Étɛ́ ka nyí Hǎgbɛ́ alixlɛ́mɛtɔ́ Kúnnuɖetɔ́ Jexóva tɔn lɛ́ tɔn?

Kplékplé kpɛví klisánwun e zin bo nɔ xlɛ́ ali Kúnnuɖetɔ́ Jexóva tɔn lɛ́ gbɔn gbɛ ɔ bǐ mɛ é tɔn ɖé wɛ nyí Hǎgbɛ́ alixlɛ́mɛtɔ́ ɔ. Azɔ̌ yětɔn ɖo donu we jí:

• Yě nɔ kpé nukún dó nǔsísɔ́ nú nǔkplɔ́nmɛ jínjɔ́n Biblu jí lɛ́ wú, gbɔn wěma lɛ́, kplé lɛ́ kpó wěmaxɔmɛ Kúnnuɖetɔ́ Jexóva tɔn lɛ́ tɔn kpó gblamɛ.—Luki 12:42.

• Yě nɔ kpé nukún dó azɔ̌ e Kúnnuɖetɔ́ Jexóva tɔn lɛ́ nɔ wa gbɔn gbɛ ɔ bǐ mɛ é wú, gbɔn wě ɖiɖe xá mɛ dó wɛnɖagbejíjlázɔ́ ɔ wú kpó nukún kpíkpé dó lěe è ná zán nǔníná lɛ́ gbɔn é wú kpó gblamɛ.

Hǎgbɛ́ alixlɛ́mɛtɔ́ ɔ nɔ xwedó kpɔ́ndéwú “mɛsɛ́dó lɛ́ kpó mɛxó agun tɔn lɛ́ kpó [e] ɖo Jeluzalɛ́mu,” ɖo xwe kanweko nukɔntɔn ɔ mɛ, bo nɔ wá gbeta tají lɛ́ kɔn dó agun klisánwun tɔn ɔ bǐ tamɛ lɛ́ é tɔn. (Mɛsɛ́dó 15:2) Súnnu gbejínɔtɔ́ énɛ́ lɛ́ ɖɔhun ɔ, mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é nyí gǎn nú tutoblónúnǔ mǐtɔn ǎ. Yě nɔ ba wěɖexámɛ Biblu tɔn lɛ́, bo nɔ tuun ɖɔ Jezu Klísu wɛ Jexóva sɔ́ b’ɛ nyí Ta nú agun ɔ.—1 Kɔlɛ́ntinu lɛ́ 11:3; Efɛ́zinu lɛ́ 5:23.

Mɛ̌ mɛ̌ e ka ɖo Hǎgbɛ́ alixlɛ́mɛtɔ́ ɔ mɛ?

Mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é wɛ nyí Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, kpó Jeffrey Winder kpó. Yě nɔ wa sinsɛnzɔ́ ɖo hɔ̌nkan gbɛ ɔ tɔn mǐtɔn ɖo Warwick, New York, États-Unis.

Nɛ̌ è ka bló tuto nú Hǎgbɛ́ alixlɛ́mɛtɔ́ ɔ gbɔn?

Hǎgbɛ́ alixlɛ́mɛtɔ́ ɔ ɖó wěɖegbɛ́ ayizɛ́n ayǐ bo ná dó kpé nukún dó azɔ̌ mǐtɔn sín akpáxwé vovo lɛ́ wú, bɔ mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é ɖokpó ɖokpó nɔ w’azɔ̌ ɖo wěɖegbɛ́ énɛ́ lɛ́ ɖokpó alǒ hú mɔ̌ mɛ.

• Wěɖegbɛ́ titoblónúnǔtɔ́ lɛ́ tɔn: É nɔ kpé nukún dó hwɛɖiɖɔxó lɛ́ wú, bo nɔ lɛ́ d’alɔ hwenu e adla lɛ́ j’ayǐ é, hwenu e è ɖo ya dó nú nǔɖitɔ́ hǎtɔ́ mǐtɔn lɛ́ wɛ ɖó nǔ e mǐ ɖi nǔ ná lɛ́ é wú é, kpó hwenu e ajijimɛ sín nǔ ɖěvo lɛ́ kan Kúnnuɖetɔ́ Jexóva tɔn lɛ́ é kpó.

• Wěɖegbɛ́ nukúnkpémɛwú tɔn: É nɔ kpé nukún dó tuto ɖěɖěe kunkplá mɛ e ɖo xwédo Betɛ́li tɔn mɛ lɛ́ é lɛ́ é wú.

• Wěɖegbɛ́ wěmazínzín tɔn: É nɔ kpé nukún dó wěma júnjɔ́n Biblu jí lɛ́ zínzín kpó yě bíbɛ́ sɛ́dó kpó wú. É nɔ lɛ́ kpé nukún dó kpléxɔ lɛ́, azɔ̌xɔsá nǔtínmɛdógbeɖévomɛ tɔn lɛ́, kpó alaxɔ lɛ́ kpó gbígbá wú.

• Wěɖegbɛ́ sinsɛnzɔ́ tɔn: É nɔ kpé nukún dó “wɛn ɖagbe Axɔ́súɖuto ɔ tɔn” jlájlá sín azɔ̌ wú.”—Matíe 24:14.

• Wěɖegbɛ́ mɛkplɔ́nkplɔ́n tɔn: É nɔ kpé nukún dó nǔkplɔ́nmɛ ɖěɖěe è nɔ xwlé mɛ, gbɔn kplé lɛ́, wěmaxɔmɛ lɛ́, kpó tuto xóyídókanjí kpó video kpó tɔn lɛ́ kpó gblamɛ lɛ́ é wú.

• Wěɖegbɛ́ nǔwlánwlán tɔn: É nɔ sɔ́ nǔ nú nǔɖuɖu gbigbɔ tɔn ɔ dó wěma lɛ́ mɛ, bo nɔ lɛ́ sɔ́ nǔ ná dó tɛn Ɛntɛnɛ́ti tɔn mǐtɔn jí, lobo nɔ lɛ́ kpé nukún dó nǔtínmɛdógbeɖévomɛzɔ́ ɔ wú.

Gɔ́ nú azɔ̌ e Hǎgbɛ́ alixlɛ́mɛtɔ́ ɔ nɔ wa gbɔn wěɖegbɛ́ énɛ́ lɛ́ jí é ɔ, é nɔ kplé ɖo aklúnɔzángbla ɖokpó ɖokpó mɛ, bo nɔ gbéjé hudó tutoblónúnǔ ɔ tɔn lɛ́ kpɔ́n. Ðo kplé énɛ́ lɛ́ sín tɛnmɛ ɔ, mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é nɔ ɖɔ xó ɖó kpɔ́ dó nǔ e Nǔwlánwlán mímɛ́ lɛ́ ɖɔ lɛ́ é jí, bo nɔ jó yěɖée dó bɔ gbigbɔ mímɛ́ Mawu tɔn nɔ xlɛ́ ali yě, lobo nɔ ɖó gbe kpɔ́ dó wá gbeta lɛ́ kɔn.—Mɛsɛ́dó 15:25.

Mɛ̌ mɛ̌ e ka nyí alɔgɔ́tɔ́ Hǎgbɛ́ alixlɛ́mɛtɔ́ ɔ tɔn lɛ́?

Klisánwun ɖejidéwú ɖěɖěe nɔ d’alɔ wěɖegbɛ́ Hǎgbɛ́ alixlɛ́mɛtɔ́ ɔ tɔn lɛ́ é wɛ. (1 Kɔlɛ́ntinu lɛ́ 4:2) Yě ɖó nǔwúkpíkpé bo lɛ́ mɔ nǔ kpɔ́n ɖo azɔ̌ e wú wěɖegbɛ́ e mɛ yě ɖe é nɔ kpé nukún dó lɛ́ é mɛ, lobo nɔ yi kplé e wěɖegbɛ́ ɔ nɔ bló aklúnɔzángbla ɖokpó ɖokpó mɛ é tɛnmɛ. Alɔgɔ́tɔ́ lɛ́ nɔ ɖ’alɔ ɖo gbeta lɛ́ kɔn wíwá mɛ ǎ có, wěɖexámɛ kpó mɔjɛmɛ kpó e xɔ akwɛ́ lɛ́ é nɔ gosín gɔ̌n yětɔn, bɔ yě nɔ bló bɔ è nɔ wa nǔ sɔgbe xá gbeta ɖěɖěe kɔn wěɖegbɛ́ ɔ wá lɛ́ é, lobo nɔ gbéjé nǔ e ná wɛ gbeta énɛ́ lɛ́ ɖe é kpɔ́n hwɛhwɛ. Hǎgbɛ́ alixlɛ́mɛtɔ́ ɔ sixú lɛ́ ɖe yě bɔ yě ná yi ba kplékplé nɔví lɛ́ tɔn mǐtɔn kpɔ́n ɖo akpáxwé gbɛ ɔ tɔn vovo lɛ́, alǒ bo ná xwlé xóɖiɖɔ lɛ́ mɛ ɖo nǔwiwa bǔnɔ lɛ́ hwenu, ɖi kplé xwewú xwewú tɔn lɛ́ alǒ kúnnuɖewéma Galádi tɔn yíyí hwenu.