǔsyɛ́n lanmɛ nú klisánwun lɛ́ ɖɔ yě ní sɔ́ nǔ nú yěɖée bónú linlin yětɔn ná nyí ɖokpó ɔ xá Klísu tɔn. (Xa 1 Piyɛ́ɛ 4:1.) Xógbe “mi sɔ́ nǔ nú miɖée” e Piyɛ́ɛ zán é ɔ, xógbe ahwanfuntɔ́ lɛ́ tɔn wɛ. Hǔn, ényí klisánwun lɛ́ tɛ́n kpɔ́n bónú linlin yětɔn nyí nǔ ɖokpó ɔ xá Jezu tɔn ɔ, yě ná ɖó ahwanlyánnú agbɔ̌nnɔ ɖé bá dó fun ahwan xá jlǒ hwɛhuhu tɔn kpó gbɛ e nu kpa acɛ dó wɛ Satáan ɖe é kpó.—2 Kɔ. 10:3-5; Efɛ́. 6:12.

4. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

⁴ Mǐ ná gbéjé lěe Jezu nɔ lin nǔ gbɔn é kpó lěe mǐ sixú xwedó kpɔ́ndéwú tɔn gbɔn é kpó kpɔ́n. Kpɔ́ndéwú tɔn ná d’alɔ mǐ bɔ mǐ ná mɔ lěe mǐ sixú (1) xwedó kpɔ́ndéwú lěe Jexóva nɔ lin nǔ gbɔn é tɔn, b’ɛ ná d’alɔ mǐ bɔ mǐ ná ɖó linlin ɖokpó ɔ éɖɔhun gbɔn é, (2) sɔ́ mǐɖée hwe gbɔn é, kpó (3) lěe ayi mǐtɔn ná ɖo te gbɔn Jexóva wú gíngánjɛ ɖo ɖɛ mɛ gbɔn é kpó.

XWEDÓ LĚE JEXÓVA NƆ LIN NǓ GBƆN É SÍN KPƆ́NDÉWÚ

5. Nɛ̌ Piyɛ́ɛ ma ka lin nǔ Jexóva ɖɔhun ǎ ɖo ninɔmɛ ɖé mɛ gbɔn?

⁵ Mǐ ní lin tamɛ dó nǔ élɔ́ jí. Ðo ninɔmɛ ɖé mɛ ɔ, Piyɛ́ɛ ɖó linlin e Jexóva nɔ ɖó dó nǔ lɛ́ wú é ǎ. Jezu ɖɔ nú mɛsɛ́dó tɔn lɛ́ ɖɔ émí ná yi Jeluzalɛ́mu, bɔ sinsɛngán lɛ́ ná wlí émí, xo émí lobo ná hu émí. (Mat. 16:21) É sixú ko vɛ́ wǔ nú Piyɛ́ɛ b’ɛ ná yí gbe ɖɔ Jexóva ná lɔn bɔ è ná hu Jezu e nyí nukúnɖíɖó Izlayɛ́li tɔn, bo lɛ́ nyí Mɛsíya e sín akpá è dó é é. (Mat. 16:16) Énɛ́ wú ɔ, Piyɛ́ɛ kplá Jezu jɛ kɛ́n, bo ɖɔ n’i ɖɔ: “Mawu ma lɔn ó, Aklúnɔ; nǔ mɔ̌hun ná jɛ dó jǐ towe gbeɖé ǎ.” (Mat. 16:22) Ðó Piyɛ́ɛ ma ɖó linlin Jexóva tɔn dó xó ɔ wú ǎ wútu ɔ, linlin tɔn nyí ɖokpó ɔ kpó Jezu tɔn kpó ǎ.

6. Ali tɛ́ nu Jezu ka xlɛ́ ɖɔ linlin émítɔn sɔgbe xá linlin Jexóva tɔn ɖe?

⁶ Linlin Jezu tɔn xo nǔ dó akpa ɖokpó ɔ mɛ bǐ mlɛ́mlɛ́ xá linlin Tɔ́ tɔn e ɖo jǐxwé é tɔn. Jezu ɖɔ nú Piyɛ́ɛ ɖɔ: “Wǎ yi gǔdo ce, Satáan! Afɔklɛ́nnú wɛ a nyí nú mì, ɖó linlin towe lɛ́ sɔgbe xá Mawu tɔn lɛ́ ǎ, loɔ, gbɛtɔ́ lɛ́ tɔn wɛ.” (Mat. 16:23) Linlin ɖagbe lɛ́ wɛ Piyɛ́ɛ sixú ko ɖó, amɔ̌, Jezu gbɛ́ wěɖexámɛ tɔn. Nǔkplɔ́nmɛ ɖé ɖo fínɛ́ nú mǐ. Ta nyinya ɖo wǔvɛ́ lɛ́ nu wɛ nyí nǔ e ba nú Jezu wɛ Jexóva ɖe é ǎ. Ðo ninɔmɛ énɛ́ mɛ ɔ, Piyɛ́ɛ kplɔ́n nǔ xɔ akwɛ́ ɖé dó linlin Mawu tɔn lɛ́ sísɔ́ dó ɖó linlin mɛtɔn wú.

7. Nɛ̌ Piyɛ́ɛ ka xlɛ́ ɖo nukɔnmɛ ɖɔ émí ba ná húzú linlin émítɔn b’ɛ ná xo nǔ dó akpa ɖokpó ɔ mɛ xá Jexóva tɔn gbɔn? (Kpɔ́n ɖiɖe ɔ.)

⁷ Nukɔnmɛ ɔ, Piyɛ́ɛ xlɛ́ ɖɔ émí ba ná tɛ́ dó lěe Jexóva nɔ lin nǔ gbɔn é wú. Hwe ɔ nu su nú Kosi e ma gbo ada ǎ lɛ́ é bɔ yě ná wá togun Mawu tɔn mɛ. È sɔ́ azɔ̌ d’así nú Piyɛ́ɛ bɔ é ná jlá wɛn ɔ Kɔnɛ́yi e nyí Kosi nukɔntɔn e ná nɔ gbɛ̌ta yɔ̌yɔ́ mawusɛntɔ́ lɛ́ tɔn énɛ́ mɛ é. Jwifu lɛ́ nɔ kpé nǔ káká ɖé xá Kosi lɛ́ ǎ, énɛ́ wú ɔ, é ɖo wɛn ɖɔ Piyɛ́ɛ ɖó hudó alɔdó tɔn bá dó sixú ɖo gbesisɔmɛ nú azɔ̌ tɔn. Hwenu e Piyɛ́ɛ wá mɔ nǔ jɛ jlǒ Mawu tɔn wú é ɔ, é húzú linlin. Wǎgbɔ tɔn ɔ, hwenu e è sɛ́ ɛ dó é ɔ, é “xo nǔ kpɔ́n” cóbó yi ǎ. (Mɛ. 10:28, 29) É jlá wɛn ɔ Kɔnɛ́yi kpó xwédo tɔn kpó bɔ yě bló batɛ́mu.—Mɛ. 10:21-23, 34, 35, 44-48.

8. Nɛ̌ mǐ ka sixú xlɛ́ ɖɔ linlin mǐtɔn sɔgbe xá linlin Jexóva tɔn gbɔn? (1 Piyɛ́ɛ 3:8 kpó tínmɛ e ɖo do é kpó)

⁸ Xwe lɛ́ gúdo ɔ, Piyɛ́ɛ dó wǔsyɛ́n lanmɛ nú klisánwun hǎtɔ́ tɔn lɛ́ ɖɔ yě ní “ɖó gbe kpɔ́.” (Xa 1 Piyɛ́ɛ 3:8 kpó tínmɛ e ɖo do é kpó.) Ðó mǐ nyí togun Jexóva tɔn wútu ɔ, ényí mǐ nɔ ɖó linlin Jexóva tɔn lěe è ɖɔ gbɔn ɖo Xó tɔn mɛ é ɔ, mǐ sixú nɔ ɖó linlin ɖokpó ɔ. Ði kpɔ́ndéwú ɔ, Jezu dó wǔsyɛ́n lanmɛ nú ahwanvú tɔn lɛ́ ɖɔ yě ní sɔ́ Axɔ́súɖuto ɔ ɖó tɛn nukɔntɔn ɔ mɛ ɖo gbɛzán yětɔn mɛ. (Mat. 6:33) Wɛnjlátɔ́ e ɖo agun towe mɛ é ɖé sixú hɛn énɛ́ ayi mɛ bo wá gbeta ɔ kɔn ɖɔ émí ná ɖ’alɔ ɖo sinsɛnzɔ́ hwebǐnu tɔn alɔkpa ɖé lɛ́ mɛ. Mǐ ná ɖɔ n’i ɖɔ é ɖó ná sɔ́ ali e ná bɔ wǔ hú gǎn n’i ɖo gbɛ mɛ é ǎ, é nyɔ́ wa ɔ, mǐ ɖó ná ɖɔ xó ɖagbe lɛ́ dó nǔ e gbé nya wɛ é ɖe é wú, bo lɛ́ d’alɔ ɛ.

NƆ SƆ́ HWIÐÉE HWE

9-10. Nɛ̌ Jezu ka ɖe xlɛ́ ɖɔ émí nɔ sɔ́ émíɖée hwe tawun gbɔn?

⁹ Ðo zǎn e jɛ nukɔn nú gbe e gbe è hu Jezu é mɛ ɔ, é kplɔ́n nǔ tají ɖé Piyɛ́ɛ kpódó mɛsɛ́dó ɖěvo lɛ́ kpó dó mɛɖéesɔ́hwe wú. Jɛ nukɔn hwɛ̌ ɔ, Jezu sɛ́ Piyɛ́ɛ kpó Jaan kpó dó ɖɔ yě ní sɔ́ nǔ nú nǔɖuɖu gǔdo tɔn e é ná nɔ agbaza mɛ bo ɖu xá yě é. Nǔsísɔ́ ɔ sixú ko lɛ́ byɔ́ ɖɔ yě ní sɔ́ nǔ nú basya kpó wǔsúnsúnnú lɛ́ kpó bónú jǒnɔ lɛ́ ná dó sixú klɔ́ afɔ yětɔn lɛ́ jɛ nukɔn nú nǔɖuɖu ɔ. Amɔ̌, mɛ̌ ka ná wa mɛɖéesɔ́hwezɔ́ énɛ́ hwenu e gan ɔ ná xo é?

¹⁰ Jezu xo nǔ kpɔ́n ǎ, bo sɔ́ éɖée hwe ɖo ali jí wǔ ɖé nu. É kpácá mɛsɛ́dó tɔn lɛ́ tawun ɖɔ é wa nǔ e, nǔ ɖo ganjí wɛ ɔ, mɛsɛntɔ́ ɖé wɛ ɖó ná wa é. Jezu ɖe awu tɔn aga tɔn ɔ nyi ayǐ, bo sɔ́ wǔsúnsúnnú ɖé sin d’alin, lobo wún sin dó basya mɛ bo jɛ afɔ klɔ́ nú yě jí. (Jaan 13:4, 5) É sixú ko ɖu hwenu kpɛɖé cóbɔ é klɔ́ afɔ nú mɛsɛ́dó 12 lɛ́ bǐ, káká jɛ Judási e ɖo nǎ wá sɛ ɛ wɛ é jí. É ɖo mɔ̌ có, Jezu ka wa azɔ̌ ɔ yi fó kpó mɛɖéesɔ́hwe kpó. Énɛ́ gúdo ɔ, Jezu xwe sɔ bo tínmɛ nú yě ɖɔ: “Mi ka mɔ nukúnnú jɛ nǔ e un bló nú mi é mɛ a? Mi nɔ ylɔ́ mì ɖɔ ‘Mɛ̌si,’ bo nɔ lɛ́ ylɔ́ mì ɖɔ ‘Aklúnɔ’; hwɛ mitɔn ka jɔ, ɖó mɔ̌ wɛ un nyí. Hǔn, ényí nyɛ mɛ e nyí Aklúnɔ, bo lɛ́ nyí Mɛ̌si é klɔ́ afɔ nú mi ɔ, mi lɔ ɖó ná nɔ klɔ́ afɔ nú miɖée lɛ́.”—Jaan 13:12-14.

11. Nɛ̌ Piyɛ́ɛ ka ɖe xlɛ́ ɖɔ émí kplɔ́n mɛɖéesɔ́hwe gbɔn? (1 Piyɛ́ɛ 5:5) (Kpɔ́n ɖiɖe ɔ lɔmɔ̌.)

¹¹ Mɛɖéesɔ́hwe Jezu tɔn kplɔ́n nǔ Piyɛ́ɛ. Ée Jezu lɛ́ kɔ yi jǐxwé gúdo é ɔ, Piyɛ́ɛ bló nǔjíwǔ bo gbɔ azɔn nú nya e è ji afɔkponɔ tɔn é ɖé. (Mɛ. 1:8, 9; 3:2, 6-8) Nǔ énɛ́ e jɛ bo sɔ́ akpakpa mɛ é zɔ́n bɔ mɛ lɛ́ nyi ahwan wá gɔ̌n yětɔn. (Mɛ. 3:11) Xá e mɛ è nɔ sɔ́ ayi ɖó mɛ nukúnɖéjí nyínyí jí ɖe é ɖé mɛ wɛ Piyɛ́ɛ su ɖe có, é ka ba ɖɔ è ní sɔ́ ayi ɖó émí jí ǎ. É nyɔ́ wa ɔ, é sɔ́ éɖée hwe bo ɖɔ nú mɛ lɛ́ ɖɔ yě ní kpa susu nú Jexóva kpó Jezu kpó hwenu e é ɖɔ xó élɔ́ é: “Nyǐkɔ [Jezu tɔn] kpó nǔ e mǐ ɖi nú nyǐkɔ tɔn é kpó mɛ wɛ gǎn wá nya élɔ́ e mɔ wɛ mi ɖe bo lɛ́ tuun é wú ɖe.” (Mɛ. 3:12-16) Ðo wěma e Piyɛ́ɛ sɛ́ dó klisánwun lɛ́ dó nǔ e wú è ɖó ná nɔ sɔ́ mɛɖée hwe é ɖé mɛ ɔ, é zán xógbe ɖé b’ɛ nɔ flín mǐ ninɔmɛ e mɛ Jezu sin wǔsúnsúnnú ɖé dó alinkan bo klɔ́ afɔ nú mɛsɛ́dó tɔn lɛ́ ɖe é.—Xa 1 Piyɛ́ɛ 5:5.

12. Nɛ̌ mǐ ka sixú kpo ɖo mǐɖée sɔ́ hwe wɛ Piyɛ́ɛ ɖɔhun gbɔn?

¹² Mǐ sixú xwedó kpɔ́ndéwú Piyɛ́ɛ tɔn bo ná nɔ ɖo tíntɛ́nkpɔ́n wɛ bo ná nɔ sɔ́ mǐɖée hwe. Flín ɖɔ mɛɖéesɔ́hwe nǔgbó ɔ nɔ byɔ́ nǔ hú xó e sɔgbe é ɖiɖɔ kpowun. Xógbe e Piyɛ́ɛ zán nú “mɛɖéesɔ́hwe” é xlɛ́ ɖɔ mɛɖéesɔ́hwe nɔ lɛ́ kunkplá linlin e mǐ nɔ ɖó dó mǐɖésúnɔ kpó mɛ ɖěvo lɛ́ kpó wú é. Mǐ nɔ wa xomɛnyínyɔ́nú lɛ́ nú mɛ ɖěvo lɛ́, ɖó mǐ yí wǎn nú Jexóva kpó gbɛtɔ́ lɛ́ kpó wú wɛ, é nyí mǐ ba ɖɔ è ní kpa susu nú mǐ wú wɛ ǎ. Ényí mǐ nɔ wa sinsɛnzɔ́ nú Jexóva kpó awǎjijɛ kpó, bo nɔ lɛ́ wa mɛsɛntɔ́zɔ́ nú nɔví mǐtɔn lɛ́ lěe mǐ kpé wú gbɔn é, bo ma nɔ ɖó nukún ɖɔ è ní ɖ’ayi gǎndídó mǐtɔn lɛ́ wú ǎ ɔ, mǐ nɔ xlɛ́ nyi wɛn ɖɔ mǐ nɔ sɔ́ mǐɖée hwe.—Mat. 6:1-4.

‘AYI TOWE NÍ ÐO TE’

13. Étɛ́ ka nyí ‘ayiɖote’ sín tínmɛ?

¹³ Étɛ́ ‘ayiɖote’ ka nɔ byɔ́? (1 Pi. 4:7) Klisánwun e nɔ ɖ’ayi te é nɔ wa nǔ e wú é kpé é bǐ bo nɔ wá gbeta ɖagbe ɖěɖěe nɔ ɖe linlin e Jexóva ɖó dó nǔ lɛ́ wú é xlɛ́ lɛ́ é kɔn. Klisánwun mɔ̌hun nɔ tuun ɖɔ nǔ ɖěbǔ kún sɔ́ ɖo tají ɖo gbɛ mɛ sɔ xɔ́ntɔn e émí zun xá Jexóva é ó. É nɔ ɖó linlin e ɖo jlɛ̌ jí é dó éɖée wú, bo nɔ tuun ɖɔ émí kún tuun nǔ bǐ ó. É nɔ ɖe xlɛ́ ɖɔ émí gán jɛ Mawu wú gbɔn ɖɛ xixo sɛ́dó Jexóva hwɛhwɛ kpó mɛɖéesɔ́hwe kpó gblamɛ.a

14. Nɛ̌ Piyɛ́ɛ ma ka kpé wú bo gán jɛ Jexóva wú ǎ ɖo ninɔmɛ ɖé mɛ gbɔn?

¹⁴ Ðo zǎn e jɛ nukɔn nú kú Jezu tɔn é mɛ ɔ, é gba akpá nú ahwanvú tɔn lɛ́ ɖɔ: “Ðó nǔ e ná jɛ dó wǔtu ce é wú ɔ, mi mɛ bǐ wɛ ná klɛ́n afɔ ɖo zǎn élɔ́ mɛ.” Piyɛ́ɛ ná xósin kpó jiɖiɖe kpó ɖɔ: “Ényí mɛ ɖě lɛ́ bǐ ná bo tlɛ klɛ́n afɔ, ɖó nǔ e ná jɛ dó wǔ we é wú ɔ, nyɛ ná klɛ́n afɔ gbeɖé ǎ!” Ðo zǎn énɛ́ mɛ ɔ, é ɖe wě xá ahwanvú tɔn ɖé lɛ́ ɖɔ: “Mi nɔ wunzɛn bo nɔ ɖo ɖɛ xo wɛ.” (Mat. 26:31, 33, 41) Ényí Piyɛ́ɛ ko xwedó wěɖexámɛ énɛ́ ɖ’ayǐ wɛ ɔ, é sixú ko ɖó akɔ́nkpinkpan bo yí gbe ɖɔ ahwanvú Jezu tɔn wɛ émí nyí. Piyɛ́ɛ ka gbɛ́ Gǎn tɔn, b’ɛ wá vɛ́ n’i tawun.—Mat. 26:69-75.

15. Nɛ̌ Jezu ka xlɛ́ ɖɔ émí kpo ɖo ayi ɖó te wɛ ɖo zǎn e jɛ nukɔn nú kú tɔn é mɛ gbɔn?

¹⁵ Jezu nɔ kpɛn zɔn Jexóva bǐ mlɛ́mlɛ́. Mɛ maɖóblɔ̌ wɛ Jezu nyí có, é ka xo ɖɛ sɛ́dó Jexóva azɔn mɔ̌kpán. Énɛ́ ná ɛ akɔ́nkpinkpan b’ɛ wa nǔ sɔgbe xá nǔ e ba n’i wɛ Jexóva ɖe é. (Mat. 26:39, 42, 44; Jaan 18:4, 5) Ðɛxixo walɔ e Jezu ɖó é mimɔ ná ko nyí nǔ manáwɔn ɖé ɖo gbɛzán Piyɛ́ɛ tɔn mɛ.

16. Nɛ̌ Piyɛ́ɛ ka xlɛ́ ɖɔ émí nɔ tɛ́n kpɔ́n bo nɔ ɖó ayi te gbɔn? (1 Piyɛ́ɛ 4:7)

¹⁶ Nukɔnmɛ ɔ, Piyɛ́ɛ kplɔ́n bo nɔ xo ɖɛ dó gán jɛ Jexóva wú hú gǎn. Jezu e fɔ́n sín kú é ná jiɖe Piyɛ́ɛ kpó mɛsɛ́dó ɖě lɛ́ kpó ɖɔ yě ná mɔ gbigbɔ mímɛ́ yí, bɔ énɛ́ ɔ, yě ná kpé wú bo jlá wɛn ɖagbe ɔ. É ɖo mɔ̌ có, Jezu ɖɔ nú yě ɖɔ yě ní nɔ te ɖo Jeluzalɛ́mu káká jɛ hwenu e nǔ ná nyí mɔ̌ é. (Luk. 24:49; Mɛ. 1:4, 5) Étɛ́ wa wɛ Piyɛ́ɛ ka ɖe hwenu e é ɖo te é? Piyɛ́ɛ kpó klisánwun hǎtɔ́ tɔn lɛ́ kpó “ɖó kan dó ɖɛxixo wú.” (Mɛ. 1:13, 14) Ðo wěmasɛ́dómɛ Piyɛ́ɛ tɔn nukɔntɔn ɔ mɛ ɔ, é wá dó wǔsyɛ́n lanmɛ nú klisánwun hǎtɔ́ tɔn lɛ́ ɖɔ yě ní nɔ ɖó ayi te, bo nɔ xo ɖɛ dó gán jɛ Jexóva wú. (Xa 1 Piyɛ́ɛ 4:7.) Piyɛ́ɛ kplɔ́n bo nɔ ɖeji dó Jexóva wú, bo wá húzú dotín ɖé ɖo agun ɔ mɛ.—Ga. 2:9.

17. Ényí mǐ ná bo ɖó nǔwúkpíkpé jɔwámɔ tɔn ɖěbǔ ɔ, étɛ́ mǐ ka ɖó ná kpo ɖo wiwa wɛ? (Kpɔ́n ɖiɖe ɔ lɔmɔ̌.)

¹⁷ Bo ná dó ɖ’ayi te ɔ, mǐ ɖó ná nɔ xo ɖɛ sɛ́dó Jexóva hwɛhwɛ. Mǐ tuun ɖɔ mǐ ná bo ɖó nǔwúkpíkpé jɔwámɔ tɔn ɖěbǔ ɔ, mǐ ɖó ná nɔ kpo ɖo ɖɛ xo sɛ́dó Jexóva wɛ. Énɛ́ wú ɔ, ɖo tají ɔ, hwenu e mǐ ja gbeta tají lɛ́ kɔn wá gbé é ɔ, mǐ nɔ xo ɖɛ sɛ́dó Jexóva dó byɔ́ wěɖexámɛ, bo nɔ kú d’é jí ɖɔ é tuun nǔ e nyɔ́ nú mǐ hú gǎn é.

18. Nɛ̌ mǐ ka sixú húzú lěe mǐ nɔ lin nǔ gbɔn é b’ɛ ná sɔgbe xá lěe Jexóva nɔ lin nǔ gbɔn é hú gǎn gbɔn?

¹⁸ Dǎ e Jexóva dá mǐ ɖo ali ɖé nu bɔ mǐ sixú ɖe jijɔ tɔn lɛ́ xlɛ́ é su nukún mǐtɔn mɛ tawun. (Bǐb. 1:26) É ɖo wɛn ɖɔ, mǐ kún sixú xwedó kpɔ́ndéwú Jexóva tɔn bɔ nǔ bǐ vɔ ɖ’é wú ó. (Eza. 55:9) Amɔ̌ Piyɛ́ɛ ɖɔhun ɔ, mǐ hɛn ɔ, mǐ ná xwedó ali e nu Jexóva nɔ lin nǔ ɖe é sín kpɔ́ndéwú hú gǎn. Mǐ sixú wa mɔ̌ gbɔn lěe Mawu nɔ lin nǔ gbɔn é sín kpɔ́ndéwú xwixwedó, mǐɖée sísɔ́ hwe kpó ayi ɖíɖó te kpó gblamɛ.