Mawu Ðò Fí Bǐ Wɛ À?
Xósin e Biblu na é
Mawu kpéwú bo na mɔ nǔ bǐ, bo lɛ́ wà nǔ ɖò fí ɖebǔ e é ba é. (Nǔnywɛxó 15:3; Eblée lɛ 4:13) Amɔ̌, Biblu kplɔ́n mɛ ɖɔ Mawu ɖò fí bǐ ɖò nǔ bǐ mɛ ǎ. É nyɔ́ wà ɔ, é xlɛ́ ɖɔ é nyí mɛ tawun ɖé, bo nɔ nɔ fí tawun ɖé.
Mɛ alɔkpa e Mawu nyí é: Mawu ɔ, gbigbɔ wɛ é nyí. (Jaan 4:24, nwt) Gbɛtɔ́ lɛ sixu mɔ ɛ ǎ. (Jaan 1:18) Hwɛhwɛ wɛ nǔmimɔ e kúnkplá Mawu, bɔ è wlan dó Biblu mɛ lɛ é nɔ xlɛ́ ɖɔ Mawu ɖó fí tawun ɖé lě bo nɔ nɔ. È ɖexlɛ́ gbeɖé ɖɔ é nɔ nɔ fí bǐ ǎ.—Ezayíi 6:1, 2; Nǔɖexlɛ́mɛ 4:2, 3, 8.
Fí e Mawu nɔ nɔ é: Mawu nɔ nɔ fí gbigbɔ tɔn e gbɔn vo nú fí e nǔɖiɖó e nukún nɔ mɔ lɛ é nɔ nɔ é ɖé. Ðò fí enɛ ɖò jixwé ɔ, Mawu ɖó “fí e [é] nɔ nɔ” é. (1 Axɔ́su lɛ 8:30) Biblu kɛnu dó ninɔmɛ ɖé wu, bɔ nǔɖiɖó gbigbɔ tɔn lɛ “wá Jehovaha nukɔn,” enɛ xlɛ́ ɖò ali ɖé nu ɖɔ Mawu ɖó fí tawun ɖé bo nɔ nɔ.—Jɔbu 1:6, nwt.
Enyi Mawu ma ɖò fí bǐ ǎ ɔ, é ka sixu kpé nukún dó nyɛ wu dóo à?
Ganji. Mawu nɔ kpé nukún dó mɛ ɖokpo ɖokpo wu tawun. Mawu nɔ nɔ fí gbigbɔ tɔn ɖé có, é nɔ ɖó ayi mɛ ɖěɖee ɖò ayikúngban jí, bo jló nǔgbo nǔgbo bo na hɛn xomɛ tɔn hun lɛ é wu, bo nɔ lɛ́ wà nǔ dó takún yetɔn mɛ. (1 Axɔ́su lɛ 8:39; 2 Tan 16:9) Kpɔ́n lee Jehovah nɔ xlɛ́ ɖɔ mɛsɛntɔ́ emitɔn nǔgbo lɛ sín nǔ nɔ ɖu ayi mɛ nú emi gbɔn é:
Hwenu e a xoɖɛ é: Jehovah sixu ɖótó we hwenu e a ɖò ɖɛ xò wɛ é.—2 Tan 18:31.
Hwenu e a ɖò linkpɔ́n syɛnsyɛn mɛ é: “Mawu Mavɔmavɔ ɖò kpɔ́ xá mɛ e ayi yetɔn gbadó lɛ, é nɔ hwlɛn mɛ e nǔ jɛ akɔ́n jí na lɛ.”—Ðɛhan 34:19.
Hwenu e a ɖó hudo alixlɛ́mɛ tɔn é: Jehovah “na na nukúnnúmɔjɛnǔmɛ we, [bo] na xlɛ́ ali e a ɖó na gbɔn ɔ we” gbɔn Xó tɔn Biblu ɔ gblamɛ.—Ðɛhan 32:8.
Nukúnnúmɔjɛnǔmɛ agɔ lɛ dó Mawu ɖò fí bǐ wu
Nukúnnúmɔjɛnǔmɛ agɔ: Mawu ɖò fí bǐ ɖò nǔɖiɖó tɔn lɛ mɛ.
Nǔgbo: Mawu nɔ nɔ ayikúngban jí ǎ, é ka nɔ lɛ́ nɔ fí e nukún nɔ mɔ é ɖebǔ ǎ. (1 Axɔ́su lɛ 8:27) Nǔgbo wɛ ɖɔ sunví lɛ kpo nǔɖiɖó ɖevo lɛ kpo ɖò “Mawu sɔ́ sù wɛ.” (Ðɛhan 19:2) Amɔ̌, Mawu nɔ nɔ nǔɖiɖó tɔn lɛ ɖě mɛ ǎ, lee alɔlyɛnzɔ́watɔ́ ɖé ma nɔ nɔ nǔ e é bló é mɛ ǎ é ɖɔhun. É ɖò mɔ̌ có, nǔ e alɔlyɛnzɔ́watɔ́ ɖé bló é sixu kplɔ́n nǔɖe mǐ dó mɛ e bló é wu. Mɔ̌ ɖokpo ɔ, nǔɖiɖó e nukún nɔ mɔ lɛ é nɔ kplɔ́n nǔɖe mǐ dó “nǔ e [Gbɛɖotɔ́ ɔ] nyí bɔ è ma nɔ mɔ ǎ” é wu ɖi hlɔnhlɔn tɔn, nǔnywɛ tɔn kpo wanyiyi tɔn kpo.—Hlɔmanu lɛ 1:20.
Nukúnnúmɔjɛnǔmɛ agɔ: Mawu ɖó na ɖò fí bǐ, bo na dó tuùn nǔ bǐ, lobo na nyí Nǔbǐwukpétɔ́ ɔ.
Nǔgbo: Gbigbɔ mímɛ́ Mawu tɔn wɛ nyí hlɔnhlɔn e Mawu nɔ sɔ́ dó wà nǔ na é. Mawu sixu zán gbigbɔ mímɛ́ tɔn bo mɔ nǔ bǐ, wà nǔ bǐ, ɖò fí ɖebǔ, hweɖebǔnu; é byɔ ɖɔ é ni ɖò finɛ cɔɔ lě ǎ.—Ðɛhan 139:7.
Nukúnnúmɔjɛnǔmɛ agɔ: Ðɛhan 139:8 ɖɔ xó elɔ lɛ, bo xlɛ́ ɖɔ Mawu ɖò fí bǐ: “Un yì jixwé ɔ, a ɖò dɔ̌n. Un yì kútomɛ ɔ, a ɖò dɔ̌n.”
Nǔgbo: Fí e Mawu nɔ nɔ é xó ɖɔ wɛ wemafɔ enɛ ɖè ǎ. Xó lómílómí ɖé wɛ, bo ɖò xíxlɛ́ wɛ ɖɔ fí ɖebǔ kún lín dó Mawu dín, bonu é na gɔn nǔ wà dó ta mǐtɔn mɛ ó.
a Mawu sín nyikɔ wɛ nɔ nyí Jehovah ɖò Biblu mɛ.