“Mi bo ɖɔ nǔ e mi ná sɛn ɔ”

1. Étɛ́ mǐ ka ɖó ná wa bo ná ɖó awǎjijɛ jɔ awǎjijɛ ɔ? Étɛ́wú? (Ezayíi 48:17, 18)

TƆ́ MǏTƆN jǐxwé tɔn ɔ yí wǎn nú mǐ titewungbe, bo ba ɖɔ mǐ ní ɖu gbɛ sín vǐví din bo lɛ́ ɖu ɖo sɔgúdo. (Nǔt. 3:12, 13) É dá mǐ kpó nǔwúkpíkpé jí wǔ ɖé lɛ́ kpó, amɔ̌, é ná mǐ nǔwúkpíkpé ɔ bónú mǐ ná kpa acɛ dó mǐɖée jí alǒ wá gbeta nǔ e nyí nǔ ɖagbe kpó nǔ nyanya kpó é tɔn kɔn nú mǐɖée ǎ. (Nǔt. 8:9; Jel. 10:23) É tuun ɖɔ cóbónú mǐ ná ɖó awǎjijɛ jɔ awǎjijɛ ɔ, mǐ ɖó ná sɛn émí bo lɛ́ zán gbɛ sɔgbe xá nǔgbódodó émítɔn lɛ́.—Xa Ezayíi 48:17, 18.

2. Étɛ́ Satáan ka ba ɖɔ mǐ ní ɖi nǔ ná? Amɔ̌, étɛ́ Jexóva ka wa?

² Satáan ba ɖɔ mǐ ní ɖi nǔ ɖɔ mǐ hɛn ɔ, mǐ ná ɖó awǎjijɛ Jexóva mɛvo, bo lɛ́ ɖi nǔ ɖɔ gbɛtɔ́ lɛ́ sixú kpa acɛ dó yěɖée jí b’ɛ ná kpa yě. (Bǐb. 3:4, 5) Jexóva tin bɔ gbɛtɔ́ gǔfɔ́ntɔ́ lɛ́ ná kpa acɛ dó yěɖée jí nú hwenu e ɖó dogbó é ɖé, bá dó xlɛ́ ɖɔ adingban wɛ Satáan ɖó. É byɔ́ ɖɔ mǐ ní ba nǔ e énɛ́ ji é ɖo zɔ ǎ. É ɖo mɔ̌ có, Biblu ɖɔ súnnu kpó nyɔ̌nu kpó gěgé sín xó bɔ yě zán gbɛ e jɛmɛ nú mɛ é ɖo sinsɛnzɔ́ Jexóva tɔn mɛ. Jezu Klísu wɛ ɖo tɔ́ntlɔ́ngbɔ́n ɖo mɛ énɛ́ lɛ́ mɛ. Jɛ nukɔn hwɛ̌ ɔ, mi nú mǐ ní kpɔ́n hwɛjijɔ ɖěɖěe wú é wá gbeta ɔ kɔn bo sɛn Jexóva lɛ́ é. Énɛ́ gúdo ɔ, mǐ ná gbéjé nǔ e wú é jɛxá ɖɔ mǐ ní sɛn Tɔ́ mǐtɔn jǐxwé tɔn ɔ é kpɔ́n. Gǔdo mɛ ɔ, mǐ ná vɔ́ hwɛjijɔ ɖěɖěe wú mǐ wá gbeta ɔ kɔn bo ná sɛn Jexóva é ɖé lɛ́ jí gbɔn.

NǓ E WÚ JEZU WÁ GBETA Ɔ KƆN BO SƐN JEXÓVA É

3. Étɛ́ Satáan ka xwlé Jezu? Étɛ́ Jezu ka wá gbeta ɔ kɔn bá wa?

³ Hwenu e Jezu ɖo ayǐkúngban jí é ɔ, é ɖó ná wá gbeta mɛ e é ná sɛn é tɔn kɔn. Ée Jezu bló batɛ́mu b’ɛ bló táan kléwún ɖé gúdo é ɔ, Satáan ɖɔ n’i ɖɔ ényí é sɛn émí azɔn ɖokpó kpowun ɔ, émí ná ná ɛ axɔ́súɖuto e ɖo ayǐkúngban ɔ jí lɛ́ é bǐ. Jezu ɖɔ n’i ɖɔ: “Bǔ dó mì, Satáan! Ðó è ko wlán ɖɔ: ‘Jexóva Mawu towe wɛ a ɖó ná sɛn, lobɔ éɖokpónɔ géé wɛ a ɖó ná wa sinsɛnzɔ́ mímɛ́ ná.’” (Mat. 4:8-10) Étɛ́wú Jezu ka wá gbeta énɛ́ kɔn? Mǐ ní kpɔ́n nǔ e wú wɛ é ɖé lɛ́.

4-5. Hwɛjijɔ tɛ́ lɛ́ mɔ̌ wú Jezu ka wá gbeta ɔ kɔn bá sɛn Jexóva?

⁴ Hwɛjijɔ tají e wú Jezu wá gbeta ɔ kɔn bá sɛn Jexóva é wɛ nyí wǎnyíyí, énɛ́ wɛ nyí wǎnyíyí e gɔ́ngɔ́n, bɔ nǔ ɖěbǔ ma sixú ɖó te ǎ e é ɖó nú Tɔ́ tɔn é. (Jaan 14:31) Gɔ́ ná ɔ, Jezu sɛn Jexóva ɖó nǔ e sɔgbe bɔ è ɖó ná wa é nɛ́. (Jaan 8:28, 29; Nǔɖe. 4:11) É tuun ɖɔ Jexóva gɔ́n wɛ gbɛ ɔ jɔ sín, bɔ Jexóva lɛ́ nyí mɛ ɖejidéwú lobo lɛ́ nyí alɔhundónánǔmɛtɔ́. (Ðɛh. 33:4; 36:10; Ja. 1:17) Jexóva nɔ ɖɔ nǔgbó nú Jezu hwebǐnu, bɔ É wɛ lɛ́ ná ɛ nǔ e é ɖó lɛ́ é bǐ. (Jaan 1:14) Amɔ̌, Satáan gbɔn vo nú Jexóva tawun, hwɛhuhu kpó kú kpó wɛ éyɛ́ dɔn nyi kɔ jí nú gbɛtɔ́ lɛ́. Adingbannɔ e nukúnkɛn kpó cejɛ́nnábí kpó wɛ nɔ sísɛ́ b’ɛ nɔ wa nǔ é wɛ n’i. (Jaan 8:44) Nǔ énɛ́ lɛ́ e Jezu tuun é zɔ́n bɔ é tlɛ lin gbeɖé bo ná xo kpóɖó nú Satáan bá fɔ́n gǔ dó Jexóva jí ǎ.—Filí. 2:5-8.

⁵ Hwɛjijɔ ɖěvo e wú Jezu wá gbeta ɔ kɔn bo sɛn Jexóva é wɛ nyí ɖɔ, é dó nukún nǔ ɖěɖěe sinsɛnzɔ́ e é ná wa kpó gbejíninɔ kpó é ná hɛn wá lɛ́ é mɛ kpɔ́n. (Ebl. 12:2) É tuun ɖɔ ényí émí nɔ gbejí ɔ, émí ná klɔ́ cí sín Tɔ́ émítɔn sín nyǐkɔ wú bo ná bló nǔ e Awǒvi hɛn gblé lɛ́ é bǐ ɖó.

NǓ E WÚ É JƐXÁ ÐƆ MǏ NÍ SƐN JEXÓVA É

6-7. Mɛ gěgé tíin bo ɖo Jexóva sɛn wɛ ǎ ɖo égbé. Étɛ́wú? Étɛ́wú é ka jɛxá ɖɔ mǐ ní sɛn Jexóva?

⁶ Mɛ gěgé tíin ɖo égbé bo ɖo Jexóva sɛn wɛ ǎ, ɖó yě ko tuun jijɔ tɔn ɖaaɖagbe e dɔn mɛ lɛ́ é ǎ. Yě ka lɛ́ tuun nǔ ɖaaɖagbe e é wa nú yě lɛ́ é bǐ ǎ. Yě cí mɛ ɖěɖěe mɛsɛ́dó Pɔ́lu ɖɔ mawuxó ná ɖo Atɛ́ni lɛ́ é ɖɔhun, yě lɔ tuun Mawu ǎ.—Mɛ. 17:19, 20, 30, 34.

⁷ Pɔ́lu tínmɛ nú tóɖóetɔ́ lɛ́ ɖɔ Mawu nǔgbó ɔ wɛ “ná gbɛ, funfún kpó nǔ bǐ kpó gbɛtɔ́ lɛ́ bǐ.” É ɖɔ gɔ́ ná ɖɔ: “É wɛ zɔ́n bɔ mǐ ɖo gbɛ, nɔ dán wǔ, bo lɛ́ tíin.” Mawu Gbɛɖótɔ́ ɔ ɔ, “gbɛtɔ́ ɖokpó jí wɛ é gbɔn bo ɖó akɔta lɛ́ bǐ ayǐ,” énɛ́ wú ɔ, éɖokpónɔ géé wɛ é jɛxá ɖɔ mǐ ní sɛn.—Mɛ. 17:25, 26, 28.

8. Étɛ́ Jexóva ma ka ná wa gbeɖé ǎ? Tínmɛ.

⁸ Ðó Jexóva wɛ nyí Gbɛɖótɔ́ ɔ kpó Nǔbǐwúkpétɔ́ wɛ̌kɛ́ ɔ tɔn kpó wútu ɔ, é hɛn ɔ, é ná hɛn gbɛtɔ́ lɛ́ gǎnnugǎnnu bɔ yě ná sɛn ɛ. Amɔ̌, Jexóva ná wa mɔ̌ gbeɖé ǎ. É nyɔ́ wa ɔ, é xlɛ́ mǐ nyi wɛn ɖɔ émí tíin bo lɛ́ yí wǎn nú ɖokpó ɖokpó mǐtɔn titewungbe. É ba ɖɔ gbɛtɔ́ gěgé ní wá húzú xɔ́ntɔn émítɔn káká sɔ́yi lěe é nyɔ́ bló gbɔn é. (1 Tim. 2:3, 4) Bo ná dó kpé énɛ́ wú ɔ, Jexóva kplɔ́n azɔ̌ mǐ nú mǐ ná kplɔ́n nǔ mɛ ɖěvo lɛ́ dó linlin tɔn lɛ́ wú, bo lɛ́ ɖɔ nǔ ɖagbe e ná bló nú gbɛtɔ́ lɛ́ wɛ é ɖe lɛ́ é nú yě. (Mat. 10:11-13; 28:19, 20) É bló tito bɔ mǐ ɖo agun lɛ́ mɛ, bo lɛ́ bló tito bɔ nukúnkpénǔwútɔ́ wǎnyíyínɔ lɛ́ ná kpé nukún dó mǐ wú.—Mɛ. 20:28.

9. Ali tɛ́ lɛ́ nu Jexóva ka xlɛ́ ɖɔ émí yí wǎn nú gbɛtɔ́ lɛ́ bǐ ɖe?

⁹ Wǎnyíyí nukúnɖéjí Jexóva tɔn jɛ wě ɖo lěe é nɔ wa nǔ xá mɛ ɖěɖěe wá gbeta ɔ kɔn, bo ma ɖi nǔ n’i ǎ lɛ́ é gbɔn é mɛ. Kpɔ́n kúnnuɖenú élɔ́ lɛ́: Sín xwe afatɔ́n mɔ̌kpán ɖíe wɛ gbɛtɔ́ lǐva mɔ̌kpán ko wá gbeta ɔ kɔn bo nɔ zán gbɛ lěe yě ba gbɔn é. É ɖo mɔ̌ có, Jexóva nyɔ́ xomɛ bo nɔ ná nǔ e sín hudó yě ɖó bá nɔ gbɛ, bá lɛ́ kpo ɖo gbɛ sín vǐví ɖu wɛ é yě. (Mat. 5:44, 45; Mɛ. 14:16, 17) É ná yě nǔwúkpíkpé ɔ bɔ yě sixú zun xɔ́ntɔn lɛ́, ɖó xwédo ayǐ bo lɛ́ ɖu azɔ̌ syɛ́nsyɛ́n e yě wa é sín le. (Ðɛh. 127:3; Nǔt. 2:24) É ɖo wɛn ɖɔ Tɔ́ mǐtɔn jǐxwé tɔn ɔ yí wǎn nú gbɛtɔ́ lɛ́ bǐ. (Tín. 34:6) Din ɔ, mi nú mǐ ní flín hwɛjijɔ ɖěɖěe wú mǐ wá gbeta ɔ kɔn bá sɛn Jexóva lɛ́ é kpó lěe é nɔ kɔn nyɔ̌ná dó mɛ ɖěɖěe wá gbeta ɔ kɔn bá sɛn ɛ lɛ́ é jí gbɔn é ɖé lɛ́ mǐɖée.

NǓ ÐĚÐĚE WÚ MǏ WÁ GBETA Ɔ KƆN BO NÁ SƐN JEXÓVA É

10. (a) Hwɛjijɔ tají tɛ́ wú mǐ ka nɔ sɛn Jexóva? (Matíe 22:37) (b) Nɛ̌ suúlu Jexóva tɔn ka ko hɛn le wá nú we gbɔn? (Ðɛhan 103:13, 14)

¹⁰ Jezu ɖɔhun ɔ, hwɛjijɔ tají e wú mǐ nɔ sɛn Jexóva é wɛ nyí ɖɔ mǐ yí wǎn n’i titewungbe. (Xa Matíe 22:37.) Ényí mǐ kplɔ́n nǔ dó jijɔ Jexóva tɔn lɛ́ wú ɔ, mǐ nɔ mɔ ɖɔ mǐ sɛkpɔ́ ɛ d’é jí. Ði kpɔ́ndéwú ɔ, lin tamɛ dó suúlu e Jexóva nɔ ɖó dó mǐ wú é jí. Hwenu e Izlayɛ́li ví lɛ́ vɛ́ tóli n’i é ɔ, é sa vo nú yě bo ɖɔ: “Mɛ ɖokpó ɖokpó ní lɛ́ kɔ sín ali nyanya e jí é ɖe é jí.” (Jel. 18:11) Jexóva nɔ flín ɖɔ hwɛhutɔ́ wɛ mǐ nyí, kɔ́gúdu wɛ mǐ nyí. (Xa Ðɛhan 103:13, 14.) Ényí a lin tamɛ dó suúlu Jexóva tɔn kpó jijɔ tɔn ɖěvo e dɔn mɛ lɛ́ é kpó jí ɔ, énɛ́ nɔ sísɛ́ we nú a ná sɛn ɛ káká sɔ́yi ǎ cé?

11. Hwɛjijɔ ɖěvo tɛ́ lɛ́ mɔ̌ wú mǐ ka wá gbeta ɔ kɔn bá sɛn Tɔ́ mǐtɔn jǐxwé tɔn ɔ?

¹¹ Nǔ e nɔ lɛ́ sísɛ́ mǐ bɔ mǐ nɔ sɛn ɛ é wɛ nyí ɖɔ, nǔ e sɔgbe bɔ è ɖó ná wa é nɛ́. (Mat. 4:10) Tají bǐ ɔ, mǐ tuun le e sinsɛnzɔ́ gbejíninɔ tɔn mǐtɔn ná hɛn wá é. Gbejíninɔgbɛ e zán wɛ mǐ ɖe é nɔ klɔ́ cí sín nyǐkɔ Jexóva tɔn wú, nɔ xlɛ́ ɖɔ adingbannɔ wɛ Awǒvi nyí, lobo nɔ hun xomɛ nú Tɔ́ mǐtɔn. Gɔ́ ná ɔ, ényí mǐ wá gbeta ɔ kɔn bo ná sɛn Jexóva ɖo égbé ɔ, ali ná hun nú mǐ bɔ mǐ ná sɛn ɛ káká sɔ́yi!—Jaan 17:3.

12-13. Étɛ́ nǔ e jɛ dó Jane kpó Pam kpó jí é ka kplɔ́n mǐ?

¹² Mǐ ná bo tlɛ kpo ɖo vǔ tawun ɔ, mǐ sixú bló bɔ wǎn e mǐ yí nú Jexóva é ná gɔ́ngɔ́n, bɔ ényí mǐ ɖo susu wɛ ɔ, é ná lɛ́ kpo ɖo jijɛjí wɛ. Kpɔ́n nǔ e jɛ dó Jane kpó Pam kpó e nyí nɔví nɔví é jí é.a Xwe 11 wɛ Jane ɖó bɔ Pam ɖó xwe 10 hwenu e yě jɛ Biblu kplɔ́n jí azɔn nukɔntɔn ɔ é. Mɛjitɔ́ yětɔn lɛ́ ba ná kplɔ́n nǔ ɔ ǎ có, yě ka ná gbe Jane kpó Pam kpó bɔ yě ná nɔ dó gbɛ̌ xá Kúnnuɖetɔ́ lɛ́, bo ka ná nɔ lɛ́ yi amǐsa xá xwédo ɔ ɖo aklúnɔzángbla fífó lɛ́. Jane ɖɔ: “Nǔ e Kúnnuɖetɔ́ lɛ́ kplɔ́n mì ɖo Biblu mɛ é d’alɔ mì bɔ un ɖu ɖo kɔ e gbɛ̌ ce lɛ́ nɔ gbídí nú mì nú má nu azɔ bo lɛ́ wa nǔ blíblí é jí.”

¹³ Xwe ɖé lɛ́ gúdo ɔ, yě bǐ bló batɛ́mu. Nukɔnmɛ ɔ, yě húzú gběxosín-alijítɔ́ bo ka lɛ́ kpo ɖo nukún kpé dó mɛjitɔ́ yětɔn e ko nyí mɛxómɔ lɛ́ é wú wɛ. Ée Jane dó nukún nǔ e jɛ dó yě jí é mɛ kpɔ́n é ɔ, é ɖɔ: “Un kplɔ́n ɖɔ Jexóva nɔ kpé nukún dó xɔ́ntɔn tɔn lɛ́ wú kpó gbejíninɔ kpó, bɔ lěe 2 Timɔtée 2:19 ɖɔ gbɔn é ɔ, ‘Jexóva tuun mɛ e nyí étɔn lɛ́ é.’” É ɖo wɛn ɖɔ, Jexóva nɔ kpé nukún dó mɛ ɖěɖěe wá gbeta ɔ kɔn bo yí wǎn n’i bo nɔ sɛn ɛ lɛ́ é wú!

14. Nɛ̌ mǐ ka sixú jɛ hun dó Jexóva jí gbɔn nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó gblamɛ gbɔn? (Kpɔ́n ɖiɖe lɛ́ lɔmɔ̌.)

¹⁴ Mǐ ba ɖɔ mɛ ɖěvo lɛ́ ní tuun nǔgbó ɔ dó Jexóva wú. Kpɔ́ndéwú ɖé ɖíe. Mǐ ní ɖɔ ɖɔ a ɖó xɔ́ntɔn vívɛ́ ɖé b’ɛ nɔ nyɔ́ xomɛ, nɔ ná nǔ mɛ bo nɔ lɛ́ sɔ́ hwɛ kɛ mɛ. Gbe ɖokpó ɔ, a se ɖɔ mɛɖé dó ji xɔ́ntɔn towe bo ɖɔ ɖɔ é nyí alǎnnúwatɔ́ bo kún nɔ lɛ́ ɖɔ nǔgbó ó. Nɛ̌ a ka ná wa nǔ gbɔn? A ná jɛ hun dó jǐ tɔn. Mɔ̌ ɖokpó ɔ, ényí Satáan kpó mɛ ɖěɖěe ɖo acɛ tɔn glɔ́ lɛ́ é kpó tɛ́n kpɔ́n bo fúnfún adingbanxó lɛ́ kpé dó Jexóva wú dó kɔn mǎsin dó nyǐkɔ tɔn wú ɔ, mǐ nɔ ɖɔ nǔgbó ɔ dó Jexóva wú bo nɔ jɛ hun dó nyǐkɔ Tɔn jí dó nǔjɔnǔ mɛ. (Ðɛh. 34:1; Eza. 43:10) Mǐ nɔ xlɛ́ ɖɔ mǐ ba ná sɛn Jexóva kpó lǐndɔ̌n mǐtɔn bǐ kpó gbɔn nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó gblamɛ.

15. Nɛ̌ hǔzú e mɛsɛ́dó Pɔ́lu húzú nǔ e gbé nya wɛ é ɖe lɛ́ é ka hɛn le wá n’i gbɔn? (Filípunu lɛ́ 3:7, 8)

¹⁵ Mǐ nɔ ɖo gbesisɔmɛ bá húzú nǔ e gbé nya wɛ mǐ ɖe ɖo gbɛ mɛ lɛ́ é bá dó sixú sɛn Jexóva lěe é ba gbɔn é alǒ sɛn ɛ bǐ mlɛ́mlɛ́. Ði kpɔ́ndéwú ɔ, mɛsɛ́dó Pɔ́lu wá gbeta ɔ kɔn bá xo mɛ nukúnɖéjí nyínyí ɖo xá tɔn mɛ nyi kɛ́n bá dó xwedó Klísu bo sɛn Jexóva. (Ga. 1:14) Wǎgbɔ tɔn ɔ, é zán gbɛ e jɛmɛ nú mɛ é ɖé, bɔ ali hun n’i b’ɛ ná kpa acɛ xá Klísu ɖo jǐxwé. Gbeta e kɔn é wá bo sɛn Jexóva é vɛ́ n’i kpɔ́n ǎ, é ka ná vɛ́ nú mǐ lɔ gbeɖé ǎ.—Xa Filípunu lɛ́ 3:7, 8.

16. Étɛ́ nǔ e jɛ dó Julia jí é ka kplɔ́n mǐ? (Kpɔ́n ɖiɖe lɛ́ lɔmɔ̌.)

¹⁶ Ényí mǐ sɔ́ Jexóva sinsɛn dó ɖó nǔ tají hú gǎn ɔ ɔ, mǐ ná ɖó gbɛzán e jɛmɛ nú mɛ é ɖé din, bo ná lɛ́ ɖó ɖo sɔgúdo. Kpɔ́n nǔ e jɛ dó nɔví nyɔ̌nu e nɔ nyí Julia é jí é. Cóbónú Julia ná kplɔ́n nǔgbó ɔ ɔ, é ko nɔ ji han ɖo sinsɛngbɛ́ta ɖé mɛ sín hwenu e é ɖo wǐnnyáwínnyá mɛ é. Hanjitɔ́ alɔsekpɛ́nnánɔ ɖé ɖó ayi nǔwúkpíkpé tɔn wú bo kplɔ́n azɔ̌ ɛ. É sɔ́ lín ǎ bɔ Julia húzú mɛ nukúnɖéjí ɖé bo nɔ ji han ɖo nǔkpɔ́ntɛn nukúnɖéjí lɛ́. Hwenu e é ɖo nǔxixo sín wěmaxɔmɛ nukúnɖéjí ɖé yi wɛ é ɔ, wěmaxɔmɛvígbɛ́ tɔn ɖé jɛ xó ɖɔ n’i dó Mawu wú jí, bo tínmɛ n’i ɖɔ nyǐkɔ Mawu tɔn wɛ nyí Jexóva. É sɔ́ lín ǎ bɔ Julia jɛ Biblu kplɔ́n jí azɔn we ɖo aklúnɔzángbla ɖokpó mɛ. Wǎgbɔ tɔn ɔ, é wá gbeta ɔ kɔn ɖɔ émí kún sɔ́ ná nyí hanjitɔ́ ó, loɔ, émí ná sɔ́ ayi ɖó Jexóva sinsɛn jí ɖo gbɛzán émítɔn mɛ. Gbeta énɛ́ bɔ wǔ ǎ. É ɖɔ: “Mɛ gěgé nɔ ɖɔ nú mì ɖɔ nǔníná ce hɛn gú wɛ nyi ɖe, amɔ̌, un ba ná zán gbɛzán ce bǐ dó sɛn Jexóva.” Nɛ̌ nǔ ka nɔ cí n’i égbé din dó gbeta énɛ́ e kɔn é wá sín xwe 30 jɛjí ɖíe é wú? É ɖɔ: “Un ɖó fífá ayi mɛ tɔn bo ɖeji ɖɔ Jexóva ná sú nǔ e nɔ jló mì lɛ́ é bǐ sín do nú mì ɖo sɔgúdo.”—Ðɛh. 145:16.

KPO ÐO JEXÓVA SƐN WƐ

17. (a) Étɛ́ mɛ ɖěɖěe ma ko ɖo Jexóva sɛn wɛ din ǎ lɛ́ é ka ɖó ná wa? Aniwú? (b) Étɛ́ mɛ ɖěɖěe wá gbeta ɔ kɔn bá sɛn Mawu lɛ́ é ka tuun?

¹⁷ Vivɔnu gbɛ élɔ́ tɔn ko ɖo kɛ́nnɛ́kɛ́nnɛ́. Mɛsɛ́dó Pɔ́lu wlán ɖɔ: “Ðó ‘hwenu kpɛví ɖé’ wɛ kpo, bɔ ‘mɛ e jawě é ná wá, é ka ná gbɔ hwenu ǎ.’” (Ebl. 10:37) Nɛ̌ énɛ́ ka kan mǐ gbɔn? Nǔ ɖokpó wɛ nyí ɖɔ hwenu e kpo nú mɛ lɛ́ bɔ yě ná wá gbeta ɔ kɔn bá sɛn Jexóva é sɔ́ sukpɔ́ ǎ. (1 Kɔ. 7:29) Gɔ́ ná ɔ, ényí mǐ ko wá gbeta ɔ kɔn bo ɖo Mawu sɛn wɛ ɔ, mǐ tuun ɖɔ ényí mǐ tlɛ ná ɖí xwi xá wǔvɛ́ lɛ́ ɔ, “hwenu kpɛví ɖé” kpowun jɛ́n é ná nyí ná.

18. Étɛ́ Jexóva kpó Jezu kpó ka ba ɖɔ mǐ ní wa?

¹⁸ Jezu dó wǔsyɛ́n lanmɛ nú mɛ lɛ́ ɖɔ yě ní húzú ahwanvú émítɔn lɛ́ bo kpo ɖo émí xwedó wɛ. (Mat. 16:24) Énɛ́ wú ɔ, ényí mǐ ko ɖo Jexóva sɛn wɛ sín xwe ɖé lɛ́ ɖíe ɔ, mi nú mǐ ní kán ɖ’é jí bo ma jó gbe ó. Mǐ ɖó ná dó gǎn syɛ́nsyɛ́n bá kpo ɖo gbɛ zán sɔgbe xá kán e mǐ kán ɖ’é jí bo ná sɛn ɛ é wɛ. É sixú nɔ ma bɔ wǔ, amɔ̌, sɛn e sɛn ɛ wɛ mǐ ɖe é ná zɔ́n bɔ mǐ ná ɖó awǎjijɛ bo ná lɛ́ ɖu nyɔ̌ná gěgé sín vǐví, é ná bo tlɛ nyí ɖo din ɔ nɛ́!—Ðɛh. 35:27.

19. Étɛ́ nǔ e jɛ dó Gene jí é ka kplɔ́n mǐ?

¹⁹ Mɛɖé lɛ́ nɔ lin ɖɔ Jexóva sinsɛn nɔ byɔ́ vɔ̌sísá dín. Ényí mɛ wínnyáwínnyá wɛ nú we ɔ, a ka nɔ lin ɖɔ ényí émí jɛ Jexóva sɛn jí ɔ, nǔɖé sixú gbɔ émí wú wɛ a? Nɔví súnnu wínnyáwínnyá ɖé nɔ nyí Gene bo ɖɔ: “Un nɔ lin ɖ’ayǐ ɖɔ Kúnnuɖetɔ́ Jexóva tɔn nyínyí ná ɖó dogbó nú mì. É nɔ cí nú mì ɖɔ gbɛ̌ ce jí lɛ́ nɔ ɖu nǔ gěgé sín vǐví, ɖi agɔ̌, nyɔ̌nu gbɛ́ dídó, alǒ ayihúndida video jí tɔn e mɛ dǎkaxixo ɖe lɛ́ é, bɔ nyɛ ka ɖó ná zán hwenu ɖo kplé lɛ́ jí bo lɛ́ zán ɖo sinsɛnzɔ́ ɔ mɛ.” Nɛ̌ linlin énɛ́ ka wa nǔ dó Gene wú gbɔn? É ɖɔ: “Un jɛ gbɛ we zán jí, bo zin ta dó ayihúndida mɛ nú hwenu ɖé. Amɔ̌, é ná awǎjijɛ e ná nɔ ayǐ é kwín ɖokpó mì ǎ. Un lɛ́ jɛ tamɛ lin dó nǔgbó Biblu tɔn ɖěɖěe un wá gbeta ɔ kɔn bo ko xo nyi kɛ́n lɛ́ é wú jí, bo lɛ́ wá gbeta ɔ kɔn bo jɛ Jexóva sɛn jí kpó ayi bǐ kpó. Sín hwenɛ́nu ɔ, é nɔ cí nú mì ɖɔ Jexóva nɔ ná sin nú ɖɛ ce lɛ́ bǐ ɖɔhun.”

20. Étɛ́ mǐ ka ɖó ná kan ɖ’é jí bá wa?

²⁰ Ðɛhanwlántɔ́ ɖé ji han nú Jexóva bo ɖɔ: “Nǔ nyɔ́ nú mɛ e a sɔ́, bo dɔn dó wǔ, bɔ é ná nɔ xwé towe gbe é.” (Ðɛh. 65:5) Jozuwée ɖɔhun ɔ, mi nú mǐ lɔ ní kán ɖ’é jí bo ɖɔ: ‘Nyɛ kpó xwédo ce kpó ɔ, Jexóva wɛ mǐ ná sɛn.’—Joz. 24:15.