Tɔgbamɛ e hɛn nǔ gblé tawun lɛ́ é: Étɛ́ Biblu ka ɖɔ?

Mɛ gěgé wɛ tɔ ɖo gbigba wɛ gbɔn gbɛ ɔ bǐ mɛ. Ð’ayi gbeɖíɖó élɔ́ lɛ́ wú:

“Jǐ e ja ɖo azǎn gǔdo gúdo tɔn e wá yi lɛ́ é mɛ ɖo azinkan Chine tɔn é syɛ́n sɔmɔ̌ bɔ mɔ̌hunkɔtɔn sɔ́ ja kpɔ́n é ɔ, é hwe bǐ ɔ, é ko bló xwe 140. Sín samedi wá jɛ mercredi ɔ, jǐ 744,8 millimètre wɛ ja.”—AP News, 2 août 2023.
“Jeudi wɛ nyí azǎn wegɔ́ e jí jɔhɔn syɛ́nsyɛ́n e nɔ nyí Khanun é zɔ́n bɔ jǐ ɖaxó ja ɖo tofɔligbé Japon tɔn, bɔ é hwe bǐ ɔ, mɛ we kú é. . . . È ɖó nukún ɖɔ jɔhɔn syɛ́nsyɛ́n énɛ́ ná zɔ́n bɔ jǐ 600 millimètre mɔ̌ ná ja ɖo tɛ́ntin Taïwan tɔn sín sókan mɛ.”—Deutsche Welle, 3 août 2023.
“Jǐ ɖaxó ɖaxó e ma ja kpɔ́n sín xwe 50 ɖíe ǎ lɛ́ é ja ɖo Canada sín awa e ɖo xu atlantique tó lɛ́ é xwé, bo zɔ́n bɔ tɔ gba mɛ ɖo aklúnɔzángbla fífó e wá yi é [ɖo Nouvelle-Écosse].”—BBC News, 24 juillet 2023.

Étɛ́ Biblu ka ɖɔ dó nǔ mɔ̌hun e jɛ lɛ́ é wú?

Xlɛ̌ “azǎn gǔdo gúdo tɔn lɛ́” tɔn ɖé

Biblu ɖe xlɛ́ ɖɔ hwenu e è ylɔ́ ɖɔ “azǎn gǔdo gúdo tɔn lɛ́” é mɛ nɔ gbɛ ɖe wɛ mǐ ɖe. (2 Timɔtée 3:1) Jezu ɖɔ ɖ’ayǐ ɖɔ ɖo hwe mǐtɔn nu ɔ, mǐ ná mɔ “nǔ e ná dó xɛsi [mǐ] lɛ́ é,” alǒ nǔ e ná gba ayi dó nú mǐ lɛ́ é. (Luki 21:11) Hǔzúhúzú ninɔmɛ ayǐ mɛ tɔn tɔn ɔ wú wɛ nǔ baɖabaɖa énɛ́ lɛ́ nɔ sín tawun, bɔ è sɔ́ ɖo alɔ ɖó ɖo hwenu e yě nɔ jɛ lɛ́ é jí wɛ sɔmɔ̌ ǎ, yě nɔ jɛ hwɛhwɛ bo nɔ lɛ́ ɖo syɛ́nsyɛ́n d’é jí wɛ.

Hwɛjijɔ e wú mǐ ná ɖó nukún nǔ é ɖé

Biblu ɖɔ nú mǐ ɖɔ nǔ e nɔ ɖó adohu adohu nú mɛ, bo ɖo jijɛ wɛ ɖo ayǐkúngban jí égbé lɛ́ é ɖó ná ná hwɛjijɔ ɖé mǐ bɔ mǐ ná ɖó nukún nǔ. Étɛ́wú? Jezu ɖɔ: “Ényí mi mɔ bɔ nǔ énɛ́ lɛ́ ɖo jijɛ wɛ hǔn, mi tuun ɖɔ Axɔ́súɖuto Mawu tɔn ko sɛkpɔ́.”—Luki 21:31; Matíe 24:3.

Nǔ e ɖo jijɛ wɛ bɔ mǐ ɖo mimɔ wɛ lɛ́ é xlɛ́ ɖɔ Axɔ́súɖuto Mawu tɔn ná ɖ’acɛ zaanɖé din dó jɔwámɔnú e ɖo nǔ gba wɛ ɖo ayǐkúngban jí lɛ́ é jí bǐ mlɛ́mlɛ́, káká jɛ hǔzúhúzú sín tuto e kunkplá sin ɖo ayǐkúngban jí é jí.—Jɔbu 36:27, 28; Ðɛhan 107:29.

Nú a jló ná ɖó mɔjɛmɛ ɖěvo lɛ́ dó lěe Axɔ́súɖuto Mawu tɔn ná bló bɔ ayǐkúngban ná lɛ́ jɛ lěe é ko ɖe ɖ’ayǐ é gbɔn é jí hǔn, kpɔ́n xóta “Mẹnu Wẹ Na Jla Aigba Do?”