Nɔ zán wěkpɛ́n ɔ ganjí

Ahwanvú Jaki jlɛ́ Biblu ɔ dó wěkpɛ́n e nɔ zɔ́n bɔ mǐ nɔ mɔ nǔ jɛ mɛ alɔkpa e mǐ nyí ɖo xomɛ é ɖé wú. (Ja. 1:22-25) Nɛ̌ mǐ ka sixú zán Biblu ɔ ganjí wěkpɛ́n ɖé ɖɔhun gbɔn?

Nɔ xa kpó sɔxwixwe kpó. Ényí mǐ zɔn kplakpla jí bo kpɔ́n mǐɖée ɖo wěkpɛ́n mɛ ɔ, mǐ sixú xo nǔjɛdo tawun tawun ɖé lɛ́ kpo. Bo ná dó tuun nú é byɔ́ ɖɔ mǐ ní w’azɔ̌ ɖo mɛ e mǐ nyí ɖo xomɛ é wú ɔ, é ná nyɔ́ ɖɔ mǐ ní nɔ xa Xó Mawu tɔn kpó sɔxwixwe kpó.

Nɔ sɔ́ ayi ɖó nǔ e é byɔ́ ɖɔ a ní w’azɔ̌ ɖ’é wú lɛ́ é jí, é ní ma nyí ɖó mɛ ɖěvo lɛ́ jí ó. Hweɖélɛ́nu ɔ, ényí mǐ ɖo wěkpɛ́n kpɔ́n wɛ ɔ, mǐ sixú mɔ mɛ ɖěvo lɛ́ lɔ ɖo wěkpɛ́n ɔ mɛ, bo sixú sɔ́ ayi ɖó nǔ e jɛ do ɖo yě wú é jí. Mɔ̌ ɖokpó ɔ, mǐ sixú zán Biblu dó mɔ nǔjɛdo e ɖo mɛ ɖěvo wú é. Amɔ̌, énɛ́ ná d’alɔ káká ɖé mǐ bónú mǐ ná w’azɔ̌ ɖo mǐɖée wú ǎ.

Nɔ nɔ jlɛ̌ jí. Ényí mǐ nɔ sɔ́ ayi ɖó blɔ̌ e ɖo mǐ wú bɔ wěkpɛ́n ɖé ɖe xlɛ́ é kɛ́ɖɛ́ jí ɔ, awakanmɛ sixú kú mǐ. É byɔ́ ɖɔ mǐ ní nɔ nɔ jlɛ̌ jí hwenu e mǐ ɖo Xó Mawu tɔn xa wɛ é, bo ma nɔ ɖó nǔ nukún ɖo mǐɖée sí zɛ nǔ e Jexóva nɔ ɖó nukún ɖo mǐ sí é wú ó.—Ja. 3:17.