Mɛ̌ ka Nyí Mali Magidalanu ɔ?
Xósin e Biblu na é
Mali Magidalanu ɔ, ahwanvu Jezu tɔn gbejinɔtɔ́ ɖé wɛ. Toxo Magdala ee sixu ko nɔ lɛ́ nyí Magadân, bo ɖò Galilée Xù ɔ kpá é wu wɛ è sixu ko kpɔ́n dó bo ɖó nyikɔ Magidalanu ɔ n’i. Bɔya, toxo enɛ mɛ wɛ Mali lɔ nɔ nɔ.
Mali Magidalanu ɔ ɖò nyɔnu e nɔ xwedó Jezu kpo ahwanvu tɔn lɛ kpo gbɔn tomɛ tomɛ, bo nɔ kpé nukún ye wu ɖò agbaza lixo lɛ é mɛ. (Luki 8:1-3) É ɖò mɛ ɖěɖee mɔ lee è hu Jezu gbɔn é lɛ é mɛ; é lɛ́ ɖò mɛ nukɔn nukɔntɔn ɖěɖee mɔ fínfɔ́n sín kú tɔn lɛ é mɛ.—Maki 15:40; Jaan 20:11-18.
Tonyatɔ́ wɛ nú Mali Magidalanu à?
Biblu ɖɔ ɖɔ Mali Magidalanu ɔ nyí tonyatɔ́ ǎ. Nǔ e Biblu ɖɔ dó ninɔmɛ tɔn wu kpowun é wɛ nyí ɖɔ Jezu nya yɛ nyanya tɛnwe sín jǐ tɔn.—Luki 8:2.
Bɔ fitɛ tonyatɔ́ xó ɔ ka gosin? Mali Magidalanu kú b’ɛ ɖó xwè kanweko mɔ̌kpan gudo é ɔ, mɛɖé lɛ ɖɔ ɖɔ é wɛ nyí nyɔnu e sín nyikɔ è ma tuùn ǎ (vlafo tonyatɔ́ ɖé), b’ɛ y’avǐ kɔn nyi Jezu sín afɔ lɛ jí, bo dɔn ɖa tɔn lɛ dó súnsún é. (Luki 7:36-38) Amɔ̌, mǐ ɖó hwɛjijɔ jinjɔn Biblu jí ɖě, bo na ɖi xó enɛ ǎ.
Mali Magidalanu nyí “mɛsɛ́dó e è sɛ́dó mɛsɛ́dó lɛ é” ɖé wɛ à?
Eǒ. Sinsɛn Katolika tɔn nɔ ylɔ́ Mali ɖɔ “Nɔ Mímɛ́ Mali Magidalanu,” bo nɔ lɛ́ ylɔ́ ɛ ɖɔ “mɛsɛ́dó e è sɛ́dó mɛsɛ́dó lɛ é,” ɖó é ɖò mɛ nukɔn nukɔntɔn ɖěɖee yì dó Jezu sín fínfɔ́n sín kú sín wɛn mɛsɛ́dó lɛ é mɛ. (Jaan 20:18) Amɔ̌, enɛ zɔ́n bonu é na nyí mɛsɛ́dó ɖé ǎ. Gɔ́ na ɔ, fí ɖě ɖò Mawuxówema ɔ mɛ bɔ è ylɔ́ ɛ ɖɔ mɔ̌ ɖè ǎ.—Luki 6:12-16.
Ðibla yì vivɔnu xwè kanweko nukɔntɔn hwenu mǐtɔn tɔn ɔ, è ko wlán Biblu ɔ kpé. Xwè kanweko mɔ̌kpan ko wá yì gudo cobɔ sinsɛngán lɛ ɖɔ ɖɔ è na nɔ ylɔ́ Mali ɖɔ mɛ “mímɛ́” ɖé. Ðò nǔ ɖěɖee è wlán ɖò xwè kanweko wegɔ́ kpo atɔngɔ́ kpo vlamɛ, bɔ ye ma ɖò Biblu mɛ ǎ lɛ é mɛ ɔ, è ɖɔ xó dó mɛsɛ́dó Jezu tɔn ɖé lɛ wu, bɔ ye hwanwǔ Mali Magidalanu ɔ. Tan enɛ lɛ e è kpa é ɖebǔ jinjɔn Mawuxówema ɔ jí ǎ.
Mali Magidalanu ɔ, Jezu Klisu sín asì wɛ à?
Eǒ. Nǔgbo ɔ, Biblu ɖexlɛ́ nyi wɛn ɖɔ Jezu kún d’asì ó.a
a Kpɔ́n xóta “Jezu D’asì Wɛ À? Jezu Ðó Nɔví lɛ Wɛ À?”