Ényí mɛjitɔ́ ce lɛ́ gbɛ́ ɖɔ un kún ná nɔ yi tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí ó ɔ ka lo?

Bóyá xɔ́ntɔn towe lɛ́ bǐ wɛ nɔ yi tɛn Ɛntɛnɛ́ti tɔn e jí e nɔ zun xɔ́ntɔn ɖe lɛ́ é jí, bo nɔ ɖo xó ɖɔ dó yě wú wɛ hwebǐnu. Yě tlɛ sixú nɔ cá we ko, ɖó a ɖó kɔ́ntu ɖě ǎ wútu. Étɛ́ a ka ɖó ná tuun dó nǔ énɛ́ wú? Nɛ̌ a ka sixú wa nǔ gbɔn?

Nǔ e a ɖó ná tuun é

É nyí hwi ɖokpó wɛ ǎ. Mɛjitɔ́ gěgé wɛ nɔ gbɛ́ ɖɔ vǐ émítɔn lɛ́ kún ná yi tɛn Ɛntɛnɛ́ti tɔn e jí e nɔ zun xɔ́ntɔn ɖe lɛ́ é jí ó. Bóyá yě sixú ko tuun ɖɔ tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é cá kan xá nǔ élɔ́ lɛ́:

• linkpɔ́nzɔn kpó taglomɛzɔn ɖěvo lɛ́ kpó.

• fɔtóo nǔblíblíwiwa tɔn kpínkpɔ́n, nǔwlánwlán, fɔtóo kpó video kpó ɖěɖěe nɔ fɔ́n jlǒ xóɖóxámɛ tɔn dó lanmɛ nú mɛ lɛ́ é sísɛ́ dó mɛ gbɔn alǒkan jí, kpó nǔɖɔ ba mɛ gbɔn Ɛntɛnɛ́ti jí kpó.

• tagba e ma ɖo dandan ǎ lɛ́ é nɔ fɔ́n ɖo xɔ́ntɔn lɛ́ tɛ́ntin.

Mɛ wínnyáwínnyá gěgé ko wá gbeta ɔ kɔn, bo ɖó tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí yiyi te. Yěɖésúnɔ mɔ nǔ jɛ wú ɖɔ nǔ e wa dó yě wú wɛ tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é ɖe é hú gǎn ɖagbe e wa nú yě wɛ yě ɖe lɛ́ é. Ð’ayi kpɔ́ndéwú élɔ́ lɛ́ wú:

• Priscilla mɔ ɖɔ é nɔ fin hwenu e émí sixú zán dó wa nǔjɔnǔ é sín émí sí.

• Jeremy ɖɔ ɖɔ acɛ e émí ma ɖó dó nǔmasɔgbe e nɔ wá xwetɔ́n ɖo kɔ́ntu émítɔn jí lɛ́ é jí ǎ é wɛ émí gbɛ́ wǎn ná.

• Bethany mɔ ɖɔ é zɔ́n bɔ émí nɔ sɔ́ ayi ɖó nǔ e wa wɛ mɛ ɖěvo lɛ́ ɖe é jí hú gǎn.

“Un wá gbeta ɔ kɔn bo súnsún aplikasyɔn e è nɔ zán bo nɔ yi tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí lɛ́ é, bɔ é víví nú mì ɖɔ un wa mɔ̌. Un tlɛ jɛ do tɔn ǎ, é nyɔ́ wa ɔ, é víví nú mì ɖɔ un ɖó hwenu hú gǎn, bo ná sɔ́ ayi ɖó nǔ e ɖo tají hú gǎn nú mì lɛ́ é jí.”—Sierra.

“Un gbɛ́ wǎn nú lě do è sixú húzú kannumɔ nú tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é sɔ é, gɔ́ nú lěe mɛ lɛ́ ná wa nǔ gbɔn ɖó nǔ e un sɔ́ ɖó yě jí lɛ́ é wú, éé nɔ ɖu ayi mɛ nú mì zɛ xwé wú é. É vɛ́ wǔ nú mì cóbɔ un sú kɔ́ntu ce, amɔ̌, ée un wa mɔ̌ é ɔ, un mɔ nyiɖée mɛ hú gǎn. Un ɖó fífá hú gǎn din.”—Kate.

Nǔ e a sixú wa é

Nɔ se tónú nú sɛ́n e mɛjitɔ́ towe lɛ́ dó lɛ́ é. Xlɛ́ yě ɖɔ a ko zin, gbɔn tónú sise nú sɛ́n ɖěɖěe yě dó lɛ́ é ma sin xomɛ, alǒ ma húnhún nǔ ɖɔ gblamɛ.

Nǔgbódodó Biblu tɔn: “Xlonɔ sin xomɛ ɔ, é nɔ ɖe xlɛ́ kpó zǐngídi kpó; mɛ e ɖó nǔnywɛ́ ɔ ka nɔ yi agbɔ̌n jí, bo nɔ ɖe xomɛsin tɔn xlɛ́ ǎ.”—Nǔnywɛ́xó 29:11.

Mɛɖé lɛ́ sixú ɖe wě xá we ɖɔ a ní nɔ yi tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí dó mɛjitɔ́ towe lɛ́ gúdo, alǒ ɖó kɔ́ntu ɖo nǔglɔ́. Nǔwanyido wɛ énɛ́ ka ná nyí! Yɛmɛnúwiwa mɔ̌hun ná zɔ́n bɔ ado ná nɔ hu we, bɔ a ná nɔ dó hwɛ hwiɖée. Bɔ ényí yě wá mɔ nǔ jɛ nǔ e wa wɛ a ɖe é wú ɔ, a ná lɛ́ flú bǐ, bɔ é ɖo wɛn ɖɔ énɛ́ ná wa nǔ dó jiɖe e yě ɖó dó wǔ we é wú.

Nǔgbódodó Biblu tɔn: “Mǐ . . . jló ná zán gbɛ ɖagbe ɖo nǔ bǐ mɛ.”—Eblée lɛ́ 13:18.

Sɔ́ dó ɖó gbeta hwiɖésúnɔ tɔn. Mɛ wínnyáwínnyá e xó mǐ ɖɔ wá yi lɛ́ é ɖɔhun ɔ, hwi lɔ sixú kpé wú bo lin tamɛ dó hwɛjijɔ tobutóbú e wú é nyɔ́ ɖɔ è ní nyi alɔ nú tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí yiyi lɛ́ é wú. Ényí a mɔ nukúnnú jɛ wú ɖɔ tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é zínzán kún nyɔ́ nú we ó hǔn, nyi alɔ ná, ní ma ka nyí ɖó mɛjitɔ́ towe lɛ́ wá gbeta énɛ́ kɔn kpowun wútu ó, loɔ, ní nyí ɖó a sɔ́ dó ɖó gbeta hwiɖésúnɔ tɔn wútu. Mɔ̌ mɛ ɔ, ényí gbɛ̌ towe lɛ́ kan nǔ byɔ́ we d’é wú ɔ, winnyá sɔ́ ná hu we ǎ, bɔ yě sɔ́ ná sixú cá we ko ɖó énɛ́ wú ǎ.

Nǔ tají ɔ: Se tónú nú mɛjitɔ́ towe lɛ́, bo tɛ́n kpɔ́n bo mɔ nukúnnú jɛ gbeta e kɔn yě wá é mɛ, lobo yí gbe ná, mɔ̌ mɛ ɔ, a ná sɔ́ dó ɖó hwiɖésúnɔ tɔn. Din hwɛ̌ ɔ, a sixú nɔ gbɛ tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é mɛvo.