Mǐ Ðó Na Sɛn Ðiɖe lɛ Wɛ À?

Xósin e Biblu na é

Eǒ, mǐ ɖó na sɛn ɖiɖe lɛ ǎ. New Catholic Encyclopedia ɖɔ xó dó sɛ́n e Mawu na akɔta Izlayɛli tɔn é wu bo ɖɔ: “Tan Biblu tɔn vovo lɛ xlɛ́ nyi wɛn ɖɔ Mawu sɛntɔ́ nǔgbo lɛ kún zán ɖiɖe lɛ ó.” Kpɔ́n wemafɔ Biblu tɔn elɔ lɛ:

• “Ma kpa bocyɔ ó; ma ka kpa nǔ e ɖò jinukúnsin aga lɛ, nǔ e ɖò ayikúngban jí ɖò dò lɛ, nǔ e ɖò sin mɛ ɖò ayikúngban glɔ́ lɛ ɖě sín akpajlɛ ó. Ma jɛkpo bo ɖekɔ́ nú ye ó; ma sɛn ye ó, ɖó nyɛ Mawu Mavɔmavɔ, Mawu towe ɔ, un nɔ ba gbeɖé ɖɔ a ni sɛn nǔ ɖevo zɛ nyɛ wu ǎ.” (Tíntɔ́n 20:4, 5) Ðó Mawu nɔ ba gbeɖé ɖɔ è ni “sɛn nǔ ɖevo zɛ [emi] wu ǎ” wutu ɔ, enyi mǐ xɔ susu nú ɖiɖe lɛ, vodun, bocyɔ alǒ wuntun lɛ, abǐ sɛn ye ɔ, é nɔ hun xomɛ n’i ǎ.

• “Un . . . nɔ jó yɛ̌yi e nyí ce ɔ dó nú bocyɔ ɖé ǎ.” (Ezayíi 42:8) Mawu gbɛ́ ɖɔ è kún na sɛn emi gbɔn ɖiɖe lɛ jí ó. Hwenu Izlayɛli-ví ɖé lɛ tɛ́n kpɔ́n bo zán nyibuví sín bocyɔ ɖé bo na dó sɛn Mawu é ɔ, é ɖɔ ɖɔ ye wà “nǔ gblegblé.”—Tíntɔ́n 32:7-9.

• “Mi sɔ́ ɖó na lin ɖɔ Mawu cí siká abǐ kpatagan abǐ awinnya ɖagbeɖagbe e gbɛtɔ́ sɔ́ linlin tɔn kpodo aɖawun tɔn kpo dó kɔn na é ɖɔhun ǎ.” (Mɛsɛ́dó 17:29) Pagáwun lɛ nɔ zán ɖiɖe e “gbɛtɔ́ sɔ́ linlin tɔn kpodo aɖawun tɔn kpo dó kɔn na” lɛ é hwɛhwɛ dó sɛn Mawu, amɔ̌, lee Biblu ɖɔ gbɔn é ɔ, Klisanwun lɛ ɖó na zán gbɛ̀ gbɔn nǔɖiɖi gblamɛ, é na nyí gbɔn nǔ e ye mɔ é gblamɛ ǎ.—2 Kɔlɛntinu lɛ 5:7.

• “Mi cɔ́ miɖée dó vodunsinsɛn wu.” (1 Jaan 5:21) Ðò gbè e Mawu ɖè nú akɔta Izlayɛli tɔn kpo Klisanwun lɛ kpo é mɛ ɔ, Biblu ɖexlɛ́ kpo gbesisɔ kpo ɖɔ nǔkplɔnmɛ e ɖɔ ɖɔ Mawu yí gbè nú ɖiɖe lɛ kpo bocyɔ lɛ kpo zinzan dó sɛn ɛ é ɔ, xɛxó wɛ.