NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É

Un ɖó ná bló batɛ́mu wɛ a?: Akpáxwé 1: Tínmɛ batɛ́mu tɔn

Xwe ɖokpó ɖokpó mɛ ɔ, mɛ wínnyáwínnyá e su ɖo xwédo Kúnnuɖetɔ́ Jexóva tɔn lɛ́ tɔn ɖé mɛ lɛ́ é gěgé wɛ nɔ bló batɛ́mu. A ɖo tamɛ lin dó afɔ énɛ́ ɖiɖe jí wɛ wɛ a? Ényí mɔ̌ wɛ ɔ, a ɖó ná tuun tínmɛ e mɛɖée zízé jó nú Mawu kpó batɛ́mu bíbló kpó ɖó é hwɛ̌.

Étɛ́ ka nyí batɛ́mu?

Batɛ́mu e xó Biblu ɖɔ é ɔ, è nɔ nylɔ́ mɛ dó sin mɛ bǐ mlɛ́mlɛ́ wɛ, é nyí è nɔ mi sin dó mɛ wú wɛ ǎ; bɔ batɛ́mu énɛ́ ka nɔ te nú nǔ tají tawun ɖé.

Sin ɔ glɔ́ yiyi ɖo batɛ́mu ɔ hwenu nɔ xlɛ́ ɖo agbawungba ɖɔ a kún sɔ́ ná nɔ gbɛ bo wa nǔ e nyɔ́ nukún towe mɛ kpowun lɛ́ é ɖě ó.
Sin ɔ glɔ́ tíntɔ́n sín nɔ xlɛ́ ɖɔ a bɛ́ gbɛzán yɔ̌yɔ́ ɖěvo, é wɛ nyí ɖɔ a ná nɔ wa nǔ e nɔ nyɔ́ Mawu nukúnmɛ lɛ́ é.

Gbɔn batɛ́mu blóbló gblamɛ ɔ, a yí gbe ɖo agbawungba ɖɔ Jexóva ɖó acɛ bo ná ɖɔ nǔ e nyɔ́ é kpó nǔ e nylá é kpó, bɔ a lɛ́ xlɛ́ mɛ bǐ ɖɔ a d’akpá bo ná nɔ wa nǔ e é ba ɖɔ a ní nɔ wa lɛ́ é hwebǐnu.

Lin tamɛ d’é wú: Étɛ́wú a ka jló ná zin alɔ d’akɔ́n ɖo agbawungba ɖɔ émí ná nɔ se tónú nú Jexóva ɖo gbɛzán émítɔn bǐ mɛ? Kpɔ́n 1 Jaan 4:19 kpó Nǔɖexlɛ́mɛ 4:11 kpó.

Étɛ́ ka nyí mɛɖée zízé jó nú Mawu?

Cóbónú a ná bló batɛ́mu ɔ, a ɖó ná zé gbɛzán towe jó nú Jexóva ɖo nǔglɔ́. Gbɔn nɛ̌ é?

Ðo ɖɛ mɛɖésúnɔ tɔn ɖé mɛ ɔ, a ná d’akpá nú Jexóva ɖɔ émí ná sɛn ɛ káká sɔ́yi, bɔ ényí ninɔmɛ ɖěbǔ ná bo wá xwetɔ́n alǒ nú mɛ ɖěvo lɛ́ ná bo ɖo nǔ ɖěbǔ bló wɛ ɔ, émí ná nɔ wa nǔ e é ba lɛ́ é.

Batɛ́mu nɔ xlɛ́ mɛ ɖěvo lɛ́ ɖɔ a ko zé hwiɖée jó nú Mawu ɖo nǔglɔ́. É nɔ ɖe xlɛ́ mɛ ɖěvo lɛ́ ɖɔ a kún sɔ́ nɔ nɔ gbɛ nú hwiɖée ɖě ó, loɔ, a nɔ nɔ gbɛ nú Jexóva.—Matíe 16:24.

Lin tamɛ d’é wú: Ényí a nyí Jexóva tɔn ɔ, étɛ́wú gbɛ towe ka ná nyɔ́ hú gǎn? Kpɔ́n Ezayíi 48:17, 18 kpó Eblée lɛ́ 11:6 kpó.

Étɛ́wú batɛ́mu ka ɖo tají?

Jezu ɖɔ ɖɔ cóbónú mɛɖé ná nyí ahwanvú émítɔn ɔ, mɛ ɔ ɖó ná bló batɛ́mu hwɛ̌. (Matíe 28:19, 20) Énɛ́ wú ɔ, batɛ́mu kpo ɖo nǔ e è byɔ́ ɖo klisánwun lɛ́ sí é ɖé nyí wɛ. Nǔgbó ɔ, Biblu ɖɔ ɖɔ batɛ́mu ɖo dandan cóbɔ è ná gán.—1 Piyɛ́ɛ 3:21.

É ɖo mɔ̌ có, wǎn yí nú Jexóva kpó lě do kancícá e ɖo hwi kpó Jexóva kpó tɛ́ntin é xɔ akwɛ́ nú we sɔ é kpó wɛ ɖó ná sísɛ́ we bɔ a ná bló batɛ́mu. A ɖó ná ɖó linlin ɖokpó ɔ ɖɛhanwlántɔ́ ɔ ɖɔhun, é wlán ɖɔ: “Nǔ e [Jexóva] wa nú mì lɛ́ ɔ, étɛ́ un ka sixú wa dó sú i axɔ́ tɔn? . . . Un ná nɔ xomlá [Jexóva] nyíkɔ. Akpá e un dó nú [Jexóva] lɛ́ ɔ, un ná ɖe yě.”—Ðɛhan 116:12-14.

Lin tamɛ d’é wú: Nǔ ɖagbe tɛ́ lɛ́ Jexóva ka ko wa nú we? Nɛ̌ a ka sixú sú i axɔ́ tɔn gbɔn? Kpɔ́n Sɛ́nflínmɛ 10:12, 13 kpó Hlɔ̌manu lɛ́ 12:1.

Nǔ e gbɛ̌ towe lɛ́ nɔ ɖɔ é

“Mɛɖée zízé jó nú Jexóva ɔ, akpá ɖé dídó n’i wɛ, bo ka nyí ayihún sín nǔ ǎ. Amɔ̌, ényí a zé hwiɖée jó nú Jexóva ɔ, é ná kɔn nyɔ̌ná dó jǐ towe b’ɛ ná túnflá. È ná ɖɔ lɔ ɔ, é sixú kpé nukún dó mǐ wú hú lěe mǐ sixú kpé nukún dó mǐɖée wú gbɔn é.”—Mijin.

“Jexóva ko xlɛ́ ɖɔ émí yí wǎn nú we. Ényí a bló batɛ́mu ɔ, a ná ɖe xlɛ́ ɖɔ a yí wǎn n’i tawun. Batɛ́mu blóbló ɔ, wǔjɔmɛ ɖaxó ɖé wɛ, bo lɛ́ nyí nyɔ̌ná ɖaxó ɖé!”—Ember.

“Gbeta ɔ kɔn wíwá bo zé mɛɖée jó nú Mawu lobo bló batɛ́mu wɛ nyí gbeta tají hú gǎn e kɔn mɛɖé sixú wá é. Amɔ̌, énɛ́ ɖó ná dó xɛsi we ǎ. Ényí a sɔ́ nǔ ɖ’ayǐ ná, bo ka lɛ́ wá gbeta énɛ́ kɔn ɖó hwɛjijɔ e sɔgbe lɛ́ é wú ɔ, gbeta ɖagbe hú gǎn e kɔn a ná wá kpɔ́n é nɛ́.”—Julian.

Xɛxó lɛ́ kpó nǔgbó lɛ́ kpó

XƐXÓ: Mɛ e ko nyí mɛxó lɛ́ é kɛ́ɖɛ́ wɛ zin bo sixú bló batɛ́mu.

NǓGBÓ: É nyí xwe e ɖo mɛɖé ta é wɛ nɔ xlɛ́ dó nukɔn ɖɔ mɛ ɔ zin ǎ, loɔ, wǎn e mɛ ɔ yí nú Jexóva é kpó gbesisɔmɛ e mɛ ɔ ɖe bo nɔ se tónú n’i é kpó wɛ nɔ xlɛ́. Jozɛ́fu, Samuwɛ́li kpó Joziyási kpó kpo ɖo wínnyáwínnyá mɛ có, yě ɖe xlɛ́ ɖɔ émí zin. Mɛ wínnyáwínnyá gěgé wɛ ɖo nǔ ɖokpó ɔ wa wɛ égbé.

Biblu ɖɔ: “Ényí vǐ ɖé ɖo walɔ ɖé lɛ́ zán wɛ ɔ, è nɔ ko tuun vǐ alɔkpa e é nyí é; é ɖo gbɛ ɖagbe, gbɛ jlɔ́jlɔ́ zán wɛ kpó é gbɔ kpó ɔ, è nɔ ko tuun.”—Nǔnywɛ́xó 20:11.

XƐXÓ: Ényí xɔ́ntɔn towe lɛ́ ɖo batɛ́mu bló wɛ ɔ, hwi lɔ ɖó ná bló batɛ́mu.

NǓGBÓ: Mɛɖésúnɔ wɛ ɖó ná jló bo wá gbeta ɔ kɔn sín ayi mɛ bo zé mɛɖée jó nú Mawu lobo bló batɛ́mu. É nyí yɛsu wɛ bɔ a ɖó ná fɔ, ɖó mɛ ɖěvo lɛ́ bló mɔ̌ alǒ ɖó a lin ɖɔ mɛ ɖěvo lɛ́ nɔ ɖó nukún ɖɔ a ní bló mɔ̌ wútu ǎ.

Biblu ɖɔ: “Togun [Mawu tɔn] ná zé yěɖée jó kpó jlǒ kpó.”—Ðɛhan 110:3, nwt.

XƐXÓ: Nú a ma bló batɛ́mu ǎ ɔ, a ɖo nǔ e a wa lɛ́ é sín gbe ná ɖó nú mɛɖé wɛ ǎ.

NǓGBÓ: É nyí batɛ́mu wɛ a ná bló cóbó ná ɖó gbe nú Jexóva ǎ, loɔ, ényí a tuun nǔ e nyɔ́ nukún tɔn mɛ lɛ́ é kpó nǔ e ma nyɔ́ ǎ lɛ́ é kpó ɔ, a ná ɖó gbe n’i.

Biblu ɖɔ: “Ényí mɛɖé tuun nǔ e sɔgbe é bo ma ka bló ǎ hǔn, hwɛ wɛ é hu.”—Jaki 4:17.

WĚÐEXÁMƐ: Ényí a nɔ mɔ ɖɔ hwiɖée zízé jó nú Mawu bo bló batɛ́mu hú agbɔ̌n émí hǔn, gbějé hwiɖée kpɔ́n bo mɔ nukúnnú jɛ nǔ e ɖo xɛsi dó we wɛ lɛ́ é wú, lobo kpɔ́n nǔ e a sixú wa dó ɖu ɖo yě jí lɛ́ é. Wěmata 37gɔ́ wěma Les jeunes s’interrogent. Réponses pratiques (volume 2) sixú d’alɔ we.