Mɛɖé ka Mɔ Mawu Kpɔ́n À?
Xósin e Biblu na é
Gbɛtɔ́ ɖebǔ mɔ Mawu cɔɔ lě kpɔ́n ǎ. (Tíntɔ́n 33:20; Jaan 1:18; 1 Jaan 4:12) Biblu ɖɔ ɖɔ “Mawu ɔ, [Gbigbɔ] wɛ é nyí,” gbɛ̀ alɔkpa ɖé wɛ bɔ nukún gbɛtɔ́ tɔn sixu mɔ ǎ.—Jaan 4:24; 1 Timɔtée 1:17.
Wɛnsagun lɛ sixu mɔ Mawu tlɔlɔ, ɖó nǔɖiɖó gbigbɔ tɔn lɛ wɛ ye nyí. (Matie 18:10) Gɔ́ na ɔ, è nɔ fɔ́n mɛ e kú é ɖé lɛ kpo agbaza gbigbɔ tɔn ɖé kpo dó jixwé bɔ enɛ gudo ɔ, ye na kpéwú bo mɔ Mawu.—Filipunu lɛ 3:20, 21; 1 Jaan 3:2.
Lee è na “mɔ” Mawu gbɔn égbé é
Biblu nɔ zán linlin nǔ mimɔ tɔn ɖò nǔjlɛdonǔwu linu hwɛhwɛ dó ɖɔ xó dó nukúnnúmɔjɛnǔmɛ wu. (Ezayíi 6:10; Jelemíi 5:21; Jaan 9:39-41) Ðò ali enɛ nu ɔ, mɛɖé sixu mɔ Mawu ɖò égbé kpo ‘ayi tɔn’ kpo gbɔn nǔɖiɖi ɖiɖó n’i bo tuùn i bo yí wǎn nú jijɔ Tɔn lɛ gblamɛ. (Efɛzinu lɛ 1:18, nwt) Biblu tinmɛ afɔ ɖěɖee è na ɖè dó sɔnǔ nú nǔɖiɖi mɔ̌hun é.
Kplɔ́n nǔ dó jijɔ Mawu tɔn lɛ wu, ɖi wanyiyi tɔn kpo alɔhundónanǔmɛ tɔn kpo gɔ́ nú nǔnywɛ tɔn kpo hlɔnhlɔn tɔn kpo, gbɔn nǔɖiɖó tɔn lɛ gblamɛ. (Hlɔmanu lɛ 1:20) Ee è flín azɔ̌ ɖěɖee Mawu wà dó dá nǔ lɛ nya gbejinɔtɔ́ Jɔbu gudo é ɔ, é cí n’i ɖɔ é mɔ Mawu kpo nukún tɔn lɛ kpo wɛ ɖɔhun.—Jɔbu 42:5.
Kplɔ́n Biblu bá dó tuùn Mawu. Biblu na jiɖe mǐ ɖɔ: “Enyi a ba [Mawu] ɔ, é na jó éɖée dó bɔ a na mɔ ɛ.”—1 Tan 28:9; Ðɛhan 119:2; Jaan 17:3.
Kplɔ́n nǔ dó Mawu wu gbɔn gbɛzinzan Jezu tɔn gblamɛ. Ðó Jezu ɖè jijɔ Tɔ́ tɔn Jehovah Mawu tɔn lɛ xlɛ́ bɔ nǔ bǐ vɔ ɖ’ewu wutu ɔ, é sixu ɖɔ: “Mɛ e mɔ mì ɔ ko mɔ Tɔ́ ɔ.”—Jaan 14:9.
Nɔ zán gbɛ̀ lee Mawu ba gbɔn é bá mɔ lee é na jɛhun dó jǐ towe gbɔn é. Jezu ɖɔ: “Nǔ nyɔ́ nú ayimímɛ́nɔ lɛ, ɖó ye na mɔ Mawu.” Lee è ko ɖɔ gbɔn wá yì é ɔ, è na fɔ́n mɛ e sín nǔ nyɔ́ Mawu nukúnmɛ é ɖé lɛ dó jixwé bɔ enɛ gudo ɔ, ye na “mɔ Mawu” ɖò finɛ.—Matie 5:8; Ðɛhan 11:7.
Mɔyizi, Ablaxamu kpo mɛ ɖevo lɛ kpo mɔ Mawu à cé?
Ðò tan ɖěɖee é cí ɖɔ Biblu ɖɔ ɖɔ gbɛtɔ́ lɛ mɔ Mawu cɔɔ lě ɖè lɛ é mɛ ɔ, ninɔmɛ ɔ xlɛ́ ɖɔ wɛnsagun ɖé wɛ sɔ́ Mawu sín afɔ ɖó te alǒ Mawu tɔ́n dó ye jí ɖò nǔmimɔ ɖé mɛ.
Wɛnsagun lɛ.
Ðò hwexónu ɔ, Mawu sɛ́ wɛnsagun lɛ dó ɖi afɔsɔ́ɖótetɔ́ tɔn lɛ bɔ ye tɔ́n dó gbɛtɔ́ lɛ jí bo ɖɔ xó nú ye ɖò nyikɔ tɔn mɛ. (Ðɛhan 103:20) Ði kpɔ́ndéwú ɔ, Mawu ɖɔ xó nú Mɔyizi gbè ɖokpo sín zungodwe e ɖò jiji wɛ é ɖé mɛ, bɔ Biblu ɖɔ ɖɔ “Mɔyizi . . . sɔ́ nǔ cyɔn nukúnmɛ, ɖó é ɖò xɛsi ɖi wɛ ɖɔ emi táa mɔ Mawu.” (Tíntɔ́n 3:4, 6) Mɔyizi mɔ Mawu cɔɔ lě ǎ, ɖó ninɔmɛ ɔ xlɛ́ ɖɔ “wɛnsagun [Jehovah] tɔn” wɛ é mɔ nǔgbo.—Tíntɔ́n 3:2.
Mɔ̌ ɖokpo ɔ, hwenu e Biblu ɖɔ ɖɔ Mawu “kpo Mɔyizi kpo nɔ kpé nu bo nɔ ɖɔ xó” é ɔ, é xlɛ́ ɖɔ Mawu nɔ ɖɔ xó vívɛ́ xá Mɔyizi. (Tíntɔ́n 4:10, 11; 33:11) Mɔyizi mɔ Mawu tawun lě ǎ, ɖó sɛ́n e Mawu na ɛ é ɔ, “wɛnsagun Mawu tɔn lɛ wɛ hɛn sɛ́n ɔ wá.” (Galatinu lɛ 3:19; Mɛsɛ́dó 7:53) É ɖò mɔ̌ có, nǔɖiɖi e Mɔyizi ɖó nú Mawu é syɛn sɔmɔ̌ bɔ Biblu tinmɛ ɖɔ é cí ɖɔ é “ɖò éyɛ Mawu e è ma nɔ mɔ ǎ é mɔ wɛ” ɖɔhun.—Eblée lɛ 11:27.
Ðò ali ɖokpo e nu Mawu ɖɔ xó nú Mɔyizi ɖè é ɔ, é lɛ́ ɖɔ xó xá Ablaxamu lɔmɔ̌ gbɔn wɛnsagun lɛ jí. Nǔgbo wɛ ɖɔ nú è ma xwè sɔ bo xà Biblu ɔ ǎ ɔ, é sixu cí nú mɛ ɖɔ Ablaxamu mɔ Mawu tlɔlɔ lě wɛ ɖɔhun. (Bǐbɛ̌mɛ 18:1, 33) É ɖò mɔ̌ có, nǔ ɖěɖee lɛlɛ̌ dó wemafɔ ɔ lɛ é xlɛ́ ɖɔ “sunnu atɔn” e wá Ablaxamu gɔ́n lɛ é ɔ, wɛnsagun e Mawu sɛ́dó lɛ é wɛ ye nyí nǔgbo. Ablaxamu yí ye ɖi afɔsɔ́ɖótetɔ́ Mawu tɔn lɛ bo ɖɔ xó nú ye cí nǔ ɖɔ Jehovah ɖesu ɖɔ xó na wɛ é ɖè tlɔlɔ ɖɔhun.—Bǐbɛ̌mɛ 18:2, 3, 22, 32; 19:1.
Nǔmimɔ lɛ.
Mawu lɛvɔ́ tɔ́n dó gbɛtɔ́ lɛ jí gbɔn nǔmimɔ lɛ alǒ nǔɖe lɛ xíxlɛ́ ye gblamɛ. Ði kpɔ́ndéwú ɔ, hwenu e Biblu ɖɔ ɖɔ Mɔyizi kpo Izlayɛli-ví ɖevo lɛ kpo “mɔ Mawu Izlayɛli tɔn ɔ” é ɔ, “nǔmimɔ Mawu nǔgbo ɔ tɔn” wɛ ye mɔ nǔgbo. (Tíntɔ́n 24:9-11, nwt) Mɔ̌ ɖokpo ɔ, Biblu nɔ ɖɔ hweɖelɛnu ɖɔ gbeyiɖɔ lɛ “mɔ [Jehovah].” (Ezayíi 6:1; Daniyɛli 7:9; Amɔsi 9:1) Ðò ninɔmɛ ɖokpo dokpo mɛ ɔ, nǔ ɖěɖee lɛlɛ̌ dó wemafɔ ɔ lɛ é nɔ xlɛ́ ɖɔ nǔmimɔ Mawu tɔn ɖé wɛ ye mɔ, é kún nyí Mawu ɖesu ó.—Ezayíi 1:1; Daniyɛli 7:2; Amɔsi 1:1.