Nɛ̌ un ka sixú ɖí xwi xá aluwɛ mɛ ninɔ gbɔn?

Xɔ́ntɔn towe ɖé alǒ xwédo towe sín hǎgbɛ́ ɖé kú agaɖanu din wɛ a? Ényí mɔ̌ wɛ ɔ, xóta élɔ́ sixú d’alɔ we bɔ a ná ɖí xwi xá aluwɛ mɛ ninɔ towe.

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

• Aluwɛ mɛ ninɔ ce ka syɛ́n dín wɛ a?

• Lěe è ná ɖí xwi xá wǔvɛ́ vovo e è nɔ mɔ hwenu e mɛɖé kú é gbɔn é

• Nǔ e gbɛ̌ towe lɛ́ nɔ ɖɔ é

Aluwɛ mɛ ninɔ ce ka syɛ́n dín wɛ a?

Nú mɛ gěgé ɔ, wǔvɛ́ vovo e è nɔ mɔ hwenu e mɛɖé kú é nɔ syɛ́n tawun bo nɔ yá wǔ fó ǎ.

“Ayi ɖě nɔ hɔ́n bónú un nɔ gɔn gǎn’páa ce flín ǎ. É kú din é ɔ, é ko bló xwe we có, é nɔ vɛ́ wǔ nú mì tawun nú má ɖɔ xó dó wǔ tɔn ma ya avǐ.”—Olivia.

“Gǎn’máa ce nɔ nɔ gǔdo nú mì tawun ɖo nǔ e gbé nya wɛ un ɖe lɛ́ é kɔn, amɔ̌, é sɔ́ wá nɔ gbɛ bo mɔ nǔ énɛ́ lɛ́ ɖěbǔ hwenu e un wá ɖo yě wú kpé wɛ é ǎ. Un nɔ nɔ aluwɛ mɛ hweɖébǔnu e un kpé nǔ énɛ́ lɛ́ ɖě wú bo wa é, ɖó é sɔ́ ɖo fínɛ́ bo mɔ ǎ.”—Alison.

Aluwɛ mɛ ninɔ sixú zɔ́n bɔ a ná se wǔvɛ́ vovo lɛ́. Ði kpɔ́ndéwú ɔ:

“Hwenu e daá-nyɔ̌nu ce sín asú kú é ɔ, é kpácá mì tawun, bɔ wǔ kú mì nú hwenu gěgé. Azɔn nukɔntɔn e mɛ vívɛ́ ce ɖé kú é nɛ́, b’ɛ cí nú mì ɖɔ pípan wɛ xo za nú mì ɖɔhun.”—Nadine.

“Xomɛ sin mì dó gǎn’páa ce wú hwenu e é kú é, ɖó mǐ sa vo n’i ɖɔ é ní kpé nukún dó éɖée wú ɖo lanmɛ ná nɔ ganjí linu có, é wa mɔ̌ ǎ.”—Carlos.

“Nyi kpó dadá ce kpó kɛ́ɖɛ́ jɛ́n nyí hǎgbɛ́ xwédo ɔ tɔn sín mɛ e ma ɖo fínɛ́ hwenu e gǎn’páa ce kú é ǎ é. Énɛ́ gúdo ɔ, un dó hwɛ nyiɖée, ɖó un lin ɖɔ un kún dó éɖabɔ n’i ganjí ó.”—Adriana.

“Asú kpó así kpó e xwédo mǐtɔn vɛ́ xá é ɖé bló alitawoví kpó mɔ̌to kpó bo kú. Énɛ́ gúdo ɔ, ényí hǎgbɛ́ xwédo mǐtɔn tɔn ɖé tɔ́n sín xwégbe hweɖébǔnu ɔ, xɛsi nɔ ɖi mì, bɔ un nɔ lin ɖɔ é lɔmɔ̌ sixú kú.”—Jared.

“Ée gǎn’máa ce kú xwe atɔn ɖíe é ɔ, é vɛ́ nǔ mì ɖɔ un kún zán hwenu gěgé xá ɛ hwenu e é ɖo gbɛ é ó.”—Julianna.

É nylá ɖɔ nǔ ní cí lě nú mɛ hwenu e è ɖo aluwɛ mɛ é ǎ: Nǔkpácámɛ, xomɛsin, hwɛdómɛɖée, xɛsi kpó nǔvɛ́númɛ kpó. Nú nǔ énɛ́ lɛ́ ɖě cí mɔ̌ nú we hǔn, flín ɖɔ hwenu ɖo yiyi wɛ ɔ, yě ná wá ɖe kpo. Din hwɛ̌ ɔ, nɛ̌ a ka sixú ɖí xwi xá aluwɛ mɛ ninɔ towe gbɔn?

Lěe è ná ɖí xwi xá wǔvɛ́ vovo e è nɔ mɔ hwenu e mɛɖé kú é gbɔn é

Nɔ ɖɔ xomɛ nú xɔ́ntɔn ɖé. Biblu ɖɔ ɖɔ xɔ́ntɔn nǔgbó nɔ “dó alɔ mɛ adǎngbomɛ hwenu.” (Nǔnywɛ́xó 17:17) Lěe nǔ cí nú we é ɖiɖɔ nú mɛɖé sixú zɔ́n bɔ a ná mɔ alɔdó e sín hudó a ɖó é.

“Aluwɛ mɛ ninɔ nylá ǎ. Hweɖélɛ́nu ɔ, a sixú nɔ aluwɛ mɛ hwiɖokpónɔ, amɔ̌, a sixú wá jɛ linlin jí ɖɔ nǔ lɛ́ kún sɔ́ ná lɛ́ wá kpɔ́n te gbeɖé ó. Nǔ e wú é nyɔ́ ɖɔ a ní ɖɔ xó xá mɛɖé é nɛ́.”—Yvette.

Nɔ flín mɛ vívɛ́ towe. Biblu ɖɔ ɖɔ “gbɛtɔ́ ɖagbe ɔ, nǔ ɖagbe wɛ é nɔ ɖe tɔ́n sín nǔ ɖagbe e ɖo ayi tɔn mɛ é mɛ.” (Luki 6:45, MAWUXÓWÉMA) A sixú xo fɔtóo tɔn lɛ́ kplé dó bló alubɔ́mu ɖé, alǒ wlán nǔ ɖagbe e a nɔ flín dó wǔ tɔn lɛ́ é.

“Un wá gbeta ɔ kɔn bo ná wlán nǔ ɖěɖěe xɔ́ntɔn ce kplɔ́n mì hwenu e é ɖo gbɛ é bǐ, mɔ̌ mɛ ɔ, kpɔ́ndéwú tɔn ná kpo ɖo le hɛn wá nú mì wɛ. Nǔ lɛ́ wlánwlán d’alɔ mì bɔ un ɖí xwi xá aluwɛ ɔ.”—Jeffrey.

Nɔ kpé nukún dó hwiɖée wú ɖo lanmɛ ná nɔ ganjí linu. Biblu yí gbe ɖɔ lanmɛ bibakpɔ́n nɔ hɛn le wá. (1 Timɔtée 4:8) Tɛ́n kpɔ́n bo nɔ ɖu nǔɖuɖu hunsin ɖagbe tɔn, bo nɔ ba lanmɛ kpɔ́n lobo nɔ lɛ́ gbɔjɛ ganjí.

“Aluwɛ mɛ ninɔ sixú wa nǔ dó lěe a nɔ lin tamɛ gbɔn é wú, énɛ́ wú ɔ, a ɖó ná tɛ́nkpɔ́n bo nɔ ganjí ɖo agbaza mɛ. Nɔ ɖu nǔ, bo nɔ lɛ́ gbɔjɛ ganjí.”—Maria.

Nɔ d’alɔ mɛ ɖěvo lɛ́. Biblu ɖɔ: “Nǔnámɛ nɔ ná awǎjijɛ mɛ hú nǔyíɖomɛsí.”—Mɛsɛ́dó 20:35.

“Nɔ tɛ́n kpɔ́n bo nɔ d’alɔ mɛ ɖěvo lɛ́, tají ɔ, mɛ e mɛ vívɛ́ yětɔn lɔmɔ̌ kú lɛ́ é. Énɛ́ sixú flín we ɖɔ mɛ ɖěvo lɛ́ lɔ ɖo wǔvɛ́ mɔ wɛ.”—Carlos.

Ðɔ lěe nǔ cí nú we é ɖo ɖɛ mɛ. Biblu ɖɔ ɖɔ Jexóva Mawu “wɛ nɔ se ɖɛ.” (Ðɛhan 65:3) É lɛ́ ɖɔ ɖɔ Jexóva nɔ “gbɔ azɔn nú mɛ e ayi yětɔn xo akpa lɛ́, bo súnsún ɖasin nú yě.”—Ðɛhan 147:3.

“Byɔ̌ Jexóva ɖɔ é ní dó alɔ e sín hudó a ɖó é we bo lɛ́ dó wǔ syɛ́n e sín hudó a ɖó é lanmɛ nú we. Nǔ lɛ́ nɔ vɛ́ wǔ ɖo azǎn ɖé lɛ́ jí hú ɖěvo lɛ́, amɔ̌, Jexóva nɔ ɖo fínɛ́ nú mì hwebǐnu.”—Jeanette.

Nǔ e a nɔ ɖó nukún lɛ́ é ní nɔ jlɛ̌ jí. Flín ɖɔ mɛ lɛ́ bǐ kún nɔ nɔ aluwɛ mɛ ɖo ali ɖokpó ɔ nu ó. Biblu ɖɔ dó Jakɔ́bu wú ɖɔ, hwenu e é lin ɖɔ vǐ émítɔn kú é ɔ, è “wá dó gbɔ n’i, có é ká se ǎ.” (Bǐbɛ́mɛ 37:35) Énɛ́ wú ɔ, ényí aluwɛ towe ma gbo kɔ ǎ hǔn, ma nú é kpácá we ó.

“Gǎn’máa ce kú din é ɔ, é ko bló xwe 15 có, nǔ gěgé wɛ nɔ zɔ́n bɔ un nɔ flín i.”—Taylor.

Mǐ ní ɖɔ ɖɔ a wɛ́n xú. É ná vɛ́ tawun, bo sixú lɛ́ byɔ́ hwenu cóbɔ a ná mɔ agbɔ̌n. Amɔ̌, dotóo ná ɖe wě xá we dó lěe a ná d’alɔ agbaza towe bɔ nǔ e ɖo wiwa we wɛ é ná xwɛ gbɔn é wú.

Nǔ ɖokpó ɔ wɛ é nyí hwenu e mɛ vívɛ́ ɖé kú nú mɛ é: è nɔ se “wǔvɛ́” syɛ́nsyɛ́n. É nɔ byɔ́ hwenu cóbɔ aluwɛ syɛ́nsyɛ́n ná ɖe kpo. Énɛ́ wú ɔ, ɖǒ suúlu. Gbějé wěɖexámɛ e ɖo xóta élɔ́ mɛ lɛ́ é kpɔ́n, bo kpɔ́n ɖěɖěe ná d’alɔ we hú gǎn lɛ́ é.