Jexóva wɛ nyí Mɛ e nɔ dó “awǎjijɛ” ɖaxó nú mǐ é

1-2. (a) Ninɔmɛ tɛ́ mɛ gěgé ka nɔ ɖí xwi xá ɖo égbé? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

MƐ GĚGÉ nɔ wa nǔ ɖěbǔ e wú yě kpé é bá dó ɖó awǎjijɛ ɖo égbé. É ɖo mɔ̌ có, é kpo ɖo wǔ vɛ́ wɛ nú è ná ɖó awǎjijɛ adodwé ɔ. Mɛ gěgé nɔ blá wǔ tawun bo nɔ lin ɖɔ nǔ lɛ́ kún ná wá kpɔ́n te nú émí gbeɖé ó. Mɛ Jexóva tɔn lɛ́ lɔ yi ɖ’é mɛ ǎ. “Azǎn gǔdo gúdo tɔn lɛ́” mɛ nɔ gbɛ ɖe wɛ mǐ ɖe, énɛ́ wú ɔ, mǐ sixú ɖí xwi xá tagba ɖěɖěe ná zɔ́n bɔ mǐ ná ɖó linkpɔ́n tawun alǒ blá wǔ tawun lɛ́ é.—2 Tim. 3:1.

² Ðo xóta élɔ́ mɛ ɔ, mǐ ná ɖɔ xó dó nǔ ɖěɖěe sixú fin awǎjijɛ mǐtɔn lɛ́ é kpó lěe mǐ sixú lɛ́ ɖó awǎjijɛ gbɔn é kpó jí. Amɔ̌, jɛ nukɔn hwɛ̌ ɔ, mǐ ɖó ná tuun Jɔtɛn awǎjijɛ adodwé ɔ tɔn.

JƆTƐN AWǍJIJƐ ADODWÉ Ɔ TƆN

3. Étɛ́ nǔɖíɖó lɛ́ ka kplɔ́n mǐ dó Jexóva wú? (Kpɔ́n ɖiɖe lɛ́ lɔmɔ̌.)

³ Jexóva nɔ jɛ awǎ hwebǐnu. É ba ɖɔ mǐ ní ɖó awǎjijɛ. Énɛ́ wú ɔ, é sɔ́ kpácá mɛ ɖɔ awǎjijɛ tɔn tɔ́n ɖo nǔɖíɖó tɔn lɛ́ mɛ ǎ, yě wɛ nyí planɛ́ti ɖɛkpɛ ɖɛkpɛ mǐtɔn, sinmɛ vovo e lɛ́ dó mǐ lɛ́ é, ayihúndida kanlin lɛ́ tɔn kpó nǔɖuɖu víví tootóbú e tíin lɛ́ é kpó. Mawu yí wǎn nú mǐ tawun bo ba ɖɔ mǐ ní ɖu gbɛ víví!

Ajinakú kpɛví: Image © Romi Gamit/Shutterstock; xɛ e nɔ nyí pingouin é sín ví lɛ́: Vladimir Seliverstov/500px via Getty Images; gbɔ̌ví lɛ́: Rita Kochmarjova/stock.adobe.com; gbowelé we: georgeclerk/E+ via Getty Images

4. (a) Jexóva nɔ mɔ wǔvɛ́ e mɔ wɛ gbɛtɔ́ lɛ́ ɖe é có, étɛ́wú é ka kpo ɖo awǎjijɛ ɖó wɛ? (b) Étɛ́ Jexóva ka nɔ ná mǐ? (Ðɛhan 16:11)

⁴ “Mawu awǎjijɛnɔ” wɛ Jexóva nyí có, é tuun wǔvɛ́ e mǐ nɔ se ɖo ayi mɛ lɛ́ é kpó wǔvɛ́ e ɖo gbɛ ɔ mɛ lɛ́ é kpó céɖécéɖé. (1 Tim. 1:11) Amɔ̌, é lɔn nú nǔ énɛ́ lɛ́ ɖe awǎjijɛ tɔn kpo ǎ. É tuun ɖɔ hwenu kpɛɖé sín nǔ wɛ wǔvɛ́ mimɔ lɛ́ bǐ nyí; éɖésúnɔ ko sɔ́ hwenu e é ná sú kún yětɔn dó é. É ɖo didɛ wɛ kpó suúlu kpó káká jɛ hwenu e é ná sú kún dó nú aluwɛ kpó wǔvɛ́ mimɔ lɛ́ kpó bǐ káká sɔ́yi é. Hwe ɖokpó ɔ nu ɔ, Jexóva nɔ mɔ nǔ jɛ nǔ e mɛ gbɔn dín wɛ mǐ ɖe lɛ́ é wú bo nɔ ba ná d’alɔ mǐ. Nɛ̌ é ka nɔ d’alɔ mǐ gbɔn? Lěe é nɔ wa mɔ̌ gbɔn é ɖokpó wɛ nyí ɖɔ é nɔ ná mǐ awǎjijɛ. (Xa Ðɛhan 16:11.) Kpɔ́n lěe é ná awǎjijɛ Vǐ súnnu tɔn Jezu gbɔn é.

5-6. Étɛ́wú Jezu ka nɔ ɖó awǎjijɛ?

⁵ Ðo nǔɖíɖó Jexóva tɔn lɛ́ bǐ mɛ ɔ, Jezu wɛ nɔ ɖó awǎjijɛ hú gǎn. Étɛ́wú? Mǐ ní ɖɔ xó dó hwɛjijɔ we jí. (1) “É wɛ nyí akpajlɛ́ Mawu e è ma nɔ mɔ ǎ é tɔn,” bo nɔ ɖe jijɔ Tɔ́ tɔn tɔn lɛ́ xlɛ́ ɖo ali lɛ́ bǐ nu bɔ nǔ bǐ nɔ vɔ ɖ’é wú. (Koló. 1:15; kpɔ́n tínmɛ e Biblu nǔkplɔ́nkplɔ́n tɔn ná dó xókwín “awǎjijɛ” e tɔ́n ɖo 1 Timɔtée 6:15 mɛ é jí é.) (2) Jezu zán hwenu ɖó kpɔ́ xá Tɔ́ tɔn e nyí Jɔtɛn awǎjijɛ tɔn é hú mɛ ɖěvo ɖěbǔ.

⁶ Jezu nɔ mɔ awǎjijɛ ɖo nǔ ɖěbǔ e Tɔ́ tɔn byɔ́ ɛ ɖɔ é ní wa é wiwa mɛ hwebǐnu. (Nǔx. 8:30, 31; Jaan 8:29) Ðó é nɔ gbejí wútu ɔ, nǔ tɔn nyɔ́ Jexóva nukúnmɛ.—Mat. 3:17.

7. Nɛ̌ mǐ ka sixú ɖó awǎjijɛ adodwé ɔ gbɔn?

⁷ Ényí mǐ sɛkpɔ́ Jexóva e nyí Jɔtɛn awǎjijɛ tɔn é ɔ, mǐ lɔ sixú ɖó awǎjijɛ adodwé ɔ. Lě do mǐ nɔ zán hwenu dó kplɔ́n nǔ dó Jexóva wú bo nɔ lɛ́ xwedó kpɔ́ndéwú tɔn sɔ é ɔ, mɔ̌ do wɛ mǐ ná ɖó awǎjijɛ sɔ. Ényí mǐ nɔ wa jlǒ Mawu tɔn bo lɛ́ tuun ɖɔ nǔ mǐtɔn nyɔ́ nukún tɔn mɛ ɔ, mǐ ná lɛ́ ɖó awǎjijɛ.a (Ðɛh. 33:12) Amɔ̌, ényí mǐ mɔ ɖɔ awǎjijɛ mǐtɔn nɔ yi bo nɔ wá alǒ ényí mǐ tlɛ ba awǎjijɛ kpo nú hwenu línlín ɔ ka lo? Xlɛ́xlɛ́ wɛ énɛ́ ɖe ɖɔ nǔ mǐtɔn kún nyɔ́ Mawu nukúnmɛ ó a? Éǒ! Hwɛhutɔ́ wɛ mǐ nyí, bɔ hweɖélɛ́nu ɔ mǐ nɔ se wǔvɛ́, nɔ blá wǔ, bo nɔ lɛ́ jɛ linkpɔ́nzɔn. Jexóva nɔ mɔ nukúnnú jɛ énɛ́ mɛ. (Ðɛh. 103:14) Mi nú mǐ ní ɖɔ xó dó nǔ ɖěɖěe sixú fin awǎjijɛ mǐtɔn lɛ́ é kpó lěe mǐ sixú lɛ́vɔ́ ɖó awǎjijɛ gbɔn é kpó jí.

MA LƆN NÚ NǓ ÐĚBǓ FIN AWǍJIJƐ TOWE Ó

8. Nɛ̌ gbɛ mɛ tagba lɛ́ ka sixú wa nǔ dó mǐ wú gbɔn?

⁸ Ajotɔ́ 1tɔn: Gbɛ mɛ tagba lɛ́. A ɖo yadónúmɛ, adla, ya, azɔn, alǒ mɛxóxwe sín wǔvɛ́ lɛ́ ɖí xwi xá wɛ wɛ a? É sixú bɔ wǔ bɔ mǐ ná ba awǎjijɛ mǐtɔn kpo hwenu e mǐ ɖo tagba mɔ̌hun lɛ́ ɖí xwi xá wɛ é, ɖo tají ɔ, hwenu e mǐ ma ɖó acɛ káká ɖé alǒ ɖěbǔ dó ninɔmɛ ɖé jí ǎ é. Biblu yí gbe ɖɔ “linkpɔ́n . . . ɖo ayi mɛ nú mɛ ɔ, wǔ nɔ kú mɛ.” (Nǔx. 15:13) Babis, éé nyí mɛxó agun tɔn bɔ nɔví súnnu tɔn kpó mɛjitɔ́ tɔn lɛ́ kpó kú ɖo xwe ɛnɛ vlamɛ é ɖɔ: “Un mɔ ɖɔ un zun nyiɖokpó bo kún sɔ́ lɛ́ ɖó ɖɔxátɔ́ ó. Hweɖélɛ́nu ɔ, akpɔ nɔ ɖó mì ɖó nǔ gěgé wɛ un ɖó ná ɖɔ hwe ɖokpó ɔ nu, bɔ nú un na bo tlɛ ba ná zán hwenu jɔ hwenu xá mɛjitɔ́ ce lɛ́ kpó nɔví súnnu ce kpó jɛ nukɔn nú kú yětɔn ɔ, un nɔ sixú kpé wú ǎ.” Nǔgbó ɔ, gbɛ mɛ tagba lɛ́ sixú zɔ́n bɔ gǎn ná vɔ ɖo mǐ wǔ ɖo agbaza kpó lěe nǔ nɔ cí nú mɛ é kpó linu.

9. Étɛ́ ka sixú d’alɔ mǐ bɔ mǐ ná lɛ́vɔ́ ɖó awǎjijɛ? (Jelemíi 29:4-7, 10)

⁹ Étɛ́ ka sixú d’alɔ mǐ bɔ mǐ ná lɛ́vɔ́ ɖó awǎjijɛ? Ényí mǐ nɔ nɔ jlɛ̌ jí bɔ nǔ nɔ lɛ́ su nukún mǐtɔn mɛ ɔ, mǐ sixú lɛ́ ɖó awǎjijɛ. Gbɛ ɖó ná ɖo tɔnfinnɔɔ nú mɛ cóbɔ è ná ɖó awǎjijɛ sín linlin wɛ gbɛ ɔ nɔ sɔ́ ɖó ajo. Amɔ̌, linlin énɛ́ nyí nǔgbó ǎ. Ði kpɔ́ndéwú ɔ, Jexóva byɔ́ Jwifu e è wlí yi Babilɔ́nu lɛ́ é ɖɔ yě ní yí gbe nú ninɔmɛ yětɔn yɔ̌yɔ́ ɔ, énɛ́ wɛ nyí ɖɔ yě ní yí gbe nú kannumɔ e yě nyí ɖo mɛ ɖěvo to mɛ é, bo wa nǔ e wú yě kpé é bǐ ɖo ninɔmɛ vɛ́ wǔ énɛ́ lɛ́ mɛ. (Xa Jelemíi 29:4-7, 10.) Nǔkplɔ́nmɛ ɔ? Tɛ́n kpɔ́n bo yí gbe nú ninɔmɛ towe bónú nǔ ɖagbe e ɖo jijɛ wɛ ɖo gbɛzán towe mɛ lɛ́ é ní nɔ su nukún towe mɛ. Flín ɖɔ Jexóva kún ná jó we dó ó, é ná d’alɔ we. (Ðɛh. 63:8; 146:5) Effie e alitawoví ɖé zɔ́n bɔ é cɛ́ kplíbɔ́ é ɖɔ: “Jexóva, xwédo ce kpó agun ɔ kpó d’alɔ mì tawun, bo lɛ́ nɔ gǔdo nú mì. Énɛ́ wú ɔ, un lin ɖɔ ɖumakpamɛsi sín nǔ wɛ é ná nyí ɖɔ má jó gbe kpowun. Un ba ná ɖe nǔsumɛnukúnmɛ xlɛ́ Jexóva kpó xɔ́ntɔn lɛ́ kpó nú alɔ tootóbú e yě dó mì lɛ́ é.”

10. Ényí mǐ ná bo tlɛ ɖo xwi ɖí xá tagba lɛ́ wɛ ɔ, étɛ́wú mǐ ka sixú ɖó awǎjijɛ?

¹⁰ É ná bo tlɛ nyí hwenu e gbɛ ma bɔ wǔ nú mǐ ɖěbǔ ǎ, alǒ hwenu e nǔ nyanya lɛ́ jɛ dó mǐ alǒ mɛ e ɖo xwédo mǐtɔn mɛ lɛ́ é jí é ɔ, mǐ sixú kpo ɖo awǎjijɛ ɖó wɛ.b (Ðɛh. 126:5) Étɛ́wú? Ðó awǎjijɛ mǐtɔn nɔ sín ninɔmɛ e mɛ mǐ ɖe é wú ǎ. Maria e nyí gběxosín-alijítɔ́ ɖé é ɖɔ: “Ényí è ɖó awǎjijɛ hwenu e è ɖo tagba lɛ́ ɖí xwi xá wɛ é ɔ, xlɛ́xlɛ́ wɛ énɛ́ ɖe ɖɔ è ɖo lěe nǔ cí nú mɛ é hwlá wɛ ǎ. É nyɔ́ wa ɔ, xlɛ́xlɛ́ wɛ énɛ́ ɖe ɖɔ è kún wɔn akpá Jexóva tɔn lɛ́ ó. Tɔ́ mǐtɔn ná d’alɔ mǐ bɔ mǐ ná nya xɛ ɖo awǎjijɛ mǐtɔn jí.” Flín ɖɔ nǔ lɛ́ ná bo tlɛ vɛ́ wǔ gbɔn ɖěbǔ din ɔ, hwenu kpɛɖé sín nǔ wɛ tagba mǐtɔn lɛ́ nyí, afɔdomɛ ɖo xu ta ɖɔhun wɛ yě cí. Bléwún jɛ́n yě ná bú bɔ è sɔ́ ná mɔ xwixwí yětɔn ǎ.

11. Nɛ̌ kpɔ́ndéwú mɛsɛ́dó Pɔ́lu tɔn ka dó wǔsyɛ́n lanmɛ nú we gbɔn?

¹¹ Ényí mǐ ka jɛ kinkanbyɔ́ mǐɖée jí ɖɔ nǔ mǐtɔn kún sɔ́ nyɔ́ Jexóva nukúnmɛ ó wɛ zɔ́n bɔ mǐ ɖo tagba lɛ́ mɔ wɛ a jí ɔ ka lo? Tamɛ linlin dó mɛsɛntɔ́ gbejínɔtɔ́ Jexóva tɔn ɖěvo e ɖí xwi xá ninɔmɛ e syɛ́n tawun lɛ́ é sín kpɔ́ndéwú jí sixú d’alɔ. Lin tamɛ dó kpɔ́ndéwú mɛsɛ́dó Pɔ́lu tɔn jí. Jezu ɖésú wɛ sɔ́ ɛ bónú é ná yi jlá nǔgbó ɔ “akɔta lɛ́, bo lɛ́ jlá axɔ́sú lɛ́ kpó Izlayɛ́li ví lɛ́ kpó.” (Mɛ. 9:15) Wǔjɔmɛ tɛ́ ɖíe! É ɖo mɔ̌ có, wǔvɛ́ hán ɖo Pɔ́lu sín gbɛzán mɛ ǎ. (2 Kɔ. 11:23-27) Tagba ɖěɖěe é cí ɖɔ yě gbɛ́ vivɔ bɔ Pɔ́lu ɖí xwi xá lɛ́ é xlɛ́ ɖɔ nǔ tɔn kún sɔ́ nyɔ́ Jexóva nukúnmɛ ó wɛ a? Éǒ wɛ nyí xósin ɔ! É nyɔ́ wa ɔ, didɛ tɔn xlɛ́ ɖɔ Jexóva kɔn nyɔ̌ná dó jǐ tɔn. (Hlɔ̌. 5:3-5) Din ɔ, lin tamɛ dó ninɔmɛ towe jí. Tagba e ɖí xwi xá wɛ a ɖe lɛ́ é bǐ ɖo fínɛ́ có, a ɖo didɛ wɛ kpó gbejíninɔ kpó. Énɛ́ wú ɔ, hwi lɔ sixú kú d’é jí ɖɔ nǔ towe nɔ nyɔ́ Jexóva nukúnmɛ.

12. Nɛ̌ nǔ e ɖó nukún wɛ mǐ ɖe bo ma ka ko mɔ ǎ lɛ́ é ka sixú fin awǎjijɛ mǐtɔn gbɔn?

¹² Ajotɔ́ 2gɔ́: Nǔ e ɖó nukún wɛ è ɖe bo ma ko mɔ ǎ lɛ́ é. (Nǔx. 13:12) Wǎnyíyí e mǐ ɖó nú Jexóva é kpó nǔ tɔn e nɔ su nukún mǐtɔn mɛ é kpó nɔ sísɛ́ mǐ bɔ mǐ nɔ nya nǔɖé lɛ́ gbé ɖo sinsɛnzɔ́ tɔn mɛ. É ɖo mɔ̌ có, ényí nǔ e gbé nya wɛ mǐ ɖe lɛ́ é ma ɖo jlɛ̌ jí bo sɔgbe xá ninɔmɛ mǐtɔn ǎ ɔ, awakanmɛ sixú wá kú mǐ. (Nǔx. 17:22) Gběxosín-alijítɔ́ ɖé nɔ nyí Holly bo ɖɔ: “Un ba ná yi Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́, yi wa sinsɛnzɔ́ ɖo to ɖěvo mɛ, alǒ w’azɔ̌ ɖo tuto xɔgbígbá tɔn e ɖo yiyi wɛ ɖo Ramapo é mɛ. Amɔ̌, ninɔmɛ ce húzú bɔ un sɔ́ kpé nǔ énɛ́ lɛ́ e gbé nya wɛ un ɖe lɛ́ é wú ǎ. Awakanmɛ kú mì. Ényí è ba ná wa nǔ ɖé lɛ́ bo ma ka kpé wú ǎ ɔ, wǔ nɔ kú mɛ.” Nǔ nɔ cí mɔ̌ nú mɛ gěgé.

13. Ényí ninɔmɛ mǐtɔn lɛ́ ɖó dogbó nú nǔ e mǐ sixú wa é ɔ, nǔ e ɖo jlɛ̌ jí é tɛ́ lɛ́ gbé mǐ ka sixú nya?

¹³ Étɛ́ ka sixú d’alɔ mǐ bɔ mǐ ná lɛ́vɔ́ ɖó awǎjijɛ? Flín ɖɔ Jexóva kún nɔ ɖó nukún nǔ ɖo mǐ sí zɛ xwé wú ó. É nɔ ɖó nukún nǔ ɖo mǐ sí zɛ xwé wú ǎ, mɔ̌ jɛ́n lěe mǐ xɔ akwɛ́ n’i sɔ é ma nɔ sín nǔ e wú mǐ kpé bo wa ɖo sinsɛnzɔ́ tɔn mɛ é wú ǎ é nɛ́. Jexóva ba ɖɔ mǐ ní nɔ nɔ jlɛ̌ jí bo nɔ lɛ́ nɔ gbejí. (Micée 6:8; 1 Kɔ. 4:2) Nǔ e mǐ nyí ɖo ayi mɛ é nɔ ɖu ayi mɛ n’i hú gǎn nǔ e mǐ nɔ wa lɛ́ é. É ka ná ɖo jlɛ̌ jí ɖɔ mǐ ní ɖó nukún nǔ ɖo mǐɖée sí zɛ lěe Jexóva nɔ wa gbɔn é wú a?c É ɖo wɛn ɖɔ é kún ná nyɔ́ mɔ̌ ó! Énɛ́ wú ɔ, ényí ninɔmɛ towe lɛ́ ɖó dogbó nú nǔ e a sixú wa ɖo sinsɛnzɔ́ Jexóva tɔn mɛ é hǔn, tɛ́n kpɔ́n bo sɔ́ ayi ɖó nǔ e a sixú wa é jí. Ði kpɔ́ndéwú ɔ, a sixú d’alɔ bɔ è ná kplɔ́n azɔ̌ mɛ wínnyáwínnyá ɖé alǒ dó wǔsyɛ́n lanmɛ nú nɔví súnnu kpó nɔví nyɔ̌nu kpó mɛxómɔ lɛ́. A ka sixú sɔ́ wǔsyɛ́n dídó lanmɛ nú mɛɖé gbɔn biba ɛ kpɔ́n, ylɔ̌ylɔ́ ɛ gbɔn alǒkan jí, alǒ gbɔn nǔ wlánwlán sɛ́dó è gblamɛ dó ɖó nǔ e gbé a ná nya é a? Jexóva ná kɔn nyɔ̌ná dó jǐ we bɔ a ná ɖó awǎjijɛ, ée a ná ɖo gǎn dó wɛ bo ná kpé nǔ mɔ̌hun e sɔgbe bo lɛ́ ɖo jlɛ̌ jí lɛ́ é wú é! Lɛ̌ flín ɖɔ ɖo gbɛ yɔ̌yɔ́ ɔ mɛ ɔ, mǐ ná kpé wú bo sɛn Jexóva ɖo ali jí wǔ lɛ́ nu! Holly e xó mǐ ɖɔ wá yi é wá ɖɔ xó élɔ́: “Un júnjɔ́n ayǐ bo lin tamɛ dó nyiɖée wú bo ɖɔ ‘gbɛ mavɔmavɔ ɖo te kpɔ́n mì.’ Kpó alɔdó Jexóva tɔn kpó ɔ, un ná kpé nǔ e gbé nya wɛ un ɖe é ɖé lɛ́ wú ɖo gbɛ yɔ̌yɔ́ ɔ mɛ.”

14. Nǔ ɖěvo tɛ́ ka sixú fin awǎjijɛ mǐtɔn?

¹⁴ Ajotɔ́ 3gɔ́: Gbɛɖuɖu. Mǐ sixú mɔ mɛ ɖé lɛ́ ɖo Ɛntɛnɛ́ti jí b’ɛ cí ɖɔ yě ɖó awǎjijɛ tawun ɖó yě nɔ ɖo nǔ ɖagbe lɛ́ sín vǐví ɖu wɛ hwebǐnu wútu. Mǐ sixú jɛ linlin jí ɖɔ ényí mǐ nɔ wa nǔ e jló mǐ lɛ́ é, nɔ xɔ nǔ e jló mǐ lɛ́ é bo nɔ ɖi sa yi fí vovo lɛ́ ɔ, mǐ ná ɖó awǎjijɛ adodwé ɔ. É nylá ɖɔ è ní ɖu nǔ énɛ́ lɛ́ sín vǐví ǎ. Jexóva dá mǐ ɖo ali ɖé nu bɔ mǐ sixú ɖu nǔ ɖaaɖagbe lɛ́ sín vǐví. É ɖo mɔ̌ có, nǔ e mɛ gěgé nɔ lin ɖ’ayǐ ɖɔ é wɛ ná ná yě awǎjijɛ é wɛ wá fin awǎjijɛ yětɔn sín yě sí. Eva e nyí gběxosín-alijítɔ́ ɖé é ɖɔ: “Ényí gbɛzán mɛtɔn wá jínjɔ́n gbɛɖuɖu kɛ́ɖɛ́ jí ɔ, nǔ ɖě sɔ́ nɔ kpé mɛ ǎ.” Gbɛɖuɖu zɛ xwé wú sixú zɔ́n bɔ mǐ ná mɔ ɖɔ mǐ kún hwɛ́n nǔtí ó.

15. Étɛ́ kpɔ́ndéwú axɔ́sú Salomɔ́ɔ tɔn ka sixú kplɔ́n mǐ?

¹⁵ Nǔ e jɛ dó axɔ́sú Salomɔ́ɔ jí é sixú kplɔ́n nǔ mǐ dó aluwɛ e mɛ gbɛɖuɖu zɛ xwé wú nɔ dɔn mɛ dó é wú. É tɛ́n kpɔ́n bá ɖó awǎjijɛ gbɔn nǔ e nɔ jló è lɛ́ é sín do súsú, ɖi nǔɖuɖu ɖaaɖagbe lɛ́ ɖuɖu, han ɖaaɖagbe lɛ́ sise kpó nǔ ɖaaɖagbe e akwɛ́ sixú xɔ ɖo hwetɔnnu lɛ́ é bǐ xixɔ kpó gblamɛ. Amɔ̌, yě jɛmɛ n’i ǎ. É ɖɔ: “Nǔkpínkpɔ́n nɔ jɛmɛ nú nukún ǎ; mɔ̌ jɛ́n nǔsise ma nɔ jɛmɛ nú tó ǎ é nɛ́.” (Nǔt. 1:8; 2:1-11) Fóbiyé ɖɔhun wɛ linlin ɖěɖěe gbɛ ɔ nɔ ɖó dó nǔ e nɔ ná awǎjijɛ adodwé ɔ mɛ é wú é cí. Yě nɔ cí nǔ e xɔ akwɛ́ lɛ́ é ɖɔhun, amɔ̌, yě sixú zɔ́n bónú mǐ ɖó awǎjijɛ adodwé ɔ gbeɖé ǎ.

16. Nɛ̌ nǔ níná mɛ ɖěvo lɛ́ ka sixú zɔ́n bɔ mǐ ná lɛ́vɔ́ ɖó awǎjijɛ gbɔn? (Kpɔ́n ɖiɖe lɛ́ lɔmɔ̌.)

¹⁶ Étɛ́ ka sixú d’alɔ mǐ bɔ mǐ ná lɛ́ ɖó awǎjijɛ? Jezu kplɔ́n mǐ ɖɔ “nǔnámɛ nɔ ná awǎjijɛ mɛ hú nǔyíɖomɛsí.” (Mɛ. 20:35) Mɛxó agun tɔn ɖé nɔ nyí Alekos bo ɖɔ: “Un nɔ sɔ́ ayi ɖó nǔ kléwún kléwún lɛ́ bíbló nú mɛ ɖěvo lɛ́ jí. Lě do un ná nǔ mɛ sɔ é ɔ, mɔ̌ do wɛ un nɔ ɖe ayi sín nyiɖée jí bo nɔ ɖó awǎjijɛ sɔ.” Étɛ́ hwɛ ka sixú wa nú mɛ ɖěvo lɛ́? Ényí a mɔ mɛɖé bɔ awakanmɛ kú i hǔn, tɛ́n kpɔ́n bo dó wǔsyɛ́n lanmɛ n’i. A sixú nɔ ma kpé wú bo ɖe ɖɛ tagba tɔn lɛ́, amɔ̌, a sixú dó gbɔ n’i gbɔn tó ɖíɖó è kpó wǔvɛ́sexámɛ kpó gblamɛ, gbɔn xomɛ nyínyɔ́ dó wǔ tɔn gblamɛ kpó gbɔn flínflín i ɖɔ é ní zlɔ́n agban tɔn lɛ́ ɖó Jexóva jí gblamɛ kpó. (Ðɛh. 55:23; 68:20) A sixú lɛ́ flín i ɖɔ Jexóva kún jó è dó ó. (Ðɛh. 37:28; Eza. 59:1) A tlɛ sixú lɛ́ byɔ́ ɛ ɖɔ émí ná wa nǔ tawun tawun ɖé lɛ́ n’i, ɖi nǔɖuɖu ɖé ɖiɖa n’i alǒ sa ɖiɖi kpowun ɖó kpɔ́ xá ɛ. A sixú byɔ́ ɛ ɖɔ é ní wá wa azɔ̌ ɖó kpɔ́ xá émí ɖo sinsɛnzɔ́ ɔ mɛ, énɛ́ ná wa ɖagbe n’i. Jǒ hwiɖée dó nú Jexóva ní zán we. Ényí mǐ ma nɔ sɔ́ ayi ɖó mǐɖée jí ǎ bo nɔ sɔ́ ɖó mɛ ɖěvo lɛ́ jí ɔ, mǐ ná ɖó awǎjijɛ adodwé ɔ!—Nǔx. 11:25.

17. Ényí mǐ ba ná ɖó awǎjijɛ adodwé ɔ ɔ, étɛ́ mǐ ka ɖó ná wa? (Ðɛhan 43:4)

¹⁷ Ényí mǐ kpo ɖo Tɔ́ mǐtɔn jǐxwé tɔn ɔ sɛkpɔ́ wɛ ɔ, mǐ sixú ɖó awǎjijɛ adodwé ɔ. Biblu ná mǐ gǎnjɛwú ɖɔ Jexóva wɛ nyí “xomɛhunhun” mǐtɔn bo nyí “awǎjijɛ” mǐtɔn. (Xa Ðɛhan 43:4.) Énɛ́ wú ɔ, ényí mǐ ná bo ɖo nǔ ɖěbǔ ɖí xwi xá wɛ ɖo gbɛ mɛ ɔ, mǐ sixú nɔ mɔ ɖɔ mǐ ɖo ayijayǐ mɛ. Mi nú mǐ ní kpo ɖo ayi mǐtɔn bǐ sɔ́ ɖó Jexóva jí wɛ, énɛ́ ɔ, é ná d’alɔ mǐ bɔ mǐ ná ɖó awǎjijɛ káká sɔ́yi!—Ðɛh. 144:15.