Nɔ ɖeji hwebǐnu ɖɔ Jexóva hɛn ɔ, é ná d’alɔ we

1. Nɛ̌ Mɔyízi ka xlɛ́ ɖɔ émí ɖeji dó Jexóva wú hwenu e é kplá Izlayɛ́li ví lɛ́ tɔ́n sín Ejípu é gbɔn?

MƐ NUKÚNÐÉJÍ ɖé wɛ Mɔyízi nyí ɖo mɛ ɖěɖěe xó wěma Eblée lɛ́ tɔn ɖɔ bɔ yě nyí kpɔ́ndéwú nǔɖiɖi tɔn lɛ́ é mɛ. (Ebl. 3:2-5; 11:23-25) É xlɛ́ ɖɔ émí ɖó nǔɖiɖi hwenu e é kplá Izlayɛ́li ví lɛ́ tɔ́n sín Ejípu é. É ɖi xɛsi nú Falawɔ́ɔn kpó ahwankpá tɔn kpó ǎ. É ɖeji dó Jexóva wú bǐ mlɛ́mlɛ́ bo kplá togun ɔ gbɔn Xu vɔvɔ ɔ mɛ, bo lɛ́ nɔ nukɔn nú yě ɖo gbětótló ɔ mɛ. (Ebl. 11:27-29) Gěgé Izlayɛ́li ví lɛ́ tɔn jɛ nǔ xo kpɔ́n jí ɖɔ Jexóva ka ná kpé nukún dó émí wú a jí, amɔ̌, Mɔyízi kpo ɖo jiɖe ɖó dó Mawu tɔn wú wɛ. Hwɛ Mɔyízi tɔn ka jɔ ɖɔ é ní ɖó nǔɖiɖi mɔ̌hun, ɖó Mawu ná nǔɖuɖu kpó sin kpó togun ɔ ɖo gbětótló e mɛ nǔɖé ma ɖe ǎ é gbɔn nǔjíwǔ gblamɛ.a—Tín. 15:22-25; Ðɛh. 78:23-25.

2. Étɛ́wú Mawu ka kan nǔ élɔ́ byɔ́ Mɔyízi: ‘Nyɛ Jexóva ɔ, un hwedó nǔ wú wɛ a’? (Kɛ́nsísɔ́ 11:21-23)

² Mɔyízi ɖó nǔɖiɖi syɛ́nsyɛ́n mɔ̌hun có, ée é kplá Izlayɛ́li ví lɛ́ tɔ́n sín Ejípu bɔ é ná bló xwe ɖokpó mɔ̌ gúdo é ɔ, é xo nǔ kpɔ́n dó nǔwúkpíkpé e Jexóva ɖó bo ná ná lan togun tɔn é wú. Mɔyízi lin ɖɔ Jexóva kún sixú ná lan gbɛtɔ́ lǐvi mɔ̌kpán e ɖó gɔnu ɖó gbětótló e mɛ nǔ ɖě ma ɖe ǎ é mɛ lɛ́ é bɔ yě ná ɖu bɔ é ná kpé yě ó. Énɛ́ wú ɔ, Jexóva kanbyɔ́ Mɔyízi ɖɔ: ‘Nyɛ Jexóva ɔ, un hwedó nǔ wú wɛ a?’ (Xa Kɛ́nsísɔ́ 11:21-23.) Xógbe Ebléegbe tɔn e è tínmɛ dó “Jexóva hwedó nǔ wú wɛ a?” é sín tínmɛ blǔju ɔ wɛ nyí “Alɔ Jexóva tɔn hwe gli dín wɛ a?” Xógbe “Alɔ Jexóva tɔn” ɔ nɔ dó gesí gbigbɔ mímɛ́ Mawu tɔn, alǒ hlɔ̌nhlɔ́n e Mawu nɔ sɔ́ dó wa nǔ é. È ná ɖɔ ɔ, kinkanbyɔ́ Mɔyízi wɛ Jexóva ɖe ɖɔ: ‘A lin nǔgbó nǔgbó ɖɔ un kún sixú wa nǔ e un ɖɔ un ná wa é ó wɛ a?’

3. Étɛ́wú mǐ ka ɖó ná lin tamɛ dó nǔ e jɛ dó Mɔyízi kpó Izlayɛ́li ví lɛ́ kpó jí é jí?

³ A ka ko kanbyɔ́ hwiɖée ɖɔ Jexóva ná kpé nukún dó hudó agbaza tɔn towe, alǒ xwédo towe tɔn lɛ́ wú a jí kpɔ́n a? A kan nǔ mɔ̌hun byɔ́ kpó a gbɔ kpó ɔ, nǔ mǐ ní gbéjé kpɔ́ndéwú Mɔyízi kpó Izlayɛ́li ví ɖěɖěe xo nǔ kpɔ́n ɖɔ Mawu ka ná kpé nukún dó yě wú a jí é kpó tɔn kpɔ́n. Nǔgbódodó Biblu tɔn ɖěɖěe ɖ’é mɛ lɛ́ é ná d’alɔ mǐ bɔ mǐ ná ná hlɔ̌nhlɔ́n kán e mǐ kán ɖ’é jí ɖɔ alɔ Jexóva tɔn kún hwe gli dín gbeɖé ó é.

NǓ KPƆ́NDÉWÚ MƆYÍZI KPÓ IZLAYƐ́LI VÍ LƐ́ KPÓ TƆN NÍ KPLƆ́N NǓ WE

4. Étɛ́ ka sixú zɔ́n bɔ mɛ gěgé ná xo nǔ kpɔ́n dó nǔwúkpíkpé e Jexóva ɖó bo ná kpé nukún dó yě wú ɖo agbaza lixo é wú?

⁴ Dǒ nukún ninɔmɛ ɔ mɛ kpɔ́n. Izlayɛ́li ví lɛ́ kpó mɛ e ma nyí Izlayɛ́li ví ǎ lɛ́ é sín “akɔta tɛnmɛ tɛnmɛ” lɛ́ kpó nɔ gbětótló ɔ mɛ nú hwenu ɖé hwenu e yě gosín Ejípu wá xwe Akpádídó yíkúngban ɔ jí é. (Tín. 12:38; Sɛ́n. 8:15) Agbɔ̌n kpé mɛ e ma nyí Izlayɛ́li ví ǎ lɛ́ é dó mǎna ɖuɖu wú, bɔ yě jɛ nǔ húnhún ɖɔ jí, lobɔ Izlayɛ́li ví gěgé xo kpóɖó nú yě. (Kɛ́n. 11:4-6) Togun ɔ jɛ nǔɖuɖu e yě nɔ mɔ ɖo Ejípu é jló jí. Togun ɔ ɖo kɔ gbídí nú Mɔyízi wɛ, b’ɛ cí ɖɔ é lin ɖɔ émíɖésúnɔ wɛ ɖó ná xo lan kan nú yě ɖɔhun.—Kɛ́n. 11:13, 14.

5-6. Étɛ́ lěe akɔta tɛnmɛ tɛnmɛ e nyi ahwan xwedó Izlayɛ́li ví lɛ́ é wa nǔ dó Izlayɛ́li ví lɛ́ wú gbɔn é ka sixú kplɔ́n mǐ?

⁵ É cí ɖɔ nǔsumɛnukúnmɛ ma ɖe xlɛ́ mɛ e ma nyí Izlayɛ́li ví ǎ lɛ́ é tɔn wa nǔ dó Izlayɛ́li ví lɛ́ wú ɖɔhun. Ðumakpamɛsi walɔ mɛ ɖěvo lɛ́ tɔn hɛn ɔ, é ná wa nǔ dó mǐ lɔmɔ̌ wú, bɔ nǔ e Jexóva nɔ ná mǐ lɛ́ é sɔ́ ná nɔ su nukún mǐtɔn mɛ ǎ. Ényí nǔ e mǐ ko ɖó kpɔ́n wá yi lɛ́ é lɛ́ jɛ jlǒjló mǐ jí, alǒ mǐ jɛ wǔ hwan mɛ ɖěvo lɛ́ jí ɖó nǔ e yě ɖó lɛ́ é wú ɔ, énɛ́ sixú xá mǐ. Amɔ̌, ényí mǐ nɔ tɛ́n kpɔ́n, bɔ nǔ e ɖo mǐ sí é nɔ kpé mǐ ɔ, mǐ ná bo ɖo ninɔmɛ ɖěbǔ mɛ ɔ, mǐ ná ɖó awǎjijɛ.

⁶ Izlayɛ́li ví lɛ́ ɖó ná ko flín ɖɔ Mawu ná jiɖe yě ɖɔ ényí yě jɛ xwé yětɔn yɔ̌yɔ́ ɔ gbe ɔ, yě ná ɖu nǔɖuɖu agbaza tɔn gěgé sín vǐví bɔ é ná túnflá. Akpádídó yíkúngban ɔ jí wɛ yě ná to jɛ hwɛ̌ cóbɔ akpá énɛ́ ná jɛnu, é nyí hwenu e yě ɖo gbětótló ɔ mɛ gbɔn dín wɛ é ǎ. Mɔ̌ ɖokpó ɔ, é nyí nǔ ɖěɖěe mǐ ma sixú ɖó ɖo gbɛ élɔ́ mɛ ǎ lɛ́ é jí wɛ mǐ ná nɔ sɔ́ ayi mǐtɔn ɖó ǎ, loɔ, é ná nyɔ́ ɖɔ mǐ ní nɔ sɔ́ ayi mǐtɔn ɖó nǔ ɖěɖěe Jexóva d’akpá ɖɔ émí ná ná mǐ ɖo gbɛ yɔ̌yɔ́ ɔ mɛ lɛ́ é jí. Mǐ sixú lɛ́ lin tamɛ dó wěmafɔ ɖěɖěe ná d’alɔ mǐ bɔ mǐ ná ná hlɔ̌nhlɔ́n jiɖe e mǐ ɖó dó Jexóva wú lɛ́ é jí.

7. Étɛ́wú mǐ ka sixú kú d’é jí ɖɔ Jexóva ná d’alɔ mǐ hwebǐnu?

⁷ Amɔ̌, a sixú kanbyɔ́ hwiɖée ɖɔ étɛ́wú Mawu ka kan nǔ élɔ́ byɔ́ Mɔyízi a jí: ‘Nyɛ Jexóva ɔ, un hwedó nǔ wú wɛ a?’ Hwenu e Jexóva kan nǔ e mǐ mɔ ɖo Kɛ́nsísɔ́ 11:23 mɛ é byɔ́ Mɔyízi é ɔ, é sixú ko ba ɖɔ Mɔyízi ní lin tamɛ dó nǔ we jí: (1) Hlɔ̌nhlɔ́n Jexóva tɔn ɖó dogbó ǎ. (2) Jexóva sixú zán hlɔ̌nhlɔ́n tɔn ɖo fí ɖěbǔ, fí ɔ ná bo tlɛ lín gbɔn ɖěbǔ ɔ nɛ́. Izlayɛ́li ví lɛ́ ná bo tlɛ ɖo gbětótló mɛ ɖo zɔ ga ɔ, Mawu hɛn ɔ, é ná ná lan yě bɔ é ná túnflá. Kpó “hlɔ̌nhlɔ́n ɖaxó” ɖé kpó ɔ, Mawu ɖe xlɛ́ ɖɔ togun émítɔn ná bo ɖo fí ɖěbǔ ɔ, émí hɛn ɔ, émí ná d’alɔ ɛ. (Ðɛh. 136:11, 12) Énɛ́ wú ɔ, ényí mǐ ɖo mɛtɛ́nkpɔ́n lɛ́ ɖí xwi xá wɛ ɔ, mǐ sixú kú d’é jí ɖɔ Jexóva kpé wú bo ná d’alɔ ɖokpó ɖokpó mǐtɔn, ényí mǐ ná bo ɖo fí ɖěbǔ ɔ nɛ́.—Ðɛh. 138:6, 7.

8. Nɛ̌ mǐ ka sixú nyi alɔ nú afɔ ɖokpó ɔ e mɛ ɖěɖěe nɔ gbětótló ɔ mɛ lɛ́ é gěgé ɖe nyi do é ɖiɖe gbɔn? (Kpɔ́n ɖiɖe ɔ lɔmɔ̌.)

⁸ Jexóva bló nǔ e sín akpá é dó nú togun tɔn é, bo sɛ́ káyi dó yě kɔn nyi kpɔ́ gégé. É ɖo mɔ̌ có, Izlayɛ́li ví lɛ́ dó kú nú Mawu ɖó nǔjíwǔ énɛ́ wú ǎ. É nyɔ́ wa ɔ, yě mɛ gěgé lɛ́ dó nukúnkɛn tɔn. Yě xo zǐn zǎn kpó kéze kpó, bo bɛ́ káyi kɔn nyi kpɔ́. Jexóva sin xomɛ tawun dó mɛ ɖěɖěe “nǔ jló díngan” lɛ́ é bo dɔn tó nú yě. (Kɛ́n. 11:31-34) Nǔ énɛ́ e jɛ é sixú kplɔ́n nǔ mǐ. Mǐ ɖó ná cɔ́ mǐɖée dó nukúnkɛn dídó wú. Ényí dɔkunnɔ wɛ mǐ nyí, alǒ wamamɔnɔ wɛ mǐ nyí ɔ, mǐ ɖó ná xlɛ́ ɖɔ ‘dɔkun xixokplé ɖó jǐxwé’ ɖo tají nú mǐ gbɔn xɔ́ntɔn vívɛ́ zunzun xá Jexóva kpó Jezu kpó gblamɛ. (Mat. 6:19, 20; Luk. 16:9) Ényí mǐ wa mɔ̌ ɔ, mǐ sixú kú d’é jí ɖɔ Jexóva kún ná jó mǐ dó ó.

9. Étɛ́ wú mǐ ka sixú ɖeji dó bǐ mlɛ́mlɛ́?

⁹ Jexóva nɔ dlɛ́n alɔ tɔn bo nɔ d’alɔ togun tɔn ɖo égbé. É ɖo mɔ̌ có, xlɛ́xlɛ́ wɛ énɛ́ ɖe ɖɔ nǔɖé kún ná hwedó mǐ gbeɖé ɖo agbaza lixo, alǒ nǔɖuɖu kún ná hwedó mǐ gbeɖé ó ǎ.b Amɔ̌, Jexóva ná jó mǐ dó gbeɖé ǎ. É ná nɔ gǔdo nú mǐ ɖo mɛtɛ́nkpɔ́n vovo mǐtɔn lɛ́ mɛ. Nɛ̌ mǐ ka sixú ɖe xlɛ́ ɖɔ mǐ ɖeji ɖɔ Jexóva ná nɔ sú hudó mǐtɔn lɛ́ sín do gbɔn? Mǐ ní kpɔ́n ninɔmɛ we: (1) hwenu e mǐ ɖo xwi ɖí xá akwɛ́yózo wɛ é kpó (2) hwenu e mǐ ɖo hudó agbaza tɔn sɔgúdo tɔn mǐtɔn lɛ́ sín tuto bló wɛ é kpó.

HWENU E MǏ ÐO XWI ÐÍ XÁ AKWƐ́YÓZO WƐ É

10. Akwɛ́ wúvɛ́ tɛ́ lɛ́ mǐ ka sixú mɔ?

¹⁰ Ðó vivɔnu gbɛ élɔ́ tɔn ɖo sisɛkpɔ́ wɛ wútu ɔ, mǐ sixú ɖó nukún ɖɔ akwɛ́yózo ná lɛ́ syɛ́n d’é jí. Hunnyahunnya e nɔ tíin ɖo toxóɖiɖɔ linu é, ahwan, adla, alǒ jɛmɛjí yɔ̌yɔ́ lɛ́ sixú zɔ́n bɔ akwɛ́zínzán maɖónukún lɛ́ wá xwetɔ́n, alǒ sixú zɔ́n bɔ azɔ̌ gblé dó mǐ, mǐ ba nǔɖókan mǐtɔn lɛ́, alǒ xwé mǐtɔn kpo. É sixú byɔ́ ɖɔ mǐ ní ba azɔ̌ yɔ̌yɔ́ ɖěvo ɖo xá mǐtɔn mɛ, alǒ lin tamɛ dó tɛnsisɛ yi gbě ɖěvo jí jí bá dó kpé nukún dó xwédo mǐtɔn wú. Étɛ́ ka sixú d’alɔ mǐ bɔ mǐ ná wá gbeta e xlɛ́ ɖɔ mǐ ɖeji dó Jexóva wú lɛ́ é kɔn?

11. Étɛ́ ka sixú d’alɔ we bɔ a ná ɖí xwi xá akwɛ́yózo? (Luki 12:29-31)

¹¹ Afɔɖiɖe e w’azɔ̌ bo lɛ́ ɖo tají tawun é ɖokpó wɛ nyí ɖɔ a ní sɔ́ nǔ e ɖo linkpɔ́n ɖó nú we wɛ lɛ́ é dó alɔ mɛ nú Jexóva. (Nǔx. 16:3) Byɔ̌ ɛ ɖɔ é ní ná émí nǔnywɛ́ e sín hudó émí ɖó bá wá gbeta ɖagbe lɛ́ kɔn é, bo lɛ́ byɔ́ ɛ ɖɔ é ní ná émí fífá ayi mɛ tɔn, bónú ‘ado ní ma hu émí zɛ xwé wú’ dó ninɔmɛ émítɔn wú ó. (Xa Luki 12:29-31.) Kpo ɖo byɔ̌byɔ́ ɛ wɛ ɖɔ é ní d’alɔ émí bónú dandannú gbɛ mɛ tɔn e émí ɖó lɛ́ é ní kpé émí. (1 Tim. 6:7, 8) Ba do nú nǔ ɖo wěma mǐtɔn lɛ́ mɛ dó lěe a ná ɖí xwi xá akwɛ́yózo b’ɛ ná kpa we gbɔn é jí. Mɛ gěgé ko ɖu le nǔ ɖěɖěe ɖo jw.org jí bo ɖɔ xó dó lěe è ná ɖí xwi xá akwɛ́yózo gbɔn é wú é tɔn.

12. Nǔkanbyɔ́ tɛ́ lɛ́ ka sixú d’alɔ klisánwun ɖé b’ɛ ná wá gbeta ɖagbe hú gǎn bǐ ɔ kɔn dó xwédo tɔn tamɛ?

¹² Mɛɖé lɛ́ ko wá gbeta ɔ kɔn bo yí gbe nú azɔ̌ e byɔ́ ɖɔ yě ní nɔ fí línlín dó xwédo yětɔn lɛ́ é, amɔ̌, mɛ gěgé wá mɔ ɖɔ gbeta e nǔnywɛ́ ma kpé ǎ é ɖé wɛ gbeta énɛ́ nyí. Cóbónú a ná yí gbe nú azɔ̌ yɔ̌yɔ́ ɖé hǔn, ma lin tamɛ dó akwɛ́ li e é sixú hun nú we lɛ́ é kɛ́ɖɛ́ jí kpowun ó, loɔ, lɛ̌ lin tamɛ dó nǔ e é sixú byɔ́ ɖ’así we ɖo gbigbɔ lixo lɛ́ é jí. (Luk. 14:28) Kanbyɔ́ hwiɖée ɖɔ: ‘Ényí un nɔ zɔ dó mɛ e un da é ɔ, nɛ̌ é ka sixú wa nǔ dó alɔwlíwlí mǐtɔn wú gbɔn? Un ka ná kpé wú bo yi kplé lɛ́ bǐ, yi kúnnuɖegbé, bo ná nɔ lɛ́ zán hwenu ɖó kpɔ́ xá nɔví súnnu kpó nɔví nyɔ̌nu kpó ce lɛ́ a?’ Ényí a ɖó vǐ lɛ́ ɔ, a ɖó ná lɛ́ kan nǔ tají élɔ́ byɔ́ hwiɖée: ‘Ényí un ma ɖo kpɔ́ xá vǐ ce lɛ́ ǎ ɔ, nɛ̌ un ka ná kplɔ́n yě “sɔgbe xá nǔgbódodó Jexóva tɔn lɛ́ kpó wěɖexámɛ tɔn lɛ́ kpó” gbɔn?’ (Efɛ́. 6:4) Nǔ linlin Mawu tɔn ní xlɛ́ ali we, é ní ma nyí xwédo towe, alǒ xɔ́ntɔn towe e ma nɔ ɖó sísí nú nǔgbódodó Biblu tɔn lɛ́ ǎ é tɔn ó.c Azɔ̌ wa ɖo to gúdo sín ali gěgé hun nú Tony e nɔ nɔ gbadahwe jí Azíi tɔn é. É ɖo mɔ̌ có, ée é xo ɖɛ dó xó ɔ wú, bo ɖɔ xó d’é wú xá asi tɔn gúdo é ɔ, é wá gbeta ɔ kɔn bá gbɛ́ azɔ̌ énɛ́ lɛ́, lobo lin tamɛ dó lěe yě sixú bló hǔzúhúzú lɛ́ ɖo gbɛzán yětɔn mɛ bo ɖe akwɛ́zínzán xwédo ɔ tɔn kpo gbɔn é jí. Ée Tony kpɔ́n gǔdo sɛ́dó é ɔ, é ɖɔ: “Un d’alɔ mɛ gěgé bɔ yě wá tuun Jexóva; gɔ́ ná ɔ, akpakpa nɔ sɔ́ vǐ mǐtɔn lɛ́ dó nǔgbó ɔ wú. Xwédo mǐtɔn kplɔ́n ɖɔ ényí mǐ ɖo xó e ɖo Matíe 6:33 mɛ lɛ́ é zán wɛ jɛ́n wɛ ɔ, Jexóva kún ná gɔn nukún kpé dó mǐ wú gbeɖé ó.”

HWENU E MǏ ÐO TAMƐ LIN DÓ LĚE KPIKPOXƆMƐ MǏTƆN NÁ CÍ É JÍ WƐ É

13. Afɔ e ɖo jlɛ̌ jí é tɛ́ lɛ́ mǐ ka sixú ɖe din b’ɛ ná d’alɔ mǐ bɔ mǐ ná sú hudó agbaza tɔn mǐtɔn lɛ́ sín do hwenu e mǐ ná ɖo kpikpoxɔmɛ é?

¹³ Mǐ sixú lɛ́ xlɛ́ lě do mǐ ɖeji dó Jexóva wú sɔ é hwenu e mǐ ɖo tamɛ lin dó lěe kpikpoxɔmɛ mǐtɔn ná cí é jí wɛ é. Biblu dó wǔsyɛ́n lanmɛ nú mǐ ɖɔ mǐ ní w’azɔ̌ syɛ́nsyɛ́n bá dó sixú kpé nukún dó hudó agbaza tɔn mǐtɔn sɔgúdo tɔn lɛ́ wú. (Nǔx. 6:6-11) É sɔgbe ɖɔ mǐ ní sɛ akwɛ́ kpɛɖé xwe nú sɔgúdo lěe ninɔmɛ mǐtɔn yí gbe ná gbɔn é. Akwɛ́ sixú nya xɛ ɖo mɛ jí ɖó bǎ ɖé mɛ. (Nǔt. 7:12) É ɖo mɔ̌ có, mǐ ɖó ná lɔn bónú nǔ agbaza tɔn lɛ́ gbé nyinya ná nyí nǔ tají hú gǎn ɔ ɖo gbɛzán mǐtɔn mɛ ǎ.

14. Nɛ̌ Eblée lɛ́ 13:5 ka sixú d’alɔ mǐ bɔ ado ma ná hu mǐ zɛ xwé wú ǎ gbɔn?

¹⁴ Jezu xlɛ́ ɖɔ xlonɔnú wɛ akwɛ́ gěgé xixokplé, bo ma ka nyí “dɔkunnɔ ɖo Mawu nukúnmɛ” ǎ nyí. (Luk. 12:16-21) Mɛɖé tuun nǔ e sɔ hɛn nu é ǎ. (Nǔx. 23:4, 5; Ja. 4:13-15) Mǐ mɛ e nyí ahwanvú Klísu tɔn lɛ́ é nɔ ɖí xwi xá tagba tají ɖé. Jezu ɖɔ ɖɔ mǐ ɖó ná ɖo gbesisɔmɛ bá “dó gǔdo” nǔɖókan mǐtɔn lɛ́ bǐ. (Luk. 14:33) Klisánwun xwe kanweko nukɔntɔn ɔ tɔn e ɖo Judée lɛ́ é ɖo gbesisɔmɛ bá jó nǔɖókan yětɔn lɛ́ bǐ dó kp’awǎjijɛ kpó. (Ebl. 10:34) Égbé ɖésú ɔ, nɔví gěgé hɛn nǔɖókan gěgé bú, ɖó yě gbɛ́ ɖɔ émí kún ná ɖ’alɔ ɖo toxóɖiɖɔ mɛ ó wútu. (Nǔɖe. 13:16, 17) Étɛ́ ka d’alɔ yě bɔ yě wa mɔ̌? Yě ɖeji dó akpá Jexóva tɔn élɔ́ wú bǐ mlɛ́mlɛ́: “Un ná jó we dó gbeɖé ǎ, un ná ɖe alɔ sín kan towe mɛ gbeɖé ǎ.” (Xa Eblée lɛ́ 13:5.) Mǐ nɔ wa nǔ e wú mǐ kpé é bǐ bo nɔ sɔ́ nǔ ɖ’ayǐ nú sɔgúdo, bɔ ényí nǔmaɖónukún lɛ́ wá jɛ ɔ, mǐ nɔ ɖeji dó Jexóva wú.

15. Linlin e ɖo jlɛ̌ jí é tɛ́ mɛjitɔ́ klisánwun lɛ́ ka ɖó ná ɖó dó vǐ yětɔn lɛ́ wú? (Kpɔ́n ɖiɖe ɔ lɔmɔ̌.)

¹⁵ Ðo xá ɖé lɛ́ mɛ ɔ, hwɛjijɔ tají e wú asú kpó asi kpó lɛ́ nɔ ji vǐ é wɛ nyí ɖɔ, vǐ lɛ́ ná wá kpé nukún dó yě wú ɖo kpikpoxɔmɛ. Biblu ɖɔ ɖɔ mɛjitɔ́ lɛ́ wɛ ɖó ná kpé nukún dó hudó vǐ yětɔn lɛ́ tɔn wú. (2 Kɔ. 12:14) É ɖo wɛn ɖɔ mɛjitɔ́ lɛ́ sixú ɖó alɔdó tawun tawun ɖé lɛ́ sín hudó hwenu e yě kpo é, bɔ kpó xomɛhunhun kpó wɛ vǐ gěgé nɔ bló tuto bo nɔ sú hudó énɛ́ lɛ́ sín do. (1 Tim. 5:4) Amɔ̌, mɛjitɔ́ klisánwun lɛ́ nɔ tuun ɖɔ nǔ e ná d’awǎjijɛ nú émí hú gǎn é wɛ nyí ɖɔ émí ná d’alɔ vǐ émítɔn lɛ́ bɔ yě ná húzú Jexóva sɛntɔ́, é kún nyí émí ná kpé nukún dó yě wú kpó linlin ɔ kpó ɖɔ yě ná wá nɔ gǔdo nú émí ɖo akwɛ́ linu wɛ ó.—3 Jaan 4.

16. Nɛ̌ mɛjitɔ́ lɛ́ ka sixú d’alɔ vǐ yětɔn lɛ́ bɔ yě ná nɔ kpé nukún dó hudó yěɖésúnɔ tɔn lɛ́ wú ɖo akwɛ́zínzán linu gbɔn? (Efɛ́zinu lɛ́ 4:28)

¹⁶ Ée a ná ɖo alɔ dó vǐ towe lɛ́ wɛ bónú yě ná nyí yěɖée é ɔ, nǔ kpɔ́ndéwú towe ní kplɔ́n yě ɖɔ yě ní nɔ ɖeji dó Jexóva wú. Sín hwenu e yě kpo ɖo vǔ é ɔ, kplɔ́n yě ɖɔ azɔ̌ syɛ́nsyɛ́n wiwa ɔ, nǔ ɖagbe wɛ. (Nǔx. 29:21; xa Efɛ́zinu lɛ́ 4:28.) Ée yě ná ɖo susu wɛ é ɔ, d’alɔ yě nú yě ní nɔ w’azɔ̌ ganjí ɖo wěmaxɔmɛ. É ná nyɔ́ ɖɔ mɛjitɔ́ klisánwun lɛ́ ní ba do nú nǔgbódodó Biblu tɔn lɛ́, bo lɛ́ zán yě dó d’alɔ vǐ yětɔn lɛ́ bónú yě ná wá gbeta lěe yě ná zán nǔ e yě kplɔ́n ɖo wěmaxɔmɛ lɛ́ é kpó nǔnywɛ́ kpó gbɔn é tɔn kɔn. Énɛ́ ná sɔ́ nǔ nú vǐ yětɔn lɛ́ bɔ yě ná kpé nukún dó yěɖée wú, bo lɛ́ ɖ’alɔ ɖo sinsɛnzɔ́ ɔ mɛ bǐ mlɛ́mlɛ́.

17. Étɛ́ jí mǐ ka sixú kú dó?

¹⁷ Mɛsɛntɔ́ gbejínɔtɔ́ Jexóva tɔn lɛ́ sixú gán jɛ nǔwúkpíkpé kpó jlǒ kpó e Jexóva ɖó bo ná sú hudó agbaza tɔn yětɔn lɛ́ sín do nú yě é wú. Ée mǐ ɖo vivɔnu gbɛ élɔ́ tɔn sɛkpɔ́ wɛ é ɔ, mǐ sixú ɖó nukún ɖɔ jiɖe e mǐ ɖó dó Jexóva wú é ná gbɔn tɛ́nkpɔ́n nu. Amɔ̌, nú nǔ ɖěbǔ ná bo ɖo jijɛ wɛ hǔn, mi nú mǐ ní kán ɖ’é jí bo ɖeji ɖɔ Jexóva ná zán hlɔ̌nhlɔ́n tɔn dó kpé nukún dó mǐ wú ɖo agbaza lixo. Mǐ sixú kú d’é jí ɖɔ Jexóva ɖó hlɔ̌nhlɔ́n bo ná d’alɔ mǐ hwebǐnu, mǐ ná bo ɖo fí ɖěbǔ ɔ nɛ́.