Nɛ̌ Un ka Sixu Nya Xɛ Ðò Nyiɖée Jí Sín Yadonúmɛ Bá Ðóxó Xá Mɛ Sí Gbɔn?
Xósin e Biblu na é
Kpɔ́n wěɖexámɛ elɔ lɛ e nyɔ́ zán bo jinjɔn nǔnywɛ e ɖò Biblu mɛ lɛ é jí lɛ é:
Azɔ̌ towe kɛɖɛ ni nɔ mya nukún nú we. Nɔ ɖ’alisá xá azɔ̌gbɛ́ towe lɛ, bo nɔ lɛ́ ɖó sísí nú ye, amɔ̌, nɔ nyì alɔ nú nǔwiwa alɔkpa ɖěɖee na xlɛ́ ɖɔ a na yí gbè nú linlin xóɖóxámɛ tɔn yetɔn lɛ é.—Matie 10:16; Kolosinu lɛ 4:6.
Nɔ sɔnǔ ɖó jlɛ̌ jí. Nǔ ɖěɖee nɔ ba axi lɛ é didó nɔ kɔn cí dó mɛ wu. Biblu ɖegbe ɖɔ è ni nɔ sɔnǔ “lee é jɛxa gbɔn é, ɖò yɛ̌yi mɛ, ɖò jlɛ̌ jí.”—1 Timɔtée 2:9.
Nɔ cyan xɔ́ntɔn towe lɛ kpo nǔnywɛ kpo. Enyi a nɔ zán hwenu ɖó kpɔ́ xá mɛ ɖěɖee nɔ yí gbè alǒ tlɛ nɔ ba alɔlwɛ́ ɖúɖú abǐ xó ɖɔ nú mɛ lɛ é ɔ, ye na ɖibla wà nǔ ɖokpo ɔ nú hwi lɔ.—Nǔnywɛxó 13:20.
Nɔ nyi alɔ nú xó gblégblé ɖiɖɔ. Enyi xóɖɔɖókpɔ́ ɖé wá byɔ “wunhinhɔ́nxó, xógbló kpodo xó kwijikwiji ɖé kpan” mɛ hǔn, tɔ́n sín mɛ.—Efɛzinu lɛ 5:4.
Nɔ nyi alɔ nú ninɔmɛ ɖěɖee na dɔn xó wá lɛ é. Ði kpɔ́ndéwú ɔ, nɔ ɖ’ayi te dó ylɔ̌ e è nɔ ylɔ́ we b’ɛ nɔ byɔ ɖɔ a na nɔte ɖò azɔ̌ganmɛ gudo, ma sín hwɛjijɔ taji ɖé wutu lɛ é wu.
Nɔ kú dó nǔ jí bo ka lɛ́ ɖò tlɔlɔ. Enyi mɛɖé ɖò ya dó nú we wɛ bo na ɖóxó xá we hǔn, ɖɔ n’i dó nǔjɔnǔ mɛ ɖɔ walɔ e zán wɛ é ɖè é kún jɛji nú emi ó. (1 Kɔlɛntinu lɛ 14:9) Ði kpɔ́ndéwú ɔ, a sixu ɖɔ: “A nɔ ɖò fɛn nyi dó mì wɛ hwɛhwɛ, un ka nɔ ba nǔ mɔhun ɖebǔ ǎ. Ni nyí kplówun.” A sixu wlan wema ɖé sɛ́dó yadonúmɛtɔ́ ɔ, bo tinmɛ nǔ e wu a sɛ́ wema ɔ dó è, lee nǔ cí nú we é kpo, lee a ba ɖɔ nǔ lɛ ni yì gbɔn hweɖevonu é kpo. Ðexlɛ́ mɛ ɔ nyi wɛn ɖɔ gbeta e kɔn a wá é jinjɔn walɔ ɖagbe e a ɖó é kpo nǔ e a ɖi nǔ na ɖò sinsɛn linu é kpo jí.—1 Tɛsalonikinu lɛ 4:3-5.
Nɔ ba alɔdó. Nú mɛ ɔ kpò ɖò ya dó nú we wɛ hǔn, ɖɔ xó ɔ nú xɔ́ntɔn ɖejid’ewu ɖé, mɛ e ɖò xwédo towe mɛ é ɖé, azɔ̌gbɛ́ towe ɖé, abǐ mɛ e ko d’alɔ mɛ ɖěɖee nǔ mɔhun ko gbò kpɔ́n lɛ é ɖé. (Nǔnywɛxó 27:9) Ðɛ ko d’alɔ mɛ ɖěɖee è dóya na bo na ɖóxó xá ye lɛ é gegě. Enyi a ma tlɛ ko xoɖɛ ɖ’ayǐ ǎ hǔn, ma xò alɔ e Jehovah, “Mawu e nɔ dó gbɔ nú mɛ ɖò ali bǐ nu é” sixu dó we é nyi kɛ́n ó.—2 Kɔlɛntinu lɛ 1:3.
Yadonúmɛ bá ɖóxó xá mɛ nɔ zɔ́n bɔ azɔ̌wiwa ɖò fí ɖé nɔ vɛwǔ nú gbɛtɔ́ livi mɔkpan, amɔ̌, Biblu sixu d’alɔ.