Nɛ̌ è ka nɔ kplɔ́n azɔ̌ Kúnnuɖetɔ́ Jexóva tɔn lɛ́ bónú yě ná kpé sinsɛnzɔ́ yětɔn wú gbɔn?

È nɔ kplɔ́n azɔ̌ Kúnnuɖetɔ́ Jexóva tɔn lɛ́ dó gbɛzán klisánwun tɔn sín akpáxwé lɛ́ bǐ wú, káká jɛ sinsɛnzɔ́ e yě nɔ wa ɖo agbawungba é jí. Sinsɛnzɔ́ énɛ́ wɛ nyí azɔ̌ e Jezu zɔ́n ahwanvú tɔn lɛ́ ɖɔ yě ní wa é, énɛ́ wɛ nyí wɛn ɖagbe Axɔ́súɖuto Mawu tɔn tɔn jíjlá kpó nǔ kplɔ́nkplɔ́n mɛ lɛ́ bónú yě ná húzú ahwanvú kpó. (Matíe 24:14; 28:19, 20) È nɔ kplɔ́n azɔ̌ mɔ̌hun mǐ ɖo kplé e mǐ nɔ bló ɖo aklúnɔzángbla ɖokpó ɖokpó mɛ lɛ́ é domɛ; mǐ nɔ lɛ́ ɖu le azɔ̌kplɔ́nmɛ mɔ̌hun tɔn ɖo kpléɖókpɔ́ ɖaxó lɛ́ gɔ́ nú kpléɖókpɔ́ e mǐ nɔ bló xwewú xwewú lɛ́ é domɛ. È nɔ lɛ́ kplɔ́n azɔ̌ Kúnnuɖetɔ́ Jexóva tɔn e ɖó wǔjɔmɛzɔ́ bǔnɔ lɛ́ ɖo agun ɔ alǒ tutoblónúnǔ ɔ mɛ lɛ́ é d’é jí ɖo wěmaxɔmɛ Biblu kplɔ́nkplɔ́n tɔn lɛ́.

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

Azɔ̌ alɔkpa tɛ́ è ka nɔ kplɔ́n Kúnnuɖetɔ́ Jexóva tɔn lɛ́?

Kplé agun tɔn lɛ́. Aklúnɔzángbla ɖokpó ɖokpó mɛ ɔ, mǐ nɔ yi kplé agun tɔn we ɖo fí e mǐ nɔ sɛn Mawu ɖe lɛ́ é; è nɔ ylɔ́ fí énɛ́ lɛ́ ɖɔ kpléxɔ Axɔ́súɖuto ɔ tɔn. Hweɖélɛ́nu ɔ, è nɔ bló kplé lɛ́ ɖokpó ɖo aklúnɔzángbla tɛ́ntin, bo nɔ bló wegɔ́ ɔ ɖo aklúnɔzángbla fífó. Mɛ bǐ sixú wá do tɔn mɛ, è nɔ yí agbǎnmɛkwɛ́ ǎ.

Kplé aklúnɔzángbla tɛ́ntin tɔn. Mǐ nɔ kplɔ́n lěe mǐ sixú kpɔ́n te d’é jí ɖo nǔxixa, wlɛnwín xóɖɔɖókpɔ́ tɔn lɛ́ zínzán, xóɖiɖɔ nú mɛ bǐ, wɛn ɖagbe ɔ jíjlá kpó nǔkplɔ́nkplɔ́n mɛ kpó kpáxwé gbɔn é. È nɔ zán xóɖiɖɔ lɛ́, xóɖɔɖókpɔ́ lɛ́, wǎzéxlɛ́ lɛ́ kpó nǔxwlémɛ sín video lɛ́ kpó dó kplɔ́n azɔ̌ mǐ. Azɔ̌kplɔ́nmɛ énɛ́ nɔ d’alɔ mǐ bɔ alɔ nɔ se kpɛ́n nú mǐ hú gǎn, hwenu e mǐ ɖo wɛn Biblu tɔn má xá mɛ ɖěvo lɛ́ wɛ, bo lɛ́ ɖo Biblu kplɔ́n xá mɛ e ɖó jlǒ lɛ́ é wɛ é. Mɛ ɖěɖěe nɔ wá kplé énɛ́ domɛ lɛ́ é bǐ wɛ nɔ ɖu azɔ̌kplɔ́nmɛ énɛ́ sín le. Tají bǐ ɔ, kplé mǐtɔn lɛ́ nɔ ná hlɔ̌nhlɔ́n nǔ e mǐ ɖi nú Mawu é, bo nɔ lɛ́ bló bɔ wǎn e mǐ yí nú é kpó klisánwun hǎtɔ́ mǐtɔn lɛ́ kpó é nɔ jɛjí.
Kplé aklúnɔzángbla fífó tɔn. Kplé akpáxwé wenɔ énɛ́ nɔ bɛ́ kpó xóɖiɖɔ jínjɔ́n Biblu jí e è nɔ xwlé mɛ bǐ é ɖé kpó. Akpáxwé wegɔ́ kplé ɔ tɔn nɔ nyí nǔkanbyɔ́ kpó xósin kpó bo nɔ jínjɔ́n Atɔxwɛa nǔkplɔ́nkplɔ́n tɔn sín xóta ɖokpó jí. Xóta énɛ́ lɛ́ nɔ ɖɔ xó dó nǔ e ɖo Biblu mɛ lɛ́ é kpó nǔgbódodó ɖěɖěe sixú d’alɔ mǐ ɖo sinsɛnzɔ́ ɔ mɛ, bo lɛ́ d’alɔ mǐ ɖo gbɛzán mǐɖésúnɔ tɔn mɛ lɛ́ é kpó jí.

Kpléɖókpɔ́ lɛ̌dó tɔn lɛ́ kpó kpléɖókpɔ́ ɖaxó lɛ́ kpó. Xwe ɖokpó ɖokpó mɛ ɔ, mǐ nɔ bló kpléɖókpɔ́ ɖaxó atɔn, bɔ agun gěgé wɛ nɔ wá kpléɖókpɔ́ énɛ́ lɛ́ ɖokpó ɖokpó domɛ. Xóta e è ɖe sín Biblu mɛ é ɖé lě tawun jí wɛ nǔwiwa awǎjijɛ tɔn énɛ́ lɛ́ nɔ jínjɔ́n; xóɖiɖɔ lɛ́, wǎzéxlɛ́ lɛ́, nǔkanbyɔ́mɛ lɛ́ kpó video lɛ́ kpó ɖo tuto ɔ mɛ. Lěe é nɔ nyí gbɔn ɖo kplé mǐtɔn lɛ́ jí é ɔ, kpléɖókpɔ́ lɛ̌dó tɔn lɛ́ kpó kpléɖókpɔ́ ɖaxó lɛ́ kpó nɔ d’alɔ mǐ bɔ nukúnnúmɔjɛnǔmɛ e mǐ ɖó dó Biblu wú é nɔ jɛjí, bo nɔ lɛ́ bló bɔ mǐ nɔ lɛ́ nyí wɛn ɖagbe ɔ jlátɔ́ ɖagbe. Lěe mǐ ko ɖɔ gbɔn wá yí é ɔ, mɛ bǐ sixú wá do tɔn mɛ; è nɔ yí agbǎnmɛkwɛ́ ǎ.

Wěmaxɔmɛ Biblu kplɔ́nkplɔ́n tɔn Kúnnuɖetɔ́ Jexóva tɔn lɛ́ tɔn lɛ́

Bo ná dó kplɔ́n azɔ̌ Kúnnuɖetɔ́ Jexóva tɔn lɛ́ d’é jí ɔ, è nɔ ylɔ́ yě mɛ ɖé lɛ́ nú wěmaxɔmɛ Biblu kplɔ́nkplɔ́n tɔn vovo lɛ́. Wěmaxɔmɛ tɛ́ lɛ́ ka wɛ? Linlin tɛ́ wú è ka ɖó wěmaxɔmɛ énɛ́ lɛ́ ayǐ? Hwenu nabí è ka nɔ bló yě ná? Mɛ̌ mɛ̌ e ka sixú d’alɔ wěma mɛ bá yi wěmaxɔmɛ énɛ́ lɛ́?

Wěmaxɔmɛ sinsɛnzɔ́ gběxosín-alijítɔ́ tɔn

Linlin e wú è ɖó ayǐ é: Bo ná dó kplɔ́n azɔ̌ sinsɛnzɔ́watɔ́ hwebǐnu tɔn e è nɔ ylɔ́ ɖɔ gběxosín-alijítɔ́b lɛ́ é bónú alɔ ná se kpɛ́n nú yě d’é jí ɖo wɛnɖagbejíjlá kpó nǔkplɔ́nkplɔ́n mɛ lɛ́ bónú yě ná húzú ahwanvú kpó sín azɔ̌ ɔ mɛ. Xóɖɔɖókpɔ́ klási tɔn lɛ́, wǎzéxlɛ́ lɛ́, xóɖiɖɔ lɛ́ kpó azɔ̌waɖókpɔ́ lɛ́ kpó nɔ ɖo nǔkplɔ́nkplɔ́n lɛ́ mɛ.
Hwenu e è nɔ bló ná é: Azǎn ayizɛ́n.
Mɛ e nɔ yi lɛ́ é: Gběxosín-alijítɔ́ ɖěɖěe ko bló xwe ɖokpó lɛ́ é wɛ è nɔ ylɔ́ dó do tɔn mɛ. È nɔ lɛ́ ylɔ́ gběxosín-alijítɔ́ hwenu línlín tɔn e ma yi wěmaxɔmɛ ɔ ɖo xwe atɔ́ɔ́n e wá yi lɛ́ é mɛ ǎ lɛ́ é bónú yě ná lɛ́ yi.

Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́

Linlin e wú è ɖó ayǐ é: Bo ná dó kplɔ́n azɔ̌ bǔnɔ mɛ e ko mɔ nǔ kpɔ́n ɖo sinsɛnzɔ́ hwebǐnu tɔn mɛ lɛ́ é. Wěmaxɔmɛ ɔ nɔ d’alɔ wěmaxɔmɛví lɛ́ bɔ alɔ nɔ lɛ́ se kpɛ́n nú yě d’é jí ɖo wɛn ɖagbe ɔ jíjlá kpó nǔ kplɔ́nkplɔ́n mɛ kpó kpáxwé; gɔ́ ná ɔ, yě nɔ lɛ́ kplɔ́n nǔ e ɖo Biblu mɛ lɛ́ é dó nǔjɔnǔ mɛ. È nɔ ylɔ́ mɛ e yí kúnnuɖewéma ɔ lɛ́ é gěgé dó fí e è ɖó hudó wɛnɖagbejlátɔ́ tɔn ɖe hú gǎn é.
Hwenu e è nɔ bló ná é: Sun we.
Mɛ e nɔ yi lɛ́ é: Gběxosín-alijítɔ́ lɛ́ sixú d’alɔ wěma mɛ bá yi, ényí yě sɔgbe xá nǔ e è byɔ́ lɛ́ é, bɔ ninɔmɛ yětɔn lɛ́ yí gbe bɔ yě ná wa sinsɛnzɔ́ ɖo fí ɖěbǔ e hudó tíin ɖe é ɔ nɛ́.

Wěmaxɔmɛ nú mɛxó agun tɔn lɛ́

Linlin e wú è ɖó ayǐ é: Bo ná dó d’alɔ mɛxó agun tɔn lɛ́c bónú yě ná kpé nukún dó wǔjɔmɛzɔ́ e yě ɖó ɖo agun ɔ mɛ lɛ́ é wú, ɖi mɛkplɔ́nkplɔ́n kpó lɛ̌ngbɔ́nyitɔ́zɔ́ kpó. Wěmaxɔmɛ ɔ nɔ lɛ́ d’alɔ yě bɔ wǎn e yě yí nú Mawu kpó nǔɖitɔ́ hǎtɔ́ yětɔn lɛ́ kpó é nɔ lɛ́ jɛjí.—1 Piyɛ́ɛ 5:2, 3.
Hwenu e è nɔ bló ná é: Azǎn atɔ́ɔ́n.
Mɛ e nɔ yi lɛ́ é: Mɛxó agun tɔn yɔ̌yɔ́ lɛ́ kpó mɛxó agun tɔn e ko mɔ nǔ kpɔ́n bo ma sɔ́ yi wěmaxɔmɛ ɔ ɖo xwe atɔ́ɔ́n e wá yi lɛ́ é mɛ ǎ lɛ́ é wɛ è nɔ ylɔ́.

Wěmaxɔmɛ nú nukúnkpénǔwútɔ́ lɛ̌dó tɔn lɛ́ kpó asi yětɔn lɛ́ kpó

Linlin e wú è ɖó ayǐ é: Bo ná dó kplɔ́n azɔ̌ sinsɛnzɔ́watɔ́ tomɛyitɔ́ lɛ́ e è nɔ lɛ́ ylɔ́ ɖɔ nukúnkpénǔwútɔ́ lɛ̌dó tɔn lɛ́d é bónú yě ná wa azɔ̌ yětɔn lɛ́ ganjí kpó azɔ̌tuuntuun kpó. (1 Timɔtée 5:17) Wěmaxɔmɛ ɔ nɔ lɛ́ d’alɔ klisánwun mɛxó énɛ́ lɛ́ kpó asi yětɔn lɛ́ kpó bɔ yě nɔ lɛ́ ɖó nukúnnúmɔjɛnǔmɛ e gɔ́ngɔ́n é dó Xó Mawu tɔn wú d’é jí.
Hwenu e è nɔ bló ná é: Sun ɖokpó.
Mɛ e nɔ yi lɛ́ é: Nukúnkpénǔwútɔ́ lɛ̌dó tɔn yɔ̌yɔ́ lɛ́ kpó asi yětɔn lɛ́ kpó wɛ è nɔ ylɔ́ wá do tɔn mɛ, ényí yě bló xwe ɖokpó ɖo nukúnkpénǔwútɔ́zɔ́ mɛ ɔ nɛ́. Yě yi énɛ́ gúdo ɔ, xwe atɔ́ɔ́n mɔ̌ gúdo tɛgbɛ ɔ, è nɔ lɛ́ ylɔ́ yě.

Wěmaxɔmɛ sinsɛnzɔ́ Axɔ́súɖuto ɔ tɔn

Linlin e wú è ɖó ayǐ é: Bo ná dó d’alɔ mɛxó agun tɔn lɛ́ kpó mɛsɛntɔ́ agun tɔn lɛ́e kpó bónú yě ná kpé nukún dó wǔjɔmɛzɔ́ e yě ɖó ɖo agun ɔ mɛ bɔ é kunkplá ninɔmɛ hwe ɔ nu tɔn lɛ́, nǔwiwa lɛ́ kpó hudó lɛ́ kpó é. (2 Timɔtée 3:1) È nɔ bló wěmaxɔmɛ ɔ ɖo xwe yɔywɛ ɖé gúdo tɛgbɛ.
Hwenu e è nɔ bló ná é: É nɔ húzú, hwɛhwɛ ɔ kéze ɖokpó wɛ é nɔ ɖu.
Mɛ e nɔ yi lɛ́ é: Nukúnkpénǔwútɔ́ lɛ̌dó tɔn lɛ́, mɛxó agun tɔn lɛ́ kpó mɛsɛntɔ́ agun tɔn lɛ́ kpó.

Sinsɛnzɔ́wiwa ɖo Betɛ́li sín wěmaxɔmɛ

Linlin e wú è ɖó ayǐ é: Bo ná dó d’alɔ xwédo Betɛ́lif tɔn sín hǎgbɛ́ lɛ́ bónú azɔ̌ yětɔn ná kpa yě, bɔ wǎn e yě yí nú Mawu kpó yěɖée lɛ́ kpó é ná lɛ́ gɔ́ngɔ́n d’é jí.
Hwenu e è nɔ bló ná é: Azǎn atɔ́ɔ́n adaɖé.
Mɛ e nɔ yi lɛ́ é: Mɛ e wá Betɛ́li yɔ̌yɔ́ lɛ́ é wɛ è nɔ ylɔ́ wá do tɔn mɛ. Hǎgbɛ́ xwédo ɔ tɔn e ko ɖo fínɛ́ sín xwe mɔ̌kpán ɖíe bo ma ka yi wěmaxɔmɛ ɔ ɖo xwe atɔ́ɔ́n e wá yi lɛ́ é mɛ ǎ é lɔ sixú lɛ́ yi.

Wěmaxɔmɛ Biblu kplɔ́nkplɔ́n tɔn Watchtower Galádi tɔn

Linlin e wú è ɖó ayǐ é: Bo ná dó d’alɔ wěmaxɔmɛví lɛ́ bónú yě ná tɛ́n kpɔ́n bo ɖó wǎnyíyí e gɔ́ngɔ́n é nú Biblu, mɔ nukúnnú jɛ mɛ ganjí lobo lɛ́ zán nǔ e yě kplɔ́n lɛ́ é. (1 Tɛsaloníkinu lɛ́ 2:13) Klisánwun súnnu kpó nyɔ̌nu kpó e zin ɖo gbigbɔ lixo, bo yi Galádi lɛ́ é nɔ nyɔ́ zán hú gǎn nú tutoblónúnǔ Jexóva tɔn kpó azɔ̌ Biblu kplɔ́nkplɔ́n mɛ tɔn e wa gbɔn gbɛ ɔ bǐ mɛ wɛ è ɖe é kpó. È sixú ɖe azɔ̌ nú mɛ e yí kúnnuɖewéma ɔ lɛ́ é bɔ yě ná yi gle ɔ mɛ, alǒ alaxɔ mɛ, é sixú nyí to yětɔn mɛ, alǒ to ɖěvo mɛ.
Hwenu e è nɔ bló ná é: Sun atɔ́ɔ́n.
Mɛ e nɔ yi lɛ́ é: Alaxɔ nɔ byɔ́ sinsɛnzɔ́watɔ́ hwebǐnu tɔn e è sɔ́ lɛ́ é ɖɔ yě ní d’alɔ wěma mɛ. È nɔ bló wěmaxɔmɛ ɔ ɖo États-Unis ɖo nɔtɛn Biblu kplɔ́nkplɔ́n tɔn Watchtower tɔn ɖo Patterson, New York.

Wěmaxɔmɛ nú wěɖegbɛ́ alaxɔ tɔn sín hǎgbɛ́ lɛ́ kpó asi yětɔn lɛ́ kpó

Linlin e wú è ɖó ayǐ é: Bo ná dó kplɔ́n azɔ̌ Wěɖegbɛ́ alaxɔ tɔng sín hǎgbɛ́ lɛ́ bónú yě ná kpé nukún dó azɔ̌ e wa wɛ è ɖe ɖo alaxɔ mɛ lɛ́ é wú, bo lɛ́ kpé nukún dó nǔ e Kúnnuɖetɔ́ Jexóva tɔn lɛ́ nɔ wa ɖo gbigbɔ lixo ɖo to alǒ to ɖěɖěe ɖo alaxɔ ɔ sín acɛ mɛ lɛ́ é wú.
Hwenu e è nɔ bló ná é: Sun we.
Mɛ e nɔ yi lɛ́ é: Hɔ̌nkan gbɛ ɔ tɔn Kúnnuɖetɔ́ Jexóva tɔn lɛ́ tɔn nɔ ylɔ́ Wěɖegbɛ́ alaxɔ tɔn sín hǎgbɛ́ ɖé lɛ́ kpó asi yětɔn lɛ́ kpó bɔ yě nɔ yi wěmaxɔmɛ ɔ. È nɔ bló wěmaxɔmɛ ɔ ɖo États-Unis ɖo nɔtɛn Biblu kplɔ́nkplɔ́n tɔn Watchtower tɔn ɖo Patterson, New York.

Étɛ́ jí azɔ̌ e è nɔ kplɔ́n Kúnnuɖetɔ́ lɛ́ é ka nɔ jínjɔ́n?

Biblu wɛ nyí wěma tají e Kúnnuɖetɔ́ Jexóva tɔn lɛ́ nɔ zán dó kplɔ́n azɔ̌ mɛ hwebǐnu é. Mǐ ɖi nǔ ɖɔ Mawu wɛ sɔ́ nǔ e ɖo Biblu mɛ lɛ́ é dó ayi mɛ nú mɛ lɛ́ bɔ yě wlán, bɔ wěɖexámɛ e nyɔ́ hú gǎn bɔ Klisánwun lɛ́ ná zán ɖo gbɛzán yětɔn sín akpáxwé lɛ́ bǐ mɛ é wɛ ɖ’é mɛ.—2 Timɔtée 3:16, 17.

Kúnnuɖetɔ́ Jexóva tɔn lɛ́ ka nɔ sú axɔ́ nú azɔ̌ e è nɔ kplɔ́n yě é wɛ a?

Éǒ. Vɔ̌nu wɛ è nɔ kplɔ́n azɔ̌ yě. Nǔ e mɛ lɛ́ nɔ ná kpó jlǒ kpó lɛ́ é wɛ è nɔ zán dó azɔ̌ e wa wɛ Kúnnuɖetɔ́ Jexóva tɔn lɛ́ ɖe é takúnmɛ.—2 Kɔlɛ́ntinu lɛ́ 9:7.

a Biblu kpó wěma mǐtɔn lɛ́ kpó, gɔ́ nú video lɛ́ ɖo tɛn Ɛntɛnɛ́ti tɔn mǐtɔn jw.org jí.

b Gběxosín-alijítɔ́ ɖé nyí Kúnnuɖetɔ́ súnnu alǒ nyɔ̌nu e bló batɛ́mu bo nyí kpɔ́ndéwú ɖagbe é. É nɔ tɛ́n kpɔ́n bo nɔ zán ganxixo nabí e è byɔ́ é ɖo sun ɖokpó ɖokpó mɛ, dó má wɛn Biblu tɔn xá mɛ ɖěvo lɛ́.

c Mɛxó agun tɔn lɛ́ nyí súnnu klisánwun e zin, bo nɔ zán Biblu dó kplɔ́n nǔ mɛ lɛ́ é; yě nɔ wa lɛ̌ngbɔ́nyitɔ́zɔ́ nú togun Jexóva tɔn gbɔn alɔ dídó è kpó wǔsyɛ́n dídó lanmɛ n’i kpó gblamɛ. È nɔ sú axɔ́ yě nú nǔ e yě nɔ wa lɛ́ é ǎ.

d Nukúnkpénǔwútɔ́ lɛ̌dó tɔn ɖé nyí sinsɛnzɔ́watɔ́ hwebǐnu tɔn e nɔ ba agun vovo kpɔ́n ɖo lɛ̌dó e mɛ è sɔ́ ɛ ɖó é, ɖo aklúnɔzángbla ɖokpó ɖokpó mɛ. É nɔ dó wǔsyɛ́n lanmɛ nú nɔví súnnu kpó nɔví nyɔ̌nu kpó tɔn gbigbɔ tɔn lɛ́ gbɔn xóɖiɖɔ jínjɔ́n Biblu jí lɛ́ xwíxwlé yě kpó tíntɔ́n xá yě ɖo sinsɛnzɔ́ ɔ mɛ kpó gblamɛ.

e Mɛsɛntɔ́ agun tɔn lɛ́ nɔ wa nǔ tawun tawun gěgé dó d’alɔ nɔví súnnu kpó nɔví nyɔ̌nu kpó yětɔn lɛ́. Mɔ̌ mɛ ɔ, yě nɔ bló bɔ mɛxó agun tɔn lɛ́ nɔ mɔ hwenu hú gǎn nú mɛkplɔ́nkplɔ́nzɔ́ kpó lɛ̌ngbɔ́nyitɔ́zɔ́ kpó yětɔn.

f Betɛ́li wɛ nyí nyǐkɔ e è ná alaxɔ Kúnnuɖetɔ́ Jexóva tɔn lɛ́ tɔn lɛ́ é. Mɛ e nɔ wa sinsɛnzɔ́ hwebǐnu ɖo fínɛ́ lɛ́ é nɔ nɔ gǔdo nú azɔ̌ e Kúnnuɖetɔ́ lɛ́ nɔ wa ɖo fí e ɖo alaxɔ ɔ sín acɛ mɛ lɛ́ é.

g Súnnu e zin é atɔn alǒ hú gǎn mɔ̌ wɛ nɔ nɔ Wěɖegbɛ́ alaxɔ tɔn ɖé mɛ.

Nɛ̌ Kúnnuɖetɔ́ Jexóva tɔn lɛ́ ka ko ɖu azɔ̌ e è kplɔ́n yě lɛ́ é sín le gbɔn?

“Ðó un nɔ kú wínnyá wútu ɔ, un mɔ ɖɔ é vɛ́ wǔ nú mì dín bónú má ɖɔ xó nú jǒnɔ lɛ́ dó Biblu wú. Amɔ̌, azɔ̌ e è nɔ kplɔ́n mì ɖo kplé aklúnɔzángbla tɛ́ntin tɔn jí é nɔ d’alɔ mì, bɔ ji nɔ ɖe mì, lobɔ nǔwúkpíkpé mɛkplɔ́nkplɔ́n tɔn ce kpɔ́n te d’é jí. Un nɔ lɛ́ kpé wú bo nɔ ɖɔ xó xá mɛ ɖěvo lɛ́ ɖo agun ɔ kpó azɔ̌ ce kpó mɛ.”—Natasha, États-Unis.
“Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́ e un yi é d’alɔ mì bɔ un tɛ́n kpɔ́n bo ɖó jijɔ Jexóva tɔn ɖé lɛ́ ɖi wǎnyíyí, suúlu kpó xomɛnyínyɔ́ kpó. Wǎgbɔ tɔn ɔ, un mɔ ɖɔ un wá húzú klisánwun, xɔ́ntɔn kpó nɔzo kpó ɖagbe ɖé. Wěmaxɔmɛ ɔ lɛ́ kplɔ́n lěe è ná ba do nú nǔ dó xóta Biblu tɔn lɛ́ jí gbɔn é kpó lěe è ná tín Xó Mawu tɔn mɛ ɖo ali ɖé nu bɔ é ná byɔ́ ayi mɛ ganjí gbɔn é kpó mì.”—Stephen, Awɔnlin.
“Wěmaxɔmɛ mɛxó agun tɔn lɛ́ tɔn d’alɔ mì bɔ un nɔ sɔ́ nyiɖée hwe hú gǎn bá dó wa mɛxó agun tɔn sín azɔ̌ ce ganjí. Xóɖiɖɔ lɛ́ xlɛ́ ɖɔ é byɔ́ ɖɔ má xwedó kpɔ́ndéwú Jezu tɔn.”—Luca, Italie.
“Wěmaxɔmɛ sinsɛnzɔ́ Axɔ́súɖuto ɔ tɔn kplɔ́n mì lě do é ɖo tají sɔ ɖɔ má nyɔ́ líyá, nyɔ́ xomɛ, bo nɔ lɛ́ nɔ fífá mɛ xá mɛ ɖěvo lɛ́ hwenu e un ɖo nǔ wa xá yě wɛ é. Un kplɔ́n ɖɔ wǎnyíyí wɛ ɖó ná nɔ sísɛ́ mì bɔ un ná nɔ wa nǔ nú mɛ ɖěvo lɛ́, ényí un ɖó ná wa nǔ bo wa kpowun wú wɛ ǎ.”—Samuel, Royaume-Uni.
“Wěmaxɔmɛ Galádi tɔn d’alɔ mǐ bɔ mǐ gbéjé mǐɖée kpɔ́n kpó Xó Mawu tɔn e cí nǔkpɛ́n ɖɔhun é kpó. (Jaki 1:22-25) Mɔ̌ mɛ ɔ, mǐ mɔ fí e é byɔ́ ɖɔ mǐ ní bló hǔzúhúzú lɛ́ ɖe ɖo mɛ alɔkpa e mǐ nyí é kpó sɛn e sɛn Jexóva wɛ mǐ ɖe é kpó wú é. Mǐ lɛ́ kplɔ́n ɖɔ nǔ mɛ ɖěvo lɛ́ tɔn ɖó ná nɔ ɖu ayi mɛ nú mǐ hú mǐɖésúnɔ tɔn, bɔ wǎnyíyí wɛ ka ɖó ná nɔ sísɛ́ mǐ ɖo nǔ e mǐ nɔ ɖɔ bo nɔ wa lɛ́ é bǐ mɛ.”—Elnathan kpó Princess kpó, Philippines.