Etɛ Biblu ka Ðɔ Dó Ahan Syɛnsyɛn Wu? Nunu Tɔn Nyla Wɛ À?
Xósin e Biblu na é
Ahan syɛnsyɛn nunu ɖó jlɛ̌ jí nyí hwɛhuhu ǎ. Biblu tinmɛ ɖɔ vɛ̌ɛn nyí nùnina Mawu tɔn ɖé, bo sixu zɔ́n bɔ è ɖu gbɛ̀ vivǐ. (Ðɛhan 104:14, 15; Nùnywɛtɔ́xó 3:13; 9:7) Biblu lɛ́vɔ xlɛ́ ɖɔ vɛ̌ɛn nɔ gbɔ azɔn.—1 Timɔtée 5:23.
Jezu nu vɛ̌ɛn hwenu e é nɔ ayikúngban jí é. (Matie 26:29; Luki 7:34) Ðò nùjiwǔ ɖěɖee Jezu bló bɔ è tuùn ganji lɛ é ɖokpo hwenu ɔ, é sɔ́ sìn dó huzu vɛ̌ɛn na, b’ɛ nyí nùnina ɖé b’ɛ na ɖò alɔwliwli sín jonɔyiyi ɖé tɛnmɛ.—Jaan 2:1-10.
Awovinú e ɖò ahan nu dingan mɛ lɛ é
Biblu ɖɔ ɖagbe ɖěɖee vɛ̌ɛn nɔ wà lɛ é có, é gbɛ́ ahan nu dingan kpo ahannumu kpo. Enɛ wu ɔ, enyi Klisanwun ɖé wá gbeta ɔ kɔn bo na nu ahan syɛnsyɛn ɔ, é ɖó na nu ɖó jlɛ̌ jí. (1 Timɔtée 3:8; Titu 2:2, 3) Biblu na hwɛjijɔ e wu è ɖó na nyì alɔ nú ahan nu dingan lɛ é gègě.
É nɔ hɛn nǔ gblé dó nǔwukpikpé tamɛ linlin tɔn mɛtɔn wu. (Nùnywɛxó 23:29-35) Mɛ e jí ahan ɖè é ɖé sixu xwedó gbeɖiɖe Biblu tɔn e ɖɔ “mi sɔ́ agbaza mitɔn dó savɔ̌ e ɖò gbɛ̀, mɛ́, bɔ Mawu yí gbè na é, é wɛ nyí sinsɛnzɔ́ mímɛ́ ɖé wiwa kpo hlɔnhlɔn nǔlinkpɔ́n tɔn mitɔn kpo” é ǎ.—Hlɔmanu lɛ 12:1, nwt.
Ahan nu dingan nɔ zɔ́n bɔ è sɔ́ nɔ ɖu ɖò mɛɖée jí ǎ, bɔ nǔ e sɔgbe é wiwa sín akpàkpà sɔ́ nɔ sɔ́ mɛ ǎ.—Ozée 4:11; Efɛzinu lɛ 5:18.
É sixu dɔn mɛ dó ya mɛ, bo lɛ́ dó azɔn syɛnsyɛn mɛ.—Nùnywɛxó 23:21, 31, 32.
Mawu gbɛ́ wǎn nú ahan nu dingan kpo ahannumu kpo.—Nùnywɛxó 23:20; Galatinu lɛ 5:19-21.
Dogbó tɛ lɛ wu è ma ka ɖó na zɛ ǎ?
Enyi mɛɖé nu ahan bɔ gbɛ̀ éyɛtɔn alǒ mɛ ɖevo lɛ tɔn jɛ axɔ́ nu hǔn, é ko nu ahan dín nɛ. Sɔgbe kpo Biblu kpo ɔ, hwenu e è nu ahan bo ba mɛɖée kpò é jɛn è nu ahan mú ǎ, loɔ, enyi è nu ahan bo jɛ sa fún jí, jɛ afɔ nyì dǎ mɛ jí, jɛ jlɛ ɖɔ jí, alǒ jɛ xógbló ɖɔ jí hǔn, è ko nu ahan mú nɛ. (Jɔbu 12:25; Ðɛhan 107:27; Nùnywɛxó 23:29, 30, 33) Mɛ ɖěɖee tlɛ nyì alɔ nú ahannumu lɛ é sixu wá ‘nu ahan dingan,’ b’ɛ na jì nǔ nyanya lɛ nú ye.—Luki 21:34, 35.
Alɔ Nyinyi Na Bǐ Mlɛ́mlɛ́
Biblu lɛ́vɔ ɖɔ hwe ɖěɖee nu Klisanwun lɛ ɖó na nyì alɔ nú ahan syɛnsyɛn nunu bǐ mlɛ́mlɛ́ lɛ é:
Hwenu e mɔ̌ biblo na nyí afɔklɛ́nnú nú mɛ ɖevo lɛ é.—Hlɔmanu lɛ 14:21.
Hwenu e sɛ́n fí e è ɖè é tɔn gbɛ́ ahan syɛnsyɛn nunu é.—Hlɔmanu lɛ 13:1.
Hwenu e è ma sixu cɔ́ ahan nunu mɛtɔn bo nu ɖó jlɛ̌ jí ǎ é. Mɛ ɖěɖee ko jiya ahannumu kpo ahan syɛnsyɛn zinzan nyì dò alɔkpa ɖevo lɛ kpo tɔn lɛ é ɖó na ɖò gbesisɔmɛ bo ɖè afɔ syɛnsyɛn ɖé lɛ.—Matie 5:29, 30.