Sinsɛn ɖó ná ɖ’alɔ ɖo toxóɖiɖɔ mɛ wɛ a?

Gbɔn gbɛ ɔ bǐ mɛ ɔ, mɛ e nɔ ɖɔ ɖɔ émí nyí ahwanvú Jezu tɔn lɛ́ é gěgé nɔ ɖ’alɔ ɖo toxóɖiɖɔ mɛ titewungbe tɔn. Mɛɖé lɛ́ nɔ tɛ́n kpɔ́n, bó nɔ jlá ajɔ̌ nú sinsɛn yětɔn lɛ́ kpó nǔgbódodó walɔ ɖagbe tɔn lɛ́ kpó, gbɔn gǔdo ninɔ nú mɛ e jló ná nyí togán é ɖé alǒ toxóɖɔgbɛ́ ɖé gblamɛ. Wǎgbɔ tɔn ɔ, toxóɖɔtɔ́ lɛ́ nɔ gbɔn xó e kúnkplá walɔ ɖagbe lɛ́ é, alǒ éé kúnkplá ninɔmɛ e mɛ gbɛtɔ́ lɛ́ ɖe lɛ́ é sín yɛkan mɛ, bónú sinsɛnnɔ lɛ́ ní nɔ gǔdo nú yě. È nɔ mɔ hwɛhwɛ bɔ sinsɛngán ɖé lɛ́ nɔ sɔ́ alɔ dó jí, bá nɔ tɛn acɛkpikpa tɔn ɖé mɛ. Ðo to ɖé lɛ́ mɛ ɔ, è nɔ kpɔ́n sinsɛn Klisánwun tɔn enyíi lɛ́ dó mɔ sinsɛn to tɔn, alǒ sinsɛn tají ɔ.

Étɛ́ a ka lin? Ahwanvú Jezu tɔn lɛ́ ɖó ná ɖ’alɔ ɖo toxóɖiɖɔ mɛ wɛ a? Ényí a kpɔ́n kpɔ́ndéwú Jezu tɔn ɔ, a sixú mɔ xósin ɔ. É ɖɔ: “Kpɔ́ndéwú ɖé wɛ é nyí, bɔ un ná mi, bónú mi lɔmɔ̌ ná nɔ bló lěe un bló gbɔn nú mi é.” (Jaan 13:15) Nú nǔ e kúnkplá toxóɖiɖɔ é ɔ, kpɔ́ndéwú tɛ́ Jezu ka sɔ́ ɖ’ayǐ?

Jezu ɖ’alɔ ɖo toxóɖiɖɔ mɛ wɛ a?

Éǒ. Jezu ɖ’alɔ ɖo toxóɖiɖɔ gbɛ ɔ tɔn mɛ ǎ.

Hlɔ̌nhlɔ́n e toxóɖiɖɔ nɔ ná mɛ é myá nukún nú Jezu ǎ. Hwenu e Satáan Awǒvi xwlé “axɔ́súɖuto gbɛ mɛ fí tɔn lɛ́ [bǐ]” Jezu é ɔ, é gbɛ́ ɖɔ émí kún ná húzú gǎn nú acɛkpikpa gbɛtɔ́ lɛ́ tɔn ó. (Matíe 4:8-10)a Ðo ninɔmɛ ɖěvo mɛ ɔ, mɛ e mɔ ɖɔ Jezu ɖó jijɔ ɖagbe e ná zɔ́n bɔ é ná nyí gǎn ɖagbe é ɖé lɛ́ tɛ́n kpɔ́n bó ná hɛn ɛ gǎnnugǎnnu bónú é ná dó ta toxóɖiɖɔ mɛ. Biblu ɖɔ: “Ée Jezu mɔ ɖɔ yě ná wá sɔ́ émí kpó hlɔ̌nhlɔ́n kpó, bó ná sɔ́ émí axɔ́sú ɔ, é gosín fínɛ́, bó tunta sókan ɔ mɛ é ɖokpónɔ.” (Jaan 6:15) Jezu wa nǔ e ɖó nukún wɛ yě ɖe ɖo así tɔn é ǎ. É nyɔ́ wa ɔ, é gbɛ́ ɖɔ émí kún ná ɖó alɔ ɖo toxóɖiɖɔ mɛ ó.

Jezu nɔ gǔdo nú linlin toxóɖiɖɔ tɔn ɖěbǔ ǎ. Ði kpɔ́ndéwú ɔ, ɖo Jezu hwenu ɔ, Jwifu lɛ́ nɔ sin xomɛ ɖó takwɛ́ e acɛkpikpa Hlɔ̌ma tɔn nɔ ɖɔ yě ná sú é wú, bó nɔ mɔ dó mɔ agban kpinkpɛn e é ma sɔgbe ɖɔ è ní sɔ́ dó kɔ jí nú yě ǎ é. Ée yě tɛ́n kpɔ́n bó ná bló bɔ Jezu ná ɖó nu ɖo xó ɔ mɛ é ɔ, é dó nu toxóɖiɖɔ mɛ bó ɖɔ ɖɔ é sɔgbe ɖɔ yě ní sú takwɛ́ alǒ gbɔ ǎ. É ɖɔ nú yě ɖɔ: “Mi bo sɔ́ nǔ e nyí Dadá Hlɔ̌ma tɔn tɔn ɔ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ jó nú Mawu.” (Maki 12:13-17) É ɖó wǔ zɔ nú toxóɖiɖɔ có, é ɖɔ ɖɔ è ɖó ná sú takwɛ́ e acɛkpikpa Hlɔ̌ma tɔn, éé nɔ te nú Dadá Hlɔ̌ma tɔn é byɔ́ é. Ðo hwe ɖokpó ɔ nu ɔ, é ɖe xlɛ́ ɖɔ tónúsíse nú acɛkpikpa to tɔn lɛ́ ɖó dogbó. Mɛɖé ɖó ná sɔ́ nǔ e nyí Mawu tɔn lɛ́ é jó nú Acɛkpikpa to tɔn ɖé ǎ; mɛɖée zízé jó nú Mawu kpó Mawusinsɛn kpó ɖo nǔ énɛ́ lɛ́ mɛ.—Matíe 4:10; 22:37, 38.

Jezu jɛ hun dó acɛkpikpa jǐxwé tɔn jí, énɛ́ wɛ nyí Axɔ́súɖuto Mawu tɔn. (Luki 4:43) É ɖ’alɔ ɖo toxóɖiɖɔ mɛ ǎ, ɖó é tuun ɖɔ Axɔ́súɖuto Mawu tɔn wɛ ná bló bɔ ayǐkúngban ɔ ná cí lěe Mawu ba ɖɔ é ní cí é, é nyí acɛkpikpa gbɛtɔ́ tɔn lɛ́ ǎ. (Matíe 6:10) É tuun ɖɔ Axɔ́súɖuto Mawu tɔn kún ná nɔ wa nǔ gbɔn acɛkpikpa gbɛtɔ́ tɔn lɛ́ jí ó, loɔ, é ná ɖyɔ́ yě wɛ.—Daniyɛ́li 2:44.

Klisánwun xwe kanweko nukɔntɔn ɔ tɔn lɛ́ ka ɖ’alɔ ɖo toxóɖiɖɔ mɛ wɛ a?

Éǒ. Ahwanvú Jezu tɔn lɛ́ se tónú nú gbeɖiɖe tɔn e ɖɔ ɖɔ yě ní ‘ma nyí gbɛ ɔ tɔn ó’ é. (Jaan 15:19) Yě xwedó kpɔ́ndéwú tɔn bó nɔ zɔ nú toxóɖiɖɔ. (Jaan 17:16; 18:36) Yě ɖ’alɔ ɖo toxóɖiɖɔ mɛ ǎ. É nyɔ́ wa ɔ, yě wa azɔ̌ e Jezu zɔ́n yě é, énɛ́ wɛ nyí ɖɔ yě jlá wɛn ɖagbe Axɔ́súɖuto Mawu tɔn tɔn, bó lɛ́ kplɔ́n nǔ mɛ d’é wú.—Matíe 28:18-20; Mɛsɛ́dó 10:42.

Klisánwun xwe kanweko nukɔntɔn ɔ tɔn lɛ́ sɔ́ tónú sise nú Mawu ɖó tɛn nukɔntɔn ɔ mɛ ɖo gbɛzán yětɔn mɛ, amɔ̌, yě lɛ́ tuun ɖɔ yě ɖó ná se tónú nú acɛkpikpa to tɔn lɛ́. (Mɛsɛ́dó 5:29; 1 Piyɛ́ɛ 2:13, 17) Yě se tónú nú sɛ́n lɛ́, bó sú takwɛ́ lɛ́. (Hlɔ̌manu lɛ́ 13:1, 7) Yě ɖ’alɔ ɖo toxóɖiɖɔ mɛ ǎ, amɔ̌, yě ɖu alɔ e acɛkpikpa lɛ́ nɔ cyɔ́n mɛ jí lɛ́ é kpó nǔ ɖěvo e yě nɔ wa lɛ́ é kpó sín le.—Mɛsɛ́dó 25:10, 11; Filípunu lɛ́ 1:7.

Wǔ ɖíɖó zɔ Klisánwun lɛ́ tɔn ɖo égbé

Biblu xlɛ́ vaan ɖɔ Jezu kún ɖ’alɔ ɖo toxóɖiɖɔ mɛ ó, ahwanvú tɔn nukɔntɔn lɛ́ lɔ kún ka wa mɔ̌ ó. Énɛ́ wú ɔ, ɖó Klisánwun wɛ nú Kúnnuɖetɔ́ Jehovah tɔn lɛ́ wútu ɔ, yě lɔ nɔ ɖó wǔ zɔ bǐ mlɛ́mlɛ́, yě nɔ wa mɔ̌ gbɔn gbɛ ɔ bǐ mɛ. Klisánwun xwe kanweko nukɔntɔn ɔ tɔn lɛ́ ɖɔhun ɔ, yě nɔ wa azɔ̌ e Jezu zɔ́n yě é, énɛ́ wɛ nyí ɖɔ yě nɔ jlá “Axɔ́súɖuɖu Mawu tɔn sín wɛn ɖagbe” ɔ.—Matíe 24:14.