Etɛ Biblu ka Ðɔ Dó Hun Didó Wu?

Xósin e Biblu na é

Biblu gbɛ́ nú mǐ ɖɔ mǐ ni ma ɖu hun ó. Enɛ wu ɔ, mǐ ɖó na yí gbè nú hun ɔ ɖesu, alǒ nǔ taji e ɖ’emɛ lɛ é ɖò ali ɖebǔ nu ǎ, é sixu nyí hwenu e è xwlé ɖuɖu tɔn mǐ é, alǒ hwenu e è ɖɔ mǐ na dó é. Ð’ayi wemafɔ elɔ lɛ wu:

• Bǐbɛ̌mɛ 9:4. Mawu na gbè Nɔwée kpo xwédo tɔn kpo ɖò Sinvɔgbɛ ɔ gudo ɖɔ ye ni gɔ́ lan nú nǔɖuɖu yetɔn, amɔ̌, é gbɛ́ nú ye ɖɔ ye ni ma ɖu hun ɔ ó. Mawu ɖɔ nú Nɔwée ɖɔ: “Mi ɖó na ɖu lan e mɛ hun kpò ɖè ɔ ǎ.” Gbɛtɔ́ lɛ bǐ wɛ gbeɖiɖe enɛ kan bɛ́sín hwenɛnu ɖidó, ɖó mǐ mɛ bǐ wɛ nyí kúnkan Nɔwée tɔn.

• Levíi ví lɛ 17:14. “Izlayɛli-ví lɛ . . . ɖó na ɖu nǔɖogbɛ ɖebǔ sín hun [ǎ], ɖó hun e ɖò nǔɖogbɛ ɖebǔ sín lanmɛ ɔ mɛ wɛ gbɛ̀ tɔn ɖè. Mɛ ɖebǔ ɖu hun ɔ, è na ɖè è sín Izlayɛli togun ɔ mɛ.” Ðò nukún Mawu tɔn mɛ ɔ, lindɔ̌n, alǒ gbɛ̀ ɖò hun mɛ, bɔ gbɛ̀ ɔ nyí Mawu tɔn. Togun Izlayɛli tɔn kɛɖɛ wɛ Mawu na sɛ́n enɛ có, sɛ́n ɔ ka xlɛ́ lě dò hun ɖuɖu nyla ɖò nukún Mawu tɔn mɛ sɔ é.

• Mɛsɛ́dó 15:20. “Ma . . . ɖu hun ó.” Sɛ́n e Mawu na Nɔwée é pɛ́ɛ wɛ é na Klisanwun lɛ lɔ. Hwenuxó xlɛ́ ɖɔ Klisanwun nukɔntɔn lɛ gbɛ́ ɖɔ emi kún na ɖu hun ɔ ɖesu, alǒ tlɛ zán ɖó hwɛjijɔ lanmɛ na nɔ ganji tɔn wu ó.

Etɛwu Mawu ka ɖegbe nú mǐ ɖɔ mǐ ni ɖó wǔ zɔ nú hun?

Kúnnuɖenú dotóozɔ́wiwa tɔn lɛ xlɛ́ ɖɔ hun didó kún nyɔ́ nú lanmɛ mǐtɔn ɖebǔ ó. Amɔ̌, taji bǐ ɔ, Mawu ɖegbe ɖɔ mǐ ni ɖó wǔ zɔ nú hun, ɖó nǔ mímɛ́ wɛ nǔ e é nɔte na é nyí ɖò nukún tɔn mɛ.—Levíi ví lɛ 17:11; Kolosinu lɛ 1:20.